BBC News, Somali
U gudub qaybta macluumaadka

You’re viewing a text-only version of this website that uses less data. View the main version of the website including all images and videos.

Take me to the main website

Wasiir Israa'iili ah oo soo jeediyay in nukliyeer lagu garaaco Qasa oo tallaabo laga qaaday

Ku soo dhawaada tebin toos ah

Tebin toos ah

  1. Turkiga oo sameeyay fal ay Xamaas ku boorisay inay dalalka kalena sameeyaan

    Dalka Turkiga ayaa u yeertay safiirkiisa Tel Aviv “si ay wada tashi loola yeeshe” iyada oo ay socdaan weerarada Israel ay ka geysaneyso Qaza, Wasaaradda Arrimaha Dibadda ayaa sidan sheegtay Sabtidii maanta.

    “Marka la eego musiibada bini’aadantinimo ee Qaza ka taagan oo ay sababeen weerarrada joogtada ah ee ay Israel ku hayso dadka rayidka ah, iyo diidmada Israa’iil ee baaqyada xabbad-joojinta iyo fasaxa gargaarka bini’aadantinimo si aan hakad lahayn, waxa la go’aamiyay in dib loogu yeedho safiirkeenna Tel Aviv Mudane Sakir Ozkan Torunlar, oo Ankara u tagay la tashi,” ayay wasaaraddu tiri.

    Ciidamada Israa’iil ayaa balaariyay weerarada cirka iyo dhulka ah ee ay ku hayaan marinka Qaza oo duqeymo aan kala joogsi lahayn ay ku hayaan tan iyo markii ay weerarka lama filaanka ah ku qaadeen kooxda Falastiiniyiinta ee Xamaas 7-dii Oct.

    Mar kale ayey ciidamada circa ee Israa’iil waxay duqeyn la beegsadeen iskuul, kaas oo ay maamulaysay wakaaladda qaxootiga ee Qaramada Midoobey.

    Ugu yaraan 15 qof ayaa ku dhimatay iskuulkaas.

  2. Kooxda Arsenal oo ka habowday halkii ay ku ciyaari lahayd

    Ciyaarta 18-jirada kooxda Arsenal ay la ciyaari lahayd kooxda kale ee Brighton ayaa si qosol leh dib loo dhigay ka dib markii kooxdu ay u safartay magaalo qaldan.

    Ciyaarta ayaa lagu balansanaa in ay ka bilaabato garoonka Seagulls Amex saacadu marka ay tahay 12:00 duhurnimo ee sabtida, laakiin dib ayey u dhacday nus saac markii ay Arsenal soo xaadiri wayday. Balse goor dambe ayaa la ogaaday inay si qaldan ugu safren magaalada kale ee Bournemouth oo ah meel 95 mayl u jirta halka ay u socdeen - ciyaarta ayaana dib loo dhigay.

    Taageerayaasha isticmaala baraha bulshada ayaa sheekada oo dhan la yaabay. Mid ka mid ah isticmaalayaasha X (Twittier) ayaa qoray: "Waa kuma darawalku? Miyuu sakhraansanaa?" Mid kale ayaa yiri: "Sidee tani ku dhici kartaan casrigan aan joogno?"

  3. Maraykanka oo aad uga walaacsan iskudhacyada Israa'iil iyo Xisbullah dhex maraya

    Aan ku laabanno Urdun hadda, halkaas oo xoghayaha arrimaha dibadda ee Maraykanka Antony Blinken uu ka sheegay kulan uu la yeeshay ku-simaha Ra'iisal wasaaraha Lubnaan Najib Mikati in uu "la wadaagay walaaciisa qotada dheer" ee ku saabsan rasaasta la isku weydaarsanayo xadka koonfureed ee Lubnaan ay la wadaagto Israa'iil.

    Blinken ayaa sidoo kale carabka ku adkeeyay muhiimada ay leedahay in la hubiyo in iskahorimaadka Israa’iil iyo Xamaas uusan ku faafin meelo kale, sida uu sheegay afhayeen Matthew Miller.

    Miller wuxuu yidhi Blinken wuxuu sii waday inuu uga mahadceliyo Mikati hogaankiisa ka hortagga Lubnaan in lagu soo jiido dagaal iyo dadaalkiisa saaxiibada gobolka si uu u "raadiyo nabad waarta oo ka hir gasha gobolka".

    Blinken ayaa sidoo ka hadlay dadaallada Mareykanka ee lagu xaqiijinayo gargaarka bini'aadantinimo ee dadka rayidka ah ee Qaza wuxuuna xusay in Lubnaan ay u baahan tahay inay doorato madaxweyne "si uu u hoggaamiyo dalka iyada oo loo marayo xiisadaha gobolka iyo kuwa gudaha labadaba", ayuu Miller ku daray.

  4. Lubnaan ma ka dhowrsan kartaa dagaalka Israa'iil iyo Xamaas

    Hadalka uu jeediyay hogaamiyaha kooxda Shiicada ah ee Xisbullah ee dalka Lubnaan Xasan Nasrullah ayaa waxa ay u soo jiitay dad badan oo ku nool Lubnaan iyo meelo kale. Ma uusan shaacinin inay sii kordhiyaan weerarada ka dhanka ah Israa’iil, sida dadka qaar ay ka baqayeen, inkastoo uu albaabka u furay tallaabo kale.

    Maalin kadib hadalkiisa, waxaa kasii socday xadka Lubnaan iyo Israa’iil isku dhacyada. Ururka Xisbullah ayaa sheegay in ay weerarro isku mar ah ku qaadeen bartilmaameedyada Israa'iil halka militariga Israa'iil ay sheegeen in ay ku aargoosanayaan duqaymo ay ku qaadeen fariisimaha Xisbullah, oo ay ku jirto goob ka mid ah meelaha indhaindhaynta.

    Inkastoo weeraradaasi ay ahaayeen kuwo isdaba joog ah, hadana labada dhinac ayaa qaaday tillaabo ay kaga fogaanayaan in xaalad halis ah ay dhacdo, waxaana dagaalka uu ahaa mid ku kooban xuduuda.

    Sidoo kale saaka, ra’iisul wasaaraha ku meel gaadhka ah ee Lubnaan, Najib Mikati, ayaa magaalada Cammaan kula kulmay xoghayaha arrimaha dibadda ee Maraykanka, Anthony Blinken. Mikati ayaa carabka ku adkeeyay muhiimada ay leedahay xabad joojinta Qaza iyo joojinta “gardarada Israa’iil” ee koonfurta Lubnaan, sida lagu sheegay bayaan ka soo baxay xafiiska ra'iisul wasaaraha.

    Mikati ayaa ku jira xaalad adag, isagoo isku dayaya inuu ka ilaaliyo dalkiisa in lagu soo jiido colaadda. Waxa uu ku leeyahay Xisbullah saamayn aad u yar haddiiba ay jirto, oo ah cududda militariga iyo siyaasadda ugu awoodda badan Lubnaan. Tani waxay ka dhigan tahay in go'aamada ay qaataan kooxda oo ay UK iyo Maraykanku u aqoonsadeen urur argagixiso, ay aad uga durugsan yihiin cidda ay taageeraan dalalkani.

  5. Rag hubaysan oo xabsi kala baxay hgaamiyihii hore ee Gini

    Hogaamiyihii hore ee militariga dalka Guinea Moussa Dadis Camara, ayaa waxaa xabsiga ka soo saaray rag hubeysan, sida uu sheegay wasiirka cadaalada ee dalkaasi.

    Kooxdan ayaa subaxnimadii hore ee Sabtida weerar ku qaadday xabsi ku yaalla caasimadda dalkaasi ee Conakry – iyagoo sii daayey Capt Camara iyo saddex kale. Mid ayaa tan iyo markii la helay.

    Dadkan baxsadka ah ayaa waxaa hadda lagu maxkamadeynayaa doorkii ay ku lahaayeen dhimashada in ka badan 150 qof oo ku dhintay mudaaharaad 2009-kii.

    Xuduudaha dalka ayaa la xiray iyadoo maamulku u uku raad joogo raggan.

    Wasiirka cadaalada ee Guinea Charles Alphonse Wright, ayaa kaga dhawaaqay baxsashada idaacada maxaliga ah sabtidii dambe.

    "Waan heli doonnaa, kuwii ka dambeeyayna waa lala xisaabtami doonaa," ayuu yiri.

  6. Israa'iil oo duqeysay guriga hogaamiyaha Xamaas

    Milatariga Israa’iil ayaa duqaymo dhanka cirka ah ku garaacay guriga qoyska hoggaamiyaha Xamaas ee bannaanka ka ah magaalada Qaza sabtidii, waxaanay hore u sii wadeen weeraro guud ahaan gobolka go’doomiyey halkaas oo dhibaatada bini’aadantinimo ay si xawli ah uga sii darayso.

    Cunto, biyo, shidaalka looga baahan yahay matoorada isbitaallada iyo tas-hiilaadka kale ayaa gabaabsi ku ah Qaza, Xoghayaha Guud ee Qaramada Midoobay Antonio Guterres ayaa ku booriyay xabbad-joojin degdeg ah si loogu oggolaado gargaarka.

    "Xaaladda bini'aadantinimo ee Qaza waa mid aad u xun," Guterres ayaa ku yiri goor dambe oo jimcahii ah hadal cad oo aan looga baran. "Dad dhan ayaa argagaxsan, meelna kuma badbaadi karaan."

  7. Blinken oo la kulmay ra'iisul wasaaraha Lubnaan iyo Qatar

    Xoghayaha Arrimaha Dibedda ee Maraykanka Antony Blinken ayaa la kulmayo hoggaamiyeyaasha iyo wasiirrada Bariga Dhexe.

    Ugu horeyn ajandaha ayaa ahaa wadahadal uu la yeeshay ku-simaha Ra'iisul Wasaaraha Lubnaan Najib Mikati, kaasoo, sida uu sheegay xafiiskiisa, Blinken wuu adkeeyay muhiimadda ay leedahay in laga shaqeeyo xabad joojinta Gaza.

    Waxaa sidoo kale lagu sawiray isagoo salaamaya Ra'iisul Wasaaraha Qatar Mohammed bin Abdulrahman al-Thani.

  8. Ciidamada Israa’iil oo gudaha u galay magaalooyin dhowr ah

    Habeenkii iyo waaberigii Sabtidii, ciidamada Israa’iil ayaa 55 Falastiiniyiin ah ka qabtay Daanta Galbeed, oo ay ku jiraan laba dumar ah, maxaabiis hore iyagoo dad dhaawacay.

    Sida laga soo xigtay naadiga maxaabiista falastiiniyiinta, howlgallada lagu soo qab-qabtay waxay ku badnaayeen xerada Al-Fawwar ee ku taalla koonfurta Daanta Galbeed, halkaas oo 25 qof loo xiray baaritaanno kaddibna la sii daayay.

    Inta soo hartay waxaa loo qeybiyay maamul goboleedyada Ramallah, Nablus, Jenin, Tulkarm, Beytlaxam, Bariga Jerusalem, iyo Tulkarm.

    Naadiga Maxaabiista Falastine ayaa sheegtay in tirada guud ee la xiray tan iyo 7-dii October ay gaartay 2,040 falastiiniyiin ah, oo ay ku jiraan 17 saxafi iyo 14 wakiil oo ka tirsan Golihii hore ee Sharci-dejinta.

    Maamulka Israa'iil ayaa sidoo kale soo saaray 872 amaro xarig maamul wixii ka dambeeyay 7-dii Oktoobar.

    Ilo maxalli ah ayaa ku waramay in ciidamada Israa’iil ay maanta oo Sabti ah calanka Israa’iil dul dhigeen minaaradda masjid ku dhexyaalla xerada Al-Fawwar ee koonfurta Xebroon. Waxay xirxireen tiro ka mid ah dadka deegaanka, waxayna si aan kala sooc lahayn ugu rideen rasaas nool guryaha dadka deegaanka.

  9. Dhul-gariir ay dad badan ku dhinteen oo ku dhuftay dal deris la ah Hindiya

    In ka badan 150 qof ayaa ku dhintay dhulgariir ku dhuftay galbeedka Nepal Jimcihii.

    Ciidamada ammaanka ayaa la geeyay goobaha uu ka dhacay si ay gacan uga geystaan ​​dadaallada lagu samatabixinayo degmooyinka qallafsan ee Jajarkot iyo Galbeedka Rukum, oo 500km (310 mayl) dhanka galbeed kaga beegan Kathmandu.

    Gariir xooggan ayaa laga dareemay meelo fog fog caasimadda Nepal iyo magaalooyin ku yaal dalka deriska la ah Hindiya oo ay ku jirto maagaalada Delhi.

    Afhayeenka ciidamada ayaa sheegay in in ka badan 100 qof ay ku dhaawacmeen. Isbitaalka Jajarkot ayaa waxaa buux dhaafiyay dhaawacyada.

  10. Tirada wariyayaasha ku dhintay Gaza oo korodhay

    Saxafiyiinta soo tebiya duqeynta Marinka, dagaalka u dhaxeeya Israa’iil iyo Xamas ayaa ah kii ugu halista badnaa uguna dhimashada badnaa tan iyo markii Guddiga Difaaca Saxafiyiinta ay bilaabeen diiwaan gelinta dilalka saxafiyiinta 1992-kii.

    Baaritaano ay sameeyeen Guddiga Difaaca Saxafiyiinta 3-dii Nofembar ayaa muujiyay in ugu yaraan 36 wariye iyo shaqaale warbaahin ah la dilay tan iyo markii uu dagaalku billowday 7-dii Oktoobar.

    Khasaare nafeed waxa weheliya hagardaamo, xarig, iyo caqabado kale oo hortaagan saxafiyiinta ka howlagala Gaza, Daanta Galbeed, iyo Israel. Taas waxa u dheer in la beegsado qoysaskooda iyo guryahooda.

  11. Blinken oo soo gaaray dalka Urdun

    Xoghayaha arrimaha dibadda ee Maraykanka Antony Blinken ayaa maanta ku sugan dalka Urdun si uu kulamo ula yeesho madax iyo wasiirro badan oo ka tirsan Carabta maanta.

    Jadwalkiisa waxaa ka mid ah inuu la kulmo Boqorka Jordan Boqor Cabdallaha Labaad iyo Ra’iisul Wasaaraha Qatar. Horay ayuu ula kulmay ra’iisul wasaaraha ku meel gaadhka ah ee Lubnaan Najib Mikati.

    Blinken waxa uu sidoo kale kulamo la qaadan doonaa wasiirada arrimaha dibadda ee dalalka Jordan, Lebanon, Qatar, Saudi Arabia, Masar iyo UAE.

  12. Baabuur daadku qaadeen iyadoo Duufaanta Ciarán ay ku dhufatay Talyaaniga

    Muuqaalo cajiib ah ayaa muujinaya baabuur ay daadadku la tageen magaalada Prato ee bartamaha Talyaaniga.

    Duufaanta Ciarán ayaa keentay roobabkii ugu cuslaa ee ku dhufta Tuscany muddo 50 sano ah.

    Ugu yaraan lix qof ayaa ku dhimatay cimilada oo aad u xun awgeed, dhowr kalena waa la la'yahay; ciidanka ayaa loo diyaariyay si ay gacan uga geystaan ​​daadgureynta dadka go'doonsan.

    Dowladda Talyaaniga ayaa ku dhawaaqday inay bixin doonto €5m (qiyaastii £4m) oo ah dhaqaale degdeg ah oo lagu caawiyo gobolka.

  13. DAAWO: Waxa uu sameeyay wariyahan kadib markii uu ogaadan geerida saaxibkiisa

    Wariye ka tirsan TV-ga Falastiin iyo weriye ayaa hawada ku buroortay ka dib markii ay ogaadeen in saaxiibkood lagu dilay qarax ka dhacay Gaza.

    Mohammad Abu Hatab, oo ahaa wariye u shaqeynayay TV-ga Falastiin, ayaa isaga iyo xubno ka tirsan qoyskiisa ku dhintay weerar ay Israa'iil ku qaadday gurigiisa oo ku yaalla Khan Younis, sida uu sheegay warfidiyeenka.

  14. Dagaalka Xamaas iyo Israel:Blinken oo tagay dal horay uu uga baaqday madaxweynaha Mareykanka

    Xoghayaha arrimaha dibadda ee Maraykanka Antony Blinken ayaa maanta ku sugan dalka Urdun si uu wadahadal ula yeesho wakiilo ka socda dalalka Carabta oo la filayo in ay ku baaqaan xabbad joojin degdeg ah oo laga sameeyo Qaza.

    Wuxuu la kulmi doonaa Boqor Cabdalla ka hor inta uusan wada hadal la yeelan Wasiirada Arrimaha Dibadda ee Jordan, Qatar, Saudi Arabia, Masar iyo UAE, iyo sidoo kale wakiil ka socda maamulka Falastiin.

    Waxaa jiray walaac isa soo taraya oo ku saabsan khasaaraha tirada badan ee rayidka soo gaaray.

    Sida aan soo tabinnay, Jimcihii baaqii Blinken ee ahaa in dagaalka la joojiyo sababo la xiriira in howlaha bini'aadantinimada fursad la siiyo ayaa waxaa gaashaanka u daruuray ra'iisul wasaaraha Israa'iil Benjamin Netanyahu, oo sheegay in aan la nasan doonin weerarrada ay ku hayso Qaza ilaa dhammaan dadka la haystayaasha ah ee halkaas ku sugan laga soo daayo.

  15. Wararkii ugu dambeeyay ee dagaalka Israel iyo Xamaas

    Ra’iisul wasaaraha Israa’iil Benjamin Netanyahu ayaa iska diiday soo jeedinta xabbad-joojin ku meel gaar ah oo lala galo Xamaas.

    Iyadoo dagaalka u dhaxeeya ciidamada difaaca Israel (IDF) iyo Xamaas uu galayo todobaadkiisii ​​shanaad, Netanyahu ayaa maanta magaalada Tel Aviv kula kulmay xoghayaha arrimaha dibadda ee Maraykanka Antony Blinken.

    Labada nin ayaa ka wada hadlay, baaqyada Mareykanka ee ah in Israa'iil ay ogolaato joojinta bini'aadantinimo ee duqeymaha ay ku hayso Gaza si loogu ogolaado in si wax ku ool ah loo gaarsiiyo gargaarka. Laakiin Netanyahu ayaa sheegay in ilaa dhammaan la-haystayaasha la sii daayo, aan heshiis noocaas ah la samayn karin.

    Dhanka kale, Dr Tedros Adhanom Ghebreyesus, oo ah madaxa Ururka Caafimaadka Adduunka, ayaa sheegay inuu "aad uga naxay" qarax la sheegay inuu ka dhacay bannaanka isbitaalka ugu weyn magaalada Gaza, Al-Shifa.

  16. António Guterres: "Waan ka argagaxnay weerarka ay ciidamada Israa'iil ku qaadeen ambalaasyada"

    Sabtidii, Xoghayaha Guud ee Qaramada Midoobay Antonio Guterres ayaa muujiyay dareenkiisa "argagaxa" ee ku aaddan weerarka ay ciidamada Israa'iil ku qaadeen kolonyo ambalaas ah oo ku sugnaa Gaza Jimcihii, isagoo ku nuuxnuuxsaday in khilaafka u dhexeeya Israa'iil iyo Xamaas " ay qasab tahay in uu joogsado".

    “Sawirada maydadka oo daadsan dariiqa ku hor-yaala cisbitaalka waa kuwo qalbi jab leh,” ayuu Guterres ku yiri hadal uu soo saaray.

    Duqeyntii Jimcihii lala beegsaday gaari Ambalaas ah oo hor taagnaa Isbitaalka Al-Shifa ayaa waxaa ku dhintay 15 qof, waxaana ku dhaawacmay 60 kale, sida ay sheegtay Wasaaradda Caafimaadka Xamaas.

    Dhankeeda, Hay’adda Bisha Cas ee Falastiin ayaa bayaan ay soo dhigtay Facebook ku sheegtay, “Ambalaasta oo hoggaaminaysay kolonyada ayaa si toos ah loo la beegsaday gantaal, taasoo keentay in si toos ah loo duqeeyo, iyo sidoo kale shaqaalihii saarnaa iyo kuwa ku dhaawacmay.

  17. Dagaalkii Qaza: Machad dhaqameed Faransiis ah oo ay Israa'iil duqeysay, Faransiiskuna wuxuu dalbaday sharraxaad degdeg ah

    Dowladda Faransiiska ayaa sharraxaad ka dalbatay Israa’iil kadib markii machad dhaqameed Faransiisku ku leeyahay Qaza lagu duqeeyay duqeymaha Israa’iil.

    Wasaaradda arrimaha dibadda ee Faransiiska ayaa bayaan ay soo saartay ku sheegtay inay ka codsatay maamulka Israa'iil inay na siiyaan "sida ugu dhaqsiyaha badan, iyada oo loo marayo hab ku habboon, oo leh waxyaabo la taaban karo oo keenay go'aankan ah in la weeraro gobtaas.

    Wasiirka arrimaha dibadda ee Faransiiska Catherine Colonna ayaa hadal ay siisay warbaahinta Faransiiska oo ku sugan caasimadda Nigeria ee Abuja waxay ku tiri “Weerarku waxa uu sare u qaaday yaab iyo faham la’aan”.

    Waxay ku dartay, "Sidee machad dhaqameed Faransiis ah u noqon karaa bartilmaameedka weerarrada Israel?"

    Wasiirka ayaa carabka ku adkeeyay, "Waxaan ku hawlannahay wada-hadallo aan la yeelanayno saaxiibadayada Israel oo heerar kala duwan ah.

    Waxay sharaxday in machadku ay ka maqnaayeen shaqaalaha ama muwaadiniin Faransiiska u dhashay markii la beegsanayay.

  18. Wasaaradda Caafimaadka ee Gaza: Tirada dadka ku dhintay weerarka ka dhacay afaafka hore ee Isbitaalka Al-Shifa oo korodhay

    Wasaaradda caafimaadka ee Xamaas ayaa ku dhawaaqday in tirada dhimashada weerarkii Israa’iil ee Jimcihii la beegsaday baabuur ambalaas ah oo marayay afaafka hore ee cisbitaalka magaalada Gaza ay gaartay 15 dhimasho ah iyo 60 dhaawac ah, kaddib markii Israa’iil ay xaqiijisay in gaariga la beegsaday, iyadoo sheegtay. "Ururka argagixisada Xamaas" ayaa isticmaalayey. Tiro hore ayaa lagu sheegay in 13 qof ay ku dhinteen 26 kalena ay ku dhaawacmeen.

    Afhayeen u hadlay wasaaradda Ashraf Al-Qudra ayaa xaqiijiyay in “Israa’iil ay si ula kac ah u duqaysay baabuurta gurmadka degdega ah ee ka soo horjeedda xarunta caafimaadka ee Al-Shifa si ay uga hortagto dadka dhaawaca ah in loo qaado Masar si loogu soo daweeyo.” Waxa uu tilmaamay in Gaariga Ambalaasta ah ee la beegsaday uu waday tiro dad ah oo dhaawac ah oo la doonayay in lagu soo daweyeyo dalka Masar.

  19. Maxay tahay sababta ciyaaryahankan shaqada looga joojiyay?

    Jimcihii, kooxda kubadda cagta Jarmalka ee Mainz ayaa joojisay qandaraaskii ay kula jirtay weeraryahankeeda Morocco-Holland Anwar El Ghazi, saacado kadib markii dacwad oogayaasha Jarmalku ay fureen baaritaan ku saabsan qoraallada uu soo dhigay baraha bulshada ee ku saabsan dagaalka Israel iyo Xamaas.

    Kooxda Mainz ayaa ku soo qortay akoonkeeda mareegaha “X”, “Waan joojinay xiriirkii qandaraaska ee Anwar El Ghazi, ciyaaryahankana waa la ceyriyay isla markiiba.”

    Kooxda ayaa bayaan ay soo saartay ku sheegtay in ay qaadayso tilaabadaan iyada oo ka jawaabaysa hadaladii ciyaaryahanka iyo qoraalada uu soo dhigay baraha bulshada.

    Horaantii Jimcihii, dacwad oogayaasha Jarmalka ayaa sheegay in ciyaaryahanka reer Holland looga shakisan yahay "in uu khalkhal geliyey nabadda dadweynaha isagoo raali ka ah falalka dambiyada isagoo hurinaya nacayb" fariimaha uu soo dhigay Instagram-ka.

    Anwar, oo horey ugu soo ciyaaray kooxaha Ajax iyo Eindhoven ee Netherland, Lille ee Faransiiska, Aston Villa iyo Everton ee England, tan iyo bilowgii dagaalka Gaza, wuxuu daabacay dhowr qoraal oo uu soo dhigay baraha bulshada, oo ay ku jiraan weedha ah, "Laga soo bilaabo webiga ilaa badda. Falastiin waa la xorayn doonaa.”

  20. UK oo ka hadashay hadii ay jiraan dad u dhashay oo ku dhintay Gaza

    Wasaaradda arrimaha dibadda UK ayaa sheegtay in aan weli lagu wargelin dad u dhashay Britain oo lagu dilay Qaza.

    Laakiin James Cleverly, xoghayaha arrimaha dibadda, ayaa ka digay in "qulqulka macluumaadka inta badan la gooyo" iyo "mararka qaarkood waxaan helnaa macluumaad iska soo horjeeda".

    Isagoo la hadlayay saxafiyiinta fiidnimadii xalay, wuxuu sheegay in tiro muwaadiniin British ah ay soo mareen marinka Rafah iyo Masar - balse ma uusan cadeynin inta ay qof ee ay yihiin.