عمران خان پاکستان حکومت ته د مذاکراتو وړاندیز وکړ

د پاکستان مخکیني لومړي وزیر عمران خان د خپل هېواد حکومت ته د خبرو وړاندیز کړی. پاکستان حکومت د ښاغلي خان د دې وړاندیز په ځواب کې تر اوسه څه نه دي ویلي، خو لومړي وزیر شهباز شریف ښاغلی خان تورن کړی، چې د مې پر نهمه ورځ یې خپل پلویان پر پوځي تاسیساتو یرغل ته لمسولي وو.

عمران خان له فرانس ۲۴ خبري شبکې سره مرکه کې وویل: ''زما پر ګوند د کړۍ تنګولو پر ځای راشئ کېنئ خبرې وکړو. د مذاکراتو پر مېز مې پوه کړئ، چې ولې زه د دې هېواد لپاره خطرناک بلل کېږم. ''

عمران خان زیاته کړه: ''زه یې یوازې کړی یم، ځکه زموږ د ګوند مشرتابه نور غړي نیول شوي دي، زموږ لس زره ګوندي ملګري نیول شوي دي، هر هغه کس نیول کېږي، چې د پي ټي ای (پاکستان تحریک انصاف ګوند) پلوي دی، یا پټ شوي دي... زه یوازې پاتې شوی یم. ''

د یادونې ده، چې د روانې میاشتې پر نهمه پلازمېنه اسلام اباد کې د ښاغلي خان له نیول کېدو وروسته د پاکستان په ځینو سیمو کې خورا سخت احتجاجونه وشول او ځینو ډلو د دې هېواد پر پوځي تاسیساتو او پر پوځي مرکز هم یرغلونه وکړل.

عمران خان د القادر ټرسټ فنډ قضیه کې نیول شوی و.

د پاکستان سترې محکمې د هغه نیول کېدل ناقانونه بللي و او د خوشي کېدو امر یې کړی و. د تحریک انصاف ګوند وکیلانو سترې محکمې ته د ښاغلي خان د نیول کېدو خلاف عریضه کړې وه.

له هغه وروسته د عمران خان په مشرۍ د تحریک انصاف ګوند ګڼ شمېر پلویان نیول شوي او د ګوند یو شمېر مهمو مشرانو له تحریک انصاف ګونده د وتلو یا هم د ګوندي مسوولیتونو پرېښوولو اعلانونه وکړل.

په دې کې د ګوند عمومي منشي اسد عمر، د بشري حقونو پخوانۍ وزیره شیرین مزاري، د اطلاعاتو مخکینی وزیر فواد چودري، مسرت چیمه، فردوس عاشق اعوان او لسګونه نور مهم مشران شامل دي.

پخوانی وزیر خسرو بختیار د پي ټي ای وروستی مهم غړی دی، چې چارشنبه یې د ګوند له غړیتوبه د استعفا ورکولو اعلان وکړ.

ښاغلي بختیار په یوه ویډیويي پیغام کې ویلي، ''کال مخکې مې د ګوند مشرتابه ته ویلي و، چې له ملي ادارو سره د ګوند جنجالي مخامختیا به ګوند ته زیان ورسوي، له همدې کبله مې د پاکستان تحریک انصاف له سیاسته لېرې والی غوره کړ او له همدې کبله مې د ګوند له مرکزي کمېټې او د سویلي پنجاب لپاره د ګوند له مسوولیته ځان لېرې کړ. ''

بل لور له فرانس ۲۴ سره خبرو کې عمران خان ادعا وکړه، چې پاکستان حکومت او اسټیبلشمنټ (پاکستان کې د پوځي مشرتابه لپاره مروجه اصطلاح) ډارېږي، چې د ده ګوند به ټاکنو کې بریالی شي، او په وینا یې له همدې ډاره یې د دوی پر ضد عملیات پیل کړي.

عمران خان وايي: ''دوی غواړي زما ګوند له منځه یوسي. د پوځي محاکمو تګلاره یې د دې لپاره غوره کړې، چې په عادي محکمو کې د دروغ تورونو پر بنسټ سزا ورکول سخت وي... د پوځي محکمو مانا زموږ د جمهوریت له منځه تلل دي. ''

له حکومت سره د مذاکراتو پوښتنې ته په ځواب کې ښاغلي خان وویل: ''زما پر ګوندي ملګرو د تشدد پر ځای راشئ، مذاکرات وکړو، د ګوند مشران په زندانونو کې دي او له پي ټي ای ګونده د وتلو پر شرط له زندانه بهر وتلای شي. ''

د پاکستان لومړي وزیر محمد شهباز شریف بیا پر عمران خان تور پورې کړی، چې خپل پلویان یې د مې پر نهمه د پاکستاني پوځ پر تاسیساتو یرغل ته لمسولي وو.

نوموړي په کراچۍ ښار کې مراسمو ته وینا کې وویل: ''د مې پر نهمه دې غدیو د عمران خان په لمسون زموږ پر سترو شهیدانو او غازیانو تورونه ولګول او پر پوځي تاسیساتو یې بریدونه وکړل. ''

ښاغلي شریف ادعا وکړه، چې د ده په خبره د دې دسیسې کړۍ تر بهر پورې رسېږي. د نوموړي په وینا ''زموږ د اتلانو مجسمې ماتې کړل شوې او پر ځمکه وغورځول شوې. ''

د پاکستان لومړی وزیر وايي، ''د نظر اختلاف له کبله دا ډول تاوتریخوالی هېڅ مخینه نه لري. ''

د یادونې ده، چې د مې نهمې پېښو په تړاو پاکستاني چارواکو زرګونه کسان نیولي چې د پاکستان کورنیو چارو وزارت په وینا د ۴۹۹ کسانو خلاف رسماً پولیس رپوټونه (ایف ای ار) ثبت شوي دي.

د پاکستان کورنیو چارو وزیر رانا ثناالله وايي، شونې ده چې له دې ډلې کسانو به د ۸۸ کسانو خلاف د ترهګرۍ ضد قانون له مخې قضیې ثبت شي.

د کورنیو چارو وزیر په وینا د ترهګرۍ ضد قانون له مخې ۳۹۴۶ کسان نیول شوي او ۵۵۳۶ کسان په نورو قضیو کې نیول شوي، چې په خبره یې اتیا سلنه یې د ضمانت بدل کې خوشي شوي دي.

رانا ثناالله وايي، له پنجابه ۱۹ او له خیبر پښتونخوا ۱۴ تورن کسان د محاکمې لپاره پوځي محکمو ته سپارل شوي دي او د پاتې نورو کسانو محاکمه به په اړوند محاکمو کې کېږي.

په همدې ترڅ کې عمران خان د چارشنبې پر ورځ پر خواله رسنۍ یو ټیوب پاکستانیانو ته وینا کې ومنله چې د هغو کسانو شمېر چې له ده سره لیدو ته ورځي، په نیشت حساب دی. نوموړي اشارتاً ویلي، چې په مشروط ډول شاتګ ته چمتو دی.

که څه هم د ښاغلي خان په دې څرګندونو کې ډېر تفصیل نه شته، خو له دې مخکې د تحریک انصاف ګوند مخکیني پارلمان غړي جلیل شرقپوري وړاندیز کړی، چې عمران خان باید د ګوند مشرتوب چودري پروېز الهی، اسد عمر یا د بهرنیو چارو مخکیني وزیر شاه محمود قریشي ته وسپاري.

د چارو پاکستاني شنونکي بیا وايي، چې که له قانوني پلوه کومه ستونزه جوړه نه شي یا د محاکمې په ترڅ کې پر عمران خان د پارلماني سیاست بندیزونه و نه لګېږي، داسې احتمال خورا کم دی،عمران خان به د ګوند مشري بل چا ته وسپاري