بریکنگ, کورونا وائرس: سندھ میں ایک دن میں ریکارڈ 1080 متاثرین کا اضافہ
وزیر اعلیٰ سندھ ڈاکٹر مراد علی شاہ نے ایک ویڈیو پیغام میں کہا کہ 74 دنوں میں کورونا وائرس کے 21610 ٹیسٹ کیے گئے۔
ان کا کہنا ہے کہ گذشتہ 24 گھنٹوں میں ہم نے تقریباً ساڑھے پانچ ہزار ٹیسٹ کیے ہیں، اس طریقے سے کل ٹیسٹ کی تعداد 87108 ہو گئی ہے۔
وزیر اعلی کے مطابق کل (جمعے) تک 9691 متاثرین تھے۔
گذشتہ 24 گھنٹوں میں 1080 افراد میں کورونا کی تشخیص ہوئی ہے جو کہ بہت بڑی تعداد بنتی ہے۔ یہ تقریباً 20 فیصد بنتا ہے جتنے لوگوں کے ٹیسٹ کیے گئے ہیں۔
مراد علی شاہ کے مطابق یہ کسی بھی صوبے میں پہلی بار ایک ہزار سے زائد افراد میں کورونا کی تشخیص ہوئی ہے، جو کہ تشویشناک ہے۔ اس سے پتا چلتا ہے کہ ہم اپنی پیک کی طرف جا رہے ہیں۔
اس وقت سندھ میں کل متاثرین کی تعداد 10771 بنتی ہے۔ یہ ٹوٹل ٹیسٹ کا تقریباً 12 اعشاریہ چار فیصد بنتا ہے۔
گذشتہ 24 میں 80 افراد اس وائرس سے صحت یاب ہوئے ہیں، جس سے صحت یاب ہونے والوں کی کل تعداد 2030 ہو گئی ہے جو 18 اعشاریہ آٹھ فیصد بنتی ہے۔
گذشتہ 24 گھنٹوں میں صوبے میں چار ہلاکتوں کے بعد اس وائرس سے مرنے والوں کی کل تعداد 180 ہو گئی جو کہ ایک اعشاریہ سات فیصد ہے۔
اس وقت 8571 افراد زیر علاج ہیں، جن میں سے 7432 گھر میں آئسولیشن میں ہیں جبکہ 609 حکومتی آئسولیشن سنٹرز میں ہیں اور 530 مختلف ہسپتالوں میں ہیں اور ان 530 میں سے 101 کی حالت نازک ہے۔ ان 101 مریضوں میں سے 30 مریض وینٹیلیٹر پر ہیں جو کہ تشویش کی بات ہے۔