آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
وزیر اعظم شہباز شریف نے سوات کے سیلاب زدہ علاقوں کے دورے کے دوران کہا کہ وفاقی حکومت نے سندھ کے لیے 15 ارب روپے گرانٹ، بلوچستان کے لیے 10 ارب روپے اور اب کے پی کے لیے بھی 10 ارب روپے گرانٹ کا اعلان کیا ہے۔ خیال رہے کہ پاکستان می سیلاب سے 1162 افراد کی ہلاکت کی تصدیق ہوچکی ہے۔
خیبر پختونخوا پولیس کے مطابق جی ٹی روڈ پر خیالی کے مقام پر پشاور کو چارسدہ سے ملانے والے دونوں پلوں پر پانی کے تیز بہاؤ کی وجہ سے شگاف پڑ گئے ہیں جس کے بعد دونوں اضلاع کے درمیان زمینی راستہ منقطع ہو گیا ہے۔
پشاور کو اسلام آباد سے ملانے والی جی ٹی روڈ کو سیلاب کی وجہ سے کامرہ کے نزدیک بھی بند کر دیا گیا ہے
خیبر پختونخوا میں حکام کے مطابق جمعے کی شب 11 بجے دریاٸے کابل میں پانی کا بہاٶ دو لاکھ کیوسک سے بڑھ گیا ہے اور آئند چند گھنٹوں میں انتہاٸی اونچے درجے کا سیلابی ریلا ضلع نوشہرہ میں داخل ہونے والا ہے۔
محکمۂ آبپاشی کا کہنا ہے کہ صوبے میں سات مقامات پر اونچے درجے کا سیلاب ہے۔
ان میں دریائے کابل میں نوشہرہ اور ورسک، دریائے پنچکوڑہ میں دیر، دریائے سوات میں خوازہ خیلہ، چکدرہ، خیالی اور منڈا ہیڈورکس کے مقام پرسیلابی پانی کی سطح بلند ہو رہی ہے۔
پی ڈی ایم اے خیبر پختونخوا کے ایک اہلکارکے مطابق ضلع چارسدہ کے قریب واقع منڈا ہیڈ ورکس کا ایک حصہ سیلابی پانی کی وجہ سے ٹوٹ گیا ہے اور اس وجہ سے چارسدہ ، نوشہرہ اور گرد و نواح کے علاقوں میں سیلاب کا خطرہ ہے۔
منڈا ہیڈ ورکس چارسدہ کے قریب واقع ہے اور دریائے سوات کا پانی کنٹرول کرنے کے لیے بنائے گئے اہم ترین ہیڈ ورکس میں سے ایک ہے۔
حکام نے لوگوں سے اپیل کی ہے کہ جانیں بچانے کی خاطر اپنے گھروں سے نکل جائیں اور حکومت کے مقرر کردہ کیمپوں میں پناہ لیں۔
نوشہرہ کے ڈپٹی کمشنر نے خبردار کیا ہے کہ ’اگلے چند گھنٹوں میں انتہاٸی اونچے درجے کا سیلابی پانی ضلع نوشہرہ میں داخل ہو جائے گا۔‘
انھوں نے لوگوں سے اپیل کی کہ ’براہ کرم اپنے عزیزو اقارب اور آس پاس لوگوں کو مطلع کریں, دیر نہ کریں اور محفوظ مقامات پر منتقل ہوجاٸیں۔‘
سماجی رابطے کی سائٹ ٹوئٹ پر انھوں نے مزید کہا کہ ’ضلعی انتظامیہ عوام الناس سےاس مشکل حالت میں تعاون کی متمنی ہے۔ کٸی علاقوں میں لوگوں کی انخلا میں تعاون نہ کرنے کی شکایتیں موصول ہورہی ہے۔ براہ کرم اس سیلاب کی صورتحال کو غیر سنجیدہ نہ لیں۔ اس دفعہ صورتحال 2010 کے سیلاب سے بھی گھمبیرہے لہذا انتظامیہ کیساتھ تعاون کریں۔‘
ڈپٹی کمشنر نوشہرہ کا کہنا تھا کہ ’تمام سرکاری و نجی تعلیمی ادارے لوگوں کیلٸے کھول دیے گٸے ہیں جہاں ہر طرح کی سہولیات میسر کی جارہی ہیں۔ ‘
چارسدہ تنگی اور شبقدر میں بھی حکام کے مطابق دریا کے کنارے واقع دیہات خالی کروا لیے گئے ہیں اور متاثرہ افراد کے لیے ولی خان سٹیڈیم اور سرکاری سکولوں میں کیمپ قائم کر دیے گئے ہیں
وفاقی حکومت نے اعلان کیا ہے کہ سیلاب سے متاثرہ علاقوں میں موبائل فون کمپنیاں صفر بیلنس کے ساتھ بھی کال کرنے کی سہولت فراہم کریں گی تاکہ ہنگامی خدمات کی فراہمی اور امدادی کارروائیوں میں کوئی رکاوٹ پیدا نہ ہو۔
نوشہرہ انتظامیہ کے مطابق اس وقت دریاٸے کابل میں پانی کا بہاؤ ایک لاکھ 96 ہزار 400 کیوسک سے تجاوز کر گیا ہے جبکہ پانی کی سطح میں مسلسل اضافہ ہوتا جا رہا ہے۔
اطلاعات ہیں کہ کئی رہائشی علاقوں میں پانی داخل ہونا شروع ہو چکا ہے۔
ڈپٹی کمشنر نوشہرہ میر رضا ازگن کے دفتر نے بتایا ہے کہ محکمہ آبپاشی کے مطابق نوشہرہ میں خطرناک سیلابی ریلہ کل صبح چار بجے سے چھ بجے کے درمیان پہنچے گا جس سے کٸی رہاٸشی علاقے زیر آب آ سکتے ہیں لہٰذا جن علاقوں کے لوگوں کو انخلاء کے احکامات دیے گٸے ہیں وہ فوری طور پر انخلاء کو یقینی بناٸیں۔
اس کے علاوہ ڈپٹی کمشنر نوشہرہ نے اپنے پیغام میں کیا کہا، اس ویڈیو میں دیکھیے۔
فلڈ فورکاسٹنگ ڈویژن لاہور کے اعداد و شمار کے مطابق تربیلا ڈیم تقریباً مکمل طور پر بھر چکا ہے۔
اس کی کُل گنجائش 1550 فٹ ہے جبکہ اس وقت اس میں 1549.87 فٹ پانی بھر چکا ہے۔
محکمہ داخلہ بلوچستان نے کمشنر مکران ڈویژن، کمشنر رخشان ڈویژن اور سرحدی اضلاع کے ڈپٹی کمشنروں کو ہدایت کی ہے کہ ایران سے ایل پی جی اور اشیائے خورد و نوش کی ترسیل کو آسان بنایا جائے۔
محکمے نے ہدایت کی ہے کہ ایران کے سرحدی حکام کے ساتھ رابطہ کر کے ایل پی جی اور اشیاء خورد و نوش کی ایران سے سپلائی کو نہ صرف برقرار رکھا جائے بلکہ اس میں اضافہ بھی کیا جائے-
سرکاری اعلامیے کے مطابق اس اقدام کا مقصد سیلاب کے باعث ذرائع آمد و رفت بند ہونے کے باوجود بھی لوگوں کو خوراک اور ایندھن کی فراہمی کو یقینی بنانا ہے۔
وزارت داخلہ نے شدید بارشوں اور سیلاب کی ہنگامی صورتحال کے پیش نظرسویلین حکومت کی مدد کے لیے چاروں صوبوں کے سیلاب سے متاثرہ علاقوں پاکستانی فوج تعینات کرنے کی منظوری دے دی ہے۔
آئین کے آرٹیکل 245 کے تحت فوج تعینات کرنے کی سمری وفاقی کابینہ کو حتمی منظوری کے لیے بھجوا دی گئی ہے۔
وزارتِ داخلہ کے اعلامیے کے مطابق چاروں صوبائی حکومتوں نے سیلاب متاثرہ علاقوں میں فوج تعینات کرنے کی ریکوزیشن وزارت داخلہ بھجوائی تھی۔
پراوینشل ڈیزاسٹر منیجمنٹ اتھارٹی (پی ڈی ایم اے) خیبرپختونخوا کے جاری اعلامیے کی روشنی میں مردان میں ممکنہ سیلاب کے پیش نظر ڈپٹی کمشنر مردان حبیب اللہ عارف نے ضلع بھر میں فلڈ ایمرجنسی کے نفاذ کا اعلان کر دیا ہے۔
نافذ ایمرجنسی کے دوران تمام نجی و سرکاری تعلیمی ادارے، ہسپتال، نجی عمارتیں و گاڑیاں ضلعی انتظامیہ کے براہ راست انتظامی کنٹرول میں رہیں گی تاکہ کسی بھی ہنگامی حالت میں لوگوں کو علاج معالجے کی سہولت کی فراہمی کے ساتھ محفوظ مقامات پر منتقلی کا انتظام کیا جا سکے۔
کوئٹہ سے چھ گھنٹے کے فاصلے پر ضلع موسیٰ خیل واقع ہے جہاں سیلاب آنے کے نتیجے میں اب تک 14 افراد ہلاک جبکہ 2000 گھر تباہ ہوچکے ہیں۔
وہاں پر موجود سماجی کارکن یاسر اقبال نے بی بی سی کو بتایا ہے کہ سیلاب سے لوگوں کے پالے ہوئے جانور بھی ہلاک ہوئے ہیں۔
اس ضلعے کی کُل آبادی ایک لاکھ 70 ہزار ہے اور سیلابی ریلے میں یہاں کے بنیادی صحت مراکز اور 2000 کی دہائی کے بعد بننے والی نئی سڑکیں بھی تباہ ہو چکی ہیں۔
یہ ضلع پنجاب اور خیبر پختونخوا کی سرحد پر ہے اور یہاں سے مغرب کی طرف ڈیرہ غازی خان جبکہ شمال کی طرف ڈیرہ اسماعیل خان ہے۔
یہ علاقہ کوہِ سلیمان کی رینج میں آتا ہے۔
ضلعی انتظامیہ نوشہرہ کی جانب سے تحصیل جہانگیرہ میں عارضی ریلیف اور رہاٸشی کیمپس قاٸم کر دیے گٸے ہیں۔ ممکنہ سیلاب کی صورت میں بے گھر افراد کو ان کیمپس میں عارضی طور پر ٹھہرایا جاٸے گا۔
کیمپوں کی تفصیلات:
ڈپٹی کمشنر نوشہرہ نے اپنے ضلعے کے عوام سے اپیل کی ہے کہ نوشہرہ کلاں (جملہ آبادی)، امان گڑھ گجر بستی، خٹ کلے، پیر سباق، نوشہرہ کینٹ میں دھوبی گھاٹ، کینٹونمنٹ بورڈ کی جملہ سرکاری اور رہاٸشی عمارتیں، زڑہ میانہ، مغلکٸی، مصری بانڈہ، مرہٹی, وتڑ (جی ٹی روڈ کے داٸیں طرف)، تاج محل ریسٹورنٹ، اجمیری و عالم گارڈن ہال، عثمانیہ شادی ہال و ریسٹورنٹ، ریور ویو اور کوربہ ریسٹورنٹ، اکوڑہ خٹک باغبان آباد، جہانگیرہ اور اس سے ملحقہ علاقوں کے شہری فوری طورپر گھر خالی کر کے محفوظ مقام پر منتقل ہو جاٸیں۔
اپنے ایک آڈیو پیغام میں اُنھوں نے کہا کہ جو لوگ ضلع چھوڑ کر پشاور جا سکتے ہیں وہ فوراً نکل جائیں کیونکہ جی ٹی روڈ بھی 2 سے 3 فٹ تک پانی جمع ہو سکتا ہے۔
اُنھوں نے کہا کہ اس وقت تک مصدقہ ہے کہ چار لاکھ کیوسک پانی اگلے چند گھنٹوں میں نوشہرہ میں داخل ہونے والا ہے اور رات کے وقت بجلی بھی کاٹی جا سکتی ہے، اس لیے جو لوگ جانا چاہتے ہیں وہ اسی وقت نکلنا شروع کریں۔
پی ڈی ایم اے پنجاب نے کہا ہے کہ اگلے 48 گھنٹوں کے دوران دریائے سندھ میں کالا باغ، چشمہ اور تونسہ کے مقام پر درمیانے سے اونچے درجے کا سیلاب متوقع ہے۔
محکمے کے مطابق میانوالی، بھکر، ڈی جی خان، لیہ، مظفر گڑھ، راجن پور اور رحیم یار خان کے اضلاع متاثر ہونے کا امکان ہے اور ڈی جی خان ڈویژن کے پہاڑی علاقوں سے آنے والے سیلاب کے باعث دریائے سندھ میں تونسہ کے مقام پر سیلاب آ سکتا ہے۔
پی ڈی ایم اے نے اپنے اعلامیے میں بتایا کہ کوہ سلیمان اور سالٹ رینج سے منسلک ندی نالوں میں پانی کی سطح بلند ہو سکتی ہے جس سے سیلاب کا خطرہ ہے۔
پی ڈی ایم اے نے تمام اضلاع کو پیشگی انتظامات مکمل رکھنے کے لیے کہہ دیا ہے۔
سوات کے علاقے کالام سے تعلق رکھنے والے مقامی صحافی حیات محمد کالامی نے بتایا ہے کہ کالام اور بحرین کے قریبی علاقوں میں کئی گاؤں ملیامیٹ ہو چکے ہیں۔
بی بی سی کو اپنے ایک پیغام میں اُنھوں نے بتایا کہ گذشتہ سیلاب کی طرح اس مرتبہ بھی دریائے سوات کالام کو بہا کر لے گیا ہے جبکہ بحرین سے کالام تک کی رابطہ سڑک بھی مکمل طور پر تباہ ہو گئی ہے۔
اُنھوں نے بتایا کہ موسم کی صورتحال کی وجہ سے ریلیف کے کام میں بھی دشواری ہو رہی ہے جبکہ اشیائے خورد و نوش کی شدید قلت کا سامنا ہے۔
ان صحافی کے مطابق مقامی دیہات میں بجلی فراہم کرنے والے کئی چھوٹے بجلی گھر بھی پانی میں بہہ گئے ہیں۔
اُنھوں نے بتایا کہ کالام کے ساتھ ساتھ بحرین بازار اور مانکیال کی صورتحال بھی یہی ہے اور اس وقت بغیر ہیلی کاپٹر کے امدادی کارروائی بہت مشکل ہے۔
پاکستان کی وفاقی وزیرِ برائے ماحولیاتی تبدیلی شیری رحمان نے کہا ہے کہ ملک بھر میں سیلاب سے تین کروڑ 30 لاکھ سے زائد افراد متاثر ہوئے ہیں۔
اپنے ایک ویڈیو پیغام میں اُنھوں نے کہا کہ پاکستان اس وقت دنیا کے سنگین ترین موسمیاتی بحران سے گزر رہا ہے۔
اُنھوں نے کہا کہ گرمی کی لہر، جنگل کی آگ، گلیشیئر پھٹنے اور اب مون سون کی صورت میں پاکستان کو اس برس لگاتار موسمی آفات کا سامنا کرنا پڑا ہے۔
واضح رہے کہ نیشنل ڈزاسٹر مینیجمنٹ اتھارٹی کی تازہ ترین رپورٹ کے مطابق متاثرہ آبادی کی تعداد 42 لاکھ سے کچھ زیادہ ہے تاہم بی بی سی کو اپنے ایک پیغام میں شیری رحمان نے کہا کہ متاثرین کی تعداد این ڈی ایم اے کی رپورٹ سے کہیں زیادہ یعنی تین کروڑ 30 لاکھ سے زیادہ ہے۔
وزیرِ اعظم ہاؤس کے ایک ترجمان نے بھی بی بی سی کو دیے گئے اپنے ایک بیان میں کہا کہ وفاقی وزیر کے دیے گئے اعداد و شمار ہی درست ہیں۔
پاکستان کے زیرِ انتظام کشمیر کی انتظامیہ نے حالیہ بارشوں کے پیش نظر سیاحوں اور شہریوں سے وادی نیلم کے غیر ضروری سفر سے اجتناب کرنے کی ہدایت کی ہے۔
ڈی سی ضلع نیلم خواجہ اعجاز احمد کے مطابق نیلم میں مون سون کی بارشوں کا سپیل 29 اگست 2022 تک جاری رہنے کی پیشگوئی کی گئی ہے۔
ڈپٹی کمشنر کے مطابق اس وقت وادی نیلم میں کئی مقامات پر تیز بارش ہو رہی ہے اور اپر نیلم کی یونین کونسل گریس کے نالہ جات جیسا کہ پھولاوئی، جانوائی، گگئی وغیرہ کے نالہ جات میں شدید بارش کی وجہ سے پانی کا بہاؤ تیز اور زیادہ ہے۔
اُنھوں نے کہا کہ جو لوگ دریا اور نالوں کے قریب آباد ہیں وہ احتیاط کریں اور خاص طور پر رات کے اوقات کار میں انتہائی محتاط رہنے کی ضرورت ہے۔
ڈپٹی کمشنر کے مطابق دریائے نیلم میں پانی کا بہاؤ تیز ہو رہا ہے، چنانچہ لوگ دریا کے کناروں پر لکڑیاں وغیرہ حاصل کرنے کے لیے مت جائیں اور نہ کسی اور کو بھیجیں۔
پی ڈی ایم اے خیبر پختونخوا کے مطابق گذشتہ 24 گھنٹوں کے دوران صوبے میں بارش سے متعلق مختلف حادثات میں ایک بچے سمیت دو افراد ہلاک ہوئے ہیں جبکہ ایک شخص کے زخمی ہونے کی اطلاع ہے۔
محکمے کے مطابق 24 گھنٹوں میں سات گھر مکمل طور پر تباہ ہو گئے جبکہ 21 کو جزوی نقصان پہنچا ہے۔
چئیرمین پی ٹی آئی عمران خان اور وزیر اعلیٰ خیبر پختونخوا محمود خان نے ڈیرہ اسماعیل خان میں سیلاب متاثرین کے کیمپ کا دورہ کیا۔
میڈیا سے گفتگو میں عمران خان نے کہا کہ سیلاب سے جہاں ملک بھر میں نقصانات ہوئے ہیں، وہاں سندھ اور بلوچستان سب سے زیادہ متاثر ہوئے ہیں۔
اُنھوں نے کہا کہ پنجاب اور خیبر پختونخوا کے وزرائے اعلیٰ خود سیلابی صورتحال کی نگرانی کر رہے ہیں۔
عمران خان کا کہنا تھا کہ سنہ 2010 کے سیلاب میں بھی اتنے نقصانات نہیں ہوئے تھے جتنے حالیہ سیلاب میں ہوئے۔
اُنھوں نے کہا کہ ٹانک زام ڈیم کی فیزیبلٹی تیار کر لی گئی ہے اور ڈیم تعمیر کر کے کی سیلاب کے نقصانات سے بچا جا سکتا ہے۔
اس موقع پر وزیرِ اعلیٰ خیبر پختونخوا محمود خان نے کہا کہ سیلاب سے متاثرہ اضلاع میں ایمرجنسی نافذ کردی گئی ہے۔
اُنھوں نے کہا کہ صوبائی حکومت نے امدادی کاموں کے لیے ایک ارب روپے جاری کیے ہیں اور مزید دو ارب روپے جاری کیے جا رہے ہیں۔
وزیرِ اعلیٰ نے الزام عائد کیا کہ صوبے میں وفاقی حکومت کے ادارے کچھ بھی نہیں کر رہے۔