ትሸሞንተ ኣባላት ዝጸዓነት ወተሃደራዊት ነፋሪት ኣመሪካ ወዲቓ

ሸሞንተ ኣባላት ዝጸዓነት ወተሃደራዊት ነፋሪት ኣመሪካ ኣብ ገማግም ባሕሪ ጃፓን ወዲቓ።

እታ ሲቪ-22 ኦስፕረይ ዝዓይነታ ኣብ ቶክዮ ካብ ዝርከብ ወተሃደራዊ ማእከል ዮካታ ዝተበገሰት ነፋሪት፡ ሎሚ ረቡዕ ኣብ ደቡባዊ ጫፍ ጃፓን ገማግም ደሴት ያኩሺማ ከምዝወደቐት ሰብመዚ ጃፓን ገሊጾም።

ጃፓናዊት ማዕከን ዜና ኤንኤችኬ፡ እታ ኦስፐረይ ኣብ ያኩሺማ ክትዓልብ ከምዝፈተነትን ትነድድ ምንባራን ጸብጺባ።

ጉጅለ ምድሓን ህይወት ናብቲ ቦታ ተዋፊሩ ኣሎ።

እታ ኦስፐረይ ከም ሂልኮፕተርን ነፋሪትን ኮይና እተገልግል እያ።

ኣብ ወርሒ ነሓሰ ብተመሳሳሊ ኣብ ሰሜናዊ ኣወሰትራልያ ኣብ ልምምድ ዝነበረት ኦስፕረይ ወዲቓ ፡ ኣብ ውሽጣ ካብ ዝነበሩ 23 ኣመሪካውያን ባሕረኛታት እቶም ሰለስተ ሞይቶም።