’خان کو باندھ کر ہرایا ہے، باندھ کر‘
سابق معاون خصوصی برائے سیاسی روابط شہباز گل نے ٹوئٹر پر اپنے پیغام میں کہا ہے کہ عمران خان کو ’باندھ کر ہرایا‘ گیا۔
وہ کہتے ہیں کہ ’ان سارے دنوں میں خان کو اکیلے لڑتے دیکھا۔ ایک بہادر کی طرح ۔ بہت کچھ دل میں ہے۔ دل میں ہی رہے تو اچھا ہے۔ بس اتنا ہی کہوں گا۔ خان کو باندھ کر ہرایا ہے باندھ کر۔‘
انھوں نے ایک دوسرے ٹویٹ میں یہ بھی لکھا کہ ’وزیراعظم نے دفتر سے جانے سے پہلے اپنا آخری حکم اپنے پرنسپل سیکرٹری اعظم خان کی درخواست پر انہیں اسٹیبلشمنٹ ڈویژن رپورٹ کرنے کا کیا۔‘
’کرپٹ مافیا نے جانے پر مجبور کیا‘
سابق وزیر تعلیم شفقت محمود نے لکھا کہ یہ پاکستان کے لیے ’المناک دن‘ ہے۔
وہ ٹوئٹر پر کہتے ہیں کہ ایک بے خوف رہنما کو کرپٹ مافیا نے نشانہ بنایا اور وزیر اعظم کے عہدے سے ہٹنے پر مجبور کیا۔
انھیں امید ہے کہ عمران خان ’دوبارہ اٹھیں گے کیونکہ پاکستانی عوام ان کے اور پی ٹی آئی کے ساتھ کھڑے ہیں۔‘
’عمران خان کی کال پر پُرامن احتجاج‘
پی ٹی آئی رہنما حماد اظہر کہتے ہیں کہ ’بال آخر میں ایک ایسے میدان میں آ گئی ہے جسے نہ خریدا جا سکتا ہے اور نہ وہ کسی کے دباؤ میں آتی ہے۔‘
خیال رہے کہ سابق وزیر اعظم نے آج کی شب ملک کے بڑے شہروں میں احتجاج کی کال دی تھی۔