ایران کا دبئی میں یوکرینی ایٹی ڈرون سسٹم تباہ کرنے کا دعویٰ: ’یہ بالکل جھوٹ ہے،‘ کئیو کی تردید

لائیو کوریج

1. 28 مار چ 2026ایران کے ساتھ امریکہ اور اسرائیل کی جنگ میں حوثیوں کی مداخلت پر جنگ پھیلنے کے خدشات

   

   ،تصویر کا ذریعہReuters

   ایران کے ساتھ امریکہ اور اسرائیل کی جنگ میں حوثیوں کی مداخلت سے بحیرہ احمر کے قریب تنازع کے پھیلنے کے خدشات ظاہر کیے جا رہے ہیں۔

   حوثیوں نے سات اکتوبر 2023 کو حماس کے اسرائیل پر حملے کے بعد شروع ہونے والی لڑائی کے دوران بھی اسرائیل کی جانب میزائل داغے تھے۔

   حوثیوں نے بحیرہ احمر میں تجارتی جہازوں کو ڈرونز، میزائلوں اور ہیلی کاپٹرز کے ذریعے نشانہ بنایا تھا۔ اس کی وجہ سے کمپنیوں نے یہ روٹ اختیار کرنے کے بجائے افریقہ کا طویل روٹ اپنانے کو ترجیح دی تھی۔

   حوثیوں نے جنوری 2024 میں برطانوی اور امریکی جنگی جہازوں پر بھی حملے کیے تھے۔

   برطانیہ اور امریکہ نے جواب میں یمن میں حوثی اہداف کے خلاف متعدد حملے کیے اور حوثی باغیوں کے حملوں سے جہاز رانی کی حفاظت کے لیے رائل نیوی کا ایک ڈسٹرائر تعینات کیا۔

   مشرق وسطیٰ میں جنگ میں حوثیوں کی مداخلت آبنائے ہرمز، جہاں متعدد ٹینکروں پر حملہ کیا گیا ہے، ایران کی جانب سے مؤثر طریقے سے بند کیے جانے کے بعد جہاز رانی کے لیے مزید خدشات پیدا کر سکتے ہیں۔

   حوثی باغیوں نے 2014 سے شمال مغربی یمن کے زیادہ تر حصے پر کنٹرول کر رکھا ہے، جب اُنھوں نے دارالحکومت صنعا سے بین الاقوامی سطح پر تسلیم شدہ حکومت کو بے دخل کیا اوراس کے بعد خانہ جنگی شروع ہو گئی تھی۔

2. 28 مار چ 2026’اگر حوثیوں نے بحیرہ احمر میں بھی ناکہ بندی کی تو یہ ایک ڈراؤنا خواب ہو گا‘

   چتھم ہاؤس کے ریسرچ فیلو فاریہ المسلمی کا کہنا ہے کہ حوثیوں کی تنازع میں ​​شمولیت ’بڑی اہمیت‘ کی حامل ہے کیونکہ وہ ایک اور اہم بین الاقوامی تجارتی بحیرہ احمر پر بیٹھے ہیں۔

   بی بی سی ریڈیو 4 سے گفتگو کرتے ہوئے اُنھوں نے بتایا کہ حوثیوں نے ابھی تک یہ نہیں کہا ہے کہ وہ بحیرہ احمر پر حملہ کریں گے۔ ان کے خیال میں، وہ ’خود کو ایک اور امریکی حملے سے بچانے کی کوشش کر رہے ہیں۔‘

   خیال رہے کہ 2025 میں بحیرہ احمر میں حوثیوں کے حملے روکنے کے لیے برطانیہ کے ساتھ مل کر بمباری کی تھی۔

   آبنائے ہرمز کی بندش کے بعد بحیرہ احمر کی ممکنہ بندش کے سوال پر المسلمی کا کہنا تھا کہ ’یہ ایک ڈراؤنا خواب ہے۔ ہمارے پاس پہلے سے ہی ایک ڈراؤنا خواب ہے، اور یہ اسے مزید خوفناک بنا دے گا۔‘

3. 28 مار چ 2026حوثیوں نے اسرائیل پر میزائل حملے کی تصدیق کر دی

   یمن میں ایران کی حمایت یافتہ حوثیوں نے تصدیق کی ہے کہ انھوں نے امریکہ اور اسرائیل کے ایران کے ساتھ جنگ کے آغاز کے بعد پہلی بار اسرائیل پر حملہ کیا ہے۔

   گروپ کا کہنا ہے کہ اس نے ’حساس اسرائیلی فوجی مقامات کو نشانہ بنانے‘ کے لیے بیلسٹک میزائل داغے ہیں اور یہ اقدام ایران، لبنان، عراق اور فلسطینی علاقوں میں ہدف بنائے جانے کے جواب میں کیا گیا۔‘

   گروپ نے مزید کہا کہ اس کے آپریشنز تب تک جاری رہیں گے جب تک تمام محاذوں پر ’جارحیت‘ ختم نہیں ہو جاتی۔

4. 28 مار چ 2026جنوبی لبنان میں جھڑپوں میں دو اسرائیلی فوجی شدید زخمی

   

   ،تصویر کا ذریعہgettyimages

   اسرائیلی دفاعی افواج (آئی ڈی ایف) کا کہنا ہے کہ جنوبی لبنان میں جھڑپوں کے دوران دو فوجی شدید زخمی ہوئے ہیں۔

   آئی ڈی ایف نے ایکس پر کہا کہ جمعے کو راکٹ حملے کے دوران ایک افسر شدید زخمی ہوا اور چھ دیگر فوجی معمولی زخمی ہوئے۔

   اس کے علاوہ ایک اور افسر اینٹی ٹینک میزائل فائرنگ میں شدید زخمی اور ایک دوسرے افسر کو معمولی چوٹیں آئیں۔

5. 28 مار چ 2026ابوظہبی میں میزائل کا ملبہ گرنے سے پانچ انڈین شہری زخمی

   

   ،تصویر کا ذریعہGetty Images

   ابوظہبی میں فضائی دفاع کے ذریعے بیلسٹک میزائل کو ناکارہ بنانے کے دوران پانچ افراد زخمی ہو گئے ہیں۔

   ابوظہبی میڈیا آفس کے مطابق خلیفہ اکنامک زون کے قریب میزائل کا ملبہ گرنے سے پانچ انڈین شہری زخمی ہو گئے ہیں۔

   میڈیا آفس نے ایکس پر ایک پوسٹ میں مزید بتایا کہ ملبہ گرنے سے دو مقامات پر آگ لگی ہے جسے بجھایا جا رہا ہے۔

6. 28 مار چ 2026یمن کے حوثی باغی کون ہیں؟

   

   ،تصویر کا ذریعہReuters

   اسرائیلی ڈیفنس فورسز نے تصدیق کی ہے کہ یمن سے اسرائیل کی جانب میزائل داغا گیا ہے۔ خبر رساں اداروں روئٹرز اور اے ایف پی کے مطابق جنگ شروع ہونے کے بعد یمن سے داغا جانے والا یہ پہلا میزائل ہے۔

   یہ یمن کے ایران کے حمایت یافتہ حوثی باغیوں کے ترجمان کے اس بیان کے بعد سامنے آیا ہے کہ اگر ایران میں حملے جاری رہے تو وہ مشرق وسطیٰ میں جنگ میں داخل ہو جائیں گے۔

   یمن کے حوثی باغی ایک مسلح سیاسی اور مذہبی گروہ ہیں جو یمن کی شیعہ مسلم اقلیت کی نمائندگی کرتے ہیں۔

   وہ خود کو حماس اور لبنان کی حزب اللہ تحریک جیسے مسلح گروپوں کے ساتھ اسرائیل، امریکہ اور وسیع تر مغرب کے خلاف ایرانی قیادت میں ’مزاحمت کے محور‘ کا حصہ ہونے کا اعلان کرتے ہیں۔

   باضابطہ طور پر انھیں انصار اللہ (خدا کے فریقین) کے نام سے جانا جاتا ہے، یہ گروپ 1990 کی دہائی میں ابھرا اور اس کا نام تحریک کے مرحوم بانی حسین الحوثی سے منسوب ہے۔ گروپ کے موجودہ رہنما ان کے بھائی عبدالمالک الحوثی ہیں۔

   سنہ 2000 کی دہائی کے اوائل میں انھوں نے یمن کے طاقتور حکمرانوں کے خلاف کئی جنگیں لڑیں۔ جب یمن کی حکومت عرب سپرنگ کے مظاہروں کی بدولت اقتدار سے ہٹی تو حوثیوں نے دارالحکومت صنعا کی طرف پیش قدمی کی اور 2014 پر اقتدار پر اپنا قبضہ جما لیا۔

   جب سے سب سے غریب عرب ممالک میں سے ایک یمن میں حوثیوں نے اقتدار سنبھالا ہے یہاں خانہ جنگی سے کافی نقصان ہوا ہے۔

   قریب ڈیڑھ لاکھ لوگوں کی ہلاکت ہوئی ہے جبکہ لاکھوں لوگ خوراک کے لیے امداد پر انحصار کرتے ہیں۔

7. 28 مار چ 2026امریکہ کا ایک اور طیارہ بردار بحری بیڑا یو ایس ایس جارج ایچ ڈبلیو بش مشرقِ وسطیٰ کے لیے روانہ

   

   ،تصویر کا ذریعہGetty Images

   بی بی سی کے امریکی پارٹنر سی بی ایس نیوز کو متعدد ذرائع نے بتایا ہے کہ ایک اور امریکی طیارہ بردار بحری بیڑا یو ایس ایس جارج ایچ ڈبلیو بش مشرقِ وسطیٰ کی جانب روانہ کر دیا گیا ہے۔

   یہ طیارہ بردار بحری بیڑا 80 سے زائد طیارے لیجا سکتا ہے اور اسے مشرقِ وسطیٰ میں امریکی سینٹرل کمانڈ میں تعینات کیا جائے گا۔

   امریکی حکام نے سی بی ایس کو بتایا کہ بڑے پیمانے پر کیریئر اور اس کے سٹرائیک گروپ نے اس ماہ کے شروع میں تعیناتی سے پہلے کی تربیت مکمل کی تھی اور اب وہ ایران میں امریکی کارروائیوں میں شامل ہو سکتے ہیں۔

   اس سے قبل دو گائیڈڈ میزائل ڈسٹرائر - یو ایس ایس ڈونلڈ کک اور یو ایس ایس میسن بھی اس ہفتے ایران میں امریکی کارروائیوں میں شامل ہونے کے لیے امریکہ سے روانہ ہوئے تھے۔

   گائیڈڈ میزائل ڈسٹرائر یو ایس ایس راس بھی اس ہفتے امریکہ سے روانہ ہوا ہے، تاہم اس کی منزل کو ظاہر نہیں کیا گیا۔

8. 28 مار چ 2026حوثیوں کی جنگ میں شامل ہونے کی دھمکی کے بعد یمن سے اسرائیل پر میزائل حملہ

   

   ،تصویر کا ذریعہgettyimages

   اسرائیلی دفاعی افواج (آئی ڈی ایف) کا کہنا ہے کہ اس نے یمن سے اسرائیلی حدود کی جانب داغے گئے ایک میزائل کی نشاندہی کی ہے۔ خبر رساں اداروں روئٹرز اور اے ایف پی کے مطابق جنگ کے آغاز کے بعد یمن سے داغا جانے والا یہ پہلا میزائل ہے۔

   اسرائیلی فوج نے ٹیلیگرام پر لکھا کہ ’آئی ڈی ایف نے یمن سے اسرائیلی علاقے کی جانب میزائل داغے جانے کی نشاندہی کی ہے اور فضائی دفاعی نظام اس خطرے کو روکنے کے لیے کام کر رہے ہیں۔‘

   پندرہ منٹ سے بھی کم وقت بعد آئی ڈی ایف نے اعلان کیا کہ ملک بھر میں لوگ محفوظ پناہ گاہوں سے باہر آ سکتے ہیں۔

   یہ پیش رفت اس بیان کے بعد سامنے آئی ہے جس میں ایران کے حمایت یافتہ یمنی حوثیوں کے ترجمان نے کہا تھا کہ اگر ایران پر حملے جاری رہے تو وہ مشرق وسطیٰ کی جنگ میں شامل ہو جائیں گے۔

   یمنی مسلح افواج (حوثی دھڑے) کے ترجمان یحییٰ سریع نے ٹیلیگرام پر بیان میں کہا کہ ’براہِ راست فوجی مداخلت کے لیے ہماری انگلیاں ٹریگر پر ہیں‘ اور یہ اقدامات درج ذیل صورتوں میں کیے جائیں گے:

   • اگر کوئی اور ملک امریکہ اور اسرائیل کے ساتھ ایران کے خلاف شامل ہوتا ہے
   • اگر بحیرۂ احمر کو ’امریکہ اور اسرائیل کی جانب سے ایران یا کسی بھی مسلم ملک کے خلاف دشمنانہ کارروائیوں‘ کے لیے استعمال کیا جاتا ہے
   • اگر ایران کے خلاف کشیدگی میں مزید اضافہ ہوتا ہے

   بیان میں کہا گیا ہے کہ یہ مؤقف ’امریکہ اور اسرائیل کی جانب سے ایران، فلسطین و غزہ، عراق اور لبنان کے خلاف جاری جارحیت‘ کے ردعمل میں اختیار کیا گیا ہے۔

9. 28 مار چ 2026سعودی ایئر بیس پر حملے میں 12 امریکی فوجی زخمی ہوئے: امریکی میڈیا

   اس سے پہلے ہم نے امریکہ میں بی بی سی کے پارٹنر ادارے سی بی ایس کے حوالے سے بتایا تھا کہ سعودی ایئر بیس پر حملے میں 10 امریکی فوجی زخمی ہوئے ہیں۔ تاہم اب امریکی میڈیا کے مطابق اس حملوں میں کم از کم 12 امریکی فوجی زخمی ہوئے ہیں۔

   امریکی جریدے وال سٹریٹ جرنل کے مطابق کم از کم دو فوجی بہت شدید زخمی ہیں اور یہ حملہ اُس وقت ہوا جب وہ یہ فوجی سعودی ایئر بیس میں ایک عمارت کے اندر موجود تھے۔

   ذرائع نے نیویارک ٹائمز اور وال سٹریٹ جرنل کو بتایا کہ یہ حملہ ایک میزائل اور کئی ڈرونز کے ذریعے کیا گیا اس میں کئی فضائی ایندھن بھرنے والے طیاروں کو بھی نقصان پہنچا ہے۔

   پینٹاگون اور امریکی سینٹرل کمانڈ نے اس معاملے پر تبصرے کے لیے میڈیا اداروں کی درخواست پر تاحال کوئی جواب نہیں دیا۔

10. 28 مار چ 2026’ہو سکتا ہے کہ ضرورت پڑنے پر ہم بھی نیٹو کی مدد نہ کریں:‘ صدر ٹرمپ کا ایک بار پھر فوجی اتحاد پر ناراضگی کا اظہار

    

    ،تصویر کا ذریعہReuters

    امریکہ کے صدر ڈونلڈ ٹرمپ نے آبنائے ہرمز کو محفوظ بنانے کے لیے فوجی مدد بھیجنے سے انکار پر ایک بار پھر فوجی اتحاد نیٹو پر ناراضگی کا اظہار کرتے ہوئے کہا ہے کہ ہو سکتا ہے کہ ضرورت پڑنے پر ہم بھی نیٹو کی مدد نہ کریں۔

    جمعے کو میامی میں تقریب سے خطاب کرتے ہوئے صدر ٹرمپ کا کہنا تھا کہ ’ایسا لگتا ہے کہ اُن (نیٹو) کا کوئی وجود ہی نہیں ہے۔ حالانکہ ہم نیٹو پر سالانہ سینکڑوں ارب ڈالرز خرچ کرتے ہیں اور ہمیشہ ان کے ساتھ کھڑے ہوتے ہیں، لیکن اب ان کے اقدامات کی بنیاد پر میں سمجھتا ہوں کہ اب ہم ایسا کرنے کے پابند نہیں ہے۔‘

    صدر ٹرمپ کا کہنا تھا کہ ’اگر وہ ہمارے ساتھ نہیں ہیں تو پھر ہم ان کے لیے یہاں کیوں ہیں؟‘

11. 28 مار چ 2026تہران میں جمعے کی شب اور سنیچر کی صبح ہونے والے دھماکوں کی تصاویر

    ذرائع نے بی بی سی کو بتایا کہ تہران میں رات بھر زبردست حملے ہوتے رہے۔ ایرانی میڈیا کے مطابق دارالحکومت کے فضائی دفاعی نظام کو فعال کر دیا گیا ہے اور دھماکوں کی آوازیں اب بھی سنائی دے رہی ہیں۔

    

    ،تصویر کا ذریعہAnadolu via Getty Images

    

    ،تصویر کا ذریعہAnadolu via Getty Images

12. 28 مار چ 2026یمن کے حوثی باغیوں کی بھی جنگ میں شامل ہونے کی دھمکی

    

    ،تصویر کا ذریعہEPA

    یمن میں حوثی باغیوں نے جمعے کو دھمکی دی ہے کہ اگر ایران پر حملے جاری رہے تو وہ جنگ میں شامل ہو جائیں گے۔

    حوثی باغیوں نے اسرائیل اور امریکہ کو مشرقِ وسطیٰ میں جاری جنگ کے دوران حملوں کے لیے بحیرہ احمر کو استعمال کرنے کے خلاف خبردار بھی کیا ہے۔

    انصار اللہ گروپ کے فوجی ترجمان، بریگیڈیئر جنرل یحییٰ ساری نے ایک ویڈیو بیان میں تصدیق کی کہ اگر امریکہ اور اسرائیل نے ایران کے خلاف کارروائیاں جاری رکھیں تو وہ بھی جنگ میں شامل ہو سکتے ہیں۔

    اُن کا یہ بھی کہنا تھا کہ بحیرہ احمر کے ذریعے اسلامی جمہوریہ ایران اور کسی بھی مسلم ملک کے خلاف کارروائیاں کرنے کی اجازت نہیں دی جائے گی۔

    یہ بیانات حوثی رہنما عبدالمالک الحوثی کی جانب سے اس اعلان کے ایک روز بعد سامنے آئے ہیں جس میں اُنھوں نے کہا تھا کہ اگر مشرق وسطیٰ میں جنگ کے دوران ضرورت پڑی تو وہ ’فوجی کارروائی‘ میں ہچکچاہٹ محسوس نہیں کریں گے۔

    حوثیوں سے وابستہ المسیرہ ٹی وی سے نشر کی گئی ایک تقریر میں اُنھوں نے کہا: ’ہم بطور یمنی عوام، وفاداری کا بدلہ دیتے ہیں۔ یمن کی آزمائش میں، سرکاری سطح پر ہمارے ساتھ یکجہتی کرنے والا واحد ایران تھا اور عمومی سطح پر وہ مزاحمت کا محور تھا۔‘

13. 28 مار چ 2026سعودی ایئر بیس پر ایرانی حملے میں 10 امریکی فوجی زخمی ہوئے ہیں: رپورٹ

    ذرائع نے بی بی سی کے امریکی میڈیا پارٹنر ’سی بی ایس نیوز‘ کو بتایا ہے کہ سعودی عرب کے شہزادہ سلطان ایئربیس پر ایرانی حملے میں 10 امریکی فوجی زخمی ہوئے ہیں۔

    ذرائع نے بتایا کہ یہ حملے میزائلوں اور ڈرونز کے ذریعے کیے گئے۔

    ان میں سے دو امریکی فوجی ’بہت شدید‘ زخمی ہوئے جبکہ آٹھ ’شدید‘ زخمی ہوئے ہیں۔

14. 28 مار چ 2026اب معاملہ آنکھ کے بدلے آنکھ کا نہیں رہے گا: پاسداران انقلاب کے کمانڈر

    ایران میں شہری عمارتوں پر حملوں کے بعد پاسدارانِ انقلاب کے ایرو سپیس کمانڈر مجید موسوی کے ایکس اکاؤنٹ سے پوسٹ میں کہا گیا ہے کہ ’اب معاملہ آنکھ کے بدلے آنکھ کا نہیں رہے گا، انتظار کریں اور دیکھیں۔‘

    پوسٹ میں یہ بھی کہا گیا ہے کہ امریکہ اور اسرائیل سے منسلک صنعتی کمپنیوں کے ملازمین ’اپنی جانوں کو خطرے میں ڈالنے سے بچنے کے لیے فوراً اپنے دفاتر سے نکل جائیں۔‘

    موسوی کے اکاؤنٹ نے مزید لکھا کہ ’آپ پہلے بھی ہمیں آزما چکے ہیں۔ دنیا نے دوبارہ دیکھ لیا کہ آپ نے ہی آگ سے کھیلنا شروع کیا اور انفراسٹرکچر کو نشانہ بنایا۔‘

    ایک الگ پوسٹ میں ایران کے وزیرِ خارجہ عباس عراقچی نے کہا ہے کہ ’ایران اسرائیلی جرائم کی بھاری قیمت وصول کرے گا۔‘

    ایرانی میڈیا نے آج رپورٹ کیا ہے کہ مرکزی اصفہان میں واقع مبارکہ سٹیل پلانٹ کو نشانہ بنایا گیا ہے۔ اصفہان گورنریٹ کے ڈپٹی سکیورٹی اینڈ لا انفورسمنٹ آفیسر نے بتایا کہ اس حملے میں ایک شخص ہلاک اور دو زخمی ہوئے۔

    اسی طرح ایرانی میڈیا کی رپورٹس کے مطابق جنوبی ایران میں خوزستان سٹیل کمپنی پر بھی حملہ کیا گیا۔ خوزستان گورنریٹ کے ڈپٹی سکیورٹی اینڈ لا انفورسمنٹ آفیسر کے مطابق اس حملے میں 16 افراد زخمی ہوئے۔

15. 28 مار چ 2026ایران معاہدہ کرنا چاہتا ہے، ٹرمپ کا دعویٰ

    

    ،تصویر کا ذریعہGetty Images

    فلوریڈا میں میامی پہنچنے پر صحافیوں سے گفتگو کرتے ہوئے صدر ٹرمپ سے ایران کی تازہ صورتِ حال کے بارے میں سوال کیا گیا۔

    ٹرمپ نے کہا کہ ’وہ تباہ ہو رہے ہیں۔ ہم ان سے بات کر رہے ہیں، وہ معاہدہ کرنا چاہتے ہیں۔‘

    انھوں نے مزید کہا کہ ’بہت سادہ سی بات ہے، ہماری فوج دنیا کی سب سے بہترین فوج ہے، وہ سب سے بہت آگے ہے۔‘

16. 28 مار چ 2026’ایران، امریکہ مذاکرات ابھی ابتدائی مراحل میں ہیں‘, برنڈ ڈبسمین جونیئر، نامہ نگار برائے وائٹ ہاؤس

    میں نے ابھی اُن حکام کی بریفنگ میں شرکت کی ہے جو ایران جنگ کے خاتمے کے لیے ممکنہ مذاکرات سے باخبر ہیں۔

    ان حکام نے واضح کیا کہ امریکہ اور ایران کے درمیان کسی بھی باضابطہ مذاکرات میں ابھی کافی وقت لگے گا اور فی الحال فریقین کی بات چیت صرف پاکستان، ترکی اور مصر کے ثالثوں کے ذریعے بالواسطہ ہو رہی ہے۔

    حکام کے مطابق فریقین نے تجاویز کا تبادلہ تو کیا ہے لیکن وہ اب تک ’زیادہ سے زیادہ مطالبات‘ پر مبنی ہیں۔ امریکہ اور ایران کے درمیان اعتماد کی کمی اب بھی بہت گہری ہے۔

    انھوں نے یہ بھی بتایا کہ صورتِ حال تیزی سے بدل رہی ہے لیکن ابھی تک کوئی بھی فریق یہ نہیں سمجھتا کہ براہِ راست بات چیت کے لیے مشترکہ بنیاد موجود ہے۔

    اگر اور جب یہ بات چیت ہوتی ہے تو اس کا انعقاد ممکنہ طور پر پاکستان کے دارالحکومت اسلام آباد، یا استنبول، یا قاہرہ میں ہو سکتا ہے، یا پھر اگر متعدد مرحلے ضروری ہوں تو تینوں جگہوں پر۔

    قابلِ ذکر بات یہ ہے کہ حکام نے تسلیم کیا کہ یہ تعین کرنا مشکل ہے کہ ایرانی حکومت کی روزمرہ کمان کس کے ہاتھ میں ہے کیونکہ حکومت کو رابطے میں مشکلات کا سامنا ہے اور اعلیٰ قیادت میں ہونے والے جانی نقصان نے فیصلہ سازی پر اثر ڈالا ہے۔

17. 28 مار چ 2026امریکہ کو ’رواں ہفتے‘ ایران کے ساتھ ملاقاتوں کی امید ہے: وٹکوف

    امریکی صدر ڈونلڈ ٹرمپ کے خصوصی ایلچی سٹیو وٹکوف کا کہنا ہے کہ امریکہ ایران کے ساتھ ’رواں ہفتے‘ ملاقاتوں کے لیے پُرامید ہے۔

    میامی میں ایف 11 پرائیوریٹی ایونٹ سے خطاب کرتے ہوئے وٹکوف نے کہا کہ امریکہ کی ایران سے بات چیت جاری ہے۔ انھوں نے مزید کہا کہ ’ہمیں لگتا ہے کہ رواں ہفتے ملاقاتیں ہوں گی اور ہم اس بارے میں خاصے پُرامید ہیں۔‘

    انھوں نے کہا کہ ’بحری جہاز گزر رہے ہیں جو کہ اچھی علامت ہے۔‘

    اپنی گفتگو جاری رکھتے ہوئے وٹکوف نے کہا کہ ٹرمپ ایک امن معاہدہ چاہتے ہیں۔ ’ہمارے پاس 15 نکاتی منصوبہ موجود ہے جو ایرانیوں کے پاس کچھ عرصے سے ہے۔ ہم ان کے جواب کے منتظر ہیں۔‘

18. 28 مار چ 2026ایران پر حملے ٹرمپ کی سفارت کاری کے لیے دی گئی مہلت کے منافی ہیں: عراقچی

    ایران کے وزیرِ خارجہ عباس عراقچی کا کہنا ہے کہ اسرائیل نے ’ایران کے دو بڑے سٹیل کے کارخانوں، ایک پاور پلانٹ اور سویلین جوہری تنصیبات سمیت متعدد شہری عمارتوں پر حملہ کیا ہے۔‘

    ایکس پر جاری اپنے پیغام میں انھوں نے کہا کہ ’اسرائیل کا دعویٰ ہے کہ اس نے یہ کارروائی امریکہ کے ساتھ ہم آہنگی کے بعد کی اور یہ حملہ ’امریکی صدر کی سفارت کاری کے لیے دی گئی اضافی مہلت کے منافی ہے۔‘

    ان کا کہنا تھا کہ ایران اس کی ’بھاری قیمت‘ وصول کرے گا۔

    یہ بیان ایسے وقت میں سامنے آیا ہے جب امریکی صدر ڈونلڈ ٹرمپ نے ایرانی توانائی کے انفراسٹرکچر پر کسی بھی حملے کو مزید 10 دن کے لیے روکنے کا اعلان کیا تھا اور اس اعلان کو 24 گھنٹے سے بھی کم وقت گزرا ہے۔

    اسی دوران اسرائیلی فوج نے تصدیق کی ہے کہ اس نے مرکزی ایران میں اراک ہیوی واٹر پلانٹ کو نشانہ بنایا ہے۔

19. 27 مار چ 2026عراقچی کا امریکہ اور اسرائیل پر شہری مراکز کو نشانہ بنانے کا الزام

    

    ،تصویر کا ذریعہReuters

    ایرانی وزیرِ خارجہ عباس عراقچی نے امریکی اور اسرائیلی افواج پر ’غیر قانونی حملوں‘ کے ذریعے ’شہری تنصیبات اور مراکز‘ کو نشانہ بنانے کا الزام لگایا ہے جن میں سکول، ہسپتال، تاریخی و ثقافتی عمارتیں اور رہائشی علاقے شامل ہیں۔

    ایرانی سرکاری میڈیا سے بات کرتے ہوئے ان کا کہنا تھا کہ ایران ’قوم کے دفاع‘ کے لیے اپنے عزم پر قائم ہے۔

    ٹیلیگرام پر پاسدارانِ انقلاب سے منسلک خبر ایجنسی ارنا نے مزید کہا کہ عراقچی نے روسی وزیرِ خارجہ کے ساتھ ٹیلیفون پر بات چیت کے دوران جنگ کی صورتِ حال پر تبادلۂ خیال کیا۔

    ارنا کے مطابق عراقچی کا کہنا تھا کہ آبنائے ہرمز میں پیدا ہونے والی بدامنی امریکہ اور اسرائیل کی فوجی کارروائی کا نتیجہ ہے اور ایران کو گزرنے والے بحری جہازوں کو روکنے کا ’قانونی حق‘ حاصل ہے۔

20. 27 مار چ 2026امریکہ کو 15 نکاتی امن منصوبے پر ایران کے جواب کا انتظار: ’امریکی آپریشن جاری رہے گا‘

    

    ،تصویر کا ذریعہGetty Images

    امریکی سیکریٹری خارجہ مارکو روبیو کا کہنا ہے کہ امریکہ زمینی فوجی دستے بھیجے بغیر ایران جنگ کے اہداف حاصل کر سکتی ہے جبکہ وہ 15 نکاتی امن منصوبے پر ایران کے جواب کے منتظر ہیں۔

    جی سیون کے وزرائے خارجہ کے اجلاس کے بعد جب ان سے پوچھا گیا کہ آیا امریکہ مشرقِ وسطیٰ میں زمینی فوج اتارنے پر غور کر رہا ہے تو روبیو نے کہا کہ وہ فوجی حکمتِ عملی پر بات نہیں کریں گے۔

    تاہم ان کا کہنا تھا کہ امریکہ کے مقاصد واضح ہیں اور ’ہمیں پورا یقین ہے کہ ہم بہت جلد ان کے حصول کے قریب ہیں‘۔

    ایران میں امریکی کارروائی کب تک جاری رہے گی؟ اس سوال کے جواب میں روبیو نے کہا کہ ’یہ معاملہ ہفتوں کا ہے، مہینوں کا نہیں۔‘

    روبیو نے مزید کہا کہ یہ ’ایک طویل جنگ نہیں۔‘

    جب ان سے دوبارہ پوچھا گیا کہ کیا امریکہ ایران میں زمینی فوج بھیجے گا تو ان کا کہنا تھا کہ امریکہ اپنے اہداف ’کسی بھی زمینی فوج کے بغیر حاصل کر سکتا ہے۔‘

    ان سے پوچھا گیا کہ کیا وہ آج امریکہ کے 15 نکاتی منصوبے پر ایران کے جواب کی توقع کر رہے ہیں؟

    بی بی سی کے شراکت دار سی بی ایس نیوز نے ذرائع کے حوالے سے خبر دی تھی کہ ایران کا جواب جمعے کو متوقع ہے۔

    روبیو نے کہا کہ ’ہمیں ابھی تک کچھ نہیں ملا‘۔

    انھوں نے کہا کہ ایرانی جواب ’کسی بھی لمحے آ سکتا ہے‘ اور وہ ’کوئی پیشگوئی نہیں کریں گے۔‘

    ’اس دوران ہماری کارروائی جاری ہے۔‘

    اس کے علاوہ روبیو نے کہا ہے کہ ’اس جنگ میں ہم کسی سے مدد نہیں مانگ رہے۔‘

    انھوں نے کہا کہ ایران آبنائے ہرمز میں ٹول وصولی کا نظام قائم کرنے کا فیصلہ کر سکتا ہے جو کہ ’ناقابل قبول‘ ہو گا۔

    انھوں نے کہا کہ پوری دنیا کو اس پر ’برہم ہونا چاہیے‘۔ تاہم ان کا یہ بھی کہنا تھا کہ اس اہم تجارتی راستے میں ممکنہ ٹول سسٹم سے سب سے زیادہ متاثر ہونے والے ممالک کو ’کچھ کرنا چاہیے۔‘