TOOS: Dagaal culus oo ka socda Gobolka Bakool

Tebin toos ah

1. 8 Sebtembar 2023Dibad-baxyo weli ka socda dalka Suuriya

   

   Xigashada Sawirka, Reuters

   Dibadbaxyada looga soo horjeedo dowladda Suuriya ayaa weli ka socda magaalada Sweida, iyadoo dibadbaxayaashu ay mar kale jeex-jeexeen sawirka madaxweyne Bashar al-Assad.

   Mudaaharaadyada ayaa billowday saddex toddobaad ka hor ka dib markii la qaaday kaalmada shidaalka, taas oo sare u sii qaadaysa qiimaha maciishadda iyada halkaa ay ka jirto dhibaato dhaqaale.

   Boqolaal qof ayaa mar kale isugu soo baxay fagaaraha Karama ee magaalada Sweida, waxayna ku dhawaaqayeen erayo ka dhan ah Madaxweyne Assad iyo nidaamkiisa.

   Sweida waa magaalo madaxda gobolka ay ku badan yihiin beesha Druze ee Suuriya dega. Waxay ka badbaaday burburkii ugu xumaa ee dagaaladii sokeeye, laakiin sida meelo badan oo dalka ka mid ah waxaa ka jirta xaalad dhaqaale oo aad u liidata.

2. 8 Sebtembar 2023Hindiya oo u ololeyneysa in midowga Afrika qeyb ka noqdo G20

   

   Xigashada Sawirka, Getty Images

   Madaxda isugu imaaneysa shirka G20 ee ka dhacaya Delhi ayaa sheegay in ay filayaan in Midowga Afrika uu noqdo xubintii ugu dambeysay ee ururka ku soo biirta.

   Ra’iisul wasaaraha Hindiya, Narendra Modi, ayaa ku baaqay in ururka guud ee Afrika uu noqdo xubin joogto ah oo ka tirsan G20, isagoo ku dooday in waddamada soo koraya ay u baahan yihiin inay gacan weyn ka geystaan ​​go'aannada caalamiga ah.Soo jeedintu ayaa waxaa sidoo kale taageeray Maraykanka.

   Guddoomiyaha Golaha Yurub Charles Michel, ayaa sheegay inuu rajaynayo soo dhawaynta Midowga Afrika ee Midowga Yurub. Koonfur Afrika hadda waa wakiilka kaliya ee ururka ka socda qaaradda Afrika.

3. 8 Sebtembar 2023Carruur Miino kula qaraxday Laascanood

   

   Xigashada Sawirka, Social Media

   Laba caruur ah ayaa dhintay labo kalena waa dhaawacmeen kadib markii duleedka magaalada Laascaanood dhinaceeda bari uu qarax ku haleelay.

   Caruurtan ayaa ku sugnayd Jabka-qoriga oo ka mid ah goobihii dagaaladu ku dhex- mareen ciidamada Somaliland iyo kuwa Khatumo .

   Miinada ayaa dishay 2 wiil halka gabar iyo wiil kalena dhaawacooda lagu dabiibayo isbitaalka Manhal sida uu noo xaqiijiyey Jaamac Cabdikariin oo ka mid ah masuuliyiinta Isbitaalkaas.

   Qorsho Cabdilaahi oo ah hooyada dhashay caruurtan ayaa sheegtay in caruurtu ay ku ciyaarayeen dooxada markii ay qarax maqashay.

   Maamulka Khatumo ayaa horay digniino ku aadan in aan magaalada lagu soo degdegin horay ugu dirtay bulshada taas oo shacabku ka dhega adaygeen.

4. 8 Sebtembar 2023Shirka G 20 oo Hindiya ka furmaya

   

   Xigashada Sawirka, Reuters

   Kumanaan ka tirsan ciidamada ammaanka ayaa gaaf wareegaya caasimadda India ee Delhi, iyadoo madaxda caalamka ay imaanayaan shirka G Twenty. Qeybaha magaalada ayaa hakad ku jira.

   Dhanka kale, mas’uuliyiinta gobolka Manipur ee dalka Hindiya ayaa ku soo warramaya in rasaas xooggan ay isweydaarsadeen ciidamada ammaanka iyo dad looga shakisan yahay in ay mintidiin yihiin. Ilaa hadda macadda haybtooda ama cidda ay yihiin.

5. 8 Sebtembar 2023Ruushka oo doorasho uu ku sheegay mid degaan ka wada gobaha uu haysto

   

   Xigashada Sawirka, EPA

   Dadka ku nool meelaha uu Ruushku haysto ee Ukraine ayaa laga codsanayaa inay codkooda ka dhiibtaan waxa lagu tilmaamay doorashada deegaanka. Kyiv ayaa ku tilmaantay doorashada mid sharci darro ah.

   Dhanka kale, Wasaaradda arrimaha dibadda ee Ukraine ayaa cambaareysay booqasho ay fannaanad Shiinees ah ku tagay magaalada Mariupol ee uu Ruushka haysto.

   Fiidiyowga ayaa muujinaya iyada oo bandhig faneed ku jirta, oo ku dhex jirta tiyaatarka ku burburay duqeyntii Ruushka halkaa ka geystay sannadkii hore.

6. 8 Sebtembar 2023Dowlad waddooyinka xirtay si madaxweynahooda dhalashadiisa ugu dabaaldego

   

   Xigashada Sawirka, AFP

   Ciidamada Taraafikada ee magaalada Kampala ee caasimadda dalka Uganda, ayaa xiray dhowr waddo oo ku yaalla magaalada si ay ugu fududaato dhaq-dhaqaaqa VIP-da kusii jeeda ama ka soo noqday xaflada dhalashada 79-aad ee Madaxweyne Yoweri Museveni maanta Jimcaha.

   Dabaaldegga dhalashada ayaa lagu qiyaasay in 100,000 oo qof oo marti ah ay ka soo qeyb gali doonaan, kuwaasoo ay ku jiraan dad Ugandees ah oo ka yimid caasimadda iyo gobollada kale ee dalkaas.

   Taliyaha Booliska Taraafikada ee Magaalada Kampala, Kormeeraha Sare Godwin Arinaitwe, ayaa sheegay Khamiista in ka soo qeyb galayaasha aan awoodin in ay adeegsadaan waddooyinka xiran ay gawaaridooda dhigan karaan barxadaha baarkinka ee loogu talagalay Kampala, inta ka hartayna ay lugeynayaan masaafada goobta ay ka dhacayso xaflada

7. 8 Sebtembar 2023Saldhig militari oo ku yaalla waqooyiga Mali oo weerar lala bartilmaameedsaday

   

   Xigashada Sawirka, AFP/GETTY

   Ciidamada ayaa sheegay in weerar ismiidaamin ah lagu qaaday mid ka mid ah saldhigyada ay ku leeyihiin gobolka Gao ee waqooyiga dalkaasi.

   Dhacdadan ayaa ku soo beegmeysa maalin uun ka dib markii mintidiin Islaami ah ay dileen in ka badan 60 qof oo rayid ah kadib markii ay weerar ku qaadeen doon ay la socdeen oo wabiga mareysay.

   Kor u kaca rabshadaha ayaa sidoo kale daba socda ka bixitaanka ciidamada nabad ilaalinta Qaramada Midoobay ee gobolka.

   Koox xiriir la leh Al-Qaacida ayaa qirtay mas'uuliyadda laba weerar oo dhacay Khamiistii: mid ka mid ah doonida, iyo mid kale oo lagu qaaday goob ciidan.

   Maali waxaa hadda ka arrimiya dowlad milatari ah kuwaas oo xukunka la wareegay 2021-kii, iyagoo ballan qaaday inay wax ka qaban doonaan ammaanka.

   Waxay jartay xiriirkii ay la lahayd xulafadeeda hore ee reer galbeedka, waxayna ku casuuntay Kooxda calooshood u shaqeystayaasha ee Wagner ee Ruushka si ay gacan uga geystaan ​​la dagaalanka kooxahan.

   Balse tillaabadaasi ma noqon mid lagu guulaysto, waxaana Mali ay hadda ka mid tahay dalalka ay ka dhacaan weerarada argagaxisada ah ee ugu badan caalamka.

8. 8 Sebtembar 2023Ciidamada RSF ee Sudan oo ka hadlay cunaqabateynta Mareykanka saaray

   

   Xigashada Sawirka, AFP

   Kooxda Rapid Support Forces (RSF) ee Sudan ayaa cambaareysay cunaqabateynta Mareykanka uu ku soo rogay laba ka mid ah hogaamiyayaasha RSF waxayna ku tilmaameen mid cadaalad darro ah oo laga naxo.

   Arbacadii, Mareykanka ayaa cunaqabateyn dhaqaale ku soo rogay ku xigeenka hogaamiyaha RSF Abdel Rahim Dagalo iyo xayiraad dhanka socdaalka ah oo la saaray taliyaha kooxda ee gobolka Galbeedka Darfur, Gen Abdul Rahman Juma, sababo la xiriira xadgudubyo dhanka xuquuqda aadanaha ah.

   Mr Dagalo iyo Gen Juma labaduba waxay beeniyeen eedeymaha Mareykanka iyagoo ku tilmaamay kuwo "been iyo marin habaabin" ah.

   Bayaan ay maalinti Khamiista soo dhigtay X (oo hore u ahaan jirtay Twitter) RSF waxay ku tilmaantay cunaqabateynta Mareykanka mid "naxdin leh, nasiib darro iyo cadaalad darro".

9. 8 Sebtembar 2023Mas'uul lagu dilay degmada Beledxaawo

   

   Waxaa maanta magaalada Beledxaawo lagu aasay gudoomiye xaafadeed ay xalay koox dabley ah ku dileen magaalada Beledxaawo.

   Guddoomiyaha la dilay ayaa lagu magacaabi jiray Faarax Sigad, waxaana dableydaas oo la sheegay inay seddex nin ahaayeen ay u dheceen gurigiisa ayagoo ku dhex dilay marxuumka reerkiisa.

   Waxaa kale oo weerarkaas ku dhaawacmay wiil uu dhalay marxuumka, kaas oo dhaawiciisa maanta magaalada Muqdisho loo qaaday.

   Faarax Sigad wuxuu ahaa guddoomiyaha xaafadda Goolan Hays ee Beledxaawo. Sidoo kale qarax ayaa ka dhacay isla wakhtiga marxuumka la dilay magaalada Gudaheeda, inkastoo aysan cidna wax ku noqon.

10. 8 Sebtembar 2023Nin toorey ku dilay xaaskiisa oo xaamila ahayd

    

    Xigashada Sawirka, WEST H POLICE

    Shantii bishi August, 2015-kii, Zubeydi Abdurahman oo haatan lagu xukumay xabsi daa’in, ayaa waxaa uu toorey ku dilay xaaskiisa oo xaamila ahayd.

    Sareeya guuta Nardos Tsagaaye, ayaa BBC-da u sheegay in ninka falkan geystan uu ka maseeray xaaskiisa.

    Dhibanaha, Xikma Cumar, oo ahayd hooyo leh afar carruur, ayaa geeriyootay balse waxaa la badbaadiyay canuga yar.

    Waxaa shaki ka qabay in canuga uu isagu leeyahay, sidaas ayuuna maseerka ku yimid.

    Dhacdadan ayaa ka dhacday galbeedka degmada Hararghe gobolka Oromada ee dalka Itoobiya. Ninka dilay xaaskiisa, ayaa qirtay dembiga uu galay.

11. 8 Sebtembar 2023Boqor Charles oo xus u sameeyay hooyadii sanad kadib geerideeda

    

    Xigashada Sawirka, PA Media

    Muddo sanad ah ayaa maanta ka soo wareegtay geeridii boqoradii Ingiriiske, Queen Elizabeth. Boqor Charles ayaa hooyadii u sameeyay xus lagu maamuusayo shaqooyinkii ay soo qabatay.

    Muuqaalka xuska oo ah mid la sii duubay, ayaa boqorka waxaa uu aad u amaanay adeegyadii ay bixisay isagoo dadka reer Britain ugu mahad celiyay jacaylka iyo taageerada ay u muujiyeen isaga iyo boqorad Camila.

    Boqor Charles ayaa sidookale soo bandhigay sawirka hooyadii oo ah midka uu ugu jecelyahay oo uu sanadkii 1968 qaaday Cecil Beaton.

12. 8 Sebtembar 2023Dawada HIV-AIDS-ka oo six un loogu isticmaalo dalka Uganda

    

    Xigashada Sawirka, AFP

    Hay’adda Qaranka ee Dawooyinka Uganda ayaa qiratay inay ka war haysay in dawada loogu talagalay cudurka dilaaga ah ee HIV-ga lagu naaxinayey xoolaha sannadkii 2014-kii, balse shacabka aysan uga digin.

    Kormeeraha sare ee dawooyinka, Amos Atumanya, ayaa u sheegay baarlamaanka inay ka war hayeen dawooyinka ka hortagga Fayraskan ee la siinayo doofaarka iyo digaagga si ay ugu cayilaan.

    Amos Atumanya ayaa sheegay in ay bini’aadanka halis ku tahay isticmaalka xitaa xaddi yar oo dawooyinkan ah.

    Laakiin hay’adda Dawooyinka Qaranka ee Uganda (NDA) ayaa tan iyo markaas isku dayeysay inay qariso faallooyinkiisa.

    Afhayeen u hadlay ayaa sheegay, in haddii ay jirto khatar caafimaad ay u digayaan shacabka, halka NDA shaqadeedu ay tahay in ay nidaamiso dawooyinka aan ahayn cuntada dadka ama tan xoolaha.

    Warbixin ay dhawaan soo saartay jaamacadda caanka ah ee Makerere ayaa lagu sheegay, in wax ka badan saddex meelood meel digaagga iyo 50% hilibka doofaarka ee la tijaabiyay ay ku jiraan raadadka dawooyinka ka hortagga retroviral oo ah fayrasyada dhaliya AIDS-ka.

    Hilibka ayaa laga keenay suuqyada caasimadda Kampala iyo waqooyiga magaalada Lira ee dalka Uganda.

13. 8 Sebtembar 2023kulan lagu heshiisiinayo beelo ku dagaalamay Ceel Afweyn oo maanta lagu qabanayo deegaankaas

    Waxaa maanta loo balansanyahay in la qabto kulan lagu heshiisiinayo laba beelood oo dhawaan ku dagaalamay deegaanka Ceel-Afweyn ee gobolka Sanaag.

    Ku dhowaad 20 qof ayaa ku dhimatay halka tiro kalena ay ku dhaawacmeen dagaal beleedkaas.

    Kulanka maanta, waxaa ka qeyb galaya wefdi ka socda Somaliland iyo mas'uuliyiinta iyo waxgaradka deegaankaas, waxaana kamid ah guddoomiye ku xiigeenka koowaad ee aqalka wakiilada Somaliland kana soo jeeda gobolka Sanaag, Siciid Mire Faarax Giire.

14. 8 Sebtembar 2023Suuqa kala iibsiga Sacuudiga oo xirmay iyadoo Maxamed Saalax uu sii joogayo Anfield

    

    Waxaa xalay si rasmi ah u soo xirmay suuqa kala iibsiga ciyaartoyda ee Sacuudiga, wuxuuna suuqa xirmay iyadoo xidiga Liverpool, Maxamed Saalax uu joogo Anfield.

    Indhawaalaba waxaa aad loo hadal hayay in Saalax uu ku biiri doono kooxda Al-Itihaad oo ka disan Sacuudiga kahor intuusan suuqu xirmin, nasiib darro, Liverpool ayaa lagu soo warramayaa inay diiday dalabka kooxdaasi.

    31 sano jirka u dhashay Masar, ayaa waxaa loo soo bandhigay heshiis gaaraya 150 milyan oo pound.

    Dhowr kooxood oo ka dhisan Sacuudiga ayaa cambaareeyay in suuqa Sacuudiga la soo xiray kadib ku dhowaad todobaad kadib markii la soo xiray suuqa kala iibsiga Yurub.

15. 8 Sebtembar 2023Ku dhowaad 70 qof oo ku dhimatay weeraro ka dhacay dalka Mali

    Taliska milateriga dalka Mali ayaa sheegay, in ugu yaraan 64 qof lagu dilay weeraro lagu qaaday doon iyo saldhig militari oo ku yaala dalka Mali, weeraradaas oo ay fuliyeen kooxda mintidiinta islaamiga.

    Dhibanayaashu ayaa badankood la rumeysanyahay nay yihiin dad rayid ah. Faahfaahinta halka hoose ka dhageyso

16. 8 Sebtembar 2023Barkhad Cabdi: Jilaaga Soomaaliyeed ayaa lacag aad uga yar tan dhigiisa ka helay filmkii ay wada jileen

17. 7 Sebtembar 2023Ra'iisul wasaaraha Australia oo boqanaya Shiinaha

    

    Xigashada Sawirka, Getty Images

    Ra'iisul wasaaraha Australia, Anthony Albanese, ayaa xaqiijiyay inuu booqan doono Shiinaha dabayaaqada sanadkan tan oo ah astaantii ugu dambeysay ee lagu hagaajinayo xiriirka labada dal.

    Talaabadan ayaa daba socotay kulan dhexmaray Mr Albanese iyo ra'iisul wasaaraha Shiinaha, Li Qiang, oo dhinac socday shir madaxeedka gobolka ee Indonesia (Khamiistii).

    Safarkan ayaa noqonaya kii u horeeyay ee ra'iisul wasaaraha Australia uu ku tago Shiinaha tan iyo sanadkii 2016.

    Xidhiidhka u dhexeeya Canberra iyo Beijing ayaa xumaa sanadihii ugu dambeeyay.

18. 7 Sebtembar 2023Ciyaaryahannada Afrikaanka ah ee u sharaxan abaalmarinta Ballon d’Or ee sanadkan

    

    Xigashada Sawirka, AFP

    Shan ciyaaryahan oo Afrikaan ah ayaa u tartamaya inay ku guuleystaan ​​abaalmarinta Ballon d’Or oo ka mid ah abaal-marinnada ugu caansan kubadda cagta.

    Victor Osimhen oo u dhashay Nigeria, Mohamed Salah oo Masar u dhashay, Andre Onan oo Cameroon u dhashay iyo Yassine Bounou oo Marooko u dhashay ayaa kamid ah liiska ragga u sharraxan abaalmarinta Ballon d’Or ee 2023.

    Abaalmarinta Ballon d’Or waa abaalmarin sanadle ah oo lagu xuso xidigaha ugu tayada wanaagsan kubbada cagta xilli ciyaareedka, 30ka October ayay xafladda ka dhici doonta Paris.

19. 7 Sebtembar 2023Daadad kajira dalka dalka Giriiga oo khasaare dhaliyay

    

    Xigashada Sawirka, Reuters

    Kooxda gurmadka degdega ah iyo ciidamad Giriiga ayaa sii wada inay isku dayayaan inay badbaadiyaan daraasiin dad ah oo ay daadadku ku xanibmeen bartamaha dalkaasi.

    Afhayeen u hadlay dowladda ayaa ku tilmaamay fatahaadda ay dhalisay duufaanta Daniel dhacdo ka duwan kuwii kale ee horay loo arkay.

    Ugu yaraan afar qof ayaa la og yahay inay dhinteen. Ciidanka dab-damiska dalka Giriiga dadka daad gureynaya kana badbaadinaya daadadka.

    Hay'adda saadaasha hawada ee Giriiga ayaa sheegtay in roobabku ay hadda yaraadeen. Ra'iisul wasaaraha Kyriakos Mitsotakis ayaa qorsheynaya inuu booqdo goobaha ay dhibaatadu saameysey.

20. 7 Sebtembar 2023Muxuu salka ku hayaa khilaafka Cali Ciid iyo Qoor Qoor?