کورونا وائرس: دنیا میں اب تک کیا ہوا؟

لائیو کوریج

1. 17 مار چ 2020یورپ میں غیرضروری سفر پر پابندی کا منصوبہ

   کورونا وائرس کے پھیلاؤ کو روکنے کے لیے جہاں دنیا بھر میں ملک اپنی سرحدوں پر آمدورفت محدود یا بند کر رہے ہیں وہیں یورپی کمیشن نے بھی یورپ کے ویزا فری ٹریول زون میں تمام غیر ضروری نقل و حرکت پر پابندیاں عائد کرنے کا منصوبہ بنایا ہے۔

   یورپی کمیشن کی صدر ارسلا ون ڈی لین نے کہا ہے کہ وہ یورپی رہنماؤں سے کہیں گی کہ وہ منگل سے سفری پابندیاں لگا دیں۔ ان کا یہ بھی کہنا تھا کہ ’کم سفر ہی ہمیں وائرس کا پھیلاؤ روکنے میں مدد دے سکتا ہے۔‘

   اس سے قبل پیر کو فرانسیسی صدر ایمینوئل میکخواں نے کہا تھا کہ یورپ کی بیرونی سرحدوں کو مسافروں کے لیے بند کر دیا جائے گا۔ ان کا کہنا تھا کہ غیر یورپی اور یورپی ممالک کے درمیان تمام سفر معطل کر دیا جائے گا۔

   ارسلا ون ڈی لین کے مطابق یورپ میں بین الممالک سفری پابندیوں کا اطلاق، یورپی شہریوں کے اہلخانہ، سفارتکاروں، طبی کارکنوں اور ایک ملک سے دوسرے ملک میں اشیا کی نقل و حمل کرنے والوں پر نہیں ہو گا۔

   یہ پابندی کم از کم ایک ماہ کے لیے لگائی جائے گی۔ خیال رہے کہ شینگن معاہدے کے تحت یورپی یونین کے رکن ممالک میں لوگ کسی بھی چیکنگ کے بغیر ایک ملک سے دوسرے ملک میں جا سکتے ہیں۔.

2. 17 مار چ 2020کورونا وائرس آپ کے جسم کے ساتھ کرتا کیا ہے؟

   کوویڈ-19 کا شکار ہونے والے زیادہ تر افراد پر اس بیماری کا اتنا اثر نہیں ہوتا اور وہ صحت یاب بھی ہو رہے ہیں، تاہم کچھ افراد اس کی وجہ سے ہلاک بھی ہو چکے ہیں۔ تو سوال یہ ہے کہ یہ وائرس جسم پر کیسے اثر انداز ہوتا ہے، اس کے نتیجے میں کچھ افراد ہلاک کیوں ہو رہے ہیں اور اس بیماری کا علاج کیسے کیا جاتا ہے؟

3. 17 مار چ 2020انڈیا میں کورونا سے تیسری ہلاکت

   انڈیا میں کورونا وائرس سے ہلاک ہونے والے افراد کی تعداد تین ہو گئی ہے۔

   تازہ ترین ہلاکت ریاست مہاراشٹر میں ہوئی جہاں ایک 64 سالہ مریض کی موت ہوئی ہے۔ انڈیا میں مہاراشٹر ہی وہ ریاست ہے جہاں کورونا کے سب سے زیادہ 39 مریض سامنے آئے ہیں لیکن یہ ریاست میں اس وائرس سے پہلی ہلاکت ہے۔

   انڈین حکام کے مطابق اب تک ملک میں 125 افراد میں کورونا کی تصدیق ہو چکی ہے جبکہ اس تازہ ہلاکت سے قبل ریاست کرناٹک میں ایک 76 سالہ شخص جبکہ دہلی میں ایک 68 سالہ خاتون اس وائرس سے ہلاک ہوئی تھیں۔

4. 17 مار چ 2020کورونا وائرس: دنیا میں کیا ہو رہا ہے؟

   جانز ہاپکنز یونیورسٹی کے کورونا ریسورس سنٹر کے اعدادوشمار کے مطابق اس وقت دنیا میں کورونا وائرس سے متاثر ہونے والے 182406 مریضوں کی تصدیق ہو چکی ہے۔

   ان میں سے 7154 افراد ہلاک ہوئے ہیں اور تقریباً 80000 افراد صحتیاب ہو چکے ہیں۔

   متاثرین کی تعداد

   • چین: 81050 مریض، 3230 اموات اور 68770 صحتیاب
   • اٹلی: 27980 مریض، 2158 اموات اور 2749 صحتیاب
   • ایران: 14991، 853 اموات اور 4996 صحتیاب
   • سپین: 9942 مریض، 342 اموات اور 530 صحتیاب
   • جنوبی کوریا: 8320 مریض، 75 اموات اور 1137 صحتیاب
   • جرمنی: 7272 مریض، 17 اموات اور 67 صحتیاب
   • فرانس: 6650 مریض، 6650 اموات اور 12 صحتیاب
   • امریکہ: 4661 مریض، 85 اموات اور 17 صحتیاب
   • سوٹزرلینڈ: 2330 مریض، 19 اموات اور 4 صحتیاب
   • برطانیہ: 1553 مریض، 56 اموات اور 53 صحتیاب

   جنوب مشرقی ایشیا کے ممالک میں کورونا وائرس کے مریضوں کی تعداد میں اچانک اضافہ دیکھنے میں آیا ہے۔ پیر کو ملیشیا میں 190 نئے مریض سامنے آئے جبکہ تھائی لینڈ میں تعطیل کے دوران مریضوں کی تعداد بڑھ کر 147 تک پہنچ گئی ہے۔

   انڈیا میں تاج محل جیسے عوامی مقامات کو 31 مارچ تک بند کر دیا گیا ہے۔

   دنیا کے کئی ممالک میں کورونا وائرس کے خوف کی وجہ سے ذخیرہ اندوزی کا عمل شروع ہو گیا ہے اور دکانوں اور مارکیٹوں میں اشیا ضرورت کی کمی کی اطلاعات آ رہی ہیں۔

5. 17 مار چ 2020کورونا سے متعلق آرڈرز میں اضافہ، ایمازون میں نئی نوکریاں

   ایمازون کا کہنا ہے کہ امریکہ میں کورونا کی وبا کی وجہ سے اس کے کاروبار میں اضافہ ہوا ہے اور وہ ملک میں مزید ایک لاکھ ملازم رکھے گا جو کہ گوداموں میں اور ڈیلیوری کا کام کریں گے۔

   آن لائن ریٹیلر کے مطابق وہ امریکہ کے علاوہ برطانیہ اور یورپ میں بھی اپنے عملے کی تنخواہ بڑھائے گا۔

   ایمازون کی مقبولیت کی بڑی وجہ عوام کی کوورونا کے پھیلاؤ کے ڈر سے آن لائن شاپنگ کو ترجیح دینا بتائی جا رہی ہے۔

6. 17 مار چ 2020جنوب مشرقی ایشیا میں کورونا کے پھیلاؤ میں تیزی, جوناتھن ہیڈ، بی بی سی

   جنوب مشرقی ایشیا کے کئی ممالک میں کورونا کے مریضوں کی تعداد میں تیزی سے اضافے سے یہ امید دم توڑتی دکھائی دے رہی ہے کہ یہ وائرس گرم موسم میں ختم ہو سکتا ہے۔

   ملائیشیا میں پیر کو 190 نئے مریض سامنے آئے جو ایک دن میں مریضوں کی سب سے بڑی تعداد ہے اور اب وہاں کل مریضوں کی تعداد 428 ہو گئی ہے۔

   ملائیشین حکومت نے خطے میں سخت لاک ڈاؤن کا اعلان کیا ہے اور شہریوں کو بیرونِ ملک سفر کرنے یا غیرملکیوں کو ملک میں داخل ہونے کی اجازت نہیں۔ اس کے علاوہ ملک بھر میں تعلیمی ادارے، عبادت گاہیں اور کاروباری مراکز کو دو ہفتے کے لیے بند کیا گیا ہے۔

   تھائی لینڈ میں بھی مریضوں کی تعداد میں اضافہ دیکھا گیا ہے اور اب یہ 147 ہو چکی ہے۔ ملائیشیا اور تھائی لینڈ میں مریضوں کی تعداد میں اضافے کی وجہ عوامی اجتماعات کو قرار دیا جا رہا ہے۔

7. 17 مار چ 2020انڈیا: اتنے بڑے ملک میں کورونا وائرس کے مریض اتنے کم کیسے؟, زبیر احمد، دلی نامہ نگار

   دنیا کی دوسری سب سے بڑی آبادی والے ملک انڈیا میں کورونا وائرس کے کیسز کی یا تو تعداد کم بتائی جا رہی ہے یا ٹیسٹ کم کیے جا رہے ہیں۔

   اگر آپ میں بخار اور زکام جیسی علامات ہیں اور آپ دلی کے کسی سرکاری ہسپتال میں جا کر کورونا وائرس کا ٹیسٹ کروانا چاہتے ہیں تو آپ کو واپس بھیج دیا جائے گا۔

   دہلی حکومت کے سیکریٹری برائے صحت کے اسسٹنٹ ڈائریکٹر ڈاکٹر ریتو کا کہنا ہے کہ کورونا وائرس کے لیے پہلے ہیلپ لائن پر کال کرنی ہوگی۔

   ڈاکٹر ریتو کا کہنا ہے کہ 'اگر آپ کو کورونا وائرس کا شبہ ہے توپہلے ہسپتال جانے کی بجائے ہیلپ لائن پر کال کریں۔ آپ سے سوالات پوچھے جائیں گے اور اگر ضرورت پڑی تو آپ کو ہسپتال جا کر ٹیسٹ کروانے کا کہا جائے گا۔‘

   انڈین کونسل آف میڈیکل ریسرچ (آئی سی ایم آر) کے رہنما اصولوں کے مطابق 'یہ مرض بنیادی طور پر متاثرہ ممالک سے سفر کرنے والے افراد یا جنھیں یہ مرض ہوا ہے اس کے قریبی رابطے میں آنے سے ہوتا ہے۔ لہذا تمام افراد کی جانچ نہیں ہونی چاہیے۔'

   دہلی کے مہارانی باغ سے تعلق رکھنے والی ایک خاتون سواتی کچھ دن قبل بخار اور کھانسی میں مبتلا ہونے کے بعد رام منوہر لوہیا ہسپتال گئی تھیں تاکہ کرونا وائرس کا ٹیسٹ کرایا جاسکے۔

   وہ ایک غریب گھرانے سے تعلق رکھتی ہیں اور حال ہی میں بہار سے واپس آئی ہیں۔ ان کا ٹیسٹ نہیں کیا گیا۔

   ہسپتال نے انھیں یہ کہتے ہوئے واپس بھیج دیا کہ انھوں نے بیرون ملک سفر نہیں کیا تھا اور بخار اور کھانسی کی وجہ سے کورونا وائرس کی ضرورت نہیں ہے۔

   صحت کے ماہرین کورونا وائرس کی جانچ کے اس حکومتی نظام پر تشویش کا اظہار کرتے ہیں۔ ان کے مطابق ایک ارب سے زیادہ آبادی والے ملک میں ٹیسٹ بہت کم ہو رہے ہیں۔

   ایشیا اور اوشیانا میں میڈیکل ایسوسی ایشن کی تنظیم (سی ایم اے اے او) کے صدر ڈاکٹر کے کے اگروال اس سرکاری طریقہ کار سے متفق نہیں ہیں۔

   ان کا کہنا ہے کہ 'یہ طریقہ محدود کرنے والا ہے۔ جنوبی کوریا، ہانگ کانگ اور سنگاپور میں لبرل (لبرل) طریقہ اپنایا گیا ہے جہاں سرکاری اور نجی ہسپتالوں میں کورونا وائرس کی علامت والے ہر مریض کا فوری طور پر ٹیسٹ کیا جاتا ہے۔'

   ڈاکٹر اگروال کی تنظیم میں جنوبی کوریا بھی شامل ہے جہاں وہ ڈاکٹروں سے مستقل رابطے میں رہتے ہیں۔ وہ چاہتے ہیں کہ جنوبی کوریا کا ماڈل انڈیا میں بھی اپنایا جائے۔

   تو کیا یہ ممکن ہے کہ انڈیا میں کورونا وائرس کی رپورٹ کم کر کے پیش کی جا رہی ہیں؟

   ڈاکٹر اگروال کہتے ہیں: 'میں یہ نہیں کہوں گا۔ کم کر کے بتانے کا مطلب یہ ہے کہ اگر تعداد 100 ہے تو آپ 60 بتا رہے ہیں۔ یہاں تو ٹیسٹ ہی کم کیے جارہے ہیں جس کی وجہ سے کم معاملے سامنے آ رہے ہیں۔'

8. 17 مار چ 2020ووہان قرنطینہ 2.0

   چین کے شہر ووہان میں جہاں سے کورونا وائرس کی وبا شروع ہوئی تھی، اب ہر اس شخص کو 14 دن کے لیے قرنطینہ میں رکھا جائے گا جو بیرونِ ملک سے واپس آیا ہو اور اس عمل کے اخراجات بھی اسی شخص کو ادا کرنے ہوں گے۔

   اس پابندی کا نفاذ منگل سے ہوا ہے۔

   جب چین میں یہ وبا اپنے عروج پر تھی تو ووہان لاک ڈاؤن کیا جانے والا پہلا شہر بنا تھا اور اس کے لاکھوں شہریوں کو ان کے گھروں میں بند کر دیا گیا تھا۔

   چین میں اب کورونا کے نئے مریضوں کی تعداد میں کمی دیکھی جا رہی ہے اور حکام کو خطرہ ہے کہ باہر سے آنے والے افراد اپنے ساتھ دوبارہ یہ وائرس لا سکتے ہیں۔

9. 17 مار چ 2020آگرہ کے تاریخی تاج محل کو بند کر دیا گیا

   انڈیا کے شہر آگرہ میں کورونا وائرس کے پھیلاؤ کو روکنے کے لیے حکام نے تاریخی تاج محل کو بند کرنے کا فیصلہ کیا ہے۔

   تاج محل سیاحوں کے لیے پُرکشش ترین مقام کے حیثیت رکھتا ہے جہاں یومیہ ہزاروں سیاح آتے ہیں۔

   انڈیا کے وزیر سیاحت پرالادھ پٹیل کا کہنا ہے کہ تمام تاریخی اور یادگاری مقامات کو 31 مارچ تک بند رکھا جائے گا۔ جس کے بعد اس بندش میں توسیع کرنے یا نہ کرنے کا جائزہ لیا جائے گا۔

   انڈیا میں اب تک کورونا وائرس کی تشخیص کے لیے 6000 ٹیسٹ کیے گئے جن میں سے 114 افراد میں اس وائرس کی تصدیق جبکہ دو افراد کی ہلاکت ہوئی ہے۔

10. 17 مار چ 2020انڈیا: 31 مارچ تک سکول، عوامی مقامات بند

    انڈیا میں پیر کی شام ہونے والی اعلی سطحی میٹنگ میں کورونا وائرس سے نمٹنے کے لیے 31 مارچ تک کے لیے کئی عارضی اقدامات تجویز کیے گئے ہیں۔

    • میٹنگ میں فیصلہ ہوا کہ کہ 31 مارچ تک تمام تعلیمی ادارے، میوزیم، کلچر اور سماجی مراکز، سوئمنگ پول، تھیئٹر وغیرہ بند رہیں گے۔
    • طلبہ کو گھر کے اندر رہنے کی ہدایت کی گئی ہے جبکہ آن لائن تعلیم کے فروغ کی بات بھی کی کئی ہے۔
    • عوام کو غیر ضروری سفر سے اجتناب کرنے کے لیے کہا گیا اور بسوں اور ٹرینوں کو سینیٹائز کرنے کی بات بھی کہی گئی ہے۔
    • پرائیوٹ سیکٹر میں ملازموں کو گھر سے کام کرنے کی اجازت فراہم کرنے کی حوصلہ افزائی کی بات بھی کی گئی ہے۔
    • میٹنگز سے جہاں تک ممکن ہو اجتناب برتا جائے اور ویڈیو کانفرنس کے ذریعے میٹنگ کی جائے۔
    • ریستورانوں سے کہا گیا ہے کہ وہ اپنے یہاں اچھی طرح سے ہاتھ دھونے کا انتظام کرے اور ٹیبل کے درمیان ایک میٹر کی دوری برقرار رکے۔
    • سفر پر مزید سختی نافذ کی جا رہی تاکہ کورونا وائرس کے پھیلاؤ کو روکا جا سکے۔ اب تک انڈیا میں کورونا وائرس کے 114 مصدقہ معاملات سامنے آئے ہیں۔

    یہ میٹنگ دہلی کے نرمان بھون میں صحت اور خاندانی بہبود کے وزیر ڈاکٹر ہرش وردھن کی قیادت میں منعقد ہوئی۔

11. 17 مار چ 2020’امریکی انتخابات کو ملتوی کرنا غیر ضروری ہے‘

    امریکی صدر ڈونلڈ ٹرمپ نے ملک میں انتخابات کو ملتوی کرنے کے بڑھتے ہوئے مطالبے کو رد کرتے ہوئے کہا ہے کہ ایسا کرنا غیر ضروری ہوگا۔

    منگل کے روز چار امریکی ریاستیں ڈیموکریٹک پارٹی کے صدارتی امیدوار کی نامزدگی کے لیے پرائمری انتخابات کا انعقاد کر رہی ہیں۔

    صدر ٹرمپ کا کہنا تھا کہ ’انتخابات کو ملتوی کرنا ایک اچھا عمل نہیں اور ان کی رائے میں امریکی انتظامیہ ایک محفوظ انداز میں انتخابات کروا لے گی۔

12. 17 مار چ 2020بریکنگ, غیر ملکی سیاحوں کو فلپائن چھوڑنے کے لیے 72 گھنٹے کی مہلت

    فلپائن حکومت نے کہا ہے کہ جو غیر ملکی سیاح ملک سے روانہ ہونا چاہتے ہیں ان کے پاس 72 گھنٹے ہیں جس کے بعد ملک کے مسطی علاقے لوزون کو قرنطینہ کر دیا جائے گا۔

13. 17 مار چ 2020بریکنگ, تین دہائیوں میں ڈاؤ جونز میں سب سے بڑی کمی

    امریکہ میں ڈاؤ جونز میں آج خرید و فروخت کے اختتام تک 12.9 فیصد کمی ریکارڈ کی گئی جو کہ 1987 کے بیلک منڈے کریش کے بعد سے سب سے زیادہ کمی ہے۔

    ادھر دوسری جانب صدر ٹرمپ نے کہا ہے کہ کورونا وائرس کی وبا امریکی میں اگست تک جاری رہ سکتی ہے اور ملک میں ایک مالیاتی بحران جلف آ سکتا ہے۔

14. 17 مار چ 2020بریکنگ, منگل کے روز سے فرانس بھر میں لاک ڈاؤن

    فرانسیسی صدر کا کہنا ہے کہ منگل سے ملک بھر میں مکمل لاک ڈاؤن ہوگا۔

    اس کے علاوہ فرانسیسی حکومت کے اقدامات کی تفصیلات مندرجہ ذیل ہیں:

    • شہریوں کی تمام غیر ضروری نقل و حرکت پر منگل کے روز سے مکمل پابندی ہے۔
    • جو لوگ اس قانون کی خلاف ورزی کریں گے، انھیں سزا دی جائے گی۔
    • دیگر یورپی ممالک کے ساتھ مشاورت سے ملکی سرحدیں بند کر دی جائیں گی۔
    • کسی بھی نجی کاروبار کو، چاہے وہ بڑا ہو یا چھوٹا، ناکام نہیں ہونے دیا جائے گا۔

15. 17 مار چ 2020’امریکہ میں کورونا وائرس کی وبا جولائی یا اگست تک جاری رہ سکتی ہے‘, صدر ٹرمپ

    امریکی صدر ٹرمپ نے ایک پریس کانفرنس میں کہا ہے کہ امریکہ میں کورونا وائرس کی وبا جولائی یا اگست تک جاری رہ سکتی ہے۔ امریکی حکومت نے لوگوں کو عوامی مقامات اور غیر ضروری سفر سے اجتناب کی ہدایت کی ہے۔ تاہم صدر ٹرمپ کا کہنا ہے کہ اس وقت ملک گیر قرنطینہ کا کوئی منصوبہ نہیں ہے۔

16. 17 مار چ 2020اداکار ادریس ایلبا میں کورونا وائرس کی تشخیص

17. 16 مار چ 2020برطانیہ میں کورونا وائرس سے ہلاکتوں کی تعداد 55 ہو گئی

    محکمہ صحت برطانیہ کے تازہ اعداوشمار کے مطابق ملک میں کورونا وائرس سے ہونے والی ہلاکتوں کی تعداد 55 ہو گئی ہے۔

    اعدادوشمار کے مطابق اب تک 44105 افراد کے ٹیسٹ کیے گئے ہیں جن میں سے 1543 میں کورونا وائرس کی تشخیص ہوئی ہے۔

    اس سے قبل آج شام برطانوی پارلیمان میں کورونا وائرس سے متعلق تفصیلات دیتے ہوئے سیکرٹری صحت میٹ ہین کوک نے بتایا تھا کہ اب تک کورونا وائرس سے انگلینڈ میں 53 افراد ہلاک ہو چکے ہیں۔

    انھوں نے ارکان پارلیمنٹ کو یہ بھی بتایا کہ ضروری خدمات کو یقینی بنانے کے لیے وہ کورونا وائرس ایمرجنسی بل بھی پیش کریں گے۔

18. 16 مار چ 2020کینیڈا نے غیر ملکیوں کے لیے اپنی سرحدیں بند کر دیں

    دیگر کئی ممالک کی طرح کینیڈا نے بھی غیر ملکیوں کے لیے اپنی سرحدیں بند کرنے کا اعلان کیا ہے تاہم اس پابندی کا اطلاق کینیڈا کے اپنے شہریوں اور مستقل رہائشیوں پر نہیں ہو گا۔

    پیر کے روز سفری پابندی کا اعلان کرتے ہوئے کینیڈا کے وزیراعظم جسٹن ٹروڈو نے کہا ’وقت آ گیا ہے کہ لوگوں کو محفوظ رکھنے کے لیے ہر احتیاط برتی جائے۔‘

    انھوں نے کینیڈین شہریوں کو مخاطب کرتے ہوئے کہا: ’مجھے واضح کرنے دیں کہ اگر آپ بیرون ملک ہیں تو اب گھر آنے کا وقت آ گیا ہے۔‘

    کینیڈین وزیراعظم نے کہا کہ امریکی شہریوں، ہوائی جہاز کے عملے اور سفارت کاروں کو کچھ استثنیٰ دیا جائے گا۔

    یاد رہے کہ گزشتہ ہفتے کینیڈین وزیراعظم کی اہلیہ میں کورونا وائرس کی تشخیص ہوئی تھی۔ وزیراعظم ٹروڈو میں اس کی کوئی علامات نہیں ملیں تاہم وہ 14 روز کے لیے خود ساختہ تنہائی میں رہیں گے۔

    اس وقت کینیڈا میں کورونا وائرس کے تصدیق شدہ کیسز کی کل تعداد 300 ہے۔

19. 16 مار چ 2020کورونا وائرس سے بچاؤ کے لیے پہلی بار انسانوں پر ویکسین کا تجربہ

    اطلاعات کے مطابق امریکہ میں کورونا وائرس سے بچاؤ کے لیے پیر کو پہلی بار انسانوں پر ایک ویکسین کا تجربہ کیا جا رہا ہے۔

    45 صحتمند رضاکاروں کے ایک گروپ کو امریکی شہر سیئٹل کے ایک تحقیقاتی مرکز میں ٹیکے لگائے جائیں گے۔

    ماہرین کے مطابق یہ پتا لگنے میں کہ یہ یا کوئی اور ویکسین کورونا وائرس سے بچا سکتی ہے یا نہیں، کئی مہینے لگ سکتے ہیں۔

    ہر رضاکار کو بازو میں 28 دن کے فرق سے دو دو ٹیکے لگائے جائیں گے۔ ماہرین کے مطابق اگر یہ تجربہ کامیاب بھی رہا تو اس کے ثمرات لوگوں تک پہنچنے میں 18 ماہ لگ سکتے ہیں۔

    دنیا بھر میں سائنسدان اس بیماری کا توڑ ڈھونڈنے کے لیے ہنگامی بنیادوں پر تحقیق کر رہے ہیں۔

    ماہرین کے مطابق عام طور پر وائرس مثلاً خسرہ، کے لیے ویکسین اس کے کمزور یا مرے ہوئے وائرس سے بنائی جاتی ہے۔ لیکن کووڈ 19 کے لیے ویکسین اس وائرس سے نہیں بنائی گئی جو اسے پھیلاتا ہے بلکہ یہ اس وائرس کے جینیاتی کوڈ کے ایک حصے پر مبنی ہے جو لیبارٹری میں تیار کیا گیا تھا۔

20. 16 مار چ 2020بریکنگ, کورونا وائرس: اٹلی میں مزید 349 افراد ہلاک

    اٹلی میں گزشتہ 24 گھنٹوں سے بھی کم وقت میں مزید 349 افراد کورونا وائرس سے ہلاک ہو گئے ہیں۔

    اٹلی کی جانب سے جاری اعدادوشمار کے مطابق اس وائرس سے اٹلی میں ہونے والی کل اموات کی تعداد 2100 سے بڑھ گئی ہے۔

    اٹلی میں اس وقت کورونا وائرس کے مریضوں کی کل تعداد 28 ہزار کے قریب ہے۔