عمران خان کا عدلیہ سے رات گئے عدالتیں کھولنے کا شکوہ، امریکہ کی شہباز شریف کو مبارکباد

لائیو کوریج

1. 13 اپريل 2022حمزہ شہباز کی علیم خان سے تلخی کی تردید، علیم خان کا پرویز الہیٰ کو چیلنج

   پاکستان کے سب سے بڑے صوبے پنجاب کے قائد حزب اختلاف حمزہ شہباز شریف نے سینیئر سیاستدان علیم خان سے اختلافات کی خبروں کی تردید کی ہے۔

   ٹوئٹر پر اپنے پیغام میں حمزہ شہباز نے کہا کہ ’میرے اور علیم خان صاحب کے حوالے سے جس جھوٹ کا پراپگینڈا کیا جا رہا ہے وہ بے بنیاد اور سراسر کسی کے تخیل کی پیداوار ہے۔

   انھوں نے مزید کہا کہ ’علیم خان صاحب محترم بھائی اور سینیئر سیاستدان ہیں۔ پنجاب میں واضح شکست دیکھ کر ایسی بے پر کی اڑائی جا رہی ہیں۔‘

   علیم خان نے بھی حمزہ شہباز کے ٹویٹ کی تصدیق کرتے ہوئے کہا ہے کہ پرویز الہیٰ صاحب کو اپنی ہار نظر آر ہی ہے۔ اُن کو پتہ چل چکا ہے کہ شکست اُن کا مقدر بن چکی ہےتو وہ ایسی حرکتوں پر آگئے ہیں۔ حمزہ کے ساتھ میرا بہت ہی اچھا محبت اور عزت کا رشتہ ہے، وہ میرے چھوٹے بھائیوں کی طرح ہیں۔۔۔ایسی کوئی بات نہیں ہوئی اور نہ ہوگی۔

   ’پرویز الہیٰ صاحب کو چاہیے کہ اپنی شکست تسلیم کر لیں۔ الیکشن کے میدان میں آئیں۔‘

2. 13 اپريل 2022وزیراعلیٰ بلوچستان میر عبدالقدوس بزنجو باپ کے نئے پارلیمانی لیڈر مقرر, محمد کاظم، بی بی سی اردو ڈاٹ کام، کوئٹہ

   پاکستان کے صوبے بلوچستان کی مخلوط حکومت میں شامل سب سے بڑی جماعت بلوچستان عوامی پارٹی (باپ) کے پارلیمانی رہنما کے عہدے سے میر ظہور بلیدی کو ہٹا کر وزیر اعلیٰ بلوچستان میرعبدالقدوس بزنجو کو پارٹی کا نیا پارلیمانی رہنما مقرر کیا گیا ہے۔

   نئے پارلیمانی رہنما کی تقرری کے لیے پارٹی کے 14 اراکین نے بلوچستان اسمبلی سیکریٹریٹ میں ایک درخواست دی تھی۔ بلوچستان عوامی پارٹی کے ترجمان اور وزیر برائے مواصلات و تعمیرات سردار عبدالرحمان کا کہنا ہے کہ پارٹی کے مجموعی 24 اراکین میں سے وزیراعلیٰ کو پارلیمانی رہنما مقرر کرنے کے لیے 16 اراکین کی حمایت حاصل تھی۔

   تجزیہ کاروں کے مطابق پارٹی میں اندرونی اختلافات کے باعث وزیر اعلیٰ قدوس بزنجو اسمبلی کے اندر بھی پارٹی پر اپنی گرفت کو مظبوط کرنا چاہتے ہیں۔

   سنہ 2018 کے عام انتخابات کے بعد پارٹی میں دوسری مرتبہ پارلیمانی رہنما کی تبدیلی بلوچستان کے سینیئر صحافی اورتجزیہ کار عبدالخالق رند کا کہنا ہے کہ بلوچستان عوامی پارٹی میں گروہ بندی ہے اور اس کے سارے ارکان ایک صفحے پر نہیں ہیں۔

   انھوں نے بتایا کہ پہلے جام کمال وزیر اعلیٰ ہونے کے ساتھ ساتھ پارٹی کے بلوچستان اسمبلی میں پارلیمانی رہنما بھی تھے لیکن اختلافات کے باعث جہاں انھیں وزارت اعلیٰ کے عہدے سے ہٹایا گیا وہیں ان کی جگہ پر میر ظہور بلیدی کو پارٹی کا پارلیمانی لیڈر بھی مقرر کیا گیا۔

   ان کا کہنا تھا کہ چونکہ وزیر اعلیٰ میر قدوس بزنجو اور میر ظہور بلیدی میں اختلافات پیدا ہوگئے اس لیے ظہور بلیدی دوبارہ پارٹی میں جام کمال کیمپ میں گئے۔ انھوں نے بتایا ظہور بلیدی کی بغاوت کے باعث ان کو ہٹا کر قدوس بزنجو کو پارٹی کا پارلیمانی رہنما مقرر کیا گیا۔

   کیا وزیر اعلیٰ قدوس بزنجو پارٹی پر گرفت مظبوط کرنا چاہتے ہیں؟

   تجزیہ کار عبدالخالق رند نے بتایا کہ قدوس بزنجو اسمبلی کے اندر اور باہر پارٹی پراپنی گرفت کو مضبوط کرنا چاہتے ہیں اس لیے پارلیمانی رہنما کو تبدیل کیا گیا۔

   سینیئر صحافی اور تجزیہ کار رضاءالرحمان کا بھی ماننا ہے کہ وہ وزیر اعلیٰ پارٹی پر اپنی گرفت کو مظبوط کرنا چاہتے ہیں اور پارلیمانی لیڈر کی تبدیلی کے ذریعے یہ دکھایا گیا کہ پارٹی کے اندر بھی قدوس بزنجو کو اکثریت حاصل ہے۔

   ان کا کہنا تھا کہ پارلیمانی لیڈر کی تبدیلی کے لیے جو درخواست دائر کی گئی تھی اس پر 14 اراکین کے دستخط تھے لیکن اس کے ساتھ ساتھ انھیں سپیکر بلوچستان اسمبلی میر جان محمد جمالی کی حمایت بھی حاصل ہے۔

   اس لحاظ سے ان کو پارٹی کے 24 اراکین میں سے 16 اراکین کی حمایت حاصل ہے۔

   انھوں نے کہا ہے کہ وفاق میں تبدیلی کے بعد بلوچستان میں بھی تبدیلی کے حوالے سے قیاس آرائیاں کی جارہی ہیں لیکن تاحال قدوس بزنجو کی پوزیشن مضبوط ہے کیونکہ ان کو اپنی پارٹی اور اتحادیوں کی حمایت کے علاوہ حزب اختلاف میں شامل جمیعت العلماءاسلام ف اور بلوچستان نیشنل پارٹی کی بھی حمایت حاصل ہے۔

   رضاءالرحمان نے کہا کہ جب تک قدوس بزنجو کو حزب اختلاف میں جے یو آئی ف اور بی این پی کی حمایت حاصل رہے گی تو ان کی حکومت کو کوئی خطرہ لاحق نہیں ہوگا۔ تاہم ان میں سے کسی جماعت کی حمایت ترک کرنے سے ان کو خطرات لاحق ہوسکتے ہیں۔

3. 13 اپريل 2022زبردستی کسی سے استعفیٰ نہیں لیا جا سکتا: سابق سپیکر قومی اسمبلی ایاز صادق

   سابق سپیکر سردار ایاز صادق نے الزام عائد کیا ہے کہ قومی اسمبلی کے عملے کو مجبور کیا جا رہا ہے کہ وہ تحریک انصاف کے ارکان اسمبلی کے استعفے منظور کرنے پر مجبور کیا جا رہا ہے۔ انھوں نے عملے کو متنبہ کیا ہے کہ وہ دباؤ میں آ کر کوئی ایسا اقدام نہ اٹھائیں جس کے باعث پھر انھیں اعلیٰ عدلیہ کے سامنے پیش ہونا پڑے۔

   پاکستان پیپلز پارٹی کی رہنما شیری رحمان کے ہمراہ میڈیا سے گفتگو کرتے ہوئے انھوں نے کہا کہ کسی سے زبردستی استعفیٰ نہیں لیا جا سکتا ہے بغیر اس کی مرضی کے۔ ان کے مطابق ان کی چند تحریک انصاف کے ارکان سے بات ہوئی ہے اور انھوں نے بتایا ہے کہ ان سے زبردستی استعفے لیے جا رہے ہیں۔

   سردار ایاز صادق کے مطابق جس وقت کوئی رکن اسپیکر کو آ کر کسی سیکریٹری یا ڈپٹی سیکریٹری کی موجودگی میں گواہی نہ دے کہ اس نے اپنے مرضی سے استعفیٰ دیا ہے تو اس وقت ایسا استعفیٰ منظور نہیں کیا جا سکتا ہے۔ انھوں نے کہا کہ ڈپٹی سپیکر قاسم سوری اس وقت اپنے عہدے پر موجود ہیں انھیں تصدیق کا یہ عمل شروع کر دینا چائیے۔

   سردار ایاز صادق نے کہا ہے کہ ڈپٹی سپیکر کے خلاف تحریک عدم اعتماد پیش کر دی گئی ہے اب اس کا شیڈول جاری کیا جانا چائیے۔

4. 13 اپريل 2022وزیراعلیٰ پنجاب کا انتخاب کب ہوگا؟ لاہور ہائی کورٹ آج شام پانچ بجے فیصلہ سنائے گی

   لاہور ہائی کورٹ وزیر اعلیٰ پنجاب کے انتخاب کے لیے درخواستوں پر مختصر فیصلہ آج سنائے گی۔ عدالت کے چیف جسٹس محمد امیر بھٹی لیگی رہنما اور اسمبلی میں قائد حزب اختلاف حمزہ شہباز سمیت دیگر درخواستوں پر فیصلہ بدھ کی شام پانچ بجے سنائیں گے۔

   سپیکر پنجاب اسمبلی چوہدری پرویز الہیٰ نے اسمبلی کا اجلاس 16 اپریل تک ملتوی کیا تھا۔ اس وقت پرویز الہٰی خود بھی وزیراعلیٰ پنجاب کے امیدوار ہیں۔

   خیال رہے کہ پنجاب کے وزیراعلیٰ عثمان بزدار اپنے عہدے سے پہلے ہی مستعفی ہو چکے ہیں۔ پنجاب اسبملی میں اس وقت حمزہ شہباز کو جہانگیر ترین اور علیم خان گروپس کی بھی حمایت حاصل ہے۔

5. 13 اپريل 2022ابھی صرف وفاق میں استعفوں کی بات چل رہی ہے، پرویز الہی

   رہنما پاکستان مسلم لیگ ق اور پنجاب اسمبلی کے سپیکر پرویز الہی نے کہا ہے کہ اسمبلیوں سے استعفوں پر ابھی صرف وفاق میں بات چل رہی ہے اور صوبائی اسمبلی کے حوالے سے ایسی بات نہیں ہوئی۔

   مقامی میڈیا سے گفتگو کرتے ہوئے جب ایک صحافی نے پرویز الہی سے اس بارے میں سوال کیا ان کا کہنا تھا کہ ’پنجاب کی بات نہیں ہوئی، ابھی صرف وفاق کی بات ہوئی ہے اور اس پر بھی بات چیت چل رہی ہے۔‘

6. 13 اپريل 2022سوشل میڈیا پر جاری پروپیگنڈہ مہم کے خلاف ایف آئی اے کی کارروائی میں مزید گرفتاریاں

7. 13 اپريل 2022شہزاد اکبر اور شہباز گل کے نام سٹاپ لسٹ سے نکالنے کے حکم امتناع میں توسیع

   اسلام آباد ہائیکورٹ نے شہزاد اکبر اور شہباز گل کے نام سٹاپ لسٹ سے نکالنے کے حکم امتناع میں توسیع کر دی ہے اور ایف آئی اے کو 18 اپریل تک پی ٹی آئی رہنماؤں کی درخواستوں پر جواب جمع کرانے کا حکم دیا ہے۔

   اسلام آباد ہائیکورٹ میں کیس کی سماعت کے دوران ایف آئی اے اہلکار نے عدالت کو بتایا کہ 8 اپریل کو انھیں لیٹر ملا، جس کی بنیاد پر سٹاپ لسٹ میں نام ڈالے گئے تاہم دو دن کا وقت دیا جائے تاکہ رپورٹ جمع کرا سکیں۔

   جس پر چیف جسٹس اطہر من اللہ نے ایف آئی اے اہلکار کو کہا کہ ’تفصیلی رپورٹ جمع کروائیں کہ کب کیا ہوا اور کیسے ہوا؟

   ایف آئی اے اہلکار نے عدالت کو بتایا کہ شہباز گل کے خلاف اختیارات سے تجاوز کر کے آمدن سے زائد اثاثے بنانے کی انکوائری ہے اور ادارے نے شہزاد اکبر اور شہباز گل کے خلاف دو انکوائریز شروع کر رکھی ہیں۔

   ایف آئی اے اہلکار نے عدالت کو یہ بھی بتایا کہ اسلام آباد زون کی سفارش پر شہزاد اکبر اور شہباز گل کا نام سٹاپ لسٹ میں شامل کیا گیا۔

   چیف جسٹس اطہر من اللہ نے کہا کہ ’ایف آئی اے کب سے اتنی آزاد ہو گئی کہ رات کو انکوائری شروع کر دی، حکومت کو ظاہر کرنا ہو گا کہ کوئی انتقامی کارروائی نہیں ہو رہی۔‘

   انھوں نے مزید کہا کہ ’یہ ادارے عوام کی خدمت کے لیے ہیں، حکومتوں کی خدمت کے لیے نہیں۔ دو سے تین سال میں ایف آئی اے کا کردار انتہائی مایوس کن رہا ہے۔‘

8. 13 اپريل 2022وزیراعظم شہباز شریف آج کراچی کا دورہ کریں گے

   شہباز شریف وزیراعظم بننے کے بعد پہلا دورہ آج کراچی کا کریں گے۔

   پاکستان پیپلر پارٹی کے رہنما اور وزیراعلیٰ سندھ مراد علی شاہ کراچی ائیر پورٹ پر شہباز شریف کا استقبال کریں گے۔

   وزیراعظم شہباز شریف اپنے ایک روزہ دورہ کراچی کے دوران مزار قائد پر حاضری بھی دیں گے۔

9. 13 اپريل 2022نوے دن میں انتخابات کروانے کا الیکشن کمیشن کے پاس کیا راستہ ہو سکتا ہے؟

10. 13 اپريل 2022عمران خان اور نواز شریف: دونوں کی وہ مماثلت جو مٹ نہیں سکتی!

11. 13 اپريل 2022پی ایم آفس کا ٹوئٹر اکاؤنٹ شریف انتظامیہ کو منتقل کیوں نہیں ہوا؟

12. 13 اپريل 2022شریف خاندان کی نریندر مودی سے ’بہتر کیمسٹری‘ انڈیا پاکستان تعلقات بحال کر سکتی ہے؟

13. 13 اپريل 2022یورپی یونین کا شہباز شریف کے ساتھ مل کر سٹریٹیجک انگیجمنٹ پلان پر کام کرنے کا اعادہ

    یورپی یونین کی خارجہ امور کی ترجمان نبیلا المسرالی نے ایک پریس کانفرنس میں پاکستان کی سیاسی صورتحال پر بات کی ہے۔ انھوں نے ایک سوال کے جواب میں کہا کہ ’گذشتہ کئی روز سے پاکستان میں ہونے والی پیش رفت کا بغور جائزہ لے رہا ہے، جس میں شہباز شریف کا انتخاب بھی شامل ہے۔‘

    ان کا مزید کہنا تھا کہ ’یورپی یونین پاکستان کے ساتھ ایک مستحکم اور قابل اعتماد شراکت دار کے طور پر روابط قائم رکھے گا اور نئے وزیرِاعظم کے ساتھ مل کر مشترکہ طور پر متفقہ سٹریٹیجک انگیجمنٹ پلان پر کام کریں گے۔‘

    خیال رہے کہ پاکستان اور یورپی یونین کے درمیان سنہ 2019 میں سٹریٹیجک انگیجمنٹ پلان پر دستخط کیے گئے تھے۔

14. 12 اپريل 2022صدر پوتن کی شہباز شریف کو وزیرِ اعظم پاکستان منتخب ہونے پر مبارکباد

    روس کے صدر ولادیمیر پوتن نے نومنتخب وزیرِاعظم شہباز شریف کو وزیرِ اعظم منتخب ہونے پر مبارکباد دی ہے۔

    روس کے پاکستان میں سفارت خانے کی جانب سے ایک ٹویٹ میں بتایا گیا ہے کہ ’پوتن نے اس امید کا اظہار کیا کہ شہباز شریف کے اقدامات روس اور پاکستان کے درمیان تعاون کو مزید فروغ دینے میں اہم کردار ادا کریں گے اور افغانستان کی صورتحال کے حل اور بین الاقوامی دہشتگردی کے خلاف حکمتِ عملی بنانے شراکت دار بنیں گے۔‘

    خیال رہے کہ اس سے قبل وزیر اعظم شہباز شریف سے پاکستان میں چین کی ناظم الامور کی خیرسگالی ملاقات ہوئی تھی جس میں انھوں نے چین کی حکومت اور قیادت کی طرف سے مبارک کا پیغام پہنچایا تھا۔

15. 12 اپريل 2022میریٹ ہوٹل میں بعض سیاستدانوں اور ایک شخص کے درمیان لڑائی کی ویڈیو وائرل

16. 12 اپريل 2022میں نے اپنے احکامات پر عملدرآمد کا حکم دے دیا ہے: وزیراعظم شہباز شریف

    پاکستان کے نئے وزیراعظم شہباز شریف نے اپنے ایک ٹویٹ میں کہا ہے کہ انھوں نے گذشتہ روز اپنے خطاب میں قومی اسمبلی کے فلور پر کیے گئے اعلانات پر عملدرآمد کے احکامات دے دیے ہیں۔ ان کے مطابق ہماری حکومت عوام کی بھلائی کے لیے دن رات محنت کرے گی۔

17. 12 اپريل 2022عمران خان کے حامی ماضی میں فوج سے خوش لیکن اب ناراض

18. 12 اپريل 2022شہباز شریف کو انتہائی مشکل حالات میں وزارت عظمیٰ کی ذمہ داری ملی: نواز شریف

    پاکستان مسلم لیگ ن کے سربراہ اور سابق وزیراعظم نواز شریف نے اپنے ایک پیغام میں کہا ہے کہ ’متحدہ اپوزیشن کی کاوشوں سے پاکستان میں آئینی تبدیلی کے ذریعے شہباز شریف کو انتہائی مشکل حالات میں وزارت عظمیٰ کی ذمہ داری ملی ہے۔ انھیں اور قوم کو بہت دعائیں۔

19. 12 اپريل 2022شہباز شریف کا ایک چھٹی کا اعلان: ’جس نے پانچ دن کوئی کام نہیں کرنا وہ چھٹے دن کون سے پہاڑ توڑے گا‘

20. 12 اپريل 2022وزیراعظم شہباز شریف کا ہنگامی بنیادوں پر معاشی ماہرین سے سفارشات کی تیاری کا حکم

    وزیراعظم شہباز شریف کو وفاقی سیکریٹری خزانہ نے ملکی معاشی صورتحال، ریونیوز، بجٹ خساروں، داخلی اور بیرونی قرض کی صورتحال سمیت مجموعی قومی بیلنس شیٹ سے متعلق تفصیلی بریفنگ دی ہے۔

    شہبازشریف نے ملک کو درپیش سنگین صورتحال اور معاشی چیلنجز سے نکلنے کے لیے ہنگامی بنیادوں پر معاشی تجاویز اور سفارشات کی تیاری کی ہدایات جاری کر دیں۔

    یہ تجاویز زراعت، صنعت، سرمایہ کاری، بینکاری، تاجر و کاروباری برادری سمیت تمام متعلقہ طبقات کی آرا کی روشنی میں مرتب کی جائیں گی، جس کے حصول کے لیے آئندہ چند دنوں میں سمٹ منعقد کرنے کا فیصلہ کیا گیا ہے۔

    اس کے علاوہ نیشنل اکنامک کونسل تشکیل دینے کا فیصلہ بھی کیا گیا ہے جوغیرجانبدار اور ممتاز معاشی ماہرین پر مشتمل ہوگی۔ وزیراعظم نے ہدایت کی کہ معاشی صورتحال اور سنگین مالی خطرات کو دیکھتے ہوئے فوری، وسط اور طویل المدتی اہداف کا واضح تعین کریں۔