جنگ ختم کرنے کے امریکی منصوبے کی تفصیلات سے آگاہ نہیں، برطانوی وزیرِ دفاع
برطانیہ کے وزیر دفاع جان ہیلی نے بی بی سی ریڈیو 4 سے بات کرتے ہوئے کہا ہے کہ برطانیہ آبنائے ہرمز کے معاملے پر تمام ممالک کو اکٹھا کر رہا ہے اور ایسا حل تلاش کرنے کی کوشش کر رہا ہے جس میں عسکری قوت کا استعمال نہ کرنا پڑے۔
جب ان سے پوچھا گیا کہ آیا وہ جانتے ہیں کہ امریکہ جنگ کے خاتمے کے لیے کیا کرنے کی منصوبہ بندی کر رہا ہے، جان ہیلی کا کہنا تھا، ’منصوبے تو تیار کیے جا رہے ہیں۔ فی الحال اس بارے میں تفصیلات میسر نہیں۔‘
ان کا کہنا ہے کہ اس مرحلے پر جو چیز اہم ہے وہ یہ ہے کہ بہت سے ممالک اس بات کا عزم ظاہر کریں کہ وہ آبنائے ہرمز کو کھولنے کے لیے ضروری اقدامات میں اپنا حصہ ڈالنے کے لیے تیار ہیں۔
وزیرِ دفاع کا مزید کہنا ہے کہ امریکہ اور ایران کے درمیان اب بات چیت ہو رہی ہے جس کا خیرمقدم کیا جانا چاہیے۔ ’کیونکہ اگر ہمیں آبنائے میں جہاز رانی دوبارہ شروع کرنی ہے، ہمیں خطے میں استحکام واپس لانا ہے، تو ہمیں اس تنازع کو ختم کرنے کا راستہ ڈھونڈنا ہوگا۔‘
