Askari Israa'iili ah oo muuqaal laga duubay isaga oo bam gacmeed ku dhex tuuraya gaari yaallay Daanta Galbeed

Booliiska Israa'iil ayaa bilaabay baaritaan kaddib markii la helay muuqaallo ay duubeen kamaradaha ammaanka (CCTV) ah oo muujinaya askari ka tirsan Ciidanka Ilaalada Xudduudaha oo bam gacmeed indho-beel ah ku tuuraya gaari ku yaalla Daanta Galbeed ee la haysto.

Muuqaalku wuxuu muujinayaa askariga oo u soo dhowaanaya gaariga oo yaallay xerada qaxootiga Falastiiniyiinta ee Qalandia, isaga oo ku qaylinaya dadka gudaha ku jira. Kadib hadal kooban oo dhex maray, ayuu bamka indho-beelka ah ka dhex tuurayaa albaabka gaariga oo furan, kadibna si xoog ah ayuu u xirayaa albaabka iyadoo darawalku isku dayayo inuu baxsado. Qarax ayaa dhacaya, qiiqna waa la arkayaa.

Labada rakaab ayaa ka baxsanaya dhinaca kale ee gaariga ka hor inta uusan askarigu u muuqan inuu qorigiisa ridayo iyaga oo isku dayaya inay gabbaad galaan. Kooxda xuquuqda aadanaha ee Israa'iil ee B'Tselem ayaa sheegtay in dhammaan dadkii gaariga saarnaa ay badbaadeen.

Booliisku waxay warbaahinta Israa'iil u sheegeen in askarigu uusan u dhaqmin "si waafaqsan habraaca".

Waxay sheegtay in dhacdada loo gudbiyay waaxda baaritaannada gudaha ee booliiska.

Dhacdo kale oo ka dhacday Qalandia maalintii Axadda, ciidamada Israa'iil ayaa toogtay oo dilay wiil 16 jir ah, oo magaciisu yahay Walid Abu Sneineh, sida ay sheegtay Wasaaradda Caafimaadka Falastiin.

Wasaaraddu waxay intaas ku dartay in laba carruur ah oo kale ay dhaawacyo rasaas ahi ka soo gaareen lugaha hoose.

Mas'uuliyiinta Israa'iil ayaa BBC-da u sheegay in ciidamada Israa'iil ay dareemeen khatar degdeg ah oo naftooda ku wajahan kaddib markii "rabshad xooggan ay qaraxday, taas oo ay ciidamadu la kulmeen roob weyn oo dhagxaan ah".

Waxay sheegeen in ciidamada ay uga jawaabeen rasaas kadib markii "qof looga shakiyay inuu saqaf dusha kaga tuurayay dhagxaan".

Sidoo kale Axaddii, ilmo afar bilood jir ah oo xaaladdiisu aad u liidatay, laguna magacaabo Ahmed Zaid, ayaa dhintay kaddib markii askarta Israa'iil ay diideen inay furaan albaab xannibayay albaabka weyn ee laga galo tuuladiisa galbeedka Ramallah, taas oo dib u dhigtay inuu helo daryeel caafimaad oo degdeg ah, sida uu sheegay madaxa xafiiska xuquuqda aadanaha ee Qaramada Midoobay ee deegaanka.

Ajith Sunghay ayaa sheegay in ambalaas uu ku sugayay dhinaca kale ee albaabka, bannaanka Deir Ammar, si uu Ahmed ugu qaado isbitaalka.

Wuxuu dhimashada ku tilmaamay "mid aan macno lahayn" iyo "tusaale muujinaya awood qabsasho oo sii wadda inay si buuxda u dayacdo bani'aadannimada iyo xuquuqda Falastiiniyiinta ku nool dhulka la haysto".

Si kastaba ha ahaatee, ciidamada milatariga Israa'iil ayaa BBC-da u sheegay in ciidamadoodu "u oggolaadeen ilmaha iyo qoyskiisa inay gudbaan iyaga oo aan wax dib u dhac ah la kulmin, si ay u sii wataan helitaanka daaweynta caafimaad".