بشار الاسد اور ان کی فیملی شام سے ماسکو پہنچ چکے ہیں جہاں انھیں پناہ دی جائے گی: روسی سرکاری میڈیا

روسی سرکاری خبر رساں اداروں نے کریملن میں ذرائع کے حوالے سے خبر دی ہے کہ معزول شامی صدر بشارالاسد اور ان کی فیملی ماسکو پہنچ چکے ہیں۔ بی بی سی تاحال ان معلومات کی آزادانہ تصدیق نہیں کر پایا۔

خلاصہ

روس کی وزارت خارجہ نے کہا ہے کہ بشارالاسد نے اپنا عہدہ اور ملک چھوڑنے سے قبل تنازع میں شریک تمام مسلح گروہوں سے بات چیت کی ہے۔
ایرانی میڈیا کے مطابق شام کے دارالحکومت دمشق میں ایرانی سفارتخانے پر حملے کی اطلاعات موصول ہوئی ہیں۔
اطلاعات ہیں کہ شام کے صدر بشارالاسد اپنا ملک چھوڑ کر کہیں کسی اور ملک جا چکے ہیں۔ تاہم ابھی تک یہ نہیں معلوم کے آخر وہ کس ملک گئے ہیں؟
باغی گروہ ہیئت تحریر شام کا کہنا ہے کہ وہ ’کسی بھی صورت میں‘ کیمیائی ہتھیاروں کا استعمال نہیں کریں گے۔
روسی وزیرِ خارجہ نے کہا ہے کہ باغی گروہ ہیئت تحریر شام کے عسکری آپریشن کی ’منصوبہ بندی لمبے عرصے پہلے کی گئی تھی۔‘
اقوامِ متحدہ کے نمائندہ برائے شام گیئر پیڈرسن نے مطالبہ کیا ہے کہ شامی حکومت اور اپوزیشن کے درمیان اقتدار کی منتقلی کے حوالے سے سکیورٹی کونسل کی قرارداد کے تحت ’فوری سیاسی مذاکرات‘ ہونے چاہییں۔

لائیو کوریج

پیشکش: محمد صہیب اور اعظم خان

8 دسمبر 2024بشار الاسد آخر ہیں کہاں؟
،تصویر کا ذریعہReuters
باغی فورسز نے شام کے دارالحکومت دمشق کا کنٹرول حاصل کر لیا ہے۔ انھوں نے اتوار کی صبح یہ اعلان کیا ہے کہ بشارالاسد کی حکومت کا خاتمہ کر دیا گیا ہے۔ بشارالاسد گذشتہ 25 برس سے شام کے مطلق العنان حکمران تھے۔
تاہم ابھی یہ واضح نہیں ہے کہ اقتدار کے خاتمے کے بعد بشارالاسد گئے کہاں ہیں۔
وہ چنگاری جس سے مشرق وسطیٰ میں انقلابی تحریکوں نے جنم لیا
دمشق پر حملہ کرنے والے باغی کون ہیں؟
ایسی اطلاعات ہیں کہ شام کے معزول ہونے والے صدر ایک طیارے پر سوار ہو کر دمشق سے باہر چلے گئے ہیں۔ خبر رساں ادارے روئٹرز کا کہنا ہے کہ دو سینیئر عسکری حکام نے بتایا ہے کہ بشارالاسد اتوار کو دمشق سے کسی نامعلوم مقام پر چلے گئے ہیں۔
ترکی کے وزیر خارجہ کا کہنا ہے کہ اس بات کے قوی امکان ہیں کہ بشارالاسد شام چھوڑ چکے ہیں مگر انھوں نے بھی یہ نہیں بتایا کہ وہ آخر گئے کہاں ہیں۔ متحدہ عرب امارات کے بھی ایک سینیئر اہلکار نے بھی اپنے ملک میں بشارالاسد کی موجودگی یا عدم موجودگی سے متعلق تصدیق یا تردید نہیں کی ہے۔
8 دسمبر 2024اسرائیل کا شام کے ساتھ بفر زون میں فوج تعینات کرنے کا اعلان
باغی فورسز کے دمشق میں داخلے کے بعد اسرائیلی فوج نے اتوار کے روز ایک بیان میں کہا کہ اس نے شام کے ساتھ اقوام متحدہ کے زیر نگرانی بفر زون میں افواج تعینات کر دی ہیں۔
اسرائیلی فوج کے بیان میں کہا گیا ہے کہ یہ قدم بفر زون کے تحفظ اور اسرائیل اور اس کے شہریوں کے دفاع کے لیے اٹھایا گیا ہے۔
شامی باغیوں کی دمشق کی جانب پیش قدمی: بشار الاسد کی قسمت ’غیر ملکی اتحادیوں کے ہاتھ میں‘
دریائے نیل سے نہرِ فرات تک پھیلے ’گریٹر اسرائیل‘ کا تصور صرف ’شدت پسندوں کا خواب‘ ہے یا کوئی ٹھوس منصوبہ
فوج نے زور دیا کہ وہ ’شام کے اندرونی واقعات میں مداخلت نہیں کرتی۔‘
بفر زون تقریباً 80 کلومیٹر طویل ہے اور اس کا رقبہ 235 مربع کلومیٹر ہے جو کہ گولان کی پہاڑیوں کے مقبوضہ حصے کو شام کے باقی حصوں سے الگ کرتا ہے۔
8 دسمبر 2024دمشق میں عراقی سفارتخانہ خالی کرا دیا گیا
اطلاعات کے مطابق شام کے دارالحکومت دمشق میں عراق کا سفارتخانہ خالی کرا دیا گیا ہے۔ عراقی میڈیا نے ان اطلاعات کی تصدیق کی ہے ان کے سفارتخانے سے عملے کو باہر نکال لیا گیا ہے۔
کیا بشار الاسد کو ’مجرم‘ کہنے والے ترک صدر اردوغان شام میں باغیوں کی حمایت کر رہے ہیں؟
شام کی جنگ میں اسرائیل کا امتحان: بشار الاسد کی بے ضرر حکومت کو بچائے یا باغیوں کی صورت میں ایک نیا خطرہ مول لے؟
خبر رساں ادارے اے ایف پی نے بھی سفارتی ذرائع سے یہ خبر چلائی ہے۔
8 دسمبر 2024دمشق میں ایرانی سفارتخانے پر حملے کی اطلاعات
،تصویر کا ذریعہReuters
ایرانی میڈیا کے مطابق شام کے دارالحکومت دمشق میں ایرانی سفارتخانے پر حملے کی اطلاعات موصول ہوئی ہیں۔
عرب نیوز کے ادارے العربیہ کی طرف سے ایک ویڈیو شیئر کی گئی جس میں ایرانی سفارتخانے کی عمارت کے بیرونی حصے کو پہنچنے والے نقصان کو دکھایا گیا ہے۔ اس عمارت کی کھڑکیاں ٹوٹی ہوئی ہیں اور کمروں کی حالت بھی ابتر ہوئی ہے۔ ان کمروں کے فرش پر پتھر اور کاغذ بکھرے پڑے ہیں۔
بشار الاسد: لندن میں امراض چشم کے ڈاکٹر سے شام کے آمر تک
دمشق پر قبضے کا دعویٰ کرنے والا عسکریت پسند گروہ ’ہیئت تحریر الشام‘ جو ماضی میں القاعدہ کا اتحادی تھا
فوٹیج میں دیکھا جا سکتا ہے کہ اس عمارت پر لٹکی ایرانی جنرل قاسم سلیمانی اور حزب اللہ کے رہنما حسن نصراللہ کی تصاویر کو بھی پھاڑی گئی ہیں۔ یہ دونوں رہنما مارے گئے ہیں اور انھیں ایران میں ہیروز کا درجہ حاصل ہے۔
خبر رساں ادارے روئٹرز کی تصویر میں بھی ان دونوں رہنماؤں کی تصاویر کو پھٹا ہوا دکھایا گیا ہے۔
8 دسمبر 2024کیا بشارالاسد متحدہ عرب امارات میں ہیں؟ صحافیوں کے سوال پر یو اے ای کے سفارتکار نے کیا جواب دیا؟
،تصویر کا ذریعہGetty Images
اطلاعات ہیں کہ شام کے صدر بشارالاسد اپنا ملک چھوڑ کر کہیں کسی اور ملک جا چکے ہیں۔ تاہم ابھی تک یہ نہیں معلوم کے آخر وہ کس ملک گئے ہیں؟ متحدہ عرب امارات کے صدر کے مشیر نے بی بی سی کو بتایا کہ انھیں یہ معلوم نہیں ہے کہ بشارالاسد یو اے ای میں ہیں یا نہیں۔
بشار الاسد: لندن میں امراض چشم کے ڈاکٹر سے شام کے آمر تک
کیا بشار الاسد کو ’مجرم‘ کہنے والے ترک صدر اردوغان شام میں باغیوں کی حمایت کر رہے ہیں؟
بحرین میں ماناما ڈائیلاگ کے موقع پر صحافیوں سے بات کرتے ہوئے انور گرگیش نے ان قیاس آرائیوں پر تبصرہ کرنے سے انکار کیا ہے کہ بشاالاسد متحدہ عرب امارات منتقل ہو چکے ہیں۔
جب پوچھا گیا کہ بشارالاسد کہاں جا رہے ہیں۔ اس پر انھوں نے کہا کہ یہ تاریخ میں زیادہ اہمیت کی حامل بات نہیں رہے گی۔ مجھے نہیں لگتا کہ یہ کوئی اہم بات ہے۔ جیسا کہ میں نے پہلے بھی کہا کہ یہ بڑے واقعات میں سے ایک چھوٹی پیشرفت ہے۔
انور گرگیش نے کہا کہ شام ابھی بحران سے باہر نہیں نکلا ہے اور ابھی بھی انتہاپسندی اور دہشتگردی کے خطرات سے دوچار ہے۔
8 دسمبر 2024بشارالاسد کے جانے سے لوگ خوش ہیں، لیکن آگے کیا ہو گا؟, ہیوگو بچیگا، نامہ نگار برائے مشرق وسطیٰ
،تصویر کا ذریعہGetty Images
ماضی میں روس اور ایران کی مدد سے بشارالاسد اپنے مخالفین کو کچلنے میں کامیاب رہے۔
لیکن اب کی بار ایسا نہیں ہوا۔
اپنے اپنے تنازعات میں گھڑے بشارالاسد کے اتحادیوں نے انھیں اس بار اکیلا چھوڑ دیا۔ اتحادیوں کی مدد بغیر ان کی فوج باغیوں کو روکنے میں ناکام رہی۔ کئی مقامات پر تو ایسا لگا جیسے وہ باغیوں روکنا چاہتے بھی نہیں ہیں۔
گذشتہ ہفتے باغیوں نے حلب پر قبضہ کیا، اس کے بعد حماۃ اور کچھ ہی دنوں میں حمص کا کنٹرول حاصل کر لیا۔ اگلے چند گھنٹوں میں ہی باغی دمشق میں داخل ہو رہے تھے۔
بہت سے لوگ بشارالاسد کے جانے سے خوش ہیں۔ لیکن آگے کیا ہوگا؟
یہ ایک ایسی بغاوت ہے جس کی قیادت ہیئت تحریر الشام کر رہی ہے۔ یہ ایک ایسی تنظیم ہے جس کی جڑیں القاعدہ سے ملتی ہیں اور اس کا ایک پر تشدد ماضی رہا ہے۔
حالیہ برسوں میں انھوں نے خود کو ایک قومی فورس کے طور پر پیش کرنے کی کوشش کی ہے۔ ان کے حالیہ بیانات بھی کافی مفاہمتی دکھائی دیتے ہیں۔
لیکن ہر کوئی اس سے قائل نہیں۔ بہت سے لوگوں کو ڈر ہے کہ شاید وہ کرنے کی منصوبہ بندی کر رہے ہوں۔
8 دسمبر 2024ملک میں آزاد انتخابات ہونے چاہییں: شامی وزیر اعظم محمد غازی الجلالی
شام کے وزیرِ اعظم محمد غازی الجلالی نے عربی خبر رساں ادارے العربیہ کو دیے گئے ایک انٹرویو میں کہا ہے کہ ملک میں آزادانہ انتخابات ہونے چاہیے۔
روئٹرز کے مطابق العربیہ کو دیے گئے انٹرویو میں انھوں نے اس بات کا ذکر کیا کہ اقتدار کی منتقلی کے حوالے سے وہ باغی رہنما ابو محمد الجولانی سے رابطے میں ہیں۔
آج صبح العربیہ نے شامی وزیرِ اعظم کے حوالے سے کہا تھا کہ ان کی صدر بشارالاسد سے آخری بار گذشتہ شب بات ہوئی تھی۔ وزیرِ اعظم کا کہنا تھا کہ ان کے پاس اس بارے میں کوئی اطلاع نہیں کہ صدر بشارالاسد اس وقت کہاں ہیں۔
اس سے قبل شامی وزیرِ اعظم کا ایک بیان سامنے آیا تھا جس میں ان کا کہنا تھا کہ جو عوام کے حق میں بہتر ہوگا، وہ کرنے کے لیے تیار ہیں۔
8 دسمبر 2024افغان طالبان بشارالاسد کی حکومت جانے سے خوش کیوں ہیں؟, حفیظ اللہ معروف، بی بی سی افغان سروس
،تصویر کا ذریعہEPA-EFE/REX/Shutterstock
افغانستان اور شام کی سرحدیں نہیں ملتی، بلکہ ان دونوں ممالک کے درمیان ہزاروں کلومیٹرز کا فاصلہ ہے۔ تاہم اس کے باوجود افغان طالبان میں شام کے باغیوں کے لیے حمایت پائی جاتی ہے۔
طالبان حکومت کی جانب سے شام کی صورتحال کو لے کر سرکاری سطح پر تاحال کوئی بیان جاری نہیں کیا گیا لیکن سوشل میڈیا پر جو دکھائی دے رہا ہے وہ کم حیران کن نہیں ہے۔
*بشار الاسد: لندن میں امراض چشم کے ڈاکٹر سے شام کے آمر تک
طالبان شدت پسند سنی نظریات رکھنے والا جہادی گروہ ہے۔ ایک طالب نے مجھے بتایا کہ طالبان میں شام کے باغیوں کے لیے پائی جانے والی حمایت کی ایک وجہ یہ ہے کہ دونوں گروہ ایک جیسے نظریات رکھتے ہیں۔
سینیئر طالبان حکام کو امید ہے کہ باغی گروہ شام میں شریعہ قوانین نافذ کریں گے جیسے طالبان نے افغانستان میں کیا ہے۔
8 دسمبر 2024شام ایک دوراہے پر کھڑا ہے ’جن لوگوں کا مسلک باغیوں کی طرح سنی نہیں، انھیں مستقبل کا خوف ہے‘, فرینک گارڈنر، سکیورٹی نامہ نگار
،تصویر کا ذریعہReuters
جب خوشی میں کی جانے والی ہوائی فائرنگ تھمے گی اور بشارالاسد کی جیلوں میں قید تمام افراد رہا ہو جائیں گے تو شام اپنے آپ کو ایک دوراہے پر کھڑا پائے گا۔
یہاں سے آگے کچھ بھی ہو سکتا ہے۔
اگر ہیئت تحریر الشام کے رہنما ابو محمد الجولونی اپنے وعدے پر قائم رہے تو ہوسکتا ہے کہ شام ایک جمہوریت پسند ملک بن جائے جسے اقوامِ متحدہ اور دیگر کی حمایت حاصل ہو۔
لیکن ہیئت تحریر الشام اور اس کے اتحادیوں کا ایک تشدد پسند ماضی رہا ہے جس میں انسانی حقوق کی پامالی عام بات تھی۔اقوام متحدہ اور کئی حکومتوں نے اسے کالعدم تنظیم قرار دیا ہوا ہے۔
القاعدہ ابھی سے ہی باغیوں کو ’یہودیوں اور صلیبیوں‘ کے خلاف کارروائیوں کے لیے اکسا رہی ہے۔
شام میں بہت سے اقلیتیں مقیم ہیں اور جن لوگوں کا مسلک باغیوں کی طرح سنی نہیں، انھیں مستقبل کا خوف ہے۔
اگرچہ ایسے کچھ حوصلہ افزا علامات موجود ہیں کہ اقتدار کی پرامن منتقلی ممکن ہے لیکن اس بات کا خطرہ ابھی ٹلا نہییں کہ شام بھی لیبیا کی راہ پر گامزن ہو سکتا ہے اور مسلح گروہوں کے درمیان لڑائی، لوٹ مار اور تباہی کی دلدل میں اتر سکتا ہے۔
8 دسمبر 2024لبنان اور شام کے درمیان بارڈر پر سرحد پار کرنے والوں کا ہجوم, لینا سنجاب، بی بی سی نیوز
لبنان اور شام کے بارڈر پر واقع مسنا کے مقام پر اس وقت لوگوں کا ہجوم سرحد پار کرنے کے لیے جمع ہے۔
جو لوگ لبنان میں موجود تھے وہ وطن واپسی کے لیے آزادی کے اس لمحے کے طویل عرصے سے منتظر تھے۔
کچھ نوجوان کراسنگ پر جمع ہوئے ہیں اور حزب اختلاف کا سبز پرچم تھامے انقلاب اور آزادی کے نغمے گا رہے ہیں۔
شام کے سرحدی حصے سے متعلق ہمیں بتایا جا رہا ہے کہ اس وقت وہاں کوئی کسٹم اہلکار موجود نہیں نہ کوئی سکیورٹی چوکی ہے یہاں تک کے پاسپورٹ پر مہر بھی نہیں لگائی جا رہی۔
دمشق میں موجود لوگوں نے ہمیں باغیوں کی فوٹیجز بھیجی ہیں جس میں وہ دیرہ سے شہر کے وسط میں آتے دیکھے جا سکتے ہیں۔
سابق سکیورٹی اہلکاروں نے ہمیں بتایا کہ انھیں راتوں رات اپنی پوزیشن چھوڑنے اور سرحدی کراسنگ پر کارروائیاں روکنے کا حکم دیا گیا تھا اور تب سے وہ بند ہے۔ وہاں باغی انچارج ہیں اور پولیس یا کسٹم حکام لوگوں کو اندر جانے کی اجازت نہیں دے رہے۔
فی الحال یہ واضح نہیں کہ یہ کراسنگ پوائنٹ کب کھلے گا تاکہ لبنان کی جانب منتظر لوگ سرحد پار کر سکیں۔
8 دسمبر 2024شام کے سرکاری ٹی وی، ’دمشق ریڈیو‘ سے باغیوں کا پہلا پیغام نشر
،تصویر کا ذریعہReuters
شام میں باغیوں کی جانب سے دمشق میں داخل ہونے کے بعد سرکاری ٹی وی اور دمشق ریڈیو سے ایک پیغام نشر کیا گیا ہے۔
پیغام میں کہا گیا ہے کہ انھوں نے صدر بشارالاسد کی حکومت کا تختہ الٹ دیا ہے اور سیاسی قیدیوں کو رہا دیا ہے۔
نشر کیے گئے پیغام میں باغی ’مجاہدین اور شہریوں‘ سے آزاد شام کی املاک کو نقصان نہ پہچانے کا کہہ رہے ہیں۔
’تمام فرقوں سے تعلق رکھنے والے شہریوں کے لیے ایک آزاد اور قابل فخر شام زندہ باد‘۔
8 دسمبر 2024بشارالاسد کی حکومت اتنا جلدی کیسے گر گئی؟
،تصویر کا ذریعہReuters
بظاہر تو ایسا لگتا ہے کہ شام میں صدر بشارالاسد کی حکومت محض چند دنوں میں گر گئی لیکن یہ معاملہ اتنا سادہ نہیں اور اس کے پیچھے کئی عوامل شامل ہیں۔
میلبرن یونیورسٹی سے تعلق رکھنے والے پولیٹیکل تجزیہ کار دارا کونڈئیٹ کہتی ہیں کہ سالوں سے جاری جنگ نے بشارالاسد کی فوج کو بہت کمزور کر دیا ہے۔
انھوں نے بی بی سی نیوز کو بتایا کہ بشارالاسد کے اتحادی روس، ایران اور حزب اللہ سب ہی اپنے اپنے تنازعات میں گھرے ہوئے ہیں۔
ان کے مطابق بشارالاسد کی پوزیشن کافی کمزور ہے۔
تاہم، ان کا کہنا ہے کہ اس سب کے باوجود جتنی جلدی یہ سب ہوا ہے وہ بہت حیران کن ہے۔
شام کے تیسرے بڑے شہر حمص پر باغیوں کے قبضے کے کچھ ہی دیر بعد اطلاع آئی کہ بشارالاسد مخالف فورسز دارالحکومت دمشق میں داخل ہو گئی ہیں اور صدر ایک طیارے میں دمشق سے نامعلوم منزل کی طرف روانہ ہو گئے ہیں۔
8 دسمبر 2024صبح سویرے دمشق میں جشن کے مناظر
اتوار کے روز باغی فورسز کے جنگجو شام کے دارالحکومت دمشق میں داخل ہوگئے۔ اس کے ساتھ ہی یہ اطلاعات بھی سامنے آئیں کہ صدر بشارالاسد ملک چھوڑ کر چلے گئے ہیں۔
باغیوں کے شہر میں داخل ہونے کے بعد شہر کے کئی مقامات پر لوگ جشن مناتے بھی دکھائی دیے۔
،تصویر کا ذریعہGetty Images
،تصویر کا کیپشندمشق کے مضافاتی علاقے جرمانا میں تین خواتین تصویر کے لیے پوز کر رہی ہیں۔
،تصویر کا ذریعہGetty Images
،تصویر کا کیپشنشہریوں کا دمشق کی سڑکوں پر جشن
،تصویر کا ذریعہGetty Images
،تصویر کا ذریعہGetty Images
،تصویر کا کیپشندمشق کے مضافاتی علاقے جرمانا میں شہری جشن منا رہے ہیں
8 دسمبر 2024کسی کے خلاف انتقامی کارروائی نہیں کی جائے گی، شامی حزبِ اختلاف کے رہنما کی عوام کو یقین دہانی
،تصویر کا ذریعہReuters
شامی انقلاب اور اپوزیشن فورسز کے قومی اتحاد کے سربراہ ہادی البحرا نے خبر رساں ادارے العربیہ سے بات کرتے ہوئے کہا ہے کہ بشارالاسد کی حکومت کے خاتمے کے ساتھ ہی ’شام کے تاریک دور‘ کا خاتمہ ہو گیا ہے۔
انھوں نے عوام کو یقین دلایا ہے کہ دمشق میں صورتحال محفوظ ہے اور کہا کہ کسی کے خلاف انتقامی کارروائی نہیں کی جائے گی۔
سماجی رابطے کی ویب سائٹ ایکس پر اپنے ایک پیغام میں ان کا کہنا تھا کہ وہ تمام افراد جو کسی دوسرے شہری کے خلاف ہتھیار نہیں اٹھائیں گے اور اپنے گھروں میں رہیں گے، بنا کسی فرقہ وارانہ یا مذہبی تفریق کے وہ محفوظ ہیں۔
8 دسمبر 2024دیکھنا ہوگا کہ کیا باغی گروپس ہم آہنگی برقرار رکھ پائیں گے: مشرقِ وسطیٰ کے امور کی ماہر نتاشہ ہال کا تجزیہ
،تصویر کا ذریعہGetty Images
سینٹر فار سٹریٹیجک اینڈ انٹرنیشنل سٹڈیز میں مشرقِ وسطیٰ کے امور کی ماہر نتاشہ ہال کا کہنا ہے کہ ان کے خیال میں یہ بشارالاسد کی حکومت کا خاتمہ ہے۔
جب ان سے باغیوں کے آپسی تعلقات کے بارے میں سوال کیا گیا تو ان کا کہنا تھا باغی گروپوں میں ’سب سے زیادہ منظم اور طاقتور‘ ہیئت تحریر الشام ہے جو ان گروہوں کی قیادت کر رہی ہے۔
ان کا کہنا تھا کہ دیگر گروہوں کے مقابلے میں ہیئت تحریر الشام پر غیر ملکی طاقتوں کا اثر و رسوخ بہت کم ہے۔ ان کے مطابق دیگر باغی گروپس ترکی کے زیرِ اثر چل رہے ہیں۔
نتاشہ کہتی ہیں کہ ابھی یہ دیکھنا باقی ہے کہ یہ گروپس ایک دوسرے اور خصوصاً شمال مشرق میں موجود کرد گروہوں کے ساتھ کیسے ہم آہنگی برقرار رکھتے ہیں۔
8 دسمبر 2024عوام جس کو بھی چنیں گے میں اس کے ساتھ تعاون کرنے کے لیے تیار ہوں: وزیرِ اعظم محمد الجلالی
،تصویر کا ذریعہSyrian government
،تصویر کا کیپشنفائل فوٹو شامی وزیرِ اعظم محمد الجلالی
باغی گروہ ہیئت تحریر الشام کے رہنما ابو محمد الجولانی کا کہنا ہے کہ اقتدار کی باضابطہ منتقلی تک عوامی ادارے وزیرِ اعظم محمد الجلالی کے ماتحت کام کرتے رہیں گے۔
دمشق میں موجود تمام جنگوؤں سے خطاب کرتے ہوئے ان کا کہنا تھا کہ کوئی بھی جنگجو عوامی اداروں میں داخل نہ ہوں۔ انھوں نے ہوائی فائرنگ پر بھی پابندی عائد کردی ہے۔
باغیوں کی جانب سے صدر بشارالاسد کی شام سے فرار ہونے کے دعوے کے بعد وزیرِ اعظم محمد الجلالی نے اعلان کیا ہے کہ عوام جس کو بھی چنیں گے وہ اس کے ساتھ تعاون کرنے کے لیے تیار ہیں۔
ان کا کہنا تھا کہ وہ اتوار کے روز اپنے دفتر میں ہوں گے اور وہ اقتدار کی منتقلی کے کسی بھی طریقہ کار کے لیے تیار ہیں۔
شام کے دو سینیئر فوجی حکام نے خبر رساں ادارے روئٹرز کو بتایا ہے کہ صدر بشار الاسد طیارے میں سوار ہو کر دمشق سے نامعلوم منزل کی طرف روانہ ہو گئے ہیں۔
8 دسمبر 2024شامی صدر کے دمشق چھوڑنے کی اطلاعات: ’عوام نے بشار الاسد کا تختہ الٹ دیا‘ باغیوں کا دعویٰ
،تصویر کا ذریعہGetty Images
باغی فوجیوں نے شام کو ’آزاد‘ قرار دیتے ہوئے دعویٰ کیا ہے کہ صدر بشار الاسد ملک سے چلے گئے ہیں۔
ٹیلیگرام پر ہیت تحریر الشام (ایچ ٹی ایس) کا کہنا ہے کہ ایک تاریک دور کا خاتمہ ہوا اور یہ ایک نئے دور کا آغاز ہے۔
باغیوں کا کہنا ہے کہ جو لوگ بے گھر ہو گئے تھے یا اسد کے دورِ حکومت میں قید تھے، وہ اب گھر آ سکتے ہیں۔
ایچ ٹی ایس کا کہنا ہے کہ یہ ایک ’نیا شام‘ ہو گا جہاں ’ہر کوئی امن اور انصاف کے ساتھ رہے گا۔‘
8 دسمبر 2024دمشق شہر کے مرکز میں شہریوں کے جشن منانے کی اطلاعات
دمشق کے مرکز میں واقع اہم سرکاری اداروں جن میں وزارت دفاع اور شامی مسلح افواج کے ایک تاریخی مقام ’اموی سکوائر‘ میں تقریبات شروع ہونے کی اطلاعات ہیں۔
سوشل میڈیا پر گردش کرنے والی ایک ویڈیو میں بلند آواز میں موسیقی کی آوازیں سنی جا سکتی ہیں اور تقریباً درجن کے قریب لوگ ایک ٹینک کے گرد رقص کر رہے ہیں جسے مبینہ طور پر فوج نے چھوڑ دیا تھا۔
مبینہ طور پر شام کی وزارت دفاع کے حکام نے دمشق میں واقع اپنے ہیڈ کوارٹر کی عمارت کو خالی کر دیا ہے۔
8 دسمبر 2024شام کی بدنامِ زنامہ صیدنایا جیل کے بارے میں ہم کیا جانتے ہیں جسے اقوامِ متحدہ ’انسانی مذبح خانہ‘ قرار دیتا ہے
،تصویر کا ذریعہUS STATE DEPARTMENT
شام میں باغیوں کی جانب سے ملک کی بدنامِ زمانہ صیدنایا جیل سے قیدیوں کو رہا کیے جانے کی اطلاعات ہیں۔
اس جیل کو اقوام متحدہ ’انسانی مذبح خانہ‘ قرار دیتا آیا ہے جہاں ہزاروں حکومت کے مخالفیں کو رکھا جاتا ہے۔
شامی باغی گروپ ہیئت تحریر الشام کا اپنے ٹیلی گرام چینل پر کہنا ہے کہ صیدنایا جیل سے قیدیوں کو رہا کردیاگیا ہے۔ سوشل میڈیا پر شیئر ہونے والی کئی ویڈیوز میں دیکھا جا سکتا ہے کہ لوگ جیل کے میدان سے ڈورتے ہوئے باہر نکل رہے ہیں، تاہم ان ویڈیوز کی تصدیق نہیں کی جاسکی ہے۔
صیدنایا جیل میں قید اور لاپتا افراد کی تنظیم کا کہنا ہے کہ جیل سے رہا ہونے والے افراد دمشق کے قریبی قصبے منین کا رخ کر رہے ہیں۔
دمشق سے 30 کلومیٹر فاصلے پر واقع صیدنایا جیل کو ایسی جگہ کہا جاتا ہے جہاں ’سیاسی قیدی داخل تو ہوتے ہیں لیکن کبھی باہر نہیں آتے۔‘
* ابو محمد الجولانی: شامی فوج کو ’حیران کن‘ شکست سے دوچار کرنے والے گروہ کے ’پراسرار‘ سربراہ
* شام کی جنگ میں اسرائیل کا امتحان: بشار الاسد کی بے ضرر حکومت کو بچائے یا باغیوں کی صورت میں ایک نیا خطرہ مول لے؟
صیدنایا جیل منظم تشدد، غیر انسانی حالات، اور اجتماعی پھانسیوں کے لیے بدنام ہے۔ اس بارے میں ایمنسٹی انٹرنیشنل اور انسانی حقوق کی دیگر تنظیموں کی رپورٹس موجود ہیں۔
سنہ 2022 میں صیدنایا میں قید اور لاپتا افراد کی تنظیم نے دعویٰ کیا تھا کہ خانہ جنگی کے آغاز کے بعد سے یہ جیل ایک ’ڈیتھ کیمپ‘ بن چکا ہے۔
تنظیم کا دعویٰ ہے کہ 2011 سے 2018 صیدنایا میں 30 ہزار کے قریب قیدی سزائے موت یا تشدد، طبی امداد کے فقدان اور بھوک کے باعث مارے گئے تھے۔
ان کا مزید کہنا تھا کہ جیل سے رہا ہونے والے قیدیوں نے بتایا ہے کہ 2018 سے 2021 کے درمیان اس جیل میں 500 قیدیوں کو سزائے موت دی گئی تھی۔
8 دسمبر 2024بشار الاسد دمشق چھوڑ گئے ہیں: روئٹر اور سیرین آبزرویٹری فار ہیومن رائٹس کا دعویٰ
،تصویر کا ذریعہgettyimages
خبر رساں ادارے روئٹرز نے شام کے دو سینئر افسران کے حوالے سے خبر دی ہے کہ شام کے صدر بشار الاسد طیارے میں سوار ہو کر دمشق سے نامعلوم منزل کی طرف روانہ ہو گئے ہیں۔
سیرین آبزرویٹری فار ہیومن رائٹس وار مانیٹر کا دعویٰ ہے کہ دمشق کے ہوائی اڈے سے نکلنے والا ایک نجی طیارہ ممکنہ طور پر اسد کو لے کر جا رہا تھا۔
انھوں نے دعویٰ کیا کہ ہوائی اڈے پر موجود سرکاری دستوں کو ان کی روانگی کے بعد وہاں سے رخصت کر دیا گیا۔
یہ اطلاعات ایک ایسے وقت میں سامنے آ رہی ہیں جب باغی فورسز کا دعویٰ ہے کہ وہ شام کے دارالحکومت میں داخل ہونا شروع ہو گئے ہیں۔