Breaking, Akeredolu win for im polling unit
APC candidate and current Govnor of Ondo state Rotimi Akeredolu don win for im polling unit for Ijebu 2 ward 5 unit 6.
APC get 413 votes while PDP get 12 votes for di polling unit.
You’re viewing a text-only version of this website that uses less data. View the main version of the website including all images and videos.
INEC final results show how Gov. Akeredolu sweep Ondo election
Ondo State Governorship Election latest updates from di sunshine state of Nigeria 10 October vote.
Live Coverage
Daniel Semeniworima and Helen Oyibo
Breaking, Jegede win for im polling unit
PDP candidate Eyitayo Jegede don win for im polling unit for Gbogi/Isikan 1 Unit 9, ward 2.
For dia, PDP get 220, APC get 60 while ZLP get 7.
Results don dey come in
Results don dey come in from different polling units afta election end for Ondo state.
For Osisi quarters, ward 4 unit 10, PDP get 111 votes, APC get 36 and LP 1.
Results from dis three LGAs fit decide winner of Ondo Governorship election?
Vote counting don begin for some LG's
Voting don end and INEC officials don begin count vote for some polling units.
For Gbogi/Isikan 1 Unit 9, ward 2 wia di PDP candidate Eyitayo Jegede vote, dem don sort finish and begin count di votes.
See how e dey go for here:
Breaking, Voting don end...
Voting don end for some polling units for Ondo state.
INEC officials don begin sorting to start vote counting.
INEC tweet about boat accident wey involve dia officials
Di Independent National Electoral Commission don confam say dia staff wey dey involved for boat accident wey happun on Friday night for Ilaje local government areas of Ondo state dey kampe.
Di electoral body for Twitter say di boats wey carry personnel and electoral materials go riverine Ilaje communities for Ilaje local goment area of Ondo state somersault.
Di tweet say none of di staff dem deploy go di riverine areas injure or die for di accident as di Nigeria Navy and oda security officers wey escort di boat epp rescue di electoral officers and materials dem go use for di governorship election for di state.
Which LG go determine di Ondo election?
Residents of Ondo don vote today to decide who go lead di state for anoda four years.
INEC say 1,822,346 candidates register to vote from di 18 local goment areas of di state.
Di LG's na Akoko North East, Akoko North West, Akoko South East, Akoko South West, Akure North, Akure South, Ifedore, Ile Oluji/Okeigbo, Ondo East, Ondo West, Owo, Ilaje, Okitipupa, Ose, Odigbo, Ese Odo, Idanre and Irele
But inside dis 18, all eyes go dey on three major local goment wey for Ondo State election history, dia voting power dey always decide who go win di elections.
Who be dis LG's? Find out here.
In case you just dey join us..., See how di Ondo election don waka so far
Ondo residents dey vote who go lead dem for di next four years today.
Some voters don hail INEC say di election process dey smooth and everything dey peaceful.
Even rain no stop some voters from coming outside to cast dia votes.
Election observer, Samson Itodo say di process dey peaceful and im tok say di large turnout of voters dey encouraging.
One of di DIGs of police Christine Okoye also say di election dey peaceful so far, e tok say di reports of violence wey pipo dey claim say e dey happun for some polling unit na false alarm.
If you just dey join us, see how di mata don waka so far:
- Accreditation and voting start around 8:30am
- APC govnorship candidate Rotimi Akeredolu and im wife vote around 9:40am
- Deputy Govnor of Ondo state and di ZLP candidate cast im vote around 10:30 am
- PDP candidate Eyitayo Jegede and im wife cast dia vote around 11:10am
- Eyitayo Jegede criticise INEC say belle no sweet am as card reader no work wen e reach im and im wife turn to cast dia votes.
- Vote counting go start by 2:30pm across polling units
How pipo dey react to Ondo decides on social media?
Di top trend for Nigeria na still di #EndSars campaign wey don dey on for about a week now.
But Ondo election still manage to dey di trend too,
See some of di tins pipo dey tok for twitter.
ICYMI: Jegede, Ajayi and Akeredolu don cast dia vote
In case you miss am, di candidates of di PDP, ZLP and APC don cast dia votes for dia different polling units.
You fit watch di video and catch up on how dem vote here:
Wetin Ondo residents want from dia next govnor?
As residents for di south west state of Ondo dey vote who go serve dem for di next four years, we ask dem wetin dia expectations from di winner of di vot be.
Hear wetin dem tok
My winning dey di hand of God - Jegede
PDP candidate Eyitayo Jegede don tell tori pipo say e destiny dey God's hand
Jegede wey express im belief and confidence in di outcome of di election also express im disappointment with di way di card reader bin mess up as im bin wan vote.
Breaking, PDP candidate Eyitayo Jegede don cast im vote
Di PDP candidate for di Ondo state govnorship election Eyitayo Jegede don cast im vote.
Im cast im vote togeda with im wife around 11:10am for Unit 1 Ggbogi/isikan1.
Before dem vote, di card reader bin get some kain problems wey delay dem small before dem go ahead.
Breaking, ZLP candidate Agboola Ajayi don cast im vote
Deputy Govnor of Ondo state and di ZLP candidate for di election don cast im vote.
Im cast im vote around 10:30 am for im polling unit for Unit 4 ward 2 Ikiribo.
Fotos of popular Benin-Ore road as e empty on election day
Di Benin Ọrẹ express way na popular and very busy road wey dey link travellers to di south, west and east of di kontri na shadow of imsef today, sake of di Ondo governorship election.
Our tori pesin sight some youths dey play football on di ever busy motorway.
Police bin don announce curfew on Friday for di state with effect from midnight.
My confidence dey in God - Akeredolu
Di APC govnorship candidate Rotimi Akeredolu don cast im vote for im polling unit Ijebu Ward 2, Unit 6.
Akeredolu tell tori pipo say im confidence about di outcome of di election "dey in God."
See some fotos from wen im vote:
Breaking, APC candidate Akeredolu don vote
APC govnorship candidate Rotimi Akeredolu and im wife don vote.
DI APC candidate vote around 9:40am
Di moment wey boat with INEC officials and materials capsize
INEC don confam say one boat wey bin carry dia officials with some material capsize yesterday.
Nobody die for di incident.
Dis video from social media capture some part of wetin happun.
Breaking, PDP candidate Jegede and wife don arrive dia polling unit
PDP candidate Eyitayo Jegede and im wife don land dia polling unit to cast dia vote.
Dem dey queue dey wait dia turn.