بریکنگ, دلی میں کورونا وائرس متاثرین کی تعداد ایک لاکھ کے قریب
انڈیا کے دارالحکومت دلی میں کورونا وائرس کی وبا تیزی سے پھیل رہی ہے اور اس وقت شہر میں اس وائرس کے متاثرین کی تعداد 99،444 بنتی ہے۔ اب ایسا واضح دکھائی دے رہا ہے کہ متاثرین کی یہ تعداد جلد ایک لاکھ سے زیادہ ہو جائے گی۔
تاہم ایک اچھی خبر یہ ہے کہ اس وائرس کا شکار ہونے والوں کی تقریباً تین چوتھائی تعداد اس سے صحت یاب ہو چکی ہے اور اس سے مرنے والوں کی تعداد محض 3000 سے زائد بنتی ہے۔ .
جون میں دلی میں یہ وبا اپنے زوروں پر تھی تاہم گذشتہ ہفتے سے ایسا لگتا ہے کہ اب صورتحال آہستہ آہستہ قابو میں آ چکی ہے۔
پیر کو انڈیا متاثرین کی تعداد کے اعتبار سے روس سے بھی آگے نکل گیا اور اس وائرس کے زیادہ متاثرین رکھنے والا تیسرا ملک بن گیا۔ اس وقت انڈیا میں کل متاثرین کی تعداد 719,664 بنتی ہے۔ گذشتہ کچھ دنوں سے انڈیا میں یہ وائرس بڑی تیزی سے پھیلا اور یومیہ 20 ہزار سے زائد متاثرین سامنے آنا شروع ہوئے۔
امریکی یونیورسٹی جان ہاپکنز کے مطابق اگرچہ انڈیا متاثرین کی تعداد کے اعتبار سے تیسرے نمبر پر ہے لیکن اس وائرس سے ہلاکتوں کی تعداد کے لحاظ سے دنیا میں یہ آٹھویں نمبر پر ہے۔