Boqollaal qof oo ku dhintay duqeyn ka dhacday cusbitaal ku yaalla Qasa iyo xaaladihii ugu dambeyay

Tebin toos ah

1. 10 Oktoobar 2023War deg deg ah, Israel oo sheegtay in la helay meydka 1,500 oo ururka Xamaas ka tirsan

   War degdeg ah: Millateriga Israel ayaa sheegay in la helay meydka 1,500 oo qof laga helay Israel iyo aagga marinka Qasa.

   Waxa intaas ku dareen inuu gebogabo ku dhowyahay daadgureynta qowmiyadda Isarel ee ku sugnaa meel u dhow Qasa.

   Wadaaradda difaaca Israel ayaa sheegtay inay bedeshay baaqa ay u direen Falastiiniyiinta doonaya inay ka baxaan Qasa.

   Waxaa ay marka hore sheegeen in dadku ka baxaan hal marin oo ay maamusho Masar, balse haatan waxaa lagu soo warramayaa in la xiray marinkaas.

   Maxay tahay shuruudda ay Xamaas ku xirtay bed qabka dadka u qafaalan

   Yom Kippur: Maxaad ka taqaan 'Dagaalkii Ramadaanka' ee dhex maray Israa'iil iyo dalalkan Carbeed?

   Maxaysan dalalka Islaamka heshiis uga ahayn dagaalka Xamaas iyo Israa'iil, si la mid ah kuwa Reer Galbeedka?

2. 10 Oktoobar 2023Sida uu u dhacay weerarka kediska ee Xamaas ay ku qaaday Israel

   Weerarrada ay qaadeen kooxda Xamaas oo u muuqday kuwa qorshaysan ayaa waxaa uu lahaa labo weji.

   Tobaneeyo nin oo hubaysan oo ka tirsan kooxda Islaamiga ah ee Xamaas ayaa u muuqda inay gudaha u galeen Israa’iil.

   Raggan hubeysan ayaa waxaa ay wararku sheegayaan in ay Israa'iil ka galeen dhanka Konfureed islamarkana ay weerar ku qaadeen ciidamo Israa'iil ah oo halkaasi joogay.

   Weerarkan oo ahaa mid la yaab leh ayaa waxaa uu kadis ku noqday Israa'iil, waxaan hal mar wada dhawaaqay qalabka bixiya digniinada. Maleeshiyaadka ayaa ku galay Israa’iil mootooyin, waxaana jira warar sheegaya in rabshado ay ka dhaceen in ka badan labaatan goobood.

   Wajiga labaad ee weerarka xamaas ayaa ahaa mid dhanka gantaalada ah oo ay Israa'iil ku gareen.

   Taliye sare oo ka tirsan Xamaas ayaa ku andacoonaya in kumannaan gantaal ay ku garaaceen gudaha Israa'iil.

   Howlgalkan ayay kooxda Xamaas ugu magac dareen "Howlgalka duufaanta Al-aqsa.

   Muuqaal aan wali si madaxbanaan loo xaqiijin ayaa muujinaya tiro askarta Israa'iil ah oo dhintay. Gawaari ay leeyihiin ciidamada Israa’iil ayaa sidoo kale la weeraray iyadoo qaarkood la qabsaday islamarkana ay dagaalyahanada Xamas u qaadeen Qaza. Halkan ka sii akhri

3. 10 Oktoobar 2023Maxay tahay shuruudda ay Xamaas ku xirtay bed qabka dadka u qafaalan

4. 10 Oktoobar 2023Mareykanka oo war cusub ka soo saaray dagaalka Israel iyo Xamaas

   Daqiiqadihii la soo dhaafay, waxaa hadal jeediyay afhayeenka amniga qaranka aqalka cad ee Mareykanka, John Kirby.

   Waxaa uu sheegay in xukumadda Mareykanka aysan dooneyn inay ciidamo u dirto Israel, balse ay ilaalin doonto badqabka muwaadiniinta Mareykanka ee ku sugan gobolka.

   Waxaa uu sheegay in codsiyo xaga amniga ay ka filayaan Israel, taas oo Mareykanku sheegay inuu isku dayi doono inuu sida ugu dhaqsiyaha badan u fuliyo.

   Kirby ayaa sidookale sheegay ‘in aysan su’aal ka taagnayn in Iiraan ay taageereyso’ Xamaas, balse Mareykanku ma cadeyn karo in Iiraan ay si toos ah ugu lug leedahay dagaalka.

   Wargeyska the Wall Street Journal ayaa qoray in Iiraan ay ururka Xamaas ka caawisay weerarka ay Sabtidii ku qaadday Israel.

   Halka & dadka qorsheeyey weerarka xamaas ee Israa'iil

5. 10 Oktoobar 2023Yom Kippur: Maxaad ka taqaan 'Dagaalkii Ramadaanka' ee dhex maray Israa'iil iyo dalalkan Carbeed?

6. 10 Oktoobar 2023Meelo badan oo waddammada Reer Galbeedka oo laga taageeray Falastiin

   Xilli qaar ka mid ah calaamadaha reer galbeedka lagu shiday iftiin muujinaya midab buluugga iyo caddaanka ah ee calanka Israel si ay taageero ugu muujiyaan Israa'iil, ayaa haddana waxaa sidoo kale ka dhacay London iyo New York muddaharaaddo iyo isu imaatinno ballaadhan oo lagu taageerayo Falastiiniyiinta.

7. 10 Oktoobar 2023Waddammada Reer Galbeedka oo siyaabo kala duwan taageeradooda ugu muujiyey Israel

8. 10 Oktoobar 2023Gaza: Habeen madaw oo holaca duqeyntu dadka iftiin u yahay

   Waa wax yar uun ka dib 02:50 Israa'iil iyo Marinka Qaza.

   Korontada ayaa maqan, burburka kaabayaasha ayaa si ba'an u saameeyay aagga Marinkaas.

   Sawirka sare waxa uu muujinayaa qiiq kU dul wareegaya dhismayaal ku yaalla Gaza, iyo holac hoos ka shidan oo ka dhashay duqeyn dhinaca cirka ah oo ay Israa’iil qaadday.

   Waxaan ogaanay in maraakiibta dagaalka ee Mareykanka ay ku wajahan yihiin bariga Mediterranean-ka, diyaarado sida saanad ciidan ayaa ku sii jeeda Israel iyaguna.

   Waxaa sidoo kale bayaan wadajir ah soo saaray madaxda UK, US, France, Italy iyo Germany.

   Hogaamiyayaasha ayaa sheegay inay ku midaysan yihiin taageerada Israel.

   Wararkii ugu dambeeyay ee aan helnay ayaa sheegaya in ugu yaraan 900 oo qof lagu dilay Israa’iil halka ku dhawaad 700 oo qof lagu dilay Gaza.

   Nala jog oo halkan kala soco xogtii u danbaysay ee xaalka halkaa ka taagan

9. 10 Oktoobar 2023Hogaamiyeyaasha Maraykanka, Ingiriiska, Faransiiska, Jarmalka iyo Talyaaniga oo bayaan wada jir ah soo saaray

   Hogaamiyeyaasha Ingiriiska, Maraykanka, Faransiiska, Talyaaniga iyo Jarmalka ayaa hadda soo saaray bayaan ay ku muujinayaan " cambaarayn aan leexleexad lahayn oo ka dhan ah Xamaas iyo falalkeeda argagaxisada ah" sida ay hadalka u dhigeen.

   Bayaanka wadajirka ah ayaa yimid ka dib markii ay wada hadleen Madaxweyne Macron, Scholz, Meloni, Sunak iyo Madaxweyne Biden.

   "Falalka argagixisanimo ee Xamaas ma laha wax cudurdaar ah, sharcina ma leh, waana in si caalami ah loo cambaareeyaa," ayaa lagu yiri bayaanka.

   "Waddamadeenu waxay Israa'iil ku taageeri doonaan dadaallada ay kaga ilaalinayso nafteeda iyo dadkeeda xadgudubyadan oo kale," ayaa lagu yiri bayaanka oo sii socda, isagoo intaas ku daray: "Waqti xaadirkan ma ahan in qolo kasta oo cadow ku ah Israa'iil ay uga faa'ideysato weerarradan."

   “Dhammaanteen waxaan aqoonsannahay rabitaanka sharciga ah ee dadka reer Falastiin, waxaanan taageernaa tallaabooyinka loo siman yahay ee caddaaladda iyo xorriyadda Israa’iil iyo Falastiiniyiinta si isku mid ah.

   Laakin ha qaldamina: Xamaas ma matasho rabitaankaas, waxna uma soo bandhigto dadka Falastiiniyiinta oo aan ka ahayn argagax iyo dhiig daata."

10. 9 Oktoobar 2023Xaaladihii u dambeeyay

    Haddii aad hadda nagusoo biirtay, waa kan wararkii ugu dambeeyay ee colaadda.

    • Tirada dhimashada ee Israa’iil ayaa sii kordheysa tan iyo Sabtidii kadib weerar lama filaan ah oo ay qaadeen dagaalyahannada Xamaas - iyadoo in ka badan 900 oo qof ay ku dhinteen, oo ay ku jiraan 260 qof oo ay dabley hubaysan ku xasuuqday goob ay ka socotay xaflad muusig.
    • Tan iyo markii Israa’iil ay bilowday duqaynta Qaza oo ay kaga jawaabayso weerarka Xamaas, ku dhawaad 690 oo qof ayaa lagu dilay halkaas
    • Ra’iisul wasaaraha Israa'iil Benjamin Netanyahu ayaa mar sii horeysay ka hadlay koonfurta Israel wuxuuna ka digay in wadanku uu “xoog weyn” u adeegsan doono kooxda xagjirka ah ee Xamaas.
    • Wasiirka difaaca Israa'iil ayaa mar sii horreysay amar ku bixiyay in "go'doomin dhameystiran" lagu sameeyo marinka Qaza, iyada oo laga jaray cunnada, shidaalka, korontada iyo biyaha.
    • Garabka hubaysan ee Xamaas, guutooyinka Al-Qassam, ayaa ku dhawaaqay inay "bilaabi doonaan dilka maxaabiista ay Israa'iil ka qabsadeen si ay uga jawaabto duqeymo kasta oo cusub oo Israa'iil ay u geysato guryaha rayidka ah iyadoon digniin horudhac ah laga bixin"
    • Sagaal qof oo Maraykan ah ayaa hadda la xaqiijiyey inay ku dhinteen Israa’iil, halka in ka badan 10 qof oo British ah laga cabsi qabo inay dhinteen, ama la la'yahay
    • Tobaneeyo qof ayaa kooxda Xamaas ay afduub ahaan ugu haystaan halka qoysaskoodu oo si quus ah u raadinaya xogtooda.

11. 9 Oktoobar 2023Maraykanka oo xaqiijiyey inay 9 muwaadin kaga dhinteen Israa'iil

    Dowladda Mareykanka ayaa xaqiijisay in sagaal ka mid ah muwaadiniinteeda lagu dilay Israa’iil.

    War qoraal ah oo ka soo baxay Aqalka Cad ayaa lagu yiri: “Waxaan tacsi tiiraanyo leh u direynaa dhibanayaasha iyo qoysaska dhammaan dadka ay dhibaatadu saameysey, waxaana u rajeyneynaa kuwa ku dhaawacmay caafimaad degdeg ah.

    "Waxaan sii wadeynaa inaan si dhow ula socono xaaladda oo aan la xiriirno saaxiibadayada Israel, gaar ahaan maamulka maxalliga ah."

12. 9 Oktoobar 2023War deg deg ah, Israa'iil iyo Falastiin: Dhimashada labada dhinac oo sare u kacday

    Afhayeen u hadlay safaaradda Israa’iil ayaa shabakadda wararka ee CBS u sheegay in tirada dadka lagu dilay weerarrada Israa’iil ay hadda marayso 900 oo qof.

    Dhanka Qasa, tan iyo bilowgii weerarkii aargoosiga ahaa ee Israa'iil, waxay hadda dhimashadu maraysaa 600 inta si rasmi ah loo sheegay.

13. 9 Oktoobar 2023DAAWO: Waddooyinka Gaza oo ay duqeeyeen Israel

    In ka badan 500 oo qof ayaa ku dhintay tan iyo markii Israa’iil ay billowday in ay duqaymo ka geysato aaggaas, taasoo jawaab u ah weerarrada uga imaanaya Xamaas.

14. 9 Oktoobar 2023Hogaamiyaasha UK, France, Germany iyo Mareykanka oo ka wada hadli doona dagaalka Israel iyo Gaza

    Chancellor-ka Jarmalka Olaf Scholz ayaa sheegay in uu filayo in uu fiidnimada Isniinta uu kala hadli doono dhiggiisa UK, Faransiiska iyo Mareykanka colaadda Bariga Dhexe.

    Scholz ayaa hadalkan ka sheegay shir jaraa’id oo uu la qaatay madaxweynaha Faransiiska Emmanuel Macron ka hor shir wadajir ah oo golaha wasiirada dalalkooda ay ku yeelan lahaayeen magaalada Hamburg.

15. 9 Oktoobar 2023Netanyahu: Aargudashada Xamaas hadda unbey bilaabatay

    Raysal wasaaraha Israa'iil Benjamin Netanyahu, oo ka hadlayay sida uu dalkiisa uga jawaabayo weerarka Xamaas ayaa sheegay in tani ay tahay billowga.

    Sida laga soo xigtay wakaaladda wararka ee AFP, saraakiil ka socotay koofurta Israa'iil ayuu u sheegay

    in "waxa ay Xamaas la kulmi doonto ay tahay wax adag oo xanuun badan".

    Netanyahu ayaa intaa raaciyay in tani ay "tahay billowga... waan idinla jirnaa dhammaan xoog ayaana uga reyn doonnaa, awood weyn".

    In ka badan 700 oo qof ayaa lagu dilay gudaha Israa'iil tan iyo markii Xamaas ay weerar ku qaadday Sabtidii.

    Ugu yaraan 560 qof oo kale ayaa lagu dilay gudaha Gaza kaddib markii weerar jawaab celin ah ay sameysay Israa'iil.

16. 9 Oktoobar 2023Sawirro:Falastiiniyiinta oo aas u sameeyay dadkii ku dhintay Qaza

    Gaza, ehelada ayaa isugu soo baxay si ay u xusaan dhimashada xubnaha hal qoys oo ku dhintay weeraradii ugu dambeeyay ee Israel.

17. 9 Oktoobar 2023Guddoomiyaha Hay’adda maareynta musiibooyinka qaranka iyo Qaramada Midoobay oo kawada hadlay ElNino

    Guddoomiyaha Hay’adda Maareynta Musiiboyinka Qaranka Soomaaliya Mudane Maxamuud Macallim Cabdulle oo maanta xarunta dhexe ee SoDMA ku qaabilay ku xigeenka Ergeyga Xoghayaha Guud ee Qaramada Midoobay ee Soomaaliya ahna Iskuduwaha Gargaarka Bini’aadanimada George Conwey ayaa kawada hadlay hadlay ElNino, saameynta ka dhalan karta roobka Dayrta, sida bulshada Soomaaliya looga digi lahaa fatahaadaha culus ee laga cabsi qaboIyo sidii gargaar loo gaarsiin lahaa goobaha lagala wareegay Al-shabaab.

    Mudane George Conwey ayaa intaas kadib booqday Xarunta ka digista halis-wadareedka ee Hay’adda Maareynta Musiboyinka Soomaaliya ee SoDMA

18. 9 Oktoobar 2023Wasiirka kowaad ee Scotland oo sheegay in waalidiinta xaaskiisa ay Gaza ku xayiranyihiin

    Wasiirka koowaad ee Scotland Humza Yousaf ayaa sheegay in waalidiinta xaaskiisa ay hadda ku xayiran yihiin Gaza.

    Soddoggii Yousaf ayaa u safray Gaza toddobaad ka hor si ay u soo booqdaan qoyska.

    "Aniga iyo xaaskaygu waanu la xanuunsannahay welwelka iyaga," ayuu yiri.

    "Waxaa jira dad, aan waxba galabsan, oo dhibban. Marna ma cadeyn karno dilka dadka rayidka ah ee aan waxba galabsan.”

    Yousaf ayaa BBC-da u sheegay in uu si adag u cambaareynayo ficillada "xaqiiq la'aanta ah" ee Xamaas.

    Wareysi lala yeeshay intii lagu jiray duqeynta Israa’iil ee ka dhanka ah Gaza bishii Maajo 2021, xaaska Yousaf Nadia El-Nakla, oo asal ahaan ka soo jeeda Falastiin, ayaa sheegtay inay xubno qoys ku leedahay Gaza oo uu ku jiro walaalkeed.

19. 9 Oktoobar 2023Kenya oo $17m ku bixisay howlgalka amniga Soomaaliya

    Kenya ayaa shantii sano ee lasoo dhaafay ka heshay Ksh2.5 bilyan oo lacagteeda ah oo u dhiganta 17 milyan oo doolar si ay uga qayb qaadato howlgalka nabad ilaalinta Soomaaliya oo hadda loo yaqaan howlgalka Kumeel Meel Gaarka ah ah ee Midowga Afrika ee Soomaaliya kaas oo ay howshiisa uu ku egtahay bisha December ee sanadka soo socda.

    Wasiirka Gaashaandhigga dalka Kenya Aadan Ducaale ayaa baarlamaanka u sheegay usbuucan in lacagtaas qeybo qeybo oo gareysa $3.3 milyan sanadkii loogu soo diray Qasnada Qaranka.

    Mudane Ducaale oo hadalkiisa sii wata ayaa sheegay in magdhowga askarta ku dhintay Soomaaliya lagu dhameeyo muddo 30 maalmood gudahood ah.

    Bishii Oktoobar 2011, Ciidanka Difaaca Kenya waxay u dhaqaaqeen Soomaaliya si ay u baacsadaan Al Shabaab ka dib markii ay afduubyo xiriir ah ka geysteen xuduudka Kenya iyo Soomaaliya.

20. 9 Oktoobar 2023Wararkii ugu dambeyay ee Xamas iyo Israel

    In ka badan 48 saacadood ka dib markii uu bilaabmay hawlgalka milatari ee ay bilaabeen guutada Al-Qassam ee dhaqdhaqaaqa Xamaas ee Marinka Gaza ee ka dhanka ah Israa’iil weerar ay ugu magacdareen (Daadadka Al-Aqsa) iyo jawaabta Israa’iil ee hawlgalka seefta birta, kuwani waa wararkii ugu dambeeyay:

    Israa’iil ayaa duqeymo ba’an ka geysatay bartamaha xerada qaxootiga ee Jabalia, oo ku taal waqooyiga marinka Qaza, agagaarka suuq caan ah oo dadku ku badan yihiin, waxaana ka dhashay tobanaan dhimasho iyo dhaawac ah ilaa hadda.

    Arrintan ayaa ku soo beegantay xilli wasiirka difaaca Israa’iil Yoav Galant uu ku dhawaaqay inuu amar ku bixiyay in gebi ahaanba la go’doomiyo marinka Qaza, isla markaana la gooyo sahayda korontada, cuntada iyo shidaalka, wax kastana la xiro.

    Xamaas ayaa wali sii wada gantaalada ay ku ridayso Israa’iil, iyaga oo beegsanaya magaalada Jerusalem iyo garoonka diyaaradaha ee Ben Gurion oo u dhaw magaalooyinka Tel Aviv iyo Ashkelon.

    Afhayeen u hadlay maamulka Garoomada Diyaaradaha ee Israa’iil ayaa beeniyay in wax gantaal ah uu ku dhacay garoonka diyaaradaha, taasoo jawaab u ah ku dhawaaqista Xamaas ee ah inay gantaallo kale la beegsanayso garoonka Ben Gurion.