تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
هند کې دیارلس تنه څاه ته لوېدلي او مړه شوي
د هند په شمال کې د اتر پردېش ایالت کې څاه ته د لوېدو له امله شاوخوا دیارلس کسان مړه شوي دي.
ځايي پولیس وايي، پېښه د واده د مراسمو پر مهال رامنځته شوې او ډېری قربانیان یې ښځې او ماشومان دي.
د پولیسو په وینا دا کسان پر یوه اوسپنیزه تخته چې د څاه سر يې پوښلی و ناست و چې د وزن زیاتېدو له امله ترې لاندې څاه ته پرېوتي دي.
په پېښه کې چې د کوشی نګر سیمه کې رامځته شوې دوه کسان ټپیان شوي هم دي.
د هند لومړي وزیر نرېندرا مودي یاده پېښه زړه بوږنوونکې بللې.
پېښه د چهارشنبې په ماښام د واده مراسمو (هلدي) پر مهال رامنځته شوې چې په دې مراسمو کې د ناوې او زوم خپلوان راټولېږي او پر مخونو یې کورکمن موښي.
پولیس وايي، د اوسپنیزې تختې له ماتېدو سره سم ټپیان روغتون ته لېږدول شوي چې ۱۱ کسانو یې سملاسي ساه ورکړې او او دوه نور وروسته مړه شوي دي.
د اتر پردېش اعلی وزیر د سیمي له چارواکو غوښتي چې د پېښې قربانیانو له کورنیو سره دې مرسته وکړي.
همدا راز د سیمې قاضي اېس راجالینګم ویلي دوی به د قربانیانو کورنیو ته یو څه د غرامت په ډول ورکړي.