اوکراييني چارواکي وايي، روسیې کيېف ته نږدې تازه بریدونه کړي
د عکس سرچینه، Reuters
اوکراييني چارواکي وايي، روسيې نن پنجشنبه سهار پلازمېنې کيېف ته نږدې په تازه توغندیزو بریدونو کې ځینې مهمې ودانۍ په نښه کړې دي.
د چارواکو په خبره، په مایکولیف سیمه کې پر یوه پنځه پوړیزه ودانۍ د توغندي لګېدو په پېښه کې دوه کسان وژل شوي او یو زلموټی له ویجاړۍ ژوندی رایستل شوی دی.
د رپوټونو له مخې په ټول اوکرايين کې د هوايي بریدونو د خطر زنګ غږول شوی او له خلکو غوښتل شوي چې ځانونه خوندي ځایونو کې پټ کړي.
هلته بیا د روسیې اړوند ښار بېګورود کې یوه هستوګنیزه وداني پر اوکراييني توغندي لګېدلې ده.
دغه بریدونه داسې مهال کېږي چې د روسیې ولسمشر ولاديمرپوتین له خپل ترکي سیال رجب طیب اردوغان سره د قزاقستان غونډې په څنډه کې کتلي دي.
رپوټونه وايي، دوی د اوکرايين پر موضوع نه دي سره غږېدلي خو پوتین ویلي چې ترکیه اروپا ته د ګازو رسولو لپاره تر ټولو باوري لار ده او هلته یې د ګازو د یوې زېرمې جوړولو وړاندیز ورته کړی دی.
ناټو هېوادونه د اوکرایین توغندي ضد سیسټم پیاوړی کوي
پر اوکرایین د روسیې له توغندیزو بریدونو سره هممهاله د اوکرایین ناټو متحدین وايي، کیېف سره د دافع هوا عصري سیسټم مرستې زیاتوي. په دې مرستو کې توغندي او راډار سیسټمونه شامل دي، چې فرانسې، کاناډا او هالنډ یې اوکرایین ته د ورکولو ژمنه کړې.
د عکس سرچینه، General Staff of Ukraine's Armed Forces
له دې مخکې امریکا متحدو ایالتونو هم ورته ژمنه کړې او د جرمني له لوري د پرمختللې تکنالوژۍ یوه ورته سیسټم وار له مخه په اوکرایین کې فعال دی.
دا ژمنه داسې مهال کېږي، چې په بروکسل کې د اوکرایین متحدو ۵۰ ناټو غړو هېوادونو غونډه کېږي. کیېف دا غونډه ستایلې او 'تاریخي ' یې بللې.
اوکرایین چارواکي وايي، پر دوشنبه او سې شنبه روسیې پر غیر پوځي هدفونو سل توغندیز او ډرون ګوزارونه کړي.
د دې بریدونو په لومړۍ ورځ لږ تر لږه ۱۹ کسان وژل شوي.
د روسیې ولسمشر ولادیمیر پوتین وايي، له کریمیا سیمې سره یې د روسیې نښلونکي مهم پله اوږدو کې د شنبې ورځې چاودنو په غبرګون کې دا بریدونه کړي دي. هممهاله روسیه وايي، په دې تړاو یې اته کسان نیولي دي. د روسیې ایف اېس بي نومي امنیتي ځواک په وینا په نیول شویو کې پنځه روسیان او پاتې نور اوکراینیان او ارمینیان دي.
روسي چارواکي وايي، د دې پېښې تر شا د کیېف لاس دی، خو د اوکرایین یوه چارواکي بیا د پېښې په هکله د روسیې پلټنې 'چټیات ' بللي.
دا رپوټونه داسې مهال خپاره شوي، چې ویل کېږي د افدیوکا ښار پر یوه مارکیټ برید کې اووه کسان وژل شوي. د دونیڅک ځايي پوځي مشر پاولو کېرېلینکو وايي، د اوکرایین تر کنټرول لاندې دې ښار کې برید داسې مهال شوی، چې د خلکو ګڼه ګوڼه خورا زیاته وه او په وینا یې پېښه کې اته کسان ټپیان شوي هم دي.
نوموړي د دې سیمې له ټولو اوسېدونکو غوښتي چې له مېشت ځایونو ووځي. د یادونې ده، چې د دې سیمې ځینې برخې د روسي ځواکونو په کنټرول کې دي.
د کریمیا پله چاودنه په سمبولیک ډول د روسیې ولسمشر ولادیمر پوتین لپاره یو سخت ګوزار بلل کېږي، چې له خپلې خاورې سره د کریمیا له یو ځای کولو څلور کاله وروسته یې په ۲۰۱۸ کال کې دا پل د تګ راتګ لپاره رسماً پرانیستی و.
ولسمشر پوتین د روسیې لپاره د دې خورا مهم پله اوږدو کې چاودنه 'د ترهګرۍ یو عمل ' بللی.
بل لور اوکراییني چارواکي وايي، د زاپوریژیا ښار په شاوخوا کې یو شمېر اېس- ۳۰۰ ډوله توغندي لګېدلي دي، چې په وینا یې یو یې پر یوه ودانۍ لګېدلی او دوی ترې د یوې کورنۍ کسان راایستلي دي.
په کیېف کې د بي بي سي خبریال هوګو باچیګا وايي، په خېرسون ښار کې چې د روسي پوځونو لخوا اشغال شویو ښارونو کې یو لوی ښار بلل کېږي، پنځه چاودنې اورېدل شوې دي.
زموږ خبریال وايي، تر اوسه د چاودنو څرنګوالي په هکله کره معلومات نه دي ترلاسه شوي. بل لور اوکراییني چارواکي وايي، په دې سیمه کې د دوی پوځونه پرلپسې پرمختګ کوي او پنځه نور ځایونه یې بېرته نیولي دي.
