'ሓላፍነት ዝጐደሎ ባህሪ ሩስያ ንኩላትና ሓደጋ'ዩ'- ወተሃደራዊ ኪዳን ሰሜን ኣትላንቲክ (ኔቶ)

ቀጥታዊ ሸፈነ

1. 29 ሚያዝያ 2026ንከይማረኹ ቦምባ ፈንጂሮም ዝተቐትሉ ወተሃደራት ሰሜን ኮርያ 'ጀጋኑ እዮም'- ኪም

   መራሒ ሰሜን ኮሪያ ነቶም ኣብ ኲናት ዩክረይን ርእሶም ዝቐተሉ ወተሃደራቱ "ጀጋኑ እዮም" ክብል ንኢዱ።

   ኪም ጆንግ ኡን ንዝኽሪ እቶም ኣብቲ ኲናት ዝሞቱ ብኣሽሓት ዝቑጸሩ ወተሃደራት እታ ሃገር ንዝተሃንጸ ሓወልቲ ኣብ ዝመረቐሉ እዋን'ዩ ነቲ መግለጺ ሂቡ።

   "ነቲ ዓቢ ክብሪ ንምክልኻል ብዘይምውልዋል ርእሶም ብምፍንጃር፡ ከምኡ'ውን ርእሰ-ቅትለታዊ መጥቃዕቲ" ምፍጻሞም ተወፋይነቶም ዘርኢ ምዃኑ'ዩ እቲ ዴሳዊ መራሒ ተዛሪቡ።

   "ካሕሳ ከይተጸበዩ ርእሶም ዝሰውኡን፡ ዓስቢ ከይተጸበዩ ዝተወፈዩን" ይብል ኪም።

   እቶም ወተሃደራት ኣብ ጐኒ ሓይልታት ሩስያ ብምስላፍ'ዮም ኣብቲ ኲናት ተሳቲፎም።

   ኣብቲ ብሰኑይ ኣብ ርእሰከተማ ፒዮንግያንግ ዝተኻየደ ስነስርዓት ሚኒስተር ምክልኻል ሩስያ ኣንድረይ በሎሶቭንተረኺቡ ነይሩ።

   ካብቶም ናብ ሩስያ ዝተላእኩ ኣስታት 15,000 ዝበጽሑ ወተሃደራት ሰሜን ኮርያ ኣስታት 2,000 ኣብቲ ውግእ ከምዝተቐትሉ ምንጭታት ስለያ ደቡብ ኮርያ የመልክቱ።

2. 28 ሚያዝያ 2026ብዝተዓጽወ መጻብቦ ሆርሙዝ ክትሓልፍ ዝኸኣለት መርከብ ሩስያ

   ሓንቲ ብሩስያዊ ቢልየነር እትውነን ዓባይ ጃልባ (ያት) በቲ ኣመሪካን ኢራንን ዓጽየንኦ ዘለዋ መጻብቦ ሆርሙዝ ክትሓልፍ ከምዝኸኣለት ተፈሊጡ።

   እታ 142 ሜትሮ ቁመት ዘለዋ 'ኖርድ' ተባሂላ ትጽዋዕ ጃልባ ምስቲ መሓዛ ፕረዚደንት ቭላድሚር ፑቲን ዝኾነ ኣለክሰይ ሞርዳሾቭ ዝተባህለ ሃብታም ምትእስሳር ከምዘለዋ ይግለጽ።

   ኣብ ዝሓለፈ ቀዳመ-ሰንበት ካብ ሕቡራት ኢማራት ዓረብ ናብ ዖማን ከምዝኣተወት'ዩ ዝግለጽ ዘሎ።

   ኣብዚ ቀረባ መዓልታት ላዕለዋይ ልኡኽ ኢራን ምስ ፕረዚደንት ፑቲን ዝርከቦም ሰበስልጣን ሩስያ ተዘራሪቡ ምንባሩ ይዝከር።

   ዋላ'ኳ እቲ ቢልየነር ብቐጥታ ዝውንና እንተዘይኮነት፡ ኣብ ትሕቲ ብዓልቲቤቱ ትውንኖ ትካል ዝተመዝገበት እያ። እታ 500 ሚልዮን ዶላር እትግመትን ሓያሎ ደርብታት ዘለዋን ክብርቲ ጃልባ ብዓርቢ ካብ ዱባይ ተበጊሳ'ያ ናብ ርእሰከተማ ሙስካት ኣትያ።

   ምዕጻው ናይቲ ማሕንቖ ንግዲ ነዳዲን ካልእ ቀመማዊ ቀረባትን ዝኾነ መጻብቦ ሆርሙዝ ኣብ ዕዳጋ ዓለም ቅልውላው ፈጢሩ ይርከብ።

3. 28 ሚያዝያ 2026ኣስመራ፡ ባርዕ ሓዊ ኣብ ሰብ ጉድኣት ኣውሪዱ

   ኣብ ርእሰከተማ ኣስመራ ብዝተወልዐ ባርዕ ሓዊ ክልተ ሰባት ከምዝሞቱ መንግስታዊ ማዕከናት ዜና ሓቢረን።

   ሓደ ወዲ 36 ከምኡ'ውን ጓል 21 ዓመት ኣብቲ ብሰንበት 26 ሚያዝያ ዘጋጠመ ባርዕ ሞይቶም ኣለዉ።

   ካብቲ ባርዕ ዝደሓኑ ሓንቲ ኣደን ኣርባዕተ ቆልዑን ብዝወረዶም ጉድኣት ኣብ ሆስፒታል ተዓቚቦም ከምዘለዉ'ውን እቲ ጸብጻብ ይጠቅስ።

   ጠንቂ ናይቲ ኣብ "ምምሕዳር ከባቢ ሓሊበት" ዘጋጠመ ባርዕ እንታይ ምዃኑ ንምርግጋጽ መርመራ ይካየድ ከምዘሎ ሓላፊ ምክልኻል ገበን 6ይ መደበር ፖሊስ ኣቶ ክብርኣብ ገብረክርስቶስ ሓቢሩ።

   "እቲ ሓደጋ ዝተኸስተ ከባቢ ሰዓት 12:30 ድሕሪ ቀትሪ ኮይኑ፡ እቲ ባርዕ ንምቁጽጻር ኣሃዱ መጥፋእቲ ሓዊ ምስ ነበርቲ እቲ ከባቢ ብምዃን ብዝገበርዎ ርብርብ፡ ኣብ ውሽጢ 30 ደቓይቕ ኣብ ትሕቲ ቁጽጽር ክኣቱ ተኻኢሉ እዩ።

   "እንተኾነ ግን፡ ብሰንኪ እቲ ዝተፈጥረ ጽዑቕ ትኪ፡ ሓንቲ ኣደን ኣርባዕተ ቆልዑን ብምዕፋኖም ህጹጽ ሕክምናዊ ረድኤት ንምርካብ ናብ ሆስፒታል ኦሮታ ተወሲዶም ኣለዉ። እቶም ግዳያት ኣብዚ እዋን እዚ ኣድላዪ ክንክን ይግበረሎም ከምዘሎ ተፈሊጡ ኣሎ" ይብል እቲ ኣብ ጋዜጣ ሓዳስ ኤርትራ ዝወጸ ሓበሬታ።

   ሕብረተሰብ ምስ ሓዊ ዝተሓሓዝ ግቡእ ጥንቃቐ ክገብር ዝተማሕጸኑ ሰብመዚ መጥፋእቲ ሓዊ፡ "ተቓጻሊ ባህሪያት ዘለዎ ንብረት ኣብ ውሽጢ መንበሪ ኣባይቲ ካብ ምኽዛን ክቑጠብ ጻውዒት ኣቕሪቦም ኣለዉ።"

   ኣብ ኤርትራ ባርዕ ሓዊ መንበሪ ሳሕቲ ዘጋጥም'ኳ እንተኾነ ኣብ ቀረባ ዓመታት ግን ሓሓሊፉ ክርአ ጸኒሑ'ዩ።

   ተወሳኺ ሓበሬታ ንምርካብ ናብ 6ይ መደበር ፖሊስ ዝገበርናዮ ፈተነ ኣይሰመረን።

4. 28 ሚያዝያ 2026ጥርጡር መጥቃዕቲ ድራር ዋይት ሃውስ ብፈተነ ቅትለት ተኸሲሱ

   ብረት ሒዙ ናብቲ ኣብ ዋሽንግተን ዝተኻየደ እንግዶት ድራር ጋዜጠኛታት ዋይት ሃውስ ክኣቱ ዝፈተነ ጥርጡር ብፈተነ ቅትለት ተኸሲሱ።

   እቲ ኣብ ልዕሊ ፕረዚደንት ዶናልድ ትራምፕ ቅትለት ክፍጽም ፈቲኑ ዝብል ወግዓዊ ክሲ ተመስሪትሉ ዘሎ ኮል ቶማስ ኣለን፡ ምስ ብረት ዝተሓሓዝ ተወሳኺ ክልተ ክስታት'ውን ቀሪቦምሉ ኣለዉ።

   እቲ ወዲ 31 ዓመት፡ ሓደ 'ሰሚ-ኦቶማቲክ'፡ ሓጺር ብረት፡ ከምኡ'ውን ሰለስተ ካራታት ሒዙ'ዩ ናብቲ ትራምፕ ዝተረኽበሉ እንግዶት ክኣቱ ኣብ ዝፈተነሉ ብኣባለት ፍሉይ ሓለዋ ፕረዚደንት (ሲክረት ሰርቪስ) ተታሒዙ።

   ኣብቲ ፍጻመ ብጥይት ዝቖሰለ ሓደ ካብቶም ሓለውቲ፡ ኣብ ድሓን ኩነታት ከምዘሎ ይፍለጥ።

   እቲ ነባሪ ካሊፎርንያ ዝኾነ ጥርጡር በቲ ቀሪብሉ ዘሎ ክስታት ገበነኛ ኮይኑ እንተተረኺቡ ንሕልፈት ክፍረድ ይኽእል'ዩ።

   ብሰንኪ እቲ ዝተፈጥረ ኩነታት፡ እቲ ፕረዚደንት ናብ ባዕሉ፡ ደገፍቱን ተቓወምቱን፡ ከምኡ'ውን ናብ ጋዜጠኛታት ዘነጻጸረ ዋዛታት ክወርውረሉ ዝተሓሰበ ዓቢ ናይ ዳእላ ምሸት ክስረዝ ከምዝተገደደ ይዝከር።

5. 28 ሚያዝያ 2026ኣመሪካ “ሽፍትነት ባሕሪ” ትፍጽም ኣላ - ኢራን

   ኣመሪካ ኣብ ዝሓለፈ ሰሙን ኣብ ህንዳዊ ውቅያኖስ ንሓንቲ ናይ ኢራን መርከብ ነዳዲ ኣብ ትሕቲ ቍጽጽር ኣእትያ።

   ወሃቢ ቃል ምኒስትሪ ጉዳያት ወጻኢ ኢራን እስማዒል ባጋይ ኣብ ትዊተር ኣብ ዝዘርግሖ መልእኽቲ፡ ነቲ ናይ ኣመሪካ ስጕምቲ “ሽፍትነት ኣብ ባሕሪ” ክብል ገሊጽዎ።

   "እንቋዕ ናብ ሽፍትነት ባሕሪ ብደሓን መጻእኩም። ሕጂ ወግዓዊ መንግስታዊ ፍቓድ ዘለዎ፡ ባንዴራኡ ብግልጺ ዘንበልብል፡ ገበኑ ድማ 'ምኽባር ሕጊ' ብዝብል ስም እዩ ዝፍጸም ዘሎ" ክብል እቲ ወሃቢ ቃል ነቲ ናይ ኣመሪካ ስጕምቲ ኮኒኑ።

   ብተወሳኺ እቲ ስጕምቲ “ዓለምለኻዊ ሕግን መትከላት ዓለማዊ ናጻ ንግድን ዝጥሕስ” ምዃኑ ገሊጹ።

   እቲ ወሃቢ ቃል ነዚ ዝብል ዘሎ፡ ዋና ኣኽባሪ ሕጊ ኣመሪካ ጂኒን ፌሪስ ፒሮ፡ እታ መርከብ ኣብ ቍጽጽር ክትኣቱ ትእዛዝ ከምዝተዋህበ ድሕሪ ምግላጻ’ዩ።

6. 28 ሚያዝያ 2026ኣብ ድራር ዋይት ሃውስ ተዅሲ ዝኸፈተ ጥርጡር ብፈተነ-ቅትለት ተኸሲሱ

   ዋይት ሃውስ ብቐዳም ምሸት ንጋዜጠኛታት ኣብ ዘዳለዎ እንግዶት ድራር፡ ኣብቲ ሆቴል ተዅሲ ብምኽፋቱ ዝተታሕዘ ኮል ቶማስ ኣለን ኣብ ልዕሊ ፕረዚደንት ኣመሪካ ዶናልድ ትራምፕ ፈተነ-ቅትለት ብምፍጻም ተኸሲሱ።

   እቲ እቲ ወዲ 31 ዓመት ኮል፡ ኣብ ውሽጢ ሆቴል ዋሽንግተን ሂልተን ብወከልቲ ጸጥታ ድሕሪ ምትሓዙ፡ ዕላማኡ ንሰበስልጣን ምምሕዳር ትራምፕ ንምቕንጻል ምዃኑ ተዛሪቡ ከም ዝነበረ ጸብጻብ ሲቢኤስ የመልክት።

   ነቲ ናይ ጸጥታ መፈተሺ ነቝጣ ክሓልፍ እንከሎ፡ ሓውሲ ኣውቶማቲክ ሽጉጥ፣ ሻትጋንን ሰለስተ ካራን ሒዙ ከምዝነበረ ኣኽበርቲ ሕጊ ገሊጾም።

   ኣብቲ ዝተፈጸ መጥቃዕቲ ሓደ ወኪል ሚስጢራዊ ኣገልግሎት ብጥይት ተሃሪሙ ነይሩ፤ ግን ብኸቢድ ኣይተጎድአን።

   ኮል ቶማስ ገበነኛ ኰይኑ እንተተረኺቡ ንዕድመ ልክዕ ማእሰርቲ ክፍረድ ተኽእሎ ኣሎ።

7. 27 ሚያዝያ 2026ፒተርስበርግ፡ ምስ ፕረዚደንት ቭላድሚር ፑቲን ዝተራኸበ ልኡኽ ኢራን

   ብሚኒስተር ጉዳያት ወጻኢ ኢራን ዝምራሕ ልኡኽ ኣብ ሩስያ ምብጻሕ የካይድ ኣሎ።

   ኣብ ምዕራባዊት ከተማ ፒተርስበርግ ዝርከብ ዓባስ ኣራግቺ ምስ ፕረዚደንት ቭላድሚር ፑቲን ብምርኻብ ብዛዕባ ኩነታት ሃገሩ ተዘራሪቡ።

   ኣብቲ ርክብ ሚኒስተር ጉዳያት ወጻኢ ሩስያ ሰርገይ ላቭሮብ፡ ተሓጋጋዚ ፕረዚደንት ፑቲን ዝኾነ ዩሪ ኡሻኮቭን ሓላፊ ወተሃደራዊ ስለያ ሩስያ ኢጎር ኮስቲዩኮቭን ተሳቲፎም ነይሮም።

   ኣብ ማእከላይ ምብራቕ ሰላም ንክሰፍን ሩስያ ዝክኣላ ከምእትገብርን፡ "ሰናይ ድልየት ወይ ንክልቲኦም ወገናት ቅቡል ዝኾነ ናይ ምሽምጋል ኣገልግሎት" ንምሃብ ቅርብቲ ምዃናን ፑቲን ነቲ ኢራናዊ ጉጅለ ከምዝገለጸሉ ኣፈኛ ክረምሊን ድሚትሪ ፐስኮቭ ሓቢሩ።

   "ኣብ መወዳእታ ሰላም፡ ዘላቒ ሰላም ንክሰፍን፡ ከምኡ'ውን ናብ ተጻብኦታት ንዘይምምላስ ዝክኣለና ኩሉ ከንገብር ቅሩባት ኢና" ይብል ፐስኮቭ።

   እቲ ኢራናዊ ሚኒስተር ብወገኑ ንጋዜጠኛታት ኣብ ዝሃቦ መብርሂ፡ ኣመሪካ ተወሳኺ ልዝብ ክግበር ሓቲታ ከምዘላ ተዛሪቡ።

   ሃገሩ "ኣንጻር ልዕለ ሓያላን ዝኾነት ሃገር [ኣመሪካ] ገጢማ ትርከብ" ዝበለ ኣራግቺ፡ ኣመጥቃዕቲ ኣመሪካውያን "ሓንቲ ካብ ዕላማታቶም'ውን ከዕውቱ ኣይክኣሉን" ኢሉ።

   "ከምኡ ስለዝኾነ ድማ'ዮም፡ ዘተ ክግበር ጠሊቦም ዘለዉ፡ ንሕና'ውን ንግምግሞ ኣለና" ብምባል ድማ፡ ኢራን "ከም ሩስያ ዝበላ ዓበይቲ መሓዙትን መሻርኽትን" ከምዘለዋ ተነይቱ።

8. 27 ሚያዝያ 2026ማሊ፡ ሩስያውያን ዕጡቓት ካብ ሰሜን እታ ሃገር ኣንሳሒቦም

   ኣብ ጐኒ ሰራዊት ማሊ ተሰሊፎም ክዋግኡ ዝጸንሑ ሓይልታት ሩስያ ካብ ሰሜን እታ ሃገር ከምዝወጹ ኣፍሊጦም።

   ናይ ሩስያ 'ኮር ኣፍሪቃ' ብማሕበራዊ መራኸቢታት ኣብ ዝሃቦ ሓበሬታ፡ ካብቲ ከተማ ኪዳል ትርከበሉ ከባቢታት ከምዝወጹ ኣረጋጊጹ።

   ነታ ከተማ ተቖጻጺሩ ዘሎ ግንባር ሓርነት ኣዛዋድ (FLA) ብሰንበት ከምዝበሎ፡ ኣብ መንጎኦምን ሞስኮን ብዝተበጽሐ ስምምዕ'ዮም እቶም ሩስያውያን ዕጡቓት ብሰላም ክወጹ ክኢሎም ዘለዉ።

   ብቐዳም ኣብ ዝተፈላለየ ቦታታት ኣብ ርእሰከተማ ባማኮ ድምጺ ተዂሲን ነትጒን ተሰሚዑ ነይሩ'ዩ።

   ሚኒስተሰር ምክልኻል እታ ሃገር ሳድዮ ካማራ እውን ኣብቲ ጥቓ ርእሰ-ከተማ ባማኮ ኣብ ዝርከብ መንበሪ ገዝኡ ብዝተፈጸመ ነብሰ-ቅለታዊ መጥቃዕቲ ተቐቲሉ ከምዘሎ ይፍለጥ።

   ብጀነራል ኣሲሚ ጎይታ ዝምራሕ ወተሃደራዊ መንግስቲ ኣብ 2020 ከምኡ'ውን ኣብ 2021 ብዝተፈጸመ ዕልዋ መንግስቲ ስልጣን ዝተቖጻጸረ ኮይኑ፡ ነቲ ካብ እስላማውያን ዝርከብዎም ዕጡቓት ተቓወምቲ ዝነቅል ጸጥታዊ ዘይምርግጋእ ከህድእ'ዩ ቃል ኣትዩ ነይሩ።

9. 27 ሚያዝያ 2026ናታንያሁ ኣብ ልዕሊ ሕዝቦላህ ሓያል መጥቃዕቲ ክካየድ ኣዚዙ

   ቀዳማይ ምኒስተር እስራኤል በንያሚን ናታንያሁ፡ እቲ ስምምዕ ምቍራጽ ተዅሲ ንሰለስተ ሰሙን ካብ ዝናዋሕ ድሕሪ ክልተ መዓልታት፡ ሰራዊቱ ኣብ ልዕሊ ሕዝቦላህ "ሓያል መጥቃዕቲ" ክኸፍት ኣዚዙ።

   እዚ ትእዛዝ`ዚ ዝመጽአ፡ ቀዳም ኣብ ደቡባዊ ሊባኖስ ብዝተፈጸመ ደብዳብ ሽድሽተ ሰባት ድሕሪ ምቕታሎምን ክልተኦም ወገናት ብተደጋጋሚ ነቲ ስምምዕ ብምጥሓስ ክካሰሱ ድሕሪ ምጽናሖምን እዩ።

   ምኒስትሪ ጥዕና ሊባኖስ፡ እስራኤል ኣብ ናባቲየን ቢንት ጀበይልን ብዘካየደቶ መጥቃዕቲ ሽዱሽተ ሰባት ከም ዝተቐተሉን 17 ድማከም ዝቘሰሉን ገሊጹ።

   ሰራዊት እስራኤል ብወገኑ፡ ኣጽዋር ጽዒኖም ይንቀሳቐሱ ነይሮም ዝበሎም ሰለስተ ኣባላት ሕዝቦላህን ካልኦት ሰለስተ ዕጡቓትን ከም ዝቐተለ ኣፍሊጡ።

   ሕዝቦላህ፡ እስራኤል ኣብ ዮህሞር ኣል-ሻቂፍ ንዝፈጸመቶ መጥቃዕቲ ሕነ ንምፍዳይ፡ ንሓንቲ ወተሃደራዊት መኪና እስራኤል ከም ዝሃረመ ሓቢሩ ኣሎ።

   ንናጽነት ሜድያ ዝጣበቕ ትካል፡ እስራኤል ኣብልዕሊ ጋዜጠኛታት እተካይዶ መጥቃዕቲ "ተቐባልነት የብሉን" ክብል ኰኒኑዎ።

   ኣብዚ ቀረባ እዋን ኣማል ካሊል ዝተባህለት ጋዜጠኛ ክትቅተል ከላ፡ ሰበስልጣን ሊባኖስ ድማ ጋዜጠኛታት ብደይመደይ ዒላማ ይግበሩ ከም ዘለዉ ይኸሱ።

   ሰራዊት እስራኤል ግን ንጋዜጠኛታት ዒላማ ከም ዘይገብር እዩ ዝገልጽ።

10. 27 ሚያዝያ 2026ማሊ፡ ምኒስተር ምክልኻል ተቐቲሉ፣ ኪዳል ኣብ ኢድ ዕጡቓት ወዲቓ

    ኣብ ማሊ፡ ብጅሃዳውያን ዕጡቓትን ተገንጸልቲ ሓይልታትን ብዝተወደበ ማዕበል መጥቃዕትን፡ ምኒስተር ምክልኻል እታ ሃገር ሳድዮ ካማራ ተቐቲሉ።

    እቲ ምኒስተር ዝተቐትለ፡ ኣብቲ ጥቓ ርእሰ-ከተማ ባማኮ ዝርከብ መንበሪኡ ብዝተፈጸመ ነብሰ-ቅለታዊ መጥቃዕቲ እዩ።

    መንግስታዊ ተለቪዥን ከም ዘረጋገጾ፡ ካማራ ምስቶም መጥቃዕቲ ዝፈጸሙ ዕጡቓት ኣብ ምክልኻል ከሎ ብዝበጽሖ መውጋእቲ ኣብ ሆስፒታል ህይወቱ ሓሊፋ።

    ኣብቲ መጥቃዕቲ ሰለስተ ኣባላት ስድራኡ እውን ተቐቲሎም እዮም።

    መሪሕነት እታ ሃገር፡ ጀነራል ኣሲሚ ጎይታ፡ ድሕሪ እቲ ኣብ ልዕሊ መንበሪ ገዛኡ ዝተፈጸመ መጥቃዕቲ ናብ ውሑስ ቦታ ከም ዝተሰጋገረ ተፈሊጡ ኣሎ።

    ዓወት ተገንጸልቲ ሓይልታትን ምስሓብ ሩስያውያን ዕጡቓትን ኣብ ሰሜናዊ ክፋል እታ ሃገር፡ ተገንጸልቲ ሓይልታት ኣዛዋድ (FLA) ንኸተማ ኪዳል ከም ዝተቘጻጸሩዋ ገሊጾም።

    ብመሰረት ጸብጻብ እቲ ጕጅለ፡ እቶም ብመንግስቲ ማሊ ተቘጺሮም ዝነበሩ ሩስያውያን ወተሃደራት (Africa Corps) ድሕሪ ናይ ክልተ መዓልታት ኲናት፡ ካብታ ከተማ ብሰላም ንኽወጽኡ ምስቶም ዕጡቓት ስምምዕ ብምግባር ለቒቖማ ወጺኦም ኣለዉ።

    ኵነታት ጸጥታን ዞባዊ ግብረ-መልስን ናይዚ መጥቃዕቲ፡ ኣብዚ ዝሓለፈ ዓመታት ኣብ ማሊ ዝተፈጸመ ዝዓበየ ዝተወሃሃደ መጥቃዕቲ ጅሃዳውያን ምዃኑ ተንተንቲ ይገልጹ።

    መንግስቲ ማሊ ኣብ መላእ ሃገር ናይ ድሕነት መጠንቀቕታ ኣዊጁ፡ ኣብ ባማኮን ካልኦት ከባቢታትን ድማ ናይ እዋን እቶ-እቶ ኣዋጅ ኣንቢሩ ኣሎ።

    ዋና ጸሓፊ ሕቡራት ሃገራት ኣንቶንዮ ጉተረዝን ምዕራብ ኣፍሪቃዊ ዞባዊ ውድብን ነቲ መጥቃዕቲ ብትሪ ኰኒኖሞ ኣለዉ። ፕረዚደንት ቡርኪና ፋሶ ካፕተን ኢብራሂም ትራኦሬ እውን ነቲ ተግባር "ጭካነ ዝመልኦ" ክብል ብምግላጽ ደገፉ ንህዝቢ ማሊ ገሊጹ።

    ማሊ ካብ 2020 ጀሚሩ ብወተሃደራዊ ጕጅለ ትመሓደር እኳ እንተ ሃለወት፡ ክሳዕ ሕጂ ግን ነቲ ካብ ኣልቓዒዳን ዳዕሽን ዝምንጩ መጥቃዕቲ ክትገትኦ ኣይከኣለትን። ብዙሕ ክፋል ሰሜንን ምብራቕን እታ ሃገር ድማ ካብ ቍጽጽር መንግስቲ ወጻኢ ኰይኑ ይርከብ።

11. 27 ሚያዝያ 2026ሊባኖስ፡ ኣብ መንጎ ተኣፋፊ ስምምዕ ብዝተፈጸመ መጥቃዕቲ እስራኤል 14 ሰባት ተቐቲሎም

    ኣብ ሊባኖስ፡ ሰንበት ብዝተፈጸመ ደብዳብ ነፈርቲ እስራኤል፡ ክልተ ህጻናትን ክልተ ደቀንስትዮን ዝርከባኦም 14 ሰባት ከም ዝተቐተሉን 37 ድማ ከም ዝቘሰሉን ምኒስትሪ ጥዕና እታ ሃገር ኣፍሊጡ።

    ሰራዊት እስራኤል ቅድሚ እቲ መጥቃዕቲ ኣብ ደቡባዊ ሊባኖስ ንዝርከባ ዓድታት ናይ ምውጻእ መጠንቀቕታ ሂቡ ዝነበረ ኰይኑ፡ እቲ ስርሒት ድማ ንወተሃደራቱ ስግኣት ዝዀኑ ድፋዓት ሕዝቦላህ ንምጥቃዕ ዝዓለመ ምዃኑ ገሊጹ።

    ሕዝቦላህ ብወገኑ ብዘካየዶ መጥቃዕቲ ድሮን፡ ሓደ ወዲ 19 ዓመት እስራኤላዊ ወተሃደር ክቕተል እንከሎ፡ ሽዱሽተ ድማ ቈሲሎም። እስራኤል ግን ካልኦት ሰለስተ ድሮናት ዶብ ቅድሚ ምስጋረን ከም ዘፍሸለተን ሓቢራ።

    እዚ ሓድሽ ወተሃደራዊ ምስሕሓብ ዝካየድ ዘሎ፡ ክልተአን ሃገራት ካብ 16 ምያዝያ ጀሚሩ ኣብ ስምምዕ ምቍራጽ ተዅሲ ኣብ ዝርከባሉን እቲ ስምምዕ ድማ ዝሓለፈ ሓሙስ ንተወሳኺ ሰለስተ ሰሙን ኣብ ዝተናወሓሉን እዋን እዩ።

    ቀዳማይ ምኒስተር በንያሚን ናታንያሁ፡ ሕዝቦላህ ነቲ ስምምዕ የፍርሶ ከም ዘሎ ብምጥቃስ፡ እስራኤል ርእሳ ንምክልኻልን ስግኣታት ንምፍሻልን "ናይምንቅስቓስ ናጽነት" ከምዘለዋ ኣስሚሩሉ።

    ኣብቲ ዲፕሎማስያዊ ሸነኽ ድማ ምኒስተር ወጻኢ ጉዳያት ኢራን ዓባስ ኣራግቺ ምስ ዋሽንግተን ክካየድ ብዛዕባ ዝሕሰብ ዘሎ ዘተ ሰላም ንምምይያጥ ኣብ ፓኪስታን ዑደት ድሕሪ ምግባር፡ ምስ ቭላድሚር ፑቲን ንምርኻብ ናብ ሞስኮ ከም ዘምርሕ ይጥቀስ።

    ፕረዚደንት ዶናልድ ትራምፕ ምስ ኢራን ዝካየድ ዘተ ዕድል ንምሃብ፡ ነቲ ተዅሲ ደው ናይ ምባል ግዜ እኳ እንተ ኣናውሖ፡ እቲ ናብ ኢስላማባድ ክግበር ዝነበሮ ዑደት ፍሉያት ልኡኻት ግን ከም ዝተሰረዘ ተፈሊጡ ኣሎ።

    እዚ ኵነታት ነቲ ተኣፋፊ ሰላም እቲ ዞባ ኣብ ትሕቲ ዓቢ ጸቕጢ የውድቘ ኣሎ።

12. 24 ሚያዝያ 2026ልኡኽ ኢራን ናብ ፓኪስታን ክብገስ'ዩ

    ኢራን፡ ብሚኒስተር ጉዳያት ወጻኢ ዝምራሕ ልኡኽ ናብ ፓኪስታን ክትሰድድ ምዃና ኣፍሊጣ።

    ዓባስ ኣራግቺ ሎሚ ለይቲ ናብታ መዲና ዘተ ሰላም ኢራንን ኣመሪካን ኮይና ዘላ ኢስላማባድ ክብገስ ምዃኑ እቲ መግለጺ ይጠቅስ።

    እቲ ላዕለዋይ ብዓልስልጣን ናብ ሙስካትን ሞስኮን ብምብጻሕ'ውን ምስ ሰበስልጣን ዖማንን ሩስያን ብዛዕባ ኲናትን ካልእ ክልተኣዊ ጉዳያትን ክዝቲ ምዃኑ ቴህራን ኣፍሊጣ'ላ።

    እቲ ብወገን መንግስቲ ኢራን ብመንገዲ ኤክስ ዝተዋህበ ሓበሬታ ብዛዕባ ዘተ ሰላም ኣይጠቐሰን።

    ምስ ወከልቲ ኢራን ንምዝርራብ ናብ ፓኪስታን ክመለስ'ዩ ክብሃለሉ ዝቐነየ ምክትል ፕረዚደንት ኣመሪካ ጀይ-ዲ ቫንስ ናብ ኢስላማባድ ብዛዕባ ምብጋሱ ግን ኣይተነጸረን ዘሎ።

    ፕረዚደንት ዶናልድ ትራምፕ ነቲ ምስ ኢራን ዝተበጽሐ ስምምዕ ምቁራጽ ተጻብኦታት ኣብ ፈለማ ናይዚ ሰሙን ንዘይተወሰነ እዋን ከምዘናውሖ ይፍለጥ።

    ሎሚ ጋዜጣዊ መግለጺ ዝሃቡ መራሕቲ ኲናት ኣመሪካ ብወገኖም፡ ኢራን "ለባም ምርጫ" ብምውሳድ ንዘተ ቅርብቲ ክትከውን ብምምካር ሓይልታቶም ኣድላዪ ኣብ ዝኾነሉ ንዳግማይ ኲናት ድሉዋት ምዃኖም ኣጠንቂቖም።

    ጸሓፊ (ሚኒስተር) ኲናት ፒት ሄግሰት ከምዝበሎ ኣመሪካ ኣዊጃቶ ዘላ ንገለ ካብን ናብን ወደባት ኢራን ዝጓዓዛ መራኽብ ዒላማ ዝገበረ ዕግታ ሓይሊ ባሕሪ ኣመሪካ ይሕይልን ይሰፍሕን ኣሎ።

    ላዕለዋይ ኣዛዚ ሓይልታት ምክልኻል ኣመሪካ ጀነራል ዳን ኬን እውን፡ ዝተወሰና መራኽብ ይሓልፋ ከምዘለዋ ብምእማን፡ ቴህራን ንስምምዕ ምቁራጽ ተዂሲ ብምጥሓስ ኣብ መጻብቦ ሆርሙዝ ፈንጂ ማይ ተጻውድ ኣላ ክብል ከሲሱ። ሓይልታቱ 34 መራኽብ ንግዲ ከምዝመለሱ'ውን እቲ ኣቦመንበር ሓለቓታት ጠቕላሊ ስታፍ ሓቢሩ'ሎ።

13. 24 ሚያዝያ 2026ሩብዮ፡ ኢራን ካብ ሱታፈ ዋንጫ ዓለም ኣይተኸልከለትን

    ኣብ ቤትጽሕፈት 'ኦቫል' ኣብ ዝተዋህበ ጋዜጣዊ መግለጺ፡ ጸሓፊ ጉዳያት ወጻኢ ማርኮ ሩብዮ፡ ኢራናውያን ስፖርተኛታት ኣብዚ ዓመት ኣብ ኣመሪካ ኣብ ዝካየድ ግጥማት ዋንጫ ዓለም ክሳተፉ ከም ዘይክእሉ ካብ ወገን ኣመሪካ ዝነገሮም ሰብ ከም ዘየሎ ገሊጹ።

    ኢራን ኣብቲ ግጥማት ንኸይትሳተፍ፡ ኣብ ክንድኣ ድማ ኢጣልያ ክትትካእ ትኽእል እያ ዝብል ግምታት ከም ዝነበረ ዝጠቐሰ ሩብዮ፡ ኢራን እንተ ዘይመጺኣ ግን ምርጫኣ ምዃኑ ወሲኹ ገሊጹ።

    ኢራን ኣብ ግጥማት ዋንጫ ዓለም ኣብ ምስታፋ ዘሎ ጸገም እቶም ስፖርተኛታት ዘይኰኑስ፡ እቶም ምስኣቶም ሒዛቶም ክትመጽእ እትኽእል ሰባት ምዃኖም ኣገንዚቡ።

    "እቲ ክገብርዎ ዘይክእሉ፡ ብዙሓት ግብረ-ሽበራውያን 'ሰራዊት ሓለዋ ሰውራ ኢራን' ከም ጋዜጠኛታትን ኣሰልጠንቲ ስፖርትን ኣምሲሎም ናብ ሃገርና ሒዞሞም ክመጽኡ ኣይፍቀድን እዩ፡" ኢሉ።

14. 24 ሚያዝያ 2026ትራምፕ፡ ኣመሪካ ምስ ሊባኖስ ብምዃን "ካብ ሕዝቦላህ ንምክልኻል" ክትሕግዝ እያ

    ዶናልድ ትራምፕ ኣብ ዝሃቦ መግለጺ፡ እቲ ምክትል ፕረዚደንት ጀይዲ ቫንስን ጸሓፊ ጉዳያት ወጻኢ ማርኮ ሩብዮን ዝተረኽብሉ ኣኼባ "ኣዝዩ ጽቡቕ" ከም ዝነበረ ገሊጹ።

    "ኣመሪካ፡ ሊባኖስ ካብ ሕዝቦላህ ርእሳ ንኽትከላኸል ንምሕጋዝ ምስኣ ክትሰርሕ እያ፡" ክብል ጽሒፉ።

    ኣብዚ "ታሪኻዊ ኣኼባ" ተሳታፊ ምዃኑ "ዓቢ ክብሪ" ከም ዝስምዖ ዝገለጸ ትራምፕ፡ ንቐዳማይ ምኒስተር እስራኤል በንያሚን ናታንያሁን ንፕረዚደንት ሊባኖስ ጆሴፍ ኣውንን ኣብ ዝመጽእ ንኸአንግዶም ብሃንቀውታ ከም ዝጽበ ኣፍሊጡ።

    እቶም ላዕለዎት ተዛተይቲ ናይ ነፍሲወከፍ ሃገር፡ ኣብ ቤትጽሕፈት 'ኦቫል' ምስ ትራምፕ፡ ቫንስን ሩብዮን ብሓባር ኰይኖም ኣብ ዝሃቡዎ ቃል፡ ነቲ ውዕል ምቍራጽ ተዅሲ ብምንዋሑ ዘለዎም ምስጋና ገሊጾም።

    ኣምባሳደር ሊባኖስ ኣብ ኣመሪካ ናዳ ሓማደ ሙዓዋድ፡ ኣምባሳደር እስራኤል ኣብ ኣመሪካ የኪኤል ላይተር፡ ኣምባሳደር ኣመሪካ ኣብ ሊባኖስ ሚሸል ኢሳ፡ ከምኡ’ውን ኣምባሳደር ኣመሪካ ኣብ እስራኤል ማይክ ሃካቢ፡ ነፍሲወከፎም ንትራምፕ ኣብቲ ዘተ ንዝተጻወቶ ተራ ንኢዶም።

    ላይተር፡ "ክቡር ፕረዚደንት፡ ብሳላ እቲ ንስኻ ዝገበርካዮ ሓያል መሪሕነት ኢራን ኣዝያ ስለ ዝደኸመት፡ ሕጂ ንሕዝቦላህ ንምድኻምን ንሊባኖስ ካብ ወራሮም ናጻ ንምውጻእን ዘሎ ተኽእሎ ናይ ሓቂ ኰይኑ ኣሎ፡" ድሕሪ ምባል፡ እስራኤልን ሊባኖስን ነታ ሃገር ካብቲ "ሕዝቦላህ ዝበሃል ሕማቕ ጽልዋ፡" ንምንጋፍ ሓባራዊ ዕላማ ከም ዘለወን ኣገንዚቡ።

    ሃካቢ ብወገኑ ንሕዝቦላህ፡ ኣብ ሓደ ሰፈር ኰይኑ ናብ መስኮት ኵሎም ጐረባብቲ እምኒ ምስ ዝድርቢ ቈልዓ ኣመሳሲሉዎ። "እቲ ቈልዓ ደው ምስ ዝብል፡ ከም ሊባኖስን እስራኤልን ዝኣመሰሉ ጐረባብቲ ብሰላም ክነብሩ ይኽእሉ እዮም፡" ኢሉ።

15. 24 ሚያዝያ 2026ምቍራጽ ተዅሲ ሊባኖስ '100% ውሑስ ኣይኰነን' - እስራኤል

    ኣምባሳደር እስራኤል ኣብ ሕቡራት ሃገራት፡ እቲ ተሓዲሱ ዘሎ ውዕል ምቍራጽ ተዅሲ፡ ኣብ መንጎ እስራኤልን እቲ ብኢራን ዝድገፍ ሕዝቦላህን ዘሎ ግጭት ምሉእ ብምሉእ ደው ከብሎ ከም ዝኽእል ርግጸኛ ከም ዘይኰነ ገሊጹ።

    ዳኒ ዳኖን ምስ ሲኤንኤን ኣብ ዝገበሮ ቃለመሕትት፡ "መንግስቲ ሊባኖስ ኣብ ልዕሊ ሕዝቦላህ ዝዀነ ዓይነት ቍጽጽር የብሉን፡" ኢሉ። ወሲኹ ድማ፡ "ሕዝቦላህ ነቲ ምቍራጽ ተዅሲ ንምዕንቃፍ ኢሉ ሮኬታት ይትኵስ ኣሎ፤ እስራኤል ድማ ግብረ-መልሲ ክትህብ ትግደድ እያ። ስግኣት ኣብ ዝረኣናሉ ኵሉ ግዜ ስጕምቲ ንወስድ ኢና፡" ብምባል ኣገንዚቡ።

    እዚ ርእይቶኡ ዝመጽእ ዘሎ፡ ኣምባሳደራት እስራኤልን ሊባኖስን ኣብ ዋይት ሃውስ ተረኺቦም፡ ፕረዚደንት ትራምፕ ነቲ ዝነበረ ናይ 10 መዓልታት ምቍራጽ ተዅሲ ንተወሳኺ ሰለስተ ሰሙን ከም ዝተናወሐ ድሕሪ ምእዋጁ እዩ።

    ዳኖን ነቲ ሓድሽ ስምምዕ ብዝተመልከት፡ "100% ውሑስ ኣይኰነን" ድሕሪ ምባል፡ "ሰራዊት ሊባኖስ ነዚ ምቍራጽ ተዅሲ ብግብሪ ከተግብሮን ከኽብሮን ክኽእል ተስፋ እገብር፡" ኢሉ።

16. 24 ሚያዝያ 2026ርእሰ-ሊቃነ-ጳጳሳት፡ ኣመሪካን ኢራንን ናብ ዘተ ሰላም ክምለሳ ጸዊዖም

    ርእሰ-ሊቃነ-ጳጳሳት ሊዮ መበል 14፡ ኣመሪካን ኢራንን ነቲ ኲናት ንምብቃዕ ዝዓለመ ዘተ ሰላም ክቕጽልኦ ተማሕጺኖም። እቲ ግጭት "ኣብ ኢራን ዝርከቡ ብዝሒ ዘለዎም ንጹሃን ሰባት ንመከራ ኣቃሊዑዎም እዩ፡" ኢሎም።

    እዞም ርእሰ-ሊቃነ-ጳጳሳት፡ ነቲ ኣመሪካን እስራኤልን ኣብ ኢራን ዘካይድዎ ዘለዉ ወተሃደራዊ ስርሒት ብትሪ ካብ ዝነቐፉ ሰባት ሓደ እዮም።

    ስለዚ እዚ ሕጂ ዝሃቡዎ ርእይቶ፡ ምስ ፕረዚደንት ዶናልድ ትራምፕ ብርቱዕ ናይ ቃላት ምልልስ ድሕሪ ምክያዶም ዝመጽእ ዘሎ እዩ። ትራምፕ’ውን ኣብ ልዕሊ እቶም ጳጳስ ነዊሕ ነቐፌታዊ ጽሑፍ ምልጣፉ ይዝከር።

    ኣብ ኣርባዕተ ሃገራት ኣፍሪቃ ካብ ዝገበሩዎ ዑደት ተመሊሶም ናብ ሮማ ብነፋሪት ኣብ ዝጓዓዝሉ ዝነበሩ እዋን፡ "ኵሎም ወገናት ሰላም ንምንጋስ፡ ስግኣት ኲናት ንምውጋድን ኣህጉራዊ ሕጊ ንምኽባርን ዝከኣሎም ኵሉ ጻዕሪ ክገብሩን እቲ ዘተ ሰላም ክቕጽልን አተባብዕ ኣለኹ፡" ኢሎም።

    ወሲኾም ድማ፡ "ከም ጓሳ መጠን፡ ወገን ኲናት ክኸውን ኣይክእልን እየ፤ ኵሉ ሰብ ድማ ካብ ጽልእን ምክፍፋልን ዘይኰነስ፡ ካብ ባህሊ ሰላም ዝምንጩ መልስታት ንምድላይ ጻዕሪ ክገብር አተባብዕ፡" ኢሎም።

    ኣብቲ እዋን፡ ዝሓለፈ ዓመት ኣብ ሊባኖስ ዑደት ኣብ ዝገበርሉ እዋን፡ "እንቋዕ ደሓን መጻእኩም ርእሰ-ሊቃነ-ጳጳሳት ሊዮ" ዝብል ጽሑፍ ሒዙ ዝተሳእለ ናይ ሓደ ሙስሊም ቈልዓ ስእሊ ወትሩ ሒዞም ከም ዝዘሩ ገሊጾም።

    እቶም ጳጳስ ብዛዕባ እቲ ቈልዓ ክዛረቡ ከለዉ፡ "ኣብዚ ናይ መወዳእታ ምዕራፍ ኲናት ተቐቲሉ እዩ፡" ኢሎም።

17. 22 ሚያዝያ 2026መንገዲ ኣየር ሉፍታንዛ 20,000 በረራታት ክስርሕዝ'ዩ

    ጀርመናዊ መንገዲ ኣየር ሉፍታንዛ ብሰንኪ ናህሪ ዋጋ ነዳዲ ነፈርቲ 20,000 ኣብ ውሽጢ ኣውሮጳ ዝካየድ ሓጸርቲ በረራታት ክስርዝ ምዃኑ ኣፍሊጡ።

    ሓደ ካብ ዓበይቲ መንገዲ ኣየራት ኣውሮጳ ዝኾነ ሉፍታንዛ፡ እቲ ስጉምቲ 40,000 ሜትሪክ ቶን ነዳዲ ክዕቅብ ከምዘኽእሎ ሓቢሩ።

    ኲናት እስራኤልን ኣመሪካን ምስ ኢራን ካብ ዝውላዕ ንድሓር ዋጋ ነዳዲ ነፈርቲ (ጀት ፍዩል) ብዕጽፊ ወሲኹ'ሎ።

    ሃገራት ወሽመጥ ቀንዲ ምንጪ ናይቲ ዓይነት ነዳዲ ምዃነን ይፍለጥ።

    ዓለምለኻዊ ትካል ጸዓት፡ ኣብ ዝሓለፈ ሰሙን ኣብ ዘውጽኦ መግለጺ፡ ኣብ ኣውሮጳ ዘሎ ነዳዲ ነፈርቲ ካብ ሰሙናት ዝሓልፍ ከምዘይኮነ ኣጠንቂቑ ነይሩ።

    እዚ ኣብ ክረምቲ ክግበር ተወሲኑ ዘሎ ምስራዝ በረራታት ሉፍታንዛ ንዋጋ ትኬታት ዝያዳ ከንህሮ ከምዝኽእል ይግመት። ክረምቲ ኣብያተ ትምህርቲ ዝዕጸውሉ ናይ መገሻ ወቕቲ ምዃኑ ይፍለጥ።

18. 22 ሚያዝያ 2026ሓይልታት ኢራን ንመራኽብ ንግዲ የጥቅዑን ይሕዙን ኣለዉ

    ኣብ ልዕሊ መራኽብ ንግዲ መጥቃዕቲ ዝፈጸሙ ሓይልታት ኢራን፡ ኣብ መጻብቦ ሆርሙዝ ክልተ መራኽብ ከምዝሓዙ ኣፍሊጦም።

    ሓደ ብሪጣንያዊ ትካል ስርሒታት ንግዲ ባሕሪ (UKMTO) ኣብ ዝሃቦ ሓበሬታ፡ ሓንቲ "ብረት ዝዓጠቐት ጃልባ" ሓይልታት ሓለዋ እስላማዊ ሰውራ ኢራን ናብ ሓንቲ ኮንቴነራት ዝጸዓነት መርከብ ንግዲ ከምዝተኮሰት የመልክት።

    መራሒ ናይታ ባንዴራ ግሪኽ ዝሰቐለት መርከብ 'ኢፓሚኖንዳስ' መጠንቀቕታ ከምዘይተዋህቦ'ኳ እንተገለጸ፡ ምስቶም ጸግዒ ሓይልታት ሓለዋ እስላማዊ ሰውራ ዘለዎ ማዕከን ዜና ኑር ኒውስ ግን፡ እታ መርከብ "ዝተዋህባ መጠንቀቕታ ዕሽሽ" ከምዝበለት ገሊጹ'ሎ።

    ናብ ወሽመጥ ዖማን ኣንፈት ትወጽእ ዝነበረት ካልእ መርከብ'ውን፡ ብተመሳሳሊ ኣገባብ ዒላማ ሓይሊታት ኢራን ከምዝኾነት ጸብጻባት ሓቢሮም።

    'ቫንጋርድ' ዝተባህለ ትካል ስለያ ባሕሪ ከምዝበሎ፡ እታ መልህቓ ከተወርድ ዝተገደደት 'ፍራንቸስካ' ዝተባህለት ባንዴራ ፓናማ ዝቐለት መርከብ፡ ጉድኣት ወሪዱዋ ከምዘሎ ሓቢራ ኣላ።

    'ዩፎሪያ' ዝተባህለት ካልእ መርከብ'ውን ግዳይ መጥቃዕቲ ኢራን ከምዝኾነት ተፈሊጡ ኣሎ። እንተኾነ ኣብታ ባንዴራ ፓናማ ዝሰቐለትን ናብ ጂዳ፡ ስዑዲ ዓረብ ትኸይድ ዝነበረት መርከብ ጽዕነት ዝወረደ ጉድኣት ከምዘየለ'ዩ ዝግለጽ።

    ፕረዚደንት ዶናልድ ትራምፕ ነቲ ኣመሪካን እስራኤልን ምስ ኢራን ከካይድኦ ዝጸንሓ ኲናት ዘህድአ ምቁራጽ ተጻብኦታት እንደገና ከናውሖ'ኳ እንተወሰነ፡ ኣብ ኣፍደገ መጻብቦ ሆርሙዝ ዝኣወጆ ዕግታ መራኽብ ንግዲ ክቕጽል ምዃኑ'ዩ ኣፍሊጡ።

    ንዕጽዋ ኣመሪካ ዝተቓወመት ኢራን ብወገና፡ ናብቲ ኣፍኲሳቶ ዝነበረት ፖሊሲኣ ተመሊሳ ነቲ መጻብቦ ከምዝዓጸወቶ ብምፍላጥ ክሓልፋ ዝፈተና መራኽብ ንግዲ ከተጥቅዕ ጀሚራ ኣላ።

    ብኻልእ ወገን፡ ኣብ መንጎ እስራኤልን ሊባኖስን ዝተበጽሐ ን10 መዓልታት ዝጸንሕ ምቁራጽ ተዂሲ ንምንዋሕ ልዝብ ይግበር ከምዘሎ ይግለጽ ኣሎ።

19. 20 ሚያዝያ 2026ኣመሪካ፡ ናብ ሱዳን ኣጽዋር ተሰጋግር እያ ዝተባህለት ኢራናዊት ኣብ ቀይዲ ኣትያ

    ሰብመዚ ጸጥታ ኣመሪካ፡ ናብ ሱዳን ኣጽዋር ተሰጋግር'ያ ንዝበልዋ ሓንቲ ኢራናዊት ኣብ ቀይዲ ኣእትዮም።

    ጓል 44 ዓመት ሻሚም ማፊ፡ ናይ ኣመሪካ ቀዋሚ መንበሪ (ግሪን ካርድ) ዘለዋ ኮይና፡ ኣብ ዝሓለፈ ቀዳም'ያ ኣብ ማዕርፎ ነፈርቲ ከተማ ሎስ ኣንጀለስ ተታሒዛ።

    "ድሮናት፡ ቦምባታት፡ ቀለቤት ቦምባታት፡ ከምኡ'ውን ብሚልዮናት ዝቑጸር ኣብ ኢራን ዝተሰርሐ ጠያይቲ ናብ ሱዳን ኣብ ምሻጥ ከም ደላሊት" ከምዝተዋስአት'ዮም ኣኽበርቲ ሕጊ ኣመሪካ ከሲሶም ዘለዉ።

    ብመሰረት እቲ ክሲ፡ መሸጣ ናይቲ ወተሃደራዊ ኣጽዋር ምስ ሚኒስትሪ ምክልኻል ሱዳን ዝተፈጸመ ኮይኑ፡ ናይ 70 ሚልዮን ዶላር ውዕል ሰብ-ኣልቦ ነፈርቲ (ድሮናት) ዘጠቓለለ እዩ።

    እታ ኢራናዊት ነቲ ኣመሪካ ኣብ ልዕሊ ኢራን ዝወሰነቶ እገዳ መሸጣ ንብረት ኢራን ጥሒሳ ተባሂላ'ያ ኣብ ቀይዲ ኣትያ ዘላ። ማፊ፡ ብዛዕባ ዝቐረበላ ክሲ ዛጊት ዝሃበቶ ግብረመልሲ የለን።

    ካብ ካሊፎርኒያ ናብ ቱርኪ ክትበርር ኣብ ዝፈተነትሉ እዋን'ያ ተታሒዛ።

    ተሓላቒ መሰላት ኣምነስቲ ኢንተርናሽናል ከምዝብሎ፡ ስርሓት ሰርቢያ፡ ሩስያ፡ ቻይና፡ ቱርኪን የመንን ዝኾነ ብረታት ኣብቲ ደማዊ ኲናት ሱዳን ኣብ ጥቕሚ ውዒሉ እዩ።

    ንሓይልታት ኣልሰሪዕ ወተሃደራዊ ደገፍ ትህብ'ያ ተባሂላ ዘይትኣደነ መርትዖታት ዝቐርበላ ሕቡራት ኢማራት ዓረብ፡ ንዝቐርበላ ክስታት ክትነጽጎ ምጽንሓ ይፍለጥ።

20. 20 ሚያዝያ 2026ሶፊያ፡ ገስጋሲ ሰልፊ ቡልጋሪያ ተዓዊቱ

    ኣብ ቡልጋሪያ ኣብ ዝተኻየደ ፓርላመንታዊ ምርጫ ተቓዋሚ ሰልፊ 'ገስጋሲት ቡልጋሪያ' ተዓዊቱ።

    እቲ ቅድሚ ኣርባዕተ ኣዋርሕ ዝተመስረተ ፖለቲካዊ ምንቅስቓስ 44.7 ሚእታዊት ድምጺ ብምርካብ'ዩ ዝበዝሐ መናብር ረኺቡ ዘሎ።

    ድሕሪ 1997 ንፈለን እዋን'ዩ ሓደ ሰልፊ ክንድዚ (135) መናብር ብምዕዋት ዓብላሊ ቦታ ክሕዝ በቒዑ ዘሎ።

    ቀዳማይ ሚኒስተር እታ ሃገር ክኸውን ትጽቢት ዝግበረሉ ዘሎ መራሒ ናይቲ ዕዉት ሰልፊ ሩመን ራደቭ "ሓያል ቡልጋሪያ ኣብ ሓያል ሕብረት ኣውሮጳ" ንምህናጽ ክሰርሕ ምዃኑ ቃል ኣትዩ።

    እቲ ሕብረት ኣብ ልዕሊ ሩስያ ዘንበሮ እገዳታት ክነቅፍ ዝጸንሐ ራደቭ፡ ምስ ሞስኮ ሃናጺ ልዝብ ክካይድ'ዩ ዝጠልብ።

    ሰራዊት ቡልጋሪያን ንዩክረይን ዝህቦ ደገፍ ክቃወም'ኳ እንተጸንሐ፡ ምስ ብራስለስ ክራጸም ከምዘይደሊ'ዩ ዝፍለጥ።