آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
پاکستان میں جمعرات کو 100 سے زیادہ نئے مریض سامنے آنے بعد ملک میں کورونا سے متاثر ہونے والے افراد کی تعداد 2426 ہوگئی ہے جبکہ 35 افراد اس وبا سے ہلاک ہوئے ہیں۔ وزیراعظم عمران خان نے کہا ہے کہ پاکستان میں جس شرح سے کورونا پھیل رہا ہے اس سے نمٹنے کے وسائل موجود ہیں۔
پشاور پولیس کے مطابق محلہ ہدیٰ کے علاقے کی رہائشی خاتون میں کورونا کی تصدیق کے بعد علاقے کو مکمل طور پر بند کر دیا گیا ہے۔
پولیس حکام کا کہنا ہے کہ ضلعی انتظامیہ کے احکامات کی روشنی میں اہل علاقہ میں وائرس پھیلنے کے پیش نظر محلے کو لاک ڈاؤن کیا گیا ہے
پاکستان کے وزیراعظم کے مشیر برائے امورِ خزانہ عبدالحفیظ شیخ نے کہا ہے کہ لاک ڈاؤن کی وجہ سے معاشی مشکلات کا سامنا کرنے والے عوام بجلی اور گیس کے بل تین ماہ بعد بھی جمع کروا سکتے ہیں۔
انھوں نے کہا کہ اس عدم ادائیگی کی وجہ سے پیدا ہونے والا خسارہ حکومت خود برداشت کرے گی اور اس مقصد کے لیے 100 ارب روپے مختص کیے گئے ہیں۔
اسلام آباد میں ایک تقریب سے خطاب کرتے ہوئے انھوں نے کہا کہ کورونا وائرس کی وجہ سے پیدا ہونے والے منفی معاشی اثرات سے نمٹے کے لیے حکومت کی جانب سے ایک کھرب دو سو ارب روپے کے پیکج کا اعلان کیا گیا ہے۔
انھوں نے کہا کہ گذشتہ روز وزیراعظم نے ڈیڑھ سو ارب روپے کے پروگرام کا افتتاح کیا تھا جس کے تحت ایک کروڑ بیس لاکھ خاندانوں میں فی خاندان 12 ہزار روپے نقد رقم تقسیم کی جائے گی، جس سے پاکستان کی تقریباً ایک تہائی آبادی مستفید ہو سکے گی۔
عبدالحفیظ شیخ نے بتایا کہ حکومت پاکستان نے ملک کی کاروباری کمیونٹی کے لیے پانچ بڑے فیصلے کیے ہیں:
بلوچستان کے ضلع کیچ کے ہیڈ کوارٹر تربت میں کورونا وائرس سے بچاﺅ کا سپرے کرنے والے خودکار واک تھرو گیٹس کا جمعرات کو کامیاب تجربہ کیا گیا۔
نامہ نگار محمد کاظم کے مطابق مقامی سطح پر تیار کیے جانے والے گیٹ کو ڈسٹرکٹ ہیڈ کوارٹر ہسپتال کے باہر نصب کیا گیا ہے۔
سندھ کے وزیراعلیٰ کے معاونِ خصوصی مرتضیٰ وہاب نے بتایا ہے کہ صوبائی حکومت کے کورونا فنڈ میں اب تک دو ارب 89 کروڑ روپے سے زیادہ رقم جمع ہو گئی ہے۔
ٹوئٹر پر اپنے پیغام میں انھوں نے کہا کہ دو ارب 84 کروڑ سے زیادہ رقم سندھ حکومت کی جانب سے دی گئی ہے جبکہ عام لوگوں نے بھی چار کروڑ 13 لاکھ روپے سے زیادہ دیے ہیں۔
پاکستان میں صوبہ سندھ کی حکومت نے کورونا وائرس کا پھیلاؤ روکنے کے لیے سب سے پہلے اور سب سے سخت اقدامات کا اعلان کیا ہے تاہم وہاں اب بھی وائرس کی مقامی منتقلی کے سب سے زیادہ مریض سامنے آ رہے ہیں۔
محکمۂ صحت کے حکام کے مطابق صوبے میں کووڈ-19 کی مقامی طور پر منتقلی کے معاملات میں مسلسل اضافہ دیکھا جارہا ہے اور یہ تعداد 410 تک جا پہنچی ہے۔
سرکاری اعداد و شمار کے مطابق صوبے میں جمعرات کی صبح تک متاثرین کی مجموعی تعداد 743 ہے جن میں 410 ایسے افراد ہیں جن میں مقامی سطح پر وائرس منتقل ہوا۔
یہ تعداد کل متاثرین کا 55 فیصد تک بنتی ہے۔
وائرس کی مقامی طور پر منتقلی کے سب سے زیادہ مریض کراچی میں سامنے آئے ہیں۔
خیال رہے کہ سندھ حکومت یہ اعلان کر چکی ہے کہ اگر لاک ڈاؤن کے باوجود حالات بہتر نہ ہوئے تو پابندیاں مزید سخت کی جا سکتی ہیں۔
پاکستان کے وزیر خارجہ شاہ محمود قریشی نے بیرون ملک پھنسے پاکستانیوں کو وطن واپس لانے کے حوالے سے بتایا ہے کہ قومی رابطہ کمیٹی میں 17 پروازیں بحال کرنے کی منظوری دے دی گئی ہے۔
پاکستان ٹیلی وژن کے مطابق وزیر خارجہ نے کہا کہ وطن واپس آنے کے خواہاں پاکستانیوں کو بتدریج ملک واپس لایا جائے گا۔
ان کا کہنا تھا کہ’ہماری پہلی ترجیح ٹرانزٹ میں پھنسے پاکستانیوں کو وطن واپس لانا ہے جبکہ اس کے بعد ویزہ ختم ہونے والے پاکستانی ہیں‘۔
انھوں نے بتایا کہ اس کے بعد بیرون ملک مقیم پاکستانی اور وہاں زیر تعلیم اور واپسی کے منتظر طلبا ہوں گے۔
مخدوم شاہ محمود قریشی نے چار سے 11اپریل تک بین الاقوامی پروازوں کے شیڈول کا اعلان بھی کیا ۔
ان کا کہنا تھا کہ ان تمام مسافروں کو ایئرپورٹ پر کورونا ٹیسٹنگ سے گزرنا ہو گا جس کے لیے ٹیسٹنگ اور قرنطینہ کی استعداد کار کو بتدریج بڑھایا جا رہا ہے۔
وزیر اعظم عمران خان کا کہنا ہے کہ دوسرے ممالک میں جس رفتار سے کورونا وائرس کے کیسز بڑھ رہے ہیں، پاکستان کو فی الحال ویسا خطرہ لاحق نہیں ہے۔
’ہمارے ہاں ابھی بھی جس ریٹ پر کورونا پھیل رہا ہے۔۔۔ ہمارے پاس جو وسائل اب تک ہیں ہم اس پر قابو پا لیں گے۔‘
انھوں نے اس بات پر زور دیا کہ لوگ بڑی تعداد میں اکٹھے نہ ہوں اور کہا کہ اسی لیے شادیاں، سینما، سکول، کالج، کھیل کے میدان بند ہیں۔
’لیکن اس کے ساتھ ساتھ ہم نے یہ بھی فیصلہ کرنا ہے کہ کون کون سی انڈسٹری چلے گی۔۔۔ اس پر ہم مسلسل سوچ رہے ہیں۔‘
اسلام آباد میں کاروباری شخصیات میں ٹیکس ریفنڈ چیک تقسیم کرنے کی تقریب سے خطاب کرتے ہوئے وزیراعظم نے کہا کہ پاکستان کاروباری سرگرمیوں کے بغیر آگے نہیں بڑھ سکتا۔
انھوں نے کہا کہ کامرس اور صنعت کی وزارتوں نے ایسی انڈسٹریز کی فہرست مرتب کی ہے جن میں کورونا پھیلنے کا کم خدشہ ہے۔
انھوں نے کہا کہ ان کی حکومت تمام چیمبرز میں رابطے میں ہے اور ان کے مسائل سے آگاہ ہیں۔ ان کا کہنا تھا کہ امریکہ کی حکومت کے سامنے بھی یہی مشکل ہے کہ کورونا سے نمٹیں یا معیشت پر توجہ دیں۔
’ہمارا کورونا ایک طرف ہے تو دوسری طرف بھوک ہے۔۔۔ ایک بہت بڑا غریب طبقہ ہے جس کا ہم نے دھیان رکھنا ہے۔‘
سندھ کی وزیرِ صحت ڈاکٹر عذرا پیچوہو نے صوبے میں کورونا وائرس سے مزید ایک شخص کی ہلاکت کی تصدیق کر دی ہے۔
ان کے مطابق اس 65 سالہ مریض کا تعلق ٹنڈو محمد خان سے تھا اور اسے 28 مارچ کو حیدرآباد لایا گیا تھا جہاں اس کا ٹیسٹ پازیٹو آنے کے بعد علاج جاری تھا۔
ان کے مطابق مذکورہ شخص کا تعلق تبلیغی جماعت سے تھا۔
خیال رہے کہ حیدرآباد میں تبلیغی جماعت سے تعلق رکھنے والے 90 سے زیادہ افراد میں یہ وائرس پایا گیا ہے جو سب زیرِ علاج ہیں۔
ہلاکتوں کی بات کی جائے تو ملک میں اب تک اس وائرس سے 32 ہلاکتیں ہو چکی ہیں۔ پنجاب میں اب تک 11 افراد اس وائرس سے ہلاک ہوئے ہیں جبکہ سندھ میں دس، خیبر پختونخوا میں آٹھ، گلگت بلتستان میں دو جبکہ بلوچستان میں ایک ہلاکت ہوئی ہے۔
حال ہی میں پاکستان کے شہر گجرات میں ایک اعلان کے ذریعے مکینوں کو دو بڑے خطرات سے متنبہ کیا گیا۔
ان سے کہا گیا کہ کورونا وائرس سے بچنے کے لیے بیرونِ ممالک خصوصاً سپین اور اٹلی وغیرہ سے واپس آنے والے لوگوں سے ’ہاتھ نہیں ملانا‘ اور دوسرا اعلان یہ کہ تبلیغی جماعت کے جو لوگ دیہات میں آ گئے ہیں ان سے بچنا ہے۔
رختِ سفر کمر پر ڈالے، سر پر ٹوپیاں ٹکائے، قطار بنائے چلتے تبلیغی جماعت کے افراد دور ہی سے پہچانے جاتے ہیں۔ گذشتہ ماہ بھی وہ اسی انداز میں پاکستان کے مختلف شہروں اور دیہات میں داخل ہوئے تاہم اس مرتبہ ان کی آمد نے مقامی افراد میں تشویش اور بےچینی پیدا کی۔
ٹولیوں کی شکل میں تبلیغی جماعت کے ارکان مارچ کے دوسرے ہفتے کے آخر میں لاہور میں رائیونڈ کے مقام پر واقع تبلیغی سنٹر میں ہونے والے ایک اجتماع میں بھی شریک تھے۔ وہاں سے اور اس کے بعد کے دنوں میں بھی وہ ’تبلیغی مشن‘ پر نکلتے رہے۔
تبلیغی اجتماع سے نکلنے والی ٹولیاں جب تک اپنے مقررکردہ علاقوں تک پہنچیں اور اپنا کام شروع کیا تو حالات یکسر بدل چکے تھے۔ کورونا وائرس کے پھیلاؤ میں تیزی آ چکی تھی اور پورا ملک لاک ڈاؤن کی صورتحال میں چلا گیا تھا۔
اسلام آباد، بلوچستان اور پاکستان کے زیرِ انتظام کشمیر میں کووڈ-19 کے 19 نئے مریضوں کی تصدیق کے بعد ملک میں اس وائرس سے متاثرہ افراد کی تعداد 2291 تک پہنچ گئی ہے۔
جمعرات کی صبح جاری کیے گئے تازہ اعدادوشمار کے مطابق اسلام آباد میں آٹھ، بلوچستان میں پانچ جبکہ کشمیر میں تین نئے مریضوں کی شناخت ہوئی ہے۔
اس اضافے کے بعد اسلام آباد میں اب 62، بلوچستان میں 169 جبکہ پاکستان کے زیرِ انتظام کشمیر میں نو متاثرین موجود ہیں۔
اس سے قبل سندھ میں بھی جمعرات کو 34 نئے مریض سامنے آئے تھے جس کے بعد وہاں متاثرین کی تعداد 743 تک پہنچ گئی ہے۔ سندھ میں کراچی سب سے متاثرہ شہر ہے جہاں تین سو سے زیادہ متاثرین موجود ہیں۔
پنجاب 845 مریضوں کے ساتھ اب بھی ملک کا سب سے متاثرہ صوبہ ہے اور ان میں سے 178 مریض دارالحکومت لاہور میں ہیں۔
اس کے علاوہ خیبر پختونخوا میں 276، گلگت بلتستان میں اب تک 184افراد میں کورونا کی تصدیق ہو چکی ہے۔
ہلاکتوں کی بات کی جائے تو ملک میں اب تک اس وائرس سے 31 ہلاکتیں ہو چکی ہیں۔ پنجاب میں اب تک 11 افراد اس وائرس سے ہلاک ہوئے ہیں جبکہ سندھ میں نو، خیبر پختونخوا میں آٹھ، گلگت بلتستان میں دو جبکہ بلوچستان میں ایک ہلاکت ہوئی ہے۔
صحت یاب
پاکستان میں جیسے جیسے نئے مریض سامنے آ رہے ہیں وہیں اس بیماری سے صحت یاب ہونے والوں کی تعداد بھی بڑھ رہی ہے اور جمعرات کی صبح تک 107 مریض صحت یاب ہو چکے تھے۔
صحت یاب ہونے والوں میں سب سے بڑی تعداد سندھ سے ہے جہاں 58 افراد اب تک شفایاب ہوئے ہیں جبکہ خیبر پختونخوا میں 19، بلوچستان میں 17، پنجاب میں چھ، گلگت بلتستان میں چار جبکہ اسلام آباد میں تین مریضوں میں اب یہ بیماری موجود نہیں۔
پنجاب حکومت دوسرے صوبوں اور بیرون ملک تبلیغی اجتماعات میں شرکت کرنے والے افراد کی فہرستیں تیار کرے گی۔
یہ فیصلہ جمعرات کو صوبائی وزیر قانون راجہ بشارت اورچیف سیکرٹری پنجاب اعظم سلیمان خان کی زیر صدارت ہونے والے اجلاس میں لیا گیا۔
چیف سیکریٹری نے تمام انتظامی افسران کو حکم دیا کہ وہ تبلیغی اجتماعات کے شرکا کی فہرستیں فراہم کریں۔ اجلاس میں بتایا گیا کہ تبلیغی جماعت کے تمام اراکین کی سکریننگ تقریباً مکمل کر لی گئی ہے۔
اجلاس میں ہسپتالوں میں کورونا کے علاوہ معمول کے علاج کے لیے او پی ڈیز کو مکمل طور پر فعال کرنے کا بھی فیصلہ کیا گیا۔
کینیڈین حکومت کی درخواست پر پی آئی اے کی دو خصوصی پروازیں ٹورنٹو کے لیے روانہ ہو گئی ہیں۔
600 مسافر لاہور اور کراچی ائیرپورٹس سے پی آئی اے کے خصوصی طیاروں پر سوار ہوئے، کراچی سے پرواز پی کے 781 جبکہ لاہور سے پی کے 789 روانہ ہوئی۔
روانگی سے قبل مسافروں کی جامع سکریننگ اور ان کے سامان سمیت ڈس انفیکشن کی گئی۔ پروازوں کی مانیٹرنگ کے لیے پی آئی اے کی اعلی انتظامیہ خود ائیر پورٹ پر موجود تھی۔
ترجمان پی آئی اے عبداللہ خان کے مطابق کینیڈا سے دونوں پروازیں خالی واپس آئیں گی۔ پی آئی اے کی دونوں خصوصی پروازوں کو گزشتہ روز اڑان کی اجازت ملی تھی۔
ڈپٹی کمشنر اسلام آباد نے ٹوئٹر پر اپنے پیغام میں یہ واضح کیا ہے کہ اسلام آباد کے سیکٹر ایف الیون کو سیل نہیں کیا گیا۔
انھوں نے لکھا کہ سیکٹر ایف الیون سے کورونا وائرس کا کوئی کیس سامنے نہیں آیا لہذا افواہوں پر یقین نہ کیا جائے۔
سندھ میں جمعرات کو 34 نئے مریض سامنے آنے کے بعد صوبے میں متاثرہ افراد کی تعداد 743 تک پہنچ گئی ہے۔
اس اضافے کے بعد پاکستان میں متاثرین کی کل تعداد 2272 ہو گئی ہے جبکہ 31 افراد ہلاک ہو چکے ہیں۔
سندھ کے تازہ ترین اعدادوشمار کے مطابق صوبے میں وائرس کی مقامی منتقلی کے 17 نئے مریض کراچی سے، نو حیدرآباد سے، چھ نواب شاہ اور دو جامشورو سے سامنے آئے ہیں۔
حکام کے مطابق کراچی میں اس وقت 324 متاثرین میں سے 285 زیرِعلاج ہیں جبکہ 30 صحت یاب اور نو ہلاک بھی ہو چکے ہیں۔
حیدرآباد میں متاثر ہونے والوں کی تعداد 137 ہے جن میں سے بیشتر تبلیغی جماعت کے ارکان ہیں۔ حیدرآباد میں بھی ایک شخص صحت یاب ہوا ہے۔
اس کے علاوہ نواب شاہ میں چھ، جامشورو میں دو جبکہ جیکب آباد اور دادو میں بھی ایک ایک مریض ہے۔
ایران سے آنے والے زائرین میں سے سکھر کے قرنطینہ میں رکھے گئے 265 مریضوں میں سے 23 صحت یاب ہو چکے ہیں جبکہ لاڑکانہ کے قرنطینہ میں سات زائرین میں کورونا وائرس پایا گیا۔ ڈاکٹر عذرا کے مطابق اب تک سندھ بھر میں 6948 ٹیسٹ کیے جا چکے ہیں۔
اس کے علاوہ ملک کے دیگر حصوں میں متاثرین کی تعداد کچھ یوں ہے:
پنجاب - 845
خیبر پختونخوا - 276
بلوچستان - 164
اسلام آباد - 54
گلگت بلتستان - 184
پاکستان کے زیر انتظام کشمیر 6
ہلاکتوں کی بات کی جائے تو پنجاب میں اب تک 11 افراد اس وائرس سے ہلاک ہوئے ہیں جبکہ سندھ میں نو، خیبر پختونخوا میں آٹھ، گلگت بلتستان میں دو جبکہ بلوچستان میں ایک ہلاکت ہوئی ہے۔
پنجاب میں بدھ کی شب کورونا کے مریضوں کی تعداد میں تیزی سے اضافہ دیکھنے میں آیا ہے اور یہ تعداد بڑھ کر 845 تک پہنچ گئی ہے۔
یکم اپریل کی رات ترجمان پرائمری اینڈ سکینڈری ہیلتھ کئیر ڈیپارٹمنٹ کی جانب سے جاری کیے گیے اعداد و شمار کے مطابق صوبے میں کورونا سے مرنے والوں کی تعداد بھی بڑھ کر 11 ہو گئی ہے جبکہ پانچ مریض صحت یاب ہو چکے ہیں۔
ہلاک ہونے والوں میں سے پانچ کا تعلق لاہور سے تھا جبکہ چار افراد اور ایک ایک فیصل آباد اور رحیم یار خان میں فوت ہوا۔
اس کے علاوہ ڈی جی خان سے 213 زائرین، ملتان 91 زائرین، رائے ونڈ قرنطینہ سے 107 اور فیصل آباد قرنطینہ میں 5 افراد میں کورونا وائرس کی تصدیق ہوئی ہے۔
مریضوں کی تعداد یوں ہے: لاہور میں 178، قصور میں ایک، ننکانہ صاحب 13، راولپنڈی 51، جہلم 28، اٹک میں ایک مریض ہے۔ترجمان گوجرانوالہ میں 13، گجرات 90، منڈی بہاوالدین میں چار، حافظ آباد میں پانچ اور ناروال میں دو مریض ہیں۔ ترجمان سیالکوٹ میں ایک، سرگودھا 10، میانوالی 3، خوشاب میں ایک، ملتان 2، وہاڑی 2، فیصل آباد 9، رحیم یار خان میں 3 مریض ہیں۔ ترجمان بہاولنگر 3، بہاولپور 1، لودھراں 2، لیہ میں ایک اور ڈی جی خان میں پانچ۔
پاکستان کے وزیر اعظم عمران خان نے خدشہ ظاہر کیا ہے کہ ملک میں کورونا وائرس کے پھیلاؤ کو روکنے کے لیے احتیاطی تدابیر نہ کی گئیں تو پاکستان میں اس وائرس سے متاثرہ افراد کی تعداد 50 ہزار تک بڑھ سکتی ہے۔
انھوں نے یہ بات بدھ کی شب وزیراعظم کے کورونا ریلیف فنڈ کے حوالے سے نجی ٹی وی چینل اے آر وائی نیوز کی ٹیلی تھون ٹرانسمیشن میں کہی۔
عمران خان نے کہا 25 اپریل تک احتیاطی تدابیر جاری رکھی گئیں تو متاثرین کی تعداد 20 سے 25 ہزار تک رہنے کا امکان ہے ورنہ یہ تعداد 50 ہزار تک بڑھ سکتی ہے جس سے مشکلات مزید بڑھیں گی۔
ان کا کہنا تھا کہ عقلمندی اسی میں ہے کہ لوگ زیادہ سے زیادہ احتیاطی تدابیر اختیار کریں۔
خیال رہے کہ حکومتِ پاکستان نے وائرس کے پھیلاؤ کو روکنے کے لیے ملک میں عائد پابندیوں میں پہلے ہی 14 اپریل تک کے لیے توسیع کر دی ہے۔
پاکستان کے صوبہ سندھ کی وزیر صحت ڈاکٹر عذرا پیچوہو نے کراچی میں کووڈ 19 سے متاثرہ ایک اور شخص کی ہلاکت کی تصدیق کردی ہے جس کے بعد صوبے بھر میں اس وائرس سے کل ہلاکتیں نو ہو گئی ہیں۔
وزیر صحت کے مطابق بدھ کے روز ہلاک ہونے والے 59 سالہ شخص کا تعلق کراچی سے ہے جسے 19 مارچ کو ہسپتال میں داخل کیا گیا تھا۔
انھوں نے بتایا کہ ہلاک ہونے والے مریض حال ہی میں سعودی عرب سے آئے تھے اور انھیں دما اور سانس لینے میں تکلیف جیسے مسائل کا بھی سامنا تھا۔
اس ہلاکت کے بعد پاکستان میں مجموعی طور اموات کی تعداد 28 ہو گئی ہے۔