Saraakiil milatari ah ayaa la sheegayaa in ay wadaan qorshahaan oo ay la wadaagi doonaan Trump, balse lama oga waxa uu ka oron doono
Israel ayaa bilowday in ay qabato maraakiibta gargaarka u sida Qasa, kuwaas oo ka fog xeebaha Israa’iil sida ay sheegtay Idaacadda Ciidanka Israa’iil.
Faah-faahin intaa dheer lagama bixin arrintaan waxaase walaac laga muujinayaa in arrintaan ay caqabad ku tahay in dadka reer Qasa ee dhibaataysan ay helaan gargaarka ay u baahanyihiin.
Xigashada Sawirka, Reuters
Taliyaha guud ee ciidamada Israa’iil Eyal Zamir ayaa wacad ku maray in uu beegsan doono xaruumaha Xisbullaah ee waqooyiga Webiga Litani iyo meelaha ka baxsan si gaar ah waxa loo yaqaan “khadka Cas”, intii uu booqasho ku joogay aagag ay ciidamadiisu ka haystaan koonfurta Lubnaan.
Zamir ayaa sheegay, sida lagu sheegay bayaan militari oo la soo saaray kadib booqashadiisa ciidamada ku sugan gudaha “aagga amniga” ee Israa’iil ka samaysay koonfurta Lubnaan, in “hanjabaad kasta, meel kasta oo ay ka timaaddo, oo ka dhan ah bulshooyinkeenna ama ciidamadeenna, xitaa ka baxsan aagga amaankaah iyo waqooyiga Litani, la baabi’in doono
Donald Trump ayaa sheegay in wada-hadallada u dhexeeya Mareykanka iyo Iiraan ay socdaan iyadoo la adeegsanayo wicitaan dhanka teleefoonka ah, sida ay ku warrantay wakaaladda wararka ee Reuters.
Wuxuu sheegay in xiriirka labada dhinac uusan u baahnayn hadda safarro rasmi ah, maadaama wada-hadalla lagu wadi karo qadka teleefoonka isla markaana ay hadda socdaan.
Hadalkaan ayaa imaanaya xilli Trump uu horey u baajiyay safar ay ergada Mareykanka ku tegi lahaayeen Pakistan, kaasoo lagu waday in halkaas lagaga wada hadlo arrimaha Iiraan.
Xigashada Sawirka, Getty Images
Madaxweynaha Mareykanka Donald Trump ayaa Arbacadii soo dhoweeyay go’aanka Imaaraadka Carabta ay uga baxeen ururka OPEC, isagoo sheegay in tallaabadan ay gacan ka geysan karto hoos u dhaca qiimaha saliidda.
Isagoo la hadlayay suxufiyiinta Aqalka Cad, Trump wuxuu sheegay: “Waxaan u arkaa go’aan aad u wanaagsan.”
OPEC ayaa wajahaya cadaadis xooggan kadib markii Imaaraadku ay Talaadadii ku dhawaaqday inay ka baxayso ururka, taasoo timid xilli xiisad dhanka tamarta aduunka ah oo weyn ay ka dhalatay dagaalka Iiraan.
Trump wuxuu intaa ku daray in go’aankani uu “ugu dambeyn hoos u dhigi doono qiimaha gaaska iyo saliidda, xitaa qiimaha badeecadaha kale,” isagoo sidoo kale xusay in OPEC ay la kulmeyso caqabado.
Xigashada Sawirka, EPA
Muran ayaa ka dhex dhacay Wasiirka Difaaca Mareykanka Pete Hegseth iyo xildhibaanad Dimuqraadi ah oo la yiraahdo Sarah Jacobs, kadib dood ku saabsan qoraallo uu barta “Truth Social” ku daabacay Madaxweyne Donald Trump.
Jacobs ayaa kulanka ku soo bandhigtay laba tusaale oo qoraallo hore oo Trump leeyahay, mid ka mid ahna wuxuu ahaa sawir lagu sameeyay AI oo uu Trump isku ekaysiiyay Ciise Masiix, kaasoo uu markii dambe tiray.
Jacobs ayaa su’aal adag weydiisay Hegseth, iyadoo tiri: “Madaxweynaha ma u aragtaa inuu leeyahay xasillooni maskaxeed uu ku hoggaamiyo dalka?”
Hegseth ayaa si degdeg ah uga jawaabay, isaga oo su’aal kale ku celiyay: “Ma Joe Biden ayaad sidaas oo kale u weydiisay afartii sano ee la soo dhaafay?”
Wuxuu intaa ku daray in Dimuqraadiyiintu ay difaaceen Biden inkastoo uu, sida uu sheegay, “mararka qaar si caadi ah aanu u hadli jirin.”
Jacobs ayaa ku jawaabtay in Biden uusan ahayn musharraxa madaxweyne ee doorashadii 2024, taasoo sii adkaysay doodda labada dhinac.
Koox qarsoodi ah oo loo malaynayo inay xiriir la leedahay dowladda Iiraan ayaa sheegatay mas’uuliyadda weerar ka dhacay Golders Green, inkastoo aysan soo bandhigin wax caddeyn ah.
Kooxdaas oo la yiraahdo Harakat Ashab al-Yamin al-Islamiya (Hayi), oo micnaheedu yahay “Dhaqdhaqaaqa Islaamiga ah ee Dadka Gacanta Midig,” ayaa horey u sheegatay inay ka dambeysay lix weerar oo kale oo lala beegsaday dhismayaal ama danaha bulshada Yuhuudda ah ee UK.
Si kastaba ha ahaatee, wax badan lagama yaqaan kooxdaas. Waxaa la rumeysan yahay inay noqon karto koox wakiil u ah Iiraan, maadaama sheegashadooda lagu faafiyo kanaallo Telegram ah oo taageera Shiicada.
Sheegashadan lagu faafiyay baraha bulshada oo ay arkeen khubarada BBC Monitoring ee la socda xagjirnimada Islaamiga ah, waxay weerarka ku tilmaameen mid uu fuliyay “qof kaliya ,” waxayna sidoo kale arkeen muuqaal laga duubay goobta.
BBC waxay fahamsan tahay in baarayaasha la dagaallanka argagixisada ay ka warqabaan sheegashadan, balse waxaa jira digniin ah in aan si degdeg ah loo rumaysan.
Waxaa suuragal ah in sheegashadu tahay mid fursad looga faa’iideysanayo. Waayihii hore, kooxaha sida Daacish ayaa marar badan sheegan jiray weerarro ka dhacay Yurub, xitaa marka aysan si toos ah uga dambeyn ama ugu lug laheyn.
Xigashada Sawirka, PA Media
Ra’iisul wasaare Keir Starmer ayaa sheegay in loo baahan yahay maalgelin dheeraad ah si loo xaqiijiyo amniga bulshada Yuhuudda.
Hadalkan ayuu jeediyay kadib kulan degdeg ah oo lagu falanqeeyay jawaabta dowladda ee weerarka, iyadoo la filayo inuu la kulmo hay’adaha cadaaladda.
Wuxuu sheegay inuu la hadlay Community Security Trust, isagoo xusay in horey loo kordhiyay amniga, balse loo baahan yahay in la sii la xoojiyo si loo gaaro heerka ilaalinta loo baahan yahay.
Starmer ayaa sidoo kale sheegay in dowladdu ay qaadi doonto tallaabooyin ka dhan ah khataraha dibadda, isla markaana ay muhiim tahay in la wajaho asalka xagjirnimada iyo dadka muujinayao naceybka bulshada Yuhuudda ah.
Wuxuu carrabka ku adkeeyay in dowladda ay waajib ku tahay in bulshada Yuhuudda ay dareento ammaan iyo kalsooni, isla markaana si dhab ah loo xalliyo sababaha keena naceybka iyo xagjirnimada.
Xigashada Sawirka, Getty Images
Adam Smith, oo ah xubinta ugu sarreysa ee Xisbiga Dimuqraaddiga ee guddiga su’aalaha wyadiinaya wasaaradda Difaaca Mareykanka, ayaa weydiiyay inta uu gaarsiisan yahay kharashka ku baxay dagaalka Iiraan ee Mareykanka ilaa hadda, iyo in sharci-dejiyeyaashu heli karaan qiimeyn buuxda oo ka timaadda Pentagon-ka.
Jules Hurst, oo ka hadlayay isla dhageysiga, ayaa sheegay in kharashku yahay qiyaastii $25 bilyan, iyadoo hubka iyo rasaastu ay ka yihiin qaybta ugu badan.
Smith ayaa sheegay inuu ku faraxsan yahay in ugu dambeyn la helo tiradaas, isagoo xusay in muddo dheer ay sugayeen xogtan. Kadib wuxuu su’aal waydiiyay Pete Hegseth xogyaha Wasaaradda Difaaca Mareykan, isaga oo weydiiyay sida dowladda u qorsheyneyso inay u soo afjarto khatarta nukliyeerka ee Iiraan.
Hegseth ayaa ku eedeeyay maamulladii hore inay galeen “heshiisyo xun”, isagoo xusay heshiiska Joint Comprehensive Plan of Action ee la saxiixay 2016 xilligii madaxweynihii hore Barack Obama.
Smith ayaa arrintaas ka hor yimid, isagoo yiri: “Taasi waa wax hore, maxaa mustaqbalka dhici kara?” wuxuuna su’aal geliyay haddii ay jirtay khatar nukliyeer oo degdeg ah oo sababtay dagaalka.
Hegseth ayaa sheegay in Iiraan aysan ka tanaasulin hamigeeda nukliyeerka, taasoo uu ku sababeeyay tallaabada Mareykanka iyo Israa’iil ay ka qaadeen Iiraan.
Xigashada Sawirka, Getty Images
Guddoomiyaha Baarlamaanka Iiraan, Maxamed Baqer Qalibaf, ayaa sheegay in xayiraadda badda ee Mareykanku ku soo rogay dalkiisa ay ujeedadeedu tahay kicinta kala qaybsanaanta gudaha iyo “in nalagu riixo burbur gudaha ah.”
Telefishinka qaranka ee Iiraan ayaa soo xigtay Qalibaf oo leh in Madaxweynaha Mareykanka, Donald Trump, “uu dalka u kala qaybinayo laba garab: kuwa ad-adag iyo kuwa dhexdhexaad ah, kadibna si cad uga hadlaya xayiraad badeed si uu ugu qasbo Iiraan inay is dhiibto iyadoo la adeegsanayo cadaadis dhaqaale iyo hurinta kala qaybsanaanta gudaha.”
Kadib dilkii tiro hoggaamiyeyaal Iiraaniyiin ah oo ka dhashay weerarrada Maraykanka iyo Israa’iil, oo uu ku jiro Hoggaamiyaha Sare Ali Khamenei, waxaa si weyn loo hadal hayay dheelitirka awoodda gudaha Jamhuuriyadda Islaamiga ah.
Trump ayaa horaantii bishan Abriil sheegay in dowladda Iiraan ay “si qoto dheer u kala qaybsan tahay, taasoo aan la yaab lahayn.”
Saameynta Qalibaf ee gudaha go’aan-qaadashada ayaa sii xoogaysatay tan iyo markii uu qarxay dagaalka Maraykanka iyo Israa’iil ay ku qaadeen Iiraan 28-kii Febraayo, wuxuuna sidoo kale hoggaamiyay wafdiga dalkiisa ee wada-xaajoodkii halka mar ahaa oo ilaa hadda dhex maray Tehran iyo Washington kana dhacay Islamabad.
Qalibaf wuxuu yiri: “Cadowgu wuxuu galay marxalad cusub isagoo isku dayaya inuu kiciyo cadaadis dhaqaale isla markaana huriyo kala qaybsanaanta gudaha iyada oo loo marayo xayiraadda badda iyo buuqa warbaahinta, si uu noo daciifiyo ama xitaa noogu riixo inaan gudaha ka burburno.”
Wuxuu ku baaqay “in la ilaaliyo midnimada” taasoo uu ku tilmaamay xalka keliya.
Mareykanka ayaa xayiraad ku soo rogay dekedaha Iiraan kadib markii Tehran ay xirtay marin-biyoodka Hormuz, oo ah marin muhiim u ah dhoofinta saliidda iyo gaaska.
Hoggaamiyaha dalka Jarmalka Friedrich Mertz ayaa sheegay xiriirka uu la leeyahay Madaxweynaha Maraykanka uu weli mid ‘’wanaagsan’’, kadib markii Donald Trump ka falceliyay dhaliishiisa dagaalka Iiraan.
‘’Aragtidayda, xiriirka shakhsi ahaaneed ee aan la leeyahay madaxweynaha Maraykanka weli waa mid wanaagsan. Bilowgii dagaalka Iiraan waxaan ahaa mid ku qancin, waana sababta aan u caddeeyay arrintaasi,’’ ayuu yiri Meretz, sida laga soo xigtay Reuters.
Donald Trump ayaa ka cambaareeyay Mertz baraha bulshada maalinkii shalay, gaar ahaan halka uu ka taagan yahay dagaalka Iiraan, isaga oo yiri hoggaamiyaha Jarmalka ‘’ma yaqaan waxa uu ka hadlayo’’
WARAR KALE OO DHEERI AH
Xigashada Sawirka, AFP via Getty Images
Faransiiska ayaa ka codsaday muwaadiniintiisa inay isaga baxaan dalka Mali ‘’sida ugu dhakhsaha badan, kadib weerarka ay soo qaadeen ciidamada mucaaradka, gaar ahaan kuwa mintidiinta iyo dagaal yahanada gooni u goosadka.
Digniinta ka timid Faransiiska maanta oo Arbaca ah ayaa sidoo kale looga digay muwaadiniinta Faransiiska in aysan u safrin dalka Galbeedka Afrika, iyaga oo xaalada ku tilmaamay mid ‘’aad u halis ah’’.
Qaraxyo iyo rasaas aan kala joogsi lahayn ayaa laga soo sheegay guud ahaan dalka oo ay ku jirto caasimada Bamako, Sabtidii.
Kati, wasiirkii difaaca Sadio Camara ayaa lagu dilay ismiidaamin qaraxyo ay sameeyeen mintidiinta, halka Waqooyiga kooxaha gooni u goosadka ay la wareegeen magaalada Kidal.
Hoggaamiyaha milatariga Mali Gen Assimi Goita ayaa sheegay xaaladda ammaan ee dalka ay haatan sugan tahay oo ay gacanta ku hayaan.
WARAR KALE OO DHEERI AH
Sarkaal sare oo ka tirsan wasaarada difaaca Maraykanka ayaa sheegay in dagaalka Iiraan uu ugu kacay milatariga Iiraan kharash dhan 25 bilyan oo doolar ilaa iyo hadda.
Jules Hurst ayaa u sheegay guddiga adeega ciidamada hubaysan ee baarlamanka in inta ugu badan kharashaynta ay la xiriirtay rasaasta.
Maraykanka iyo Israa’iil ayaa qaaday duqaymaha ka dhanka ah Iiraan dhammaadkii Febraayo, waxaana uu yahay hadda mid aan degenayn in kasta oo ay xabbad-joojin jirto.
Madaxweynaha Maraykanka ayaa heerka qiimayntiisa ee gudaha ay hoos u dhacday tan iyo intii ay bilowdeen duqaymaha Iiraan iyada oo tobanaan ciidamada Maraykanka ay ilaa iyo hadda ku dhinteen colaada iyada oo boqolaal ay ku dhaawacmeen.
WARAR KALE OO DHEERI AH
Xigashada Sawirka, Getty Images
Qaramada Midoobay ayaa sheegtay tan iyo intii uu bilowday dagaalka Iiraan, inuu rajiimka Iiraan uu toogtay ugu yaraan 21 qof uuna xabsiga dhigay in ka badan 400.
Waxaa la sheegayaa in inta badan maxaabiista ay ahaayeen dhibanayaal dad la waayay iyo kuwo la jirdilay.
WARAR KALE OO DHEERI AH
Xigashada Sawirka, Getty Images
Waxaa mar kale kacay qiimaha shidaalka, kadib markii ay soo baxeen warbixinada in Maraykanka uu qorsheynayo inuu sii dheereeyo xirnaanshiyaha dekeddaha Iiraan.
Heerka shidaalka cayriin ee Brent ayaa kor u kacay iyada oo uu gaaray 117 doolar fuustadii. Waxaa ay Shan doolar ka badan tahay intii ay ahayd fiidnimadii Talaadada.
WARAR KALE OO DHEERI AH
Xigashada Sawirka, Getty Images
Wasiirka maaliyada Ruushka Anton Siluanov ayaa sheegay Arbacadii in go’aanada Imaaraatka ay isaga baxday ururka Opec ay tahay mid ku keenaysa dowladaha soo saara shidaalka inay kordhiyaan soo saarista, taasi oo hoos u dhigaysa qiimaha shidaalka caalamka ee mustaqbalka, sida ay tabisay wakaalada wararka ee Reuters.
Ruushka xubin ayay ka tahay OPEC+, waxaana loo arkaa inay tahay tan faa’iidada ugu badan ka hesha kororka sicirka shidaalka ee ka dhashay dagaalka Bariga Dhexe.
Siluanov ayaa intaa ku daray ‘’Waxaynu maqlaynaa in mid kamid ah dowladaha oo ah Imaaraatka ay isaga baxayso Opec. Taasi maxay la mico tahay? Waxay la micno tahay in dowladda ay suurtagal u tahay soo saarista in ka badan tirada shidaalka awoodeeda ah ee u oggolaanaya soo saarista iyo suuq gaynteeda’’
WARAR KALE OO DHEERI AH
Xigashada Sawirka, PA Media
Ku-xigeenka madaxa la-dagaalanka argagixisada Laurence Taylor ayaa sharci ahaan ku sheegay weerar argagixisanimo shilka weerarka toorreey ee lagu qaaday Golders Green.
Ilaa labo qof ayaa si xun ugu dhaawacmay weerarka, iyada oo xabsiga loo taxaabay qofka weerarka gaystay.
Taylor ayaa ugu dhawaaqay shilka inuu ahaa shilka weerar argagixiso.
WARAR KALE OO DHEERI AH
Xigashada Sawirka, Reuters
Madaxweynaha Maraykanka Donald Trump ayaa ugu baaqay Iiraan Arbacadii inay ‘caqli lahaadeen sida ugu dhakhsiiyaha badan’ ayna saxiixaan heshiis, iyada oo dabasocota maalmo kama dambays ah oo lagu raadinayay dadaalka in lagu dhammeeyo colaada, waxaana warbixino ay sheegayaan in Maraykanku uu kordhinayo sii xirnaanshaha dekeddaha Iiraan.
Qoraal uu soo dhigay barta bulshada Truth Social ayaa Trump sheegay in Iiraan ay soo wici karaan haddii ay wadahadal doonayaan, waxaana uu adkeeyay si laalabasho leh in Tehran aysan yeelan karin Nukliyeer.
Wargayska Wall Street Journal ayaa tilmaamay saraakiisha Maraykanka ay sheegeen Madaxweynaha (Trump) uu u sheegay kaaliyayaashiisa inay isku diyaariyaan sii xirnaanshiyo wakhtiga loo dheereeyay oo lagu soo rogayo dekedaha Iiraan, taasi oo ah iskuday Iiraan loogu khasabayo inay is-dhiibto.
WARAR KALE OO DHEERI AH
Xigashada Sawirka, Reut
Warar dheeri ah oo ka imaanaya dhanka ra’iisul wasaaraha Ingiriiska Keir Starmer, kaas oo waxyar kahor u sheegay xildhibaanada in uu ‘aad uga walaacsan yahay’’ weerarka Golders Green ayaa mar kale ka sheegay qoraal uu soo dhigay barta bulshada in ‘’weerarka Yuhuud nacaybka ee Golders Green uu ‘’gabi ahaanba yahay mid si weyn looga walaaco.’’
Starmer ayaa u mahadceliyay Kooxaha Bulshada Yahuuda ee Shomrin iyo Hatzola iyo booliska , ‘’sida dhakhsaha badan’’ ee ay uga jawaabeen, waxa kale oo uu ballan qaaday in cadaalada la hor keenayo uuna yahay ‘’weerarka bulshada Yahuuda weerar lagu soo qaaday Britain,’’ sida uu sheegay.
WARAR KALE OO DHEERI AH
Xigashada Sawirka, PA Media
Duqa magaalada Londn ayaa xaqiijiyay xiritaanka ay sameeyeen booliska London. Qoraal uu soo dhigay barta-bulshada Sadiq Khan ayaa ku xaiijiyay weerarka lagu qaaday labo kamid ah Yuhuuda reer London ee Golders Green.
Waxaa uu sidoo kale ka hadlay inay boolisku sameeyeen xiritaano.
‘’Waxaan xiriir dhow la leeyahay @MetPoliceUK, kuwaasi oo ina siinaya warbixinadii u dambeeyay,’’ ayuu yiri, isaga oo intaa ku daray ‘’ Met (booliska magaalada) waxa ay kor u qaadeen roondada muuqata ee aagga 'uu shilku ka dhacay'’’.
WARAR KALE OO DHEERI AH
Xigashada Sawirka, UK Parliament/PA
Isaga oo ka hadlayay Baarlamanka, ra’iisul wasaaraha Ingiriiska Keir Starmer ayaa sheegay toorriyaynta maanta ee Golders Green waa mid ‘’walaac xooggan keh’’.
Waxaa uu sheegay inuu baaritaan socdo, isaga oo intaasi ku daray in dalku uu u baahan yahay ‘’gabi ahaan meel cad laga istaago doonitaankeena la macaamilida weeraradan sida aynu ka aragnayba in badan muddooyinkii u dambeeyay’’.
WARAR KALE OO DHEERI AH
