Hii ni tovuti ya maandishi pekee ambayo inatumia data kidogo. Tazama toleo kuu la tovuti likijumuisha picha na video zote.
Pata maelezo zaidi kuhusu toleo hili la linalotumia kiasi kidogo cha data
Mgombea wa Republican Donald Trump amemshinda Hillary Clinton wa Democratic katika uchaguzi wa urais uliokuwa na ushindani mkali.
Trump amepanda jukwaani Manhattan, New York. Amewashukuru wafuasi wake na kusema amepigiwa simu na Hillary Clinton "kuwapongeza".
Aidha, amesema mwenyewe amempongeza Bi Clinton.
"Hillary amefanya kazi kwa bidii sana na kwa muda mrefu sana na twafaa kumshukuru kwa alivyoitumikia nchi yetu," Bw Trump amesema.
"Sasa ni wakati wa Marekani kuponya vidonda vya mgawanyiko."
Mike Pence, mgombea mwenza wa Donald Trump, na mkewe Karen, wamejitokeza na kupanda jukwaani mkutano wa Trump wa kusherehekea ushindi jimbo la Manhattan.
Shangwe, nderemo na vifijo zimetanda miongoni mwa wafuasi wa Donald Trump.
CNN na NBC wameripoti kwamba mgombea wa chama cha Democratic Hillary Clinton amempigia simu Donald Trump na kukubali kushindwa.
Mwenyekiti wa kampeni wa Hillary Clinton John Podesta amesema bado ni mapema mno na maafisa wa kampeni wa Clinton hawawezi kusema lolote kwa sasa.
"Bado wanahesabu kura na kila kura ina umuhimu ... majimbo kadha kura zimekaribiana sana kwa hivyo hatutasema mengine zaidi leo.
"Kila mtu anafaa kwenda nyumbani, alale. Tutasema mengi kesho."
ABC News wanakadiria kwamba kura tatu za wajumbe kati ya nne jimbo la Maine zitamwendea Bi Clinton.
Moja itachukuliwa na Trump.
Jimbo hilo limekuwa likiunga mkono Democratic. Mwaka 2008, Obama alikuwa mbele kwa asilimia 17. Maine na Nebraska ndiyo majimbo pekee ambapo wagombea wanaweza kugawana kura za wajumbe.
Wafuasi wa wagombea wakuu wa urais nchini Marekani Hillary Clinton na Donald Trump wamepokea matokeo yanayoendelea kutangazwa kwa hisia tofauti mjini New York.
Timu ya Trump ilitaraji kwamba mgombea wao angeshinda uchaguzi kama jana lakini matokeo ya uchaguzi yamewakosoa.
Mwandishi wa BBC Chris Gibson amekuwa akizungumza na wafuasi wa Clinton katika mkutano wake huko New York,akiwemo mfuasi mmoja ambaye alidhani kwamba matokeo hayo yangemfanya 'atapike'.
Maafisa wa ubalozi wa Marekani, raia wa Marekani pamoja na wanahabari kadha walioalikwa, wamekuwa wakifuatilia matokeo ya uchaguzi ubalozi wa Marekani jijini Nairobi.
Hivi ndivyo hali ilivyo:
"Umekuwa usiku mwema kwa mashabiki wa Donald Trump ,usiku mwema kwa raia wa Marekani na usiku mwema zaidi kwa walimwengu,Curtis Ellis mshauri mwandamizi wa timu ya kampeni za Trump .
Kwenye ujumbe wa video, Ras Obama amesifu demokrasia bila kujali nani atashinda usiku huu (Marekani bado ni usiku).
Amesema bila kujali kitakachotokea, "Jua lazima litachomoza asubuhi."
Ameandika kwenye Twitter na kuwashauri wapiga kura "kutazamana sio tu kama wafuasi wa Democratic au Republican bali kama Wamarekani".
Donald Trump ameondoka Trump na kuelekea hoteli ya Hilton Midtown ambapo anatarajiwa kuandaa mkutano wa ushindi
Jeff DeWitt, mkuu wa fedha jimbo la Arizona, amekuwa na Bw Trump wakifuatilia matokeo ya uchaguzi.
Amepakia picha ya Trump akimfunga tai mwanawe, na nyingine ya Trump na mgombea mwenza wake Mike Pence wakifuatilia matokeo.
Tazama:
Hivi ndivyo Wamarekani walivyopokea matokeo ya uchaguzi mjini Florida
Hillary Clinton ameshinda uchaguzi wa urais jimbo la Nevada, ambapo amejizolea kura 6 za wajumbe. Sasa ana kura 215 naye Trump 244. Mshindi anahitaji kura 270.
Wengi wameanza kujadili uwezekano wa Trump kuibuka mshindi. New York Time, gazeti lililokuwa linamuunga mkono Hillary Clinton, limechapisha mchoro wa jinsi matarajio ya mshindi wa urais yalivyobadilika.
Nate Silver, anayeandika blogu ya FiveThirtyEight (538 ni idadi ya kura za wajumbe) amesema pia kuna uwezekano wa Donald Trump kushinda urais.
Silver anafahamika kwa kuweza kutabiri matokeo katika majimbo yote 50 mwaka 2012.
Tazama mchoro hapa chini:
Iwapo wagombea wote wawili watatoshana nguvu kwa kura za wajumbe, kila mmoja apate kura 270, basi Bunge la Wawakilishi ndilo litakaloamua nani atakuwa rais.
Hillary Clinton sasa atahitajika kushinda majimbo ya Pennsylvania, Michigan na Wisconsin iwapo atashinda urais kulingana na Norm Ornstein.
"Ana njia moja ya kupata ushindi huku Trump akiwa na njia nyingi''.
Mwandishi wa BBC wa Amerika Kaskazini Anthony Zurcher pia anakubaliana na Ornstein kuhusu umuhimu wa Michigan na Wisconsin.
Donald Trump ameshinda jimbo la Georgia kwa mujibu wa makadirio ya ABC News. Jimbo hilo lina kura 16 za wajumbe. Sasa Trump ana kura 244 naye Clinton 209. Mshindi anahitaji kura 270 za wajumbe.
Donald Trump ameshinda jimbo la Iowa, kwa mujibu wa makadirio ya ABC News. Amejishindia kura 6 za wajumbe. Sasa ana 228 naye Clinton 209. Mshindi anahitaji kura 270.
Hillary Clinton ameshinda jimbo la Washington kwa mujibu wa makadirio ya ABC News. Jimbo hilo lina kura 12 za wajumbe. Sasa Trump ana kura 222 za wajumbe na Clinton 209 za wajumbe. Mshindi anahitaji kura 270.