Sgeulachd: Dùn Bhuirgh na Theine
Sgeulachd à Barraigh co-cheangailte ris an rann a bh' ann am prògram 03/02/09.
Bha boireannach a bha seo a' fuireach air an eilean agus bha i uabhasach fhèin trang a h-uile latha riamh. Ach bha i an còmhnaidh a' miannachadh 's a' guidhe airson cuideachadh oir cha robh i toilichte leatha fhèin. Bha i a' dèanamh an obair gun teagamh ach cha robh aice ach dìreach ag iarraidh cuideachadh 's ag iarraidh cuideigin a bhiodh còmhla rithe, a dhèanadh an obair còmhla rithe.
Aon latha co-dhiù, b' fheudar dhith an taigh fhàgail agus nuair a thill i bha na sìthichean air an àite a ghabhail thairis agus bha iad air a h-uile nì as an taigh a dhèanamh ach feuch thusa a faigheadh i a-staigh fo na cabair. Chan fhaigheadh ma-thà. Cha leigeadh iad leatha 's dh'fheuch i a h-uile sìon ach gun bhuannachd.
Dh'fhalbh i mu dheireadh a dh'fhaighinn cuideachadh bho nàbaidh a bha shuas an rathad ach an dèanadh ise cobhair oirre. Ach cha b' urrainn dhith dad a dhèanamh. Ach 's ann a dh'iarr i oirre a dhol gu bodach liath a' bhaile - fear a bha a' fuireach faisg agus bhon is e esan bu shine, fhios agad, 's e bu ghlice a bh' as an àite.
'S rinn iad sin. Chaidh iad chun a' bhodaich is bha a nàbaidh ceart. Fhuair i stiùireadh bhuaidhe-san. Thuirt e rithe tilleadh air ais dhachaidh agus a' rann a bha seo a ghabhail taobh a-muigh an taighe. Well, chan fhaigheadh i staigh co-dhiù! Agus nuair a thigeadh i chun an loidhne as a bheil Dùn Bhuirgh, bha aice ri èigheach àird a claigeann. "Agus geallaidh mise dhut," ars esan, "nach bi iad fada a' teicheadh!"
Well, rinn a' chailleach sin agus mar a thuirt b'fhìor. Cho luath 's a laigh a teangaidh air loidhne Dhùn Bhuirgh siud na sìthichean a-mach an doras.
Mo chàis is mo ghogan-ime;
Mo mhic 's mo nigheanan
'S mo chisteachan mòra mine;
An snàth 's a' chuigeal;
Mo bhò 's a' bhuarach
'S cruachan bainne.
Cliabhan 's cinnein
'S an talamh cuir roimhe
Dun Bhuirgh ri theine
'S ma loisgear Dun Bhuirgh
Loisgear mo mhùirn agus mo mhire.
'S a bharrachd air a sin thug am bodach deagh chomhairle dhan chaillich gun miannachadh no guidhe tuilleadh airson nì sam bith agus i bhith toilichte agus riaraichte leis na bh' aice.
BBC iD
BBC iDStiùireadh a’ BhBC
Ceangalaichean BBC
BBC © 2014 Chan eil uallach air a' BhBC airson na th' air làraich-lìn eile.
Gheibhear sealladh nas fheàrr den duilleig seo le sealladair lìn nas ùire agus na duilleagan stoidhle (CSS) air. Ged a chithear susbaint na làraich leis an t-sealladair lìn a th' agaibh, tha sinn a' moladh an dreach as ùire den bhathar-bhog ur sealladair a thoirt a-nuas, no ur duilleagan-stoidhle a chur air ma ghabhas sin dèanamh.