Diyaaradaha Isra’iil oo garaacay bartilmaameedyo ku yaala Suuriya.

Tebin toos ah

1. 12 Nofembar 2023Sida loo kala xukumay dadkii dawladda ka tirsanaa ee Al-shabaab lagu eedeeyay

   Dad ka tirsnaa shaqaalaha maamulka gobolka Benaadir oo ku eedaysnaa inay la shaqeeyaan Al-shabaab ayaa maanta la xukumay.

   Sida aan kasoo xigannay warbaahinta dawladda, sidan ayuu u kala dhignaa xukunkoodu:

   "Cabdiraxiin Maxamed Cusmaan Jimcaale (Macruuf) Ayaa u qaabilsanaa Alshabaab Gudbinta Macluumaadka iyo Xogaha Xubnaha ka shaqeeya Degmooyinka kala ah, Dayniile, Yaaqshiid, Hilwaa, Hodan, Howl-wadaag. Macruuf ayaa Afar iyo tobankii bishii Jun ee sanadkaan Hay’adda Nabad Sugidu ka soo qabatay suuqa weyn ee Bakaaraha.

   • Computer-kiisa ayaa laga helay liiska xogta iyo taleefanada Shariif Nuur Awliyo iyo Cabdi Cali Tabliiq iyo Xubno kale oo Maqanayaal ah oo uu horjooge u ahaa, Maanta aye Maxkamadda Darajada koowaad ee Ciidamadda ku xukuntay 10 sano oo Xabsi Ciidan ah.
   • Shariif Nuur Cali Aadan Ayaanle (Shariif Owliyoo) oo ahaa gudoomiyaha waaxda October ee Dagmada Hodan ayaa loo soo xiray u gudbinta Al-shabaab Macluumaadka iyo Xogaha Xubnaha Dowladda ee ka shaqeeya Degmada Hodan. Waxa ayna Maxkamadda ku xukuntay Sideed Sano oo Xabsi Ciidan ah.
   • Jabriil Cabdullahi Cali Cadoow (Sheekha) ayaa isna Al-shabaab u qaabilsanaa Qeybta Faafinta Fikirada guracan ee kooxda, waxa uuna tababar ku saabsan Jabhadaha ku soo qaatay Saakow, waxa uuna ka mid ahaa basaasiinta maleeshiyada ku dhuumaaleysata Muqdisha, waxa ayna Maxkamadda ku xukuntay Sideed Sano oo Xabsi Ciidan ah.
   • Cabdi Cali Cibaar Wardheere (Tabliiq) ayaa uqaabilsanaa Al-shabaab Qeybta Soo gudbinta Macluumaadka Deegaanka Daarusalaam iyo Carafaad, isagoo u gudbin jiray Xogta Qaraxyada ka dhaca Goobahaas. Waxa ayna Maxkamadda ku xukuntay Shan Sano oo Xabsi Ciidan ah.
   • Canab Xuseen Cumar Fiidow ayaa Cabdiraxiin ugudbin jirtay xogta Degmada Hodon iyo Xarunta Xisbiga, sidoo kalana ay ka taageri jirtay Al-shabaab baraha bulshada gaar ahaan Fecbook. Waxa ayna Maxakamadda ku xukuntay Hal sano oo Xabsi ciidan ah.

   qaar ka mid ah kooxdan ayaa iyagana ay Maxkamadda ku xukuntay Sadax sano oo xabsi ilkuhayn ah.

   • Cawil Jaamac Cabdulle Xiireey.
   • Raxma Cabdishakuur Cali Muumin(Sandheere)
   • Maxamuud Axmed Siyaad Barre(Muruq)
   • Sharma’arke Muuse Ismaaciil Caraale

   Halka Asiili Maxamed Dhicisow Faarax iyo Xasan Maxamed Ibraahim (Xasan Kacaan) lagu waayay wax danbi ah ay maxakamadu sii daysay.

   Xukunkan Waxaa la wadaagay Warbaahinta Gaashaanle Sare Xasan Cali Nuur Shuute Guddoomiyaha Maxkamadda Darajada Koowaad Ee Ciidamada Qalabka Sida."

2. 12 Nofembar 2023Dagaalka ka socda xadka Israa'iil ay la wadaagto Lubnaan oo sii xoogeysanaya

   Ciidamada Israa’iil ayaa sheegay in gantaalka lidka taangiyada laga soo riday xadka Lubnaan. Inta la xaqiijiyay 6-ruux ayaa ku dhaawacantay oo mid kamid ah la sheegay in xaaladiisa ay aad u liidato.

   Rasaasta la is weydaarsaday ayaa timid saacado kadib markii wasiirka difaaca ee Israa’iil Yoav Gallant uu booqday askarta Israa’iil ee ku sugan waqooyiga, wuxuuna si cad u sheegay in Xisbullah aysan ahayn in xilligan ay ka cadhaysiiyaan Israa’iil.

   Wuxuu intaas ku daray in guulihii ay ka gaareen Qaza, goobtaas lagu soo celin karo Beirut. Markaa si cad ayuu ugu digayaa Xisbullah.

   Ilaa iyo hadda ma jirto cid sheegatay mas’uuliyadda weeraradii ugu dambeeyay.

3. 12 Nofembar 2023Faa’iidada cajiibka ah ee geedka aysan Soomaalidu ka illaabin shaaha

4. 12 Nofembar 2023Saraakiil ka tirsan ciidamada Uganda ee Soomaaliya ku sugan oo shaqada looga eryay fuleynimo kadib weerarkii buulomareer

   Maxkamad ku taalla dalka Uganda ayaa laba sarkaal ku heshay danbiyo fuleynimo ah, kaddib markii dagaalyahanno ay gudaha u galeen saldhig ay ciidamada Midowga Afrika ku leeyihiin Soomaaliya bishii May.

   Korneyl Deo Akiki iyo Major John Oluka ayaa baxsaday kadib markii Al-Shabaab ay weerar ku qaadeen deegaanka Buulo Mareer ee koonfurta magaalada Muqdisho.

   Ugu yaraan 50 askari oo ka tirsan ciidamada Uganda ayaa la dilay, sida ay saraakiishu sheegeen.

   Uganda ayaa qeyb ka ah ciidamada Midowga Afrika ee Soomaaliya ka caawiya dagaalka ay kula jiraan Al-Shabaab ee xiriirka la leh Al-Qaacida.

   Weerarkii Buulo-mareer ayaa ahaa midkii ugu khasaaraha badnaa ee ciidamada Midowga Afrika ee Atmis, tan iyo markii ay billaabeen weerarro cusub oo ka dhan ah Al-shabaab sannadkii hore.

   Madaxweynaha Uganda, Yoweri Museveni, ayaa ku dhaliilay ciidankiisa jawaabta ay ka bixiyeen.

   Maxkamadda ciidamada Uganda ee fadhigeedu yahay magaalada Muqdisho ayaa dhageysatay in saraakiishaasi la siiyay digniin ku aadan weeraro ku soo wajahan balse ay ku guuldareysteen inay ka hortagaan.

   Markii dabley hubeysan oo ka tirsan Al-Shabaab ay gudaha u galeen saldhigga, ayaa waxay ku guuldareysteen inay isku soo uruuriyaan ciidankooda, waxayna taasi bedelkeeda u carareen saldhig kale.

   Labada sarkaal ayaa laga ruqseeyay ciidamada.

   Afar sarkaal-xigeen ayaa sidoo kale lagu helay dambi ah inay ilaalin waayeen agabka ciidamada.

   Ciidamada Midowga Afrika oo gaaraya 19,000 oo askari ayaa loo soo diray Soomaaliya sanadkii 2007-dii, waxaana ay gacan ka geysteen in Al-Shabaab laga saaro magaalooyin badan.

   Waxaa lagu wadaa in masuuliyadda amniga lagu wareejiyo ciidamada dowladda Soomaaliya, islamarkaana sanadka soo socda ay dalka isaga baxaan kuwa ATMIS.

   Si kastaba ha ahaatee, weeraradii ka dhanka ahaa Al-shabaab ayaa hakad ku yimid, waxaana weli ay gacanta ku hayaan deegaano badan oo miyi ah.

5. 12 Nofembar 2023Qaramada midoobey oo soo tabinaysa dhimasho badan kadib markii la duqeeyay xarumaheeda Qaza

   Qaramada Midoobay ayaa sheegtay in mid ka mid ah xarumaheeda, oo ay gabaad ka dhigteen boqolaal Falastiiniyiin ah si ay uga baxsadaan dagaalka, lagu garaacay duqeyn saacadihii la soo dhaafay lala beegsanayey magaalada Qaza. Hay'adda Qaramada Midoobay ayaa aad uga xumaatay warbixinadii ugu horreeyay ee ahaa "tiro badan oo dhimasho iyo dhaawac ah," kuwaas oo sida muuqata aan tiradooda weli la koobin.

   Qoraalka Barnaamijka Horumarinta ee Qaramada Midoobay oo soo baxay goor dambe oo fiidnimadii xalay oo Sabti ahayd, ayaa lagu sheegay in shaqaalaheedu ay maamulayeen dhismahan caalamiga ah si ay u caawiyaan dadka reer Falastiin ilaa saddex iyo tobankii Oktoobar ee la soo dhaafay, taas oo ah, ilaa inta laga soo saaray amarkii Israa'iil ee ahaa in ay ka baxaan waqooyiga Qaza.

   6-dii Nofembar, hay'adda Qaramada Midoobay u qaabilsan horumarinta ayaa sheegtay in dhowr boqol oo qof ay xaruntan ka dhigteen hoy ay galaan, waxaana jira calaamado muujinaya in tiradani ay aad u korodhay tan iyo markaas, sida uu barnaamijku sheegay.

   Xafiiska Qaramada Midoobay u qaabilsan xuquuqul insaanka ee dhulka falastiiniyiinta ayaa cambaareeyay qaraxii ka dhacay xaruntaasi oo ay ku nool yihiin boqolaal rayid ah, iyagoo dalbaday in dadkaasi loo ilaaliyo si waafaqsan sharciga caalamiga ah ee bini’aadantinimada. Qarammada Midoobay, ayaa iyaduna ka hadashay in masiibada joogtada ah ee dhimashada iyo dhaawaca ee dadka rayidka ah ay tahay mid aan la aqbali karin oo ay tahay in la joojiyo.

   Intii uu socday dagaalka, Hay'adda Qaramada Midoobay u qaabilsan gargaarka ee UNRWA ayaa xaqiijisay in tobanaan ka mid ah shaqaalaheeda lagu dilay Marinka Qaza tan iyo markii uu dagaalku billowday, in ka badan 35 xarumood oo ay QM leedahay ayey dil dhaawac kasoo gaareen dad rayid ah. Waxaa xusid mudan in 2016, ururka caalamiga ah uu muujiyay diidmada buuxda ee ay ku lug leeyihiin shaqaalaheeda iyo xarumaha iskahorimaadka, oo ka soo horjeeda adeegga Amniga Guud ee Israel (Shin Bet) oo xiray shaqaale ka mid ah barnaamijkeeda horumarinta ee Qaza iyo gargaar kale oo caalami ah.

6. 12 Nofembar 2023Maxaa ka jira in xalay ay haweeney ilmo yar oo ninkeedu dhalay ku gubtay Hargeysa?

7. 12 Nofembar 2023Maalintii BBC-da ay war la'aantu ku dhacday

   Way adag tahay haatan in la xasuusto waagii ay warrarku aad u yaraayeen iyo sida xaal ahaa, balse 87 sano ka hor - 18kii Abriil 1930 kii, tabiyihii wararka ee BBC waxay la kulantay xaalad aan caadi ahayn, iyada oo leh "Wax war ah ma jiro," sida qoraalka loogu talagalay 20:45 wargelinta wararka, muusikada ayaa buuxisay qaybta 15-daqiiqo.

   Adeegga bilaa-waayirka ah ayaa markaa dib uga bilaabay baahinta hoolka Queen's Hall ee Langham Place, London, halkaas oo uu ka socday opera Wagner Parsifal.

   Xawaarraha iyo mugga wararka maanta aad ayay uga fog yihiin xiligii 1930.

   BBC hadda waxay ku faantaa shaqaale badan iyo karti waxayna dib u qeexday waxa uu yahay war.

   Horumarka tebinta warrarka ayaa ka tarjumaysa waqtiyada isbeddelaya iyo isku xiranka aduunyada ee sii kordhaya.

   Markaan dhex-mareyno da'da macluumaadka, hal shay ayaa weli ah mid joogto ah - rabitaanka warrarka.

8. 12 Nofembar 2023Weeraryahanka reer Gaana ee 28 jirka ah oo ku dhintay garoonka dhexdiisa isagoo kubad ciyaaraya.

   Weeraryahanka Ghana Raphael Dwamena ayaa geeriyooday isagoo 28 jir ah kaddib markii uu ku dhex dhacay garoonka ciyaar ka tirsaneyd horyaalka Albania.

   Dwamena ayaa u ciyaarayay Egnatia kulankii Partizani sabtidii.

   "Inkastoo dhaqaatiirta takhasuska leh ay si degdeg ah u soo farageliyeen dhacdadan, haddana nasiib daro wuu dhintay," ayaa lagu yiri war ka soo baxay yiri xiriirka kubada cagta Albania (AFL).

   Dwamena ayaa ahaa gooldhaliyaha ugu sareeya horyaalka Albania xilli ciyaareedkan isagoo dhaliyay sagaal gool.

   Sagaal kulan ayuu u saftay xulka wadankiisa Gaana, waxa uuna u dhaliyay labo gool.

   Ciyaartii sabtida waa la joojiyay, waxaana xiriirku uu dib u dhigay dhammaan ciyaarihii lagu ballansanaa toddobaadkan.

   “Xiriirka AFL waxa uu tacsi tiiraanyo leh u dirayaa qoyska Dwamena iyo kooxda Egnatia iyo bahda kubada cagta Albania geerida naxdinta leh ee ku timid ciyaartoyga,” ayaa lagu yiri warka xiriirku soo saaray.

   Xiriirka Kubadda Cagta Gaana (GFA) ayaa sheegay in ay tacsi tiiraanyo leh u direen qoyskiisa xilligan adag.

   2017-kii heshiis £14 milyan ku kacaya oo uu ugu dhaqaaqi lahaa kooxda Brighton ayaa burburray kaddib markii Dwamena uu ku guuldareystay tijaabada caafimaadka.

   Waxa uu u soo ciyaaray kooxda Levante ee horyaalka La Liga, wuxuu sidoo kale amaah ugu soo ciyaaray kooxda Real Zaragoza.

   Sannadkii 2021-kii ayuu ku dhacay garoonka ciyaar ka dhacday Austria oo dhexmartay kooxdiisa Blau-Weiss Linz iyo Hartberg, laakiin wuu soo kabsaday, oo wuxuu sii watay xirfaddiisa ciyaareed.

   Waxaa la sheegay in horey wadnaha qaliin looga sameeyay, isla markaana lagu rakibay qalab ka caawinaya shaqada wadnaha.

9. 12 Nofembar 2023Jaakad maqaar ka sameysan oo uu xidhan jiray fanaankii caanka ahaa ee Michael Jackson oo la iibiyay

   Jaakad maqaar ka sameysan oo uu xidhan jiray fanaankii caanka ahaa ee Michael Jackson oo xayeysiis u sameynayay Pepsi ayaa lagu iibiyay lacag dhan £250,000 ($306,000).

   Jaakadda oo uu xirnaa Jackson sanad kii 1984 kii isaga oo xayaysiis sameynaya ayaa jimcihii lagu xaraashay London.

   Waxaa lagu qiyaasayay in lagu iibinayo inta u dhaxaysa £200,000 iyo £400,000.

   Jaakadan ayaa kamid ahayd illaa 200 oo shay oo lagu xusuusto muusika oo jimcihii lagu iibiyay London.

   Dhacdadan ayaa lagu xusuustaa shilkii uu tinta dabku uga qabsaday Jackson kaas oo uu dhaawac weyn ka soo gaaray, laakiin markaas wuxuu watay jaakad kale.

10. 12 Nofembar 2023Daawo dab xoogan oo ka kacay Ingiriiska

    Aagga warashada ee Nottinghamshire, oo ku taalla gudaha Iglan ayaa la arkay dab xoogan ka soo taluumaya.

11. 12 Nofembar 2023Geed habaarka iyo cudurrada la isaga daweyn jiray oo la jaray.

    Nin ayaa ka soo hor muuqday maxkamad kaddib markii lagu eedeeyay inuu jaray geed caan ah oo jiray 300 oo sano oo ku yaala koonfurta Gaana.

    Sawirro laga soo qaaday geedka la jaray oo ku yaala magaalada Feyiase ayaa caro ka dhex dhaliyay dadka reer Gaana ee isticmaala internet-ka.

    Geedkan oo ah mid qadiimi ah ayaa la abuuray xiligii boqortooyadii Ashanti, wuxuna hadda kamid yahay waxyaabaha aadka u soo jiita dadka dalxiisayaasha ah ee taga Gaana.

    Ninka ku eedeysan arintan ayaa sheegay in uusan sameyn wax sharciga baal marsan, waxana lagu sii daayay damiin.

    Ninkan ayaan magaciisa la shaacin.

    Sida la soo weriyay geedkan meesha uu ka baxay waxa loos ku tufay baadarigii la oran jiray Komfo Anokye horraan tii 1700-meeyadii.

    Qaar badan oo kamid ah bulshada ayaa rumeysan in miraha geedkan Kola ee madowga iyo caddaanka leh ay daweyn karaan cudurrada iyo habaarka.

    Geedkan waxa uu ku yaalaa wadada u dhaxaysa magaalada ganacsiga ee Kumasi iyo harada Bosomtwe oo ah goob loo dalxiis tago.

    Waxa la diiday in la jaro markii la dhisayay wadadan, sababo la xiriirra caanimadiisa.

    Ma cadda sababta hadda loo jaray.

    Agaasimaha xarunta cilmi baarista ee Manhyia Osei Bonsu Safa Kantanka ayaa BBC-da u sheegay in geedkan muhim u yahay taariikhda boqortooyada Ashanti.

12. 12 Nofembar 2023Dagaalka Gaza: Ururka Caafimaadka Aduunka ayaa lumiyay xiriirkii ay la lahaayeen shaqaalaha Isbitaalka Al-Shifa.

    Hay’adda caafimaadka adduunka ee WHO ayaa Sabtidii sheegtay inay lumisay xidhiidhkii ay la lahayd cisbitaalka Shifa ee waqooyiga Gaza kaddib markii taleefankii iyo internet kiiba ay go’een.

    Hay’adda ayaa sheegtay inay aad uga walaacsan tahay badqabka dhammaan dadka ku go’doonsan halkaas dagaallada ka socda awgeed, waxayna ku baaqday xabbad-joojin degdeg ah.

    Afhayeen u hadlay Wasaaradda Caafimaadka ee Qaza ayaa sheegay in hawlihii Isbitaalka Shifa oo ah kan ugu weyn marinka Qasa uu istaagay Sabtidii kaddib markii shidaalku ka dhammaaday.

    Ururka Caafimaadka Adduunka ayaa sheegay in ay "walaac weyn ka qabaan badbaadada shaqaalaha caafimaadka iyo boqollaal qof oo xanuunsan iyo kuwa dhaawaca ah, oo ay ku jiraan carruur, iyo dadka barakacay ee ku haray isbitaalka.

    Ururka ayaa ku celiyay baaqiisa ku aaddan xabbad-joojin degdeg ah oo laga sameeyo Gaza.

13. 12 Nofembar 2023Diyaaradaha Isra’iil oo garaacay bartilmaameedyo ku yaala Suuriya.

    Ciidanka Israa’iil ayaa Axaddii sheegay in diyaaradahooda dagaalku ay qaadeen weerarro ka dhan ah “kaabeyaasha argagixisada” ee gudaha Suuriya, iyaga oo ka jawaabaya baa la yiri weerar looga soo qaaday xudduudda, kuna wajahnaa buurraha Golan Haytis ee la haysto.

    Ciidanku waxay ku sheegeen barta Telegram: "Waqti yar ka hor, iyada oo laga jawaabayo weerarkii Buurta Golan ee shalay, diyaaradaha dagaalka ee Israa'iil waxay duqeeyeen xarumaha kaabayaasha argagixisada ee Suuriya."

    Sabtidii, ciidanku waxay sheegeen in laba madfac oo laga soo tuuray Suuriya ay ku dhaceen goobo aanay cidna ku noolayn oo ka tirsan buurraha Golan, waxaana aaggaas laga maqlay dhawaaqa digniinta bixiya.

    Israa'iil ayaa sidoo kale Jimcihii duqeysay bartilmaameedyo ku yaalla Suuriya, kaddib markii diyaarad aan duuliye lahayn oo ka soo duushay dalkaasi ay ku burburtay iskuul ku yaalla magaalada Eilat ee koonfurta Isra’iil.

    Israa'iil waxay qabsatay qayb weyn oo ka mid ah buuraha Golan Haytis dagaalkii lixda maalmood socday ee 1967.

    Rasaasta la is weydaarsanayo ayaa sidoo kale si joogto ah uga dhacaysa xadka Lubnaan, halka Israa’iil ay sii xoojisay duulaankeeda ka dhanka ah Xamaas.

14. 12 Nofembar 2023Erik ten Hag oo helay waqti uu ku nafiso

    Marka la eego sheekada guud ee ku saabsan Manchester United iyo tababarahooda Erik ten Hag, waxa la yaab noqotay in la ogaado inay ku jiraan qaab ciyaareed wanaagsan.

    Goolkii qeybtii labaad ee ciyaarta uu Victor Lindelof ka dhaliyay Luton Town ayaa la micno ah in United ay haatan badisay afar kulan oo horyaalka ah, shanti kulan ee u dambeysay, taasoo ka dhigan soo laabashadoodii ugu fiicneyd xili ciyaareedkan.

    Intaa waxaa dheer, waxay sidoo kale safka hore ka galeen kuwa shabaqooda aan gool la taabsiin markii ugu horeysay tan iyo bilowgii May.

15. 12 Nofembar 2023Madaxweyne Xasan Sheekh oo sheegay in waxa ka socda Qasa ay ka soo horjeedaan xeerrarka caalamiga ah

    Madaxweynaha Soomaaliya Xasan Sheekh Maxamuud oo ka hadlayay shirka wadamada Islaamka ee ka dhacay magaalada Riyaad ayaa sheegay in shacabka iyo dawladda Soomaaliyeedba ay ku garab taagan yihiin walaallahooda Falastiiniyiinta gobanimadooda iyo dawladnimadooda.

    Madaxweyne Xasan ayaa yiri “Waxa ka socda Qasa waxay ka soo horjeeddaan damiirka aadamaha iyo dhammaan xeerarka iyo dhaqanka Caalamiga ah, si loo joojiyo waa in aan la nimaadnaa go’aan mideysan. Dowlad madax bannaan oo reer Falastiin yeeshaan, caasimaddeeduna tahay Qudusta bari waa xalka kaliya ee lagaga hortagi karo qalalaase amni, siyaasadeed iyo bulsho oo ka dhaca Gobolka”.

    Madaxweyne Xasan Sheekh ayaa sedex shir uga qaybgalaya dalka Sucuudiga, mid wadamada carabtu leeyihiin, mid wadamada islaamku isku arkayaan, iyo midka Sucuudiga iyo Afrika.

16. 12 Nofembar 2023Dagaalka Qaza: Dagaallada dhulka ayaa sii xoogeystay, kumannaan qofna waxay ka cararrayaan waqooyiga Marinka Qaza – sawirro

    Ciidamada Isra’iil ayaa wali sii wada duqeymaha xagga cirka ah ee ay ku hayaan Marinka Qaza, waxayna askartooda ku jiraan howlgallada dhinaca dhulka ah ee ka dhanka ah Xamaas.

    Iska hor’imaadyadu way sii xoogeysanayaan, kumannaan Falastiiniyiin ahna waxay ka cararrayaan dagaallada, iyagoo u socda dhanka koonfurta.

17. 12 Nofembar 2023Sidee xalay wax uga dhaceen London markii 120 taageerayaasha Falastiin ah xabsiga la dhigay?

18. 12 Nofembar 2023Xasan Nasrallah ayaa weerarrada Xisbullah ee ka dhanka ah Israa'iil ku tilmaamay " garab istaag "

    Hoggaamiyaha Xisbullah ee Lubnaan, Xasan Nasrallah, ayaa sheegay in ururkiisu xoojiyey weerarrada ka dhanka ah Israa’iil todobaadkii la soo dhaafay, wuxuuna carrabka ku adkeeyay in weerarrada ka imaanaya koonfurta Lubnaan ay sii socon doonaan, isagoo ku sifeeyay inay yihiin garab istaag.

    Israa’iil iyo Xisbullah ayaa in ka badan hal bil waxa ay rasaas isku weydaarsanayeen ku dhawaad ​​maalin kasta xadka ay wadaagaan, balse inta badan duqeymaha ayaa lagu bartilmaameedsadaa goobaha ciidamada iyo goobaha furan.

    Khudbadii ugu horeysay ee uu jeediyay todobaadkii hore ayuu Nasrallah ku sheegay in Xisbullah ay ku filan tahay caawinta Xamaas ee Gaza, iyadoo ciidamada Isra’iil uu aag kale kaga furan yahay xuduudka waqooyi ee dalkaasi.

    Kuwa filayey in hoggaamiyaha Xisbullah uu ku dhawaaqo xaalad kasta oo soo korortay, Nasrullah ayaa maanta kaga jawaabay isagoo leh, "Ficillada dhulka ka dhacaya iyagaa iska hadli doona.

    Nasrallah oo khudbad ka jeediyay taleefishinka ayaa sidoo kale ka hadlay weerarradii ugu dambeeyay ee ay kooxaha hubeysan ku qaadeen saldhigyada Mareykanka ee Ciraaq iyo Suuriya, iyo sidoo kale weerarada Xuutiyiinta Yemen.

    Sida Xisbullah, kooxahani waa qayb ka mid ah waxa loogu yeero kooxaha wax iska caabinta ee isbahaysiga gobolka ee ay taageerto Iran.

19. 12 Nofembar 2023Xaaladda ilmaha aan ku dhalan waqtigooda ee ku jira isbitaallada Qasa oo laga dayrinayo

    BBC-da ayaa loo soo diray sawirrada 20 caruurra oo hadda dhalatay oo lagu hayo saalada qaliinka ee isbitaalka Al-Shifa, waxayna dhakhaatiirtu ka digayaan in ay dhiman karaan xili kasta.

    Qaybbta dhalooyinka lagu hayo caruurta aan xiligooda ku dhalan ayaa shaqadeeda joojisay sababo la xiriirra koronto la’aan, sida ay sheegayaan dhakhaatiirtu.

    “Waxan ka baqayaa haddaan caruurta halkan uga tagno xaaladdan, in aan ogolaanay in ay dhintaan….. waa ilmo aan waqtigooda ku dhalan”, ayuu ku yiri Dr Marwaan Abuu Saada oo ah madaxa qaliinka ee isbitaal, cod loo soo diray BBC-da.

20. 12 Nofembar 2023Subax wanaagsan saaxiibbayaal, ku soo dhawaada tabinta tooska ah ee BBCSomali.com