TOOS, Markab badeeco qaada oo lagu weeraray meel u dhaw dekadda Xudeyda ee Yeman

Tebin toos ah

1. 4 Luulyo 2026Trump oo sheegay in Iran ay siiyeen wakhti ay ku aastaan hogaamiyahoodii sare

   Madaxweynaha Mareykanka Donald Trump ayaa sheegay in Washington ay siisay Tehran muddo hal toddobaad ah si ay u aasaan hoggaamiyihii hore ee sare ee Iran Cali Khamenei, isagoo yiri “maxaa yeelay dad wanaagsan ayaa nahay.”

   Waaxaa xusid mudan in Hoggaamiyihii Sare ee Iiraan lagu dilay weerarro ay Mareykanka iyo Israa'iil ku qaadeen Iiraan.

   Isagoo ka hadlayay furitaanka xuska 250-aad ee aasaaska Mareykanka oo ka dhacay Mount Rushmore National Monument habeenkii Jimcaha, Trump wuxuu ku andacoodey in Iran ay dooneyso inay “heshiis la gaarto” Mareykanka.

   “Waxaan hal maalin ku jabinnay Venezuela, sidoo kalena si weyn ayaan u waxyeellaynay Iran,” ayuu yiri, isagoo xusay waxa uu ku tilmaamay awoodda milatari ee Mareykanka. “Waxay si aad ah u doonayaan heshiis, aad bayna u rajo beeleen inay arrintan xalliyaan.”

   Wuxuu intaas ku daray: “Waxaan siinnay hal toddobaad si ay u aasaan, maxaa yeelay waan wanaagsan nahay.”

   Sidoo kale akhriso

   Iiraan: "Haddii Maraykanka iyo Israa'iil ay weeraraan aaska Ayatollah Cali Khamenei waa ka jawaabeynaa"

   Yaa ka soo qayb gali doona aaska Ali Khamenei, mase imaan doonaa Narendra Modi, ra'iisul wasaaraha Hindiya?

   Waa kuma Mojtaba Khamenei, wiilka uu dhalay Ali Khamenei ee loo doortay hugaamiyaha ruuxigaha ee Iran?

2. 4 Luulyo 2026Kumuu ahaa Ayatollah Cali Khamenei oo maanta aas qaran loo sameynayo?

   Waxaa magaalada Tehran iyo guud ahaan Iran ka socda aaska iyo tacsida hogiyihii ruuxiga iran Ayatollah Cali Khamenei.

   Khamenei waxaa lagu dilay weeraradoo ugu horeeyay ee ay Mareykanka iyo Iraan ku qaadeen dalka Iran.

   Taariikhda Ayatollah Cali Khamenei si aad u akhriso ku dhufo lifaaqa hoose.

   Kumuu ahaa Ayatollah Cali Khamenei,

3. 4 Luulyo 2026Iran oo digniin u dirtay Fransiiska iyo Britain

   Isaga oo ka jawaabaya bayaan wadajir ah oo ay soo saareen Britain iyo Faransiiska, Wasiir ku-xigeenka Arrimaha Dibadda ee Iran Kazem Gharibabadi ayaa ka digay in joogitaan militari laga sameeyo Marinka Hormuz.

   Britain iyo Faransiiska, bayaan ay si wadajir ah u soo saareen Jimcihii, waxay ku tilmaameen Marinka Hormuz inuu yahay “halbowle muhiim ah oo u ah dhaqaalaha caalamka”, waxayna sheegeen inay diyaar u yihiin inay diraan ciidamo si loo xaqiijiyo marin ammaan ah oo xor ah oo maraakiibtu uga gudbaan marinkan istiraatiijiga ah ee maraakiibta.

   Labada dal ayaa sidoo kale sheegay inay la shaqayn doonaan saaxiibada gobolka, oo ay ku jirto Cumaan, si loo xoojiyo amniga badda ee marinka.

   Mr. Gharibabadi ayaa barta bulshada ee X ku soo bandhigay sawirka bayaanka wadajirka ah ee Britain iyo Faransiiska, isagoo qoray:

   “Marinka Hormuz ma aha goob lagu sameeyo bandhig milatari oo ay isticmaalaan quwadaha ka baxsan gobolka,Iran, oo ah awood mas’uul ah isla markaana dammaanad qaadaysa amniga marinka, waxay ka digaysaa dhaqdhaqaaq kasta oo militari oo ka dhaca marin-biyoodkan xasaasiga ah".

   "Amniga Hormuz waxaa iska leh dalalka xeebaha leh; kuwa abuura xiisadaha ayaa qaadi doona mas’uuliyadda cawaaqibka ka dhalan kara tallaabooyinkooda. Tani waa digniin culus.” ayuu intaa ku daray.

   Wargeyska Bloomberg News ayaa Khamiistii sheegay, isagoo soo xiganaya ilo xog-ogaal ah, in qaar ka mid ah dalalka waaweyn ee Yurub ay hadda aqbaleen in bixinta lacag si maraakiibta loogu oggolaado inay si ammaan ah uga gudbaan Marinka Hormuz ay noqon karto mid aan laga fursan karin.

   Sidoo kale akhriso

   Iiraan: "Haddii Maraykanka iyo Israa'iil ay weeraraan aaska Ayatollah Cali Khamenei waa ka jawaabeynaa"

   Yaa ka soo qayb gali doona aaska Ali Khamenei, mase imaan doonaa Narendra Modi, ra'iisul wasaaraha Hindiya?

   Waa kuma Mojtaba Khamenei, wiilka uu dhalay Ali Khamenei ee loo doortay hugaamiyaha ruuxigaha ee Iran?

4. 4 Luulyo 2026Taliye cusub oo looga magacaabay ciidamads Badda ee ciidanka IRGC ee Iran

   Cali Azmaei waxaa loo magacaabay taliyaha cusub ee Ciidanka Badda IRGC.

   Taliyihii hore ee ciidankan wuxuu ahaa Alireza Tangsiri, kaasoo la dilay Abriil 26, weerar ay qaadeen ciidamada Mareykanka iyo kuwa Israa'iil.

   Ali Azmaei wuxuu hore u ahaa taliyaha Gobolka Shanaad ee Ciidanka Badda IRGC.

   Gobolka Shanaad ee Ciidanka Badda IRGC waxaa la aasaasay Noofambar 4, 2012, waxaana hawlgalkiisa lagu dhawaaqay "laga bilaabo cirifka Jasiiradda Qeshm, oo lagu daray aagga Jasiiradaha Nazeat, ilaa galbeedka Jasiiradda Kish."

   Mr. Azmaei waxaa loo magacaabay taliyaha gobolkan laga bilaabo taariikhdaas.

   Kahor intaas, wuxuu ahaa ku xigeenka taliyaha Gobolka Koowaad ee Ciidanka Badda IRGC.

5. 4 Luulyo 2026Mojtaba Khamenei ma huggaamin doono janaasada aabihiis

   Warbaahinta Iran ayaa sheegaysa in magaalo kasta, uu wadaadka ugu sarreeya hoggaamin doono salaadda janaasada ee Cali Khamenei iyo qoyskiisa.

   Sida ay sheegeen wakaaladaha wararka ee Iran, Jafar Sobhani Tabrizi ayaa hoggaamin doona salaadda janaasada ee Tehran, Nasser Makarem Shirazi ayaa ka hoggaamin doona Qom, halka Hossein Nouri Hamedani uu ka hoggaamin doono Mashhad.

   Cali Akbar Pourjamshidian, oo ah xoghayaha guddiga qabanqaabada aaska Cali Khamenei, ayaa sheegay in go'aanka ku saabsan ka qaybgalka Mojtaba Khamenei ee aaska aabihiis uu u yaallo qoyska Hoggaamiyaha Sare, haddii la qorsheeyona lagu shaacin doono xafiiskiisa.

   Mojtaba Khamenei laguma arkin goobaha dadweynaha tan iyo bilowgii dagaalka—markaas oo aabihiis iyo xubno dhowr ah oo qoyskiisa ka tirsan lagu dilay daqiiqadihii ugu horreeyay ee dagaalka socday 40-ka maalmood—mana jiro wax muuqaal ama cod ah oo laga soo saaray isaga.

6. 4 Luulyo 2026Cuntooyinka kaa caawin kara korriinka Timaha

   Timaha banii'aadanka waxay ka kooban yihiin borootiin la yiraahdo Keratin kasoo sidoo kale qaabilsan korriinka cidiyaha iyo maqaarka jirka.

   Timaha waxaa sidoo kamid ah qeybta u xilsaaran kalarka ,qeybta difaaca iyo sidoo kale qeybta hoose ee qaabilsan tamarta ay u baahan yihiin timaha.

   Faahfaahinta ku dhufo lifaaqa hoose

   Cuntooyinka kaa caawin kara korriinka Timaha

7. 4 Luulyo 2026In ka badan 600,000 oo qaxooti Lubnaaniyiin ah ayaa dib ugu laabtay guryahooda - IOM

   Hay'adda Caalamiga ah ee Socdaalka (IOM) ayaa ku dhawaaqday in in ka badan "640,000" oo qaxooti Lubnaan ah ay ku soo laabteen guryahooda iyadoo dagaalku uu yaraaday ka dib markii la gaaray heshiis lagu soo afjarayo dagaalka Bariga Dhexe.

   Ururku wuxuu warbixin ku sheegay in qiyaastii "500,000 oo qof" ay weli barakaceen oo aysan awoodin inay ku laabtaan guryahooda.

   Tiradani waxay ku salaysan tahay xog la ururiyay tan iyo Juun 22 iyadoo lala kaashanayo mas'uuliyiinta maxalliga ah.

   Lubnaan waxay gashay dagaal goboleed horraantii Maarso (afar bilood ka hor), markii Hezbollah, oo ah koox ay taageerto Tehran, ay gantaallo ku tuurtay Israa'iil si ay uga jawaabto dilkii hoggaamiyaha Jamhuuriyadda Islaamiga ah ee Iiraan ee weerarrada wadajirka ah ee Mareykanka iyo Israa'iil.

   Iyada oo ka jawaabaysa, Israa'iil waxay bilowday duqeymo cirka ah iyo duullaan dhulka ah oo ay ku qaadday koonfurta Lubnaan, oo ah aag ay weli ciidamada Israa'iil ku sugan yihiin qaybo ka mid ah.

8. 4 Luulyo 2026Mareykanka ayaa ciidamo kala baxay Nigeria kadib hawlgal ka dhan ah kooxda Dowladda Islaamka

   Mareykanka ayaa kala baxay ciidamadiisa la geeyay Nigeria horaantii sanadkan si ay gacan uga geystaan ​​la dagaalanka kooxaha diimaha ee xagjirka ah.

   Bishii Disembar ee lasoo dhaafay, ciidamada Mareykanka iyo kuwa Nigeria ayaa howlgal wadajir ah ka billaabay gobolka Harada Chad, kaasoo ay ku jireen weerarro lagu bartilmaameedsaday maleeshiyaadkii maalinta Kirismaska, waxaana xigay 200 oo askari oo labo bilood kaddib la geeyay.

   Hogaamiyihii ugu sareeyay Daacish Abu-Bilaal al-Minuki ayaa lagu dilay howlgalka oo socday dhowr bilood.

   Khamiistii, Mareykanku wuxuu muujiyay guulaha laga gaaray howlgalka, iyadoo afhayeen u hadlay militariga Nigeria uu BBC-da u sheegay in ka bixitaanka ciidamada Mareykanka aysan "wax saameyn ah ku yeelan doonin dardarkeena".

   Iyadoo ay jiraan howlgalladaas, kooxaha jihaad doonka ah ayaa sii waday weerarada, gaar ahaan waqooyi bari Nigeria.

   Sarreeye Gaas Michael Onoja ayaa sheegay in iskaashiga dhanka sirdoonka ee labada dal uu sii socon doono, waana arrin uu militariga Mareykanka ku sheegay warbixintiisa.

   Wadashaqeynta militari ee u dhaxeysa Nigeria iyo Mareykanka ayaa kor u kacday kadib markii Washington ay ku eedeysay mas’uuliyiinta Nigeria inay ku guuldareysteen inay si waafi ah uga hortagaan dagaalyahannada jihaad doonka ah, waxayna sheegtay inuu dalkaas ka dhacay "xasuuq ka dhan ah Masiixiyiinta Masiixiyiinta ah".

   Nigeria ayaa beenisay eedeymahaas, waxayna sheegtay in rabshadaha ay saameeyaan dadka ka soo jeeda dhammaan bulshooyinka.

9. 4 Luulyo 2026'Aargoosi' oo ayay ku qaylinayaan dadka isugu soo baxay aaska Ali Khamenei

   Weriyaha wakaaladda wararka ee AFP oo ku sugan magaalada Tehran ayaa sheegaya in kumanaan qof ay isugu soo baxeen deegaanka Mosal ee magaalada Tehraan ka hor imaanshaha naxashka Ali Khamenei, hogaamiyihii hore ee jamhuuriyadda Islaamiga ah.

   Sida laga soo xigtay wakaaladda wararka, tiro ka mid ah ka qaybgalayaasha ayaa sitay calan cas iyo boorar, midab la xiriira baaqyada aargoosiga.

   Warbixintu waxay tilmaamtay in dadkii goobta joogay ay ku dhawaaqayeen halku dhigyo ay ka mid yihiin “Dhimashada Ameerika” iyo “Aargoosi, Aargoosi”.

   Telefishinka qaranka Iran ayaa ku dhawaaqay in xaflada aaska dadwaynaha ee lixda maalmood ah ee Mr. Khamenei ay bilaabatay subaxnimadii Sabtida.

10. 4 Luulyo 2026Aaska qaran ee loo samaynayo Cali Khamenei

    Magaalada Tehraan waxaa ka billowday aaska ee loo samaynayo Hoggaamiyihii Sare ee hore ee Iiraan Cali Khamenei iyo dad kale oo ehelkiisa ahaa, iyadoo shalay la qabtay xaflad maamuus caalami ah oo ay ka soo qaybgaleen hoggaamiyayaal iyo ergooyin ka socday waddamo kala duwan oo caalamka ah, oo uu ka mid ahaa wafdi heer sare ah oo uu hoggaaminayo Ra'iisul Wasaaraha Pakistan Shehbaz Sharif.

    Kuwani waa sawirradii ugu dambeeyay ee aaska hoggaamiyihii ruuxiga ahaa ee Iiraan.

11. 4 Luulyo 2026Trump: Todobaad ayaan siinnay Iiraan si loo aaso Khamenei

    Madaxweynaha Mareykanka Donald Trump ayaa sheegay in Washington ay toddobaad siisay Tehraan si ay u aasto Hoggaamiyihii Sare ee hore ee Iiraan Cali Khamenei, kaas oo ku dhintay weeraradii Mareykanka iyo Israa'iil, isagoo xusay in tallaabadan ay u sameeyeen "sababtoo ah inaan nahay dad wanaagsan".

    Mr. Trump, oo ka hadlayay furitaanka dabaaldegga sannad-guurada 250-aad ee aasaaska Mareykanka oo habeenkii Jimcaha ka dhacay Mount Rushmore, ayaa sheegay in Iiraan ay aad u rabto inay "heshiis la gasho" Mareykanka.

    Isagoo ku faanaya awoodda ciidanka Mareykanka ee adduunka, wuxuu intaas ku daray in ay hal maalin gudaheed ku jabiyeen dalka Venezuela, sidoo kalena ay khasaare xoogan u geysteen Iiraan, wuxuuna ku celiyay in muddada toddobaadka ah ee ay u siiyeen aaska hoggaamiyaha ay tahay naxariis ay u muujiyeen.

12. 4 Luulyo 2026Trump: Maraykanku weligiis ma fashilmin isma na dhiibin

    Madaxweynaha Mareykanka Donald Trump, isagoo ku jira habeenka looga dabaaldegayo sannad-guuradii 250-aad ee madaxbannaanida dalkaas, waxa uu weerar afka ah ku qaaday waxa uu ugu yeeray "khatar cusub oo ku wajahan aqoonsiga qaranka Mareykanka", isagoo tilmaamay "xagjiriinta gudaha".Khudbaddiisa waddaniga ahayd, wuxuu ku ammaanay aaminsanaanta ah in Mareykanku yahay dal sarreeya islamarkaana gaar ah, isagoo ammaanay hoggaamiyayaashii hore ee dalkaas.Mr. Trump oo ka hadlayay fagaaraha taallada caanka ah ee Mount Rushmore ee gobolka South Dakota, ayaa ku tilmaamay Mareykanka dal "aan waligiis is dhiibin, marnabana fashilmin."

13. 4 Luulyo 2026Xulafada uu Sucuudigu hoggaamiyo oo hanjabaad u diray Xuutiyiinta

    Isbahaysiga uu Sacuudigu horkacayo ee ka dagaallama dalka Yemen ayaa ku dhawaaqay in ay si go'aan qaadasho leh iyo "xoog aan horay loo arag" ugu jawaabi doonaan isku day kasta oo lala beegsanayo boqortooyada Sacuudi Carabiya.War-murtiyeedkan ka soo baxay isbahaysiga ayaa yimid saacado yar kaddib markii afhayeenka ciidammada kooxda Xuutiyiinta ee taageerada ka hesha Iiraan uu uga digay Sacuudiga in haddii uu sii wado waxa uu ugu yeedhay ku xadgudubka hawada Yemen, ay kooxdoodu beegsan doonto garoommada diyaaradaha iyo goobaha muhiimka ah ee Sacuudigu ku leeyahay berriga iyo baddaba.

14. 4 Luulyo 2026Colombia oo iska xaadirisay wareegga 16-ka ee Koobka Adduunka

    Kolombiya ayaa hal gool iyo waxba kaga badisay xulka Ghana, ciyaartii ugu dambaysay ee wareegga 16-ka ee Koobka Adduunka.

    Xulka Kolombiya ayaa hoggaanka ciyaarta qabtay qeybtii hore iyo daqiiqadihii ugu horreeyay ee ciyaarta. Intii ay ciyaartu socotay kaddib, kooxda Ghana oo uu tababare u yahay Carlos Queiroz ayaa isku dayday in ay iska soo gudaan goolkaas laga dhaliyay, balse qaybtii hore ee ciyaarta waxay ku dhammaatay natiijadaas.

    Qeybtii labaad ee ciyaarta, Kolombiya ayaa haddana muujisay ciyaar aad u wanaagsan, waxayna ku guuleysteen in ay dhaliyaan gool labaad daqiiqaddii 55-aad ee ciyaarta, balse calan-hayaha ayaa tilmaamay inuu ahaa offside. Kaddib markii dib loo eegay dhacdadaas, goolkii waa la diiday, ciyaartuna waxay ku dhammaatay isla natiijadii 1-0 oo ay guushu ku raacday Kolombiya.

    Natiijadan darteed, Kolombiya waxay u gudubtay wareegga 16-ka ee Koobka Adduunka 2026, waxayna wajihi doontaa xulka Iswisarland taariikhdu marka ay tahay July 7.

15. 4 Luulyo 2026Ukrayn: Hore-u-socoshada ciidanka Ruushka ee bariga dalka waa la wiiqay

    Masuuliyiinta Ukraine, oo uu ku jiro madaxweynaha dalkaas, ayaa sheegay in horusocodkii ciidamada Ruushka ee bariga Ukraine uu si weyn u gaabiyay tan iyo bilowgii sannadkan, ayna ciidamada Ukraine xitaa ku guuleysteen inay dib u qabsadaan meelaha qaar.

    Madaxweynaha Ruushka Vladimir Putin ayaa meesha ka saaray sheegashadaas intii uu ku guda jiray khudbadiisa, isagoo sheegay in ay qayb ka yihiin "olole dacaayad ah" oo ay Ukraine ku soo bandhigayso "guulaha ay sheeganayso."

    Madaxweynaha Ukraine Volodymyr Zelensky ayaa warqad furan ku weydiistay Vladimir Putin in ay si toos ah u kulmaan, balse hoggaamiyaha Ruushka ayaa diiday soo jeedintaas.

    Dedaallada Mareykanka ee lagu horumarinayo heshiis nabadeed, oo ay gadhwadeen ka tahay Washington, ayaa istaagay xilli ay jirto xiisad kala dhaxaysa Iiraan. Si kastaba ha ahaatee, labada dhinac ee Moscow iyo Kiev ayaa sheegay in ay rajaynayaan booqashada dhow ee Steve Whittaker.

16. 4 Luulyo 2026Aas qaran oo loo samaynayo hoggaamiyihii la dilay ee Iiraan

    Warbaahinta Iriaan ayaa sheegtay in la la furay albaabbada dhanka waqooyi ee Mosalla ee magaalada Tehran, xilli ay sii kordhayaan dadweynaha ku sugan goobtaasi.Dadkaas ayaa ka qaybqaadanaya aaska Cali Khamenei. Waxaa qorshuhu yahay in naxashka hoggaamiyihii hore ee Jamhuuriyadda Islaamiga ah iyo afar xubnood oo qoyskiisa ka mid ah si guud loogu soo bandhigo fagaaraha Mosalla ee Tehran, iyadoo dadkuna ay hareer mari doonaan.

    Masuuliyiinta Iiraan ayaa filayaa in inta u dhaxaysa 15 ilaa 20 milyan oo qof ay ka qaybgalaan aaska oo muddo lix maalmood ah ka socon doona magaalooyin kala duwan oo ku yaalla dalalka Iiraan iyo Ciraaq. Waxaa la sheegay in magaalada Baqdaad ee caasimadda Ciraaq la xidhi doono maalinta Arbacada ah sababo la xidhiidha munaasabadda rasmiga ah. Dhanka kale, tiro masuuliyiin sare ah oo ka socda dalalka Ruushka, Bakistaan iyo Bartamaha Aasiya ayaa ka qaybgalaya.

17. 3 Luulyo 2026Mas’uuliyiin ka socday Sacuudiga iyo hoggaamiyeyaal kale oo ka qaybgalay aaska Cali Khamenei ee Tehran

    Wasiir Ku-xigeenka Arrimaha Dibadda ee Sacuudiga, Waliid Al-Khuraiji, iyo wafdi uu hoggaaminayo ayaa ka qaybgalay munaasabadda tacsida iyo aaska Hoggaamiyihii hore ee Jamhuuriyadda Islaamiga ah ee Iiraan, Cali Khamenei, oo lagu qabtay goob salaadda lagu tukado oo ku taalla magaalada Tehran.

    Sidoo kale, hoggaamiyeyaal iyo mas’uuliyiin kale oo caalami ah oo u safray Tehran si ay uga qaybgalaan munaasabadda ayaa tacsidooda u muujiyay Cali Khamenei.

    Waxaa ka mid ah Madaxweynaha Tajikistan, Emomali Rahmon; Madaxweynaha Georgia, Mikheil Kavelashvili; Madaxweynaha Ciraaq, Nizar Omeidi; Guddoomiyaha Baarlamaanka Ciraaq, Haibat al-Halbousi; Ra’iisul Wasaaraha Armenia, Nikol Pashinyan; Hoggaamiyaha Turkmenistan, Gurbanguly Berdimuhamedow; iyo Guddoomiyaha Aqalka Wakiillada Belarus, Igor Sergeenko.

    Sidoo kale, Guddoomiyeyaasha Baarlamaannada Cumaan iyo Qatar ayaa iyaguna hoggaaminaya wafdiyo u tegay magaalada Tehran si ay uga qaybgalaan munaasabadda.

    Sidoo kale akhriso

    Iiraan: "Haddii Maraykanka iyo Israa'iil ay weeraraan aaska Ayatollah Cali Khamenei waa ka jawaabeynaa"

    Yaa ka soo qayb gali doona aaska Ali Khamenei, mase imaan doonaa Narendra Modi, ra'iisul wasaaraha Hindiya?

    Waa kuma Mojtaba Khamenei, wiilka uu dhalay Ali Khamenei ee loo doortay hugaamiyaha ruuxigaha ee Iran?

18. 3 Luulyo 2026Taliban-ka Afgaanistaan ​​oo beddelay magaca booliiska Taraafikada una bixiyay magac cusub

    Dowladda Taliban ee Afghanistan ayaa shaacisay inay magac cusub u bixisay booliiska taraafikada iyo kuwa ilaalinta xuduudaha, kuwaas oo hadda ka dib loogu yeeri doono “Sharta”.

    Sida ay sheegtay Wasaaradda Arrimaha Gudaha ee Taliban, go’aankan ayaa lagu dhaqangeliyay amar rasmi ah oo ka soo baxay Hoggaamiyaha Sare Mullah Haibatullah Akhundzada, kaas oo faray in la tirtiro erayada lagu tilmaamo “shisheeye ama afka qalaad” ama “aan Afgaanistaan ahayn”.

    Erayga Carabiga ah “Shurta” (شرطة) ayaa macnihiisu yahay booliis, waxaana si ballaaran looga adeegsadaa dalal badan oo Carbeed, sida Sacuudi Carabiya.

    Horay, 3-dii May, iyadoo lagu dhaqmayay amar ka yimid Akhundzada, waxaa sidoo kale la faray in laga saaro erayga Ingiriisiga ah “national” magacyada hay’adaha dowladda.

    Kadib, dhowr wasaaradood ayaa beddelay magacyadooda. Tusaale ahaan, Wasaaradda Difaaca Qaranka ayaa loo bixiyay Wasaaradda Difaaca, halka Hay’adda Qaranka ee Ilaalinta Deegaanka loo beddelay Agaasinka Guud ee Ilaalinta Deegaanka.

    Sidoo kale akhriso

    Iiraan: "Haddii Maraykanka iyo Israa'iil ay weeraraan aaska Ayatollah Cali Khamenei waa ka jawaabeynaa"

    Yaa ka soo qayb gali doona aaska Ali Khamenei, mase imaan doonaa Narendra Modi, ra'iisul wasaaraha Hindiya?

    Waa kuma Mojtaba Khamenei, wiilka uu dhalay Ali Khamenei ee loo doortay hugaamiyaha ruuxigaha ee Iran?

19. 3 Luulyo 2026Sawirro dayax-gacmeed oo muujinaya burbur ka dhashay weerarro lagu qaaday Nukliyeerka Iran

    Shirkad bixisa sawirrada dayax-gacmeedka oo lagu magacaabo Planet Labs PBC ayaa dhowaan soo saartay in ka badan 250,000 oo sawirro heer sare ah, kuwaas oo markii ugu horreysay si cad u muujinaya baaxadda burburka ka dhashay qaar ka mid ah xarumaha militari iyo nukliyeerka Iran intii lagu jiray dagaalka.

    Planet Labs, oo ka mid ah shirkadaha hormuudka ka ah sawirrada dayax-gacmeedka, ayaa dib u soo celisay helitaanka sawirro ka kooban ku dhowaad 800 goobood oo ku yaalla Iran, kuwaas oo horey loo xaddiday 9-kii March kadib codsi ka yimid dowladda Mareykanka.

    BBC Verify ayaa falanqeeysay sawirrada dayax-gacmeedka, kuwaas oo diiradda saaray laba goobood oo muhiim ah, Isfahan iyo Bushehr.

    Sida ay sheegtay shirkadda sirdoonka militari ee Janes, sawirradu waxay muujinayaan in weerarradu ay beegsadeen xarumo kala duwan, oo ay ku jiraan kaydka rasaasta, kaabeyaasha gantaallada ballistic-ga, xarumaha nukliyeerka, goobaha difaaca hawada, iyo saldhigyada ciidamada badda.

    Warbixinno hore oo la xaqiijiyay ayaa sidoo kale muujiyay in goobahan ay hore u beegsadeen Mareykanka iyo Israa’iil, hase yeeshee sawirrada cusub ee dayax-gacmeedka ayaa bixiya faahfaahin dheeraad ah oo ku saabsan bartilmaameedyada iyo baaxadda burburka.

    Burbur ballaaran oo ka dhacay agagaarka Bushehr

    Sawirrada dayax-gacmeedka ayaa muujinaya in dhowr goobood oo ku yaalla agagaarka magaalada xeebta ah ee Bushehr ay si weyn u burbureen ama gabi ahaanba u baaba’een tan iyo 9-kii March.

    Sida ay sheegtay shirkadda Janes, xarumaha ay saameeyeen waxaa ka mid ah dhismayaal militari iyo dowladeed, sida hangarro diyaaradeed, bakhaarro hub, xarumo dayactir iyo dhismo maraakiib, iyo sidoo kale goobaha laga rido gantaallada.

    Sawirradu waxay muujinayaan burbur cad oo ka muuqda goobahaas, iyadoo qaar ka mid ah aagagga lagu tilmaamay “goobo militari” oo ku yaalla khariidadaha internet-ka sida OpenStreetMap ay gebi ahaanba burbureen dhismayaashii ku yiilay.

    Sida lagu sheegay warbixinta, goobaha ay waxyeelladu gaartay waxay ka tirsan yihiin labada dhinac ee dowladda Iran iyo sidoo kale Ciidanka Ilaalada Kacaanka Islaamiga ah (IRGC).

    Hoose ka eeg sawirada

20. 3 Luulyo 2026Madaxda Taliban iyo mucaaradkooda oo aaska Khamenei, ku wada-kulmay

    Munaasabadda aaska Hoggaamiyihii hore ee Jamhuuriyadda Islaamiga ah ee Iiraan, Cali Khamenei, waxaa ka qaybgalay mas’uuliyiin ka tirsan dowladda Taliban iyo sidoo kale hoggaamiyeyaal ka tirsan mucaaradka Afghanistan.

    Warbaahinta Iiraan ayaa baahisay sawirro muujinaya Axmad Massoud, hoggaamiyaha Jabhadda Iska-caabbinta Qaranka Afghanistan, iyo Maxammad Mohaqiq, hoggaamiyaha Xisbiga Midnimada Islaamiga ah ee Shacabka Afghanistan, iyagoo u wda tacsiyaynaya Cali Khamenei iyo xubno ka tirsan qoyskiisa.

    Sidoo kale, wafdi ka socday dowladda Taliban oo uu hoggaaminayay Ra’iisul Wasaare Ku-xigeenka, Abdul Ghani Baradar Akhund, iyo Wasiirka Arrimaha Dibadda, Amir Khan Muttaqi, ayaa ka qaybgalay munaasabadda, iyagoo booqday masaajidka lagu qabtay tacsida ee magaalada Tehran.

    Madaxda Taliban iyo mucaaradkooda oo isku mar ka soo muuqday aaska Cali Khamenei ee Tehran ayaa noqotay dhacdo si weyn loo hadal hayo, maadaama labada dhinac ay muddo dheer uu u dhaxeeyay khilaaf siyaasadeed iyo mid militari.

    Sidoo kale akhriso

    Iiraan: "Haddii Maraykanka iyo Israa'iil ay weeraraan aaska Ayatollah Cali Khamenei waa ka jawaabeynaa"

    Yaa ka soo qayb gali doona aaska Ali Khamenei, mase imaan doonaa Narendra Modi, ra'iisul wasaaraha Hindiya?

    Waa kuma Mojtaba Khamenei, wiilka uu dhalay Ali Khamenei ee loo doortay hugaamiyaha ruuxigaha ee Iran?