وسله والو د هند تر کنټرول لاندې کشمیر کې پر پولیسو برید کړی

د هند تر کنټرول لاندې کشمیر کې چارواکي وايي، وسله والو کسانو پر هغه ګاډي برید کړی، چې ځايي پولیس یې لېږدول او درې سرتېري یې وژلي دی.

د ځايي پولیسو په وینا دې پېښه کې ۱۱ کسان ټپیان شوي دي.

د چارواکو په وینا درې وسله والو سري نګر ښار ته نژدې د پولیسو یوه مرکز ته پر روان ګاډي ډزې وکړې او د پېښې له ځایه وتښتېدل.

لومړي وزیر نرېندرا مودي د دې پېښې په هکله خواشیني څرګنده کړې او د نورو معلوماتو ورکولو امر یې کړی دی. چارواکي وايي، سیمه کلابند شوې او تالاشي پیل شوې ده.

د چارواکو په وینا برید هغه مهال وشو، چې پولیس سرتېري له دندې کمپ ته ستنېدل او وسله وال د شپې په تیاره کې وتښتېدل.

په یوه رسمي اعلامیه کې ویل شوي، چې ټپیان شوي پولیس افسران غلام حسین او شفیق علي له پېښې وروسته د دوشنبې پر شپه مړه شول او دریم کس رمیز احمد بابا د سې ش‍نبې پر سهار ساه ورکړه.

د کشمیر پولیسو مشر وجې کومار وايي، دوی داسې ''باوري ثبوتونه '' موندلي چې دا برید د جېش محمد ډلې یوې څانګې کشمیر ټایګرز لخوا تر سره شوی دی.

جېش محمد چې مرکز یې پاکستان کې دی، د هند، ملګرو ملتونو، بریتانیا او امریکا لخوا د ترهګرو ډلو په نوملړ کې شامله وسله واله ډله ده.

دې ډلې د ۲۰۱۹ کال په فبرورۍ کې د کشمېر هغه ځانمرګي برید مسوولیت منلی و، چې ۴۶ هندي پوځیان پکې وژل شوي وو.

د کشمير پخواني اعلی وزیر عمر عبدالله په یوه ټویټر پیغام کې دا برید غندلی دی.

هند او پاکستان دواړه پر ټول کشمیر د ملکیت ادعا کوي، خو دواړه اتومي ځواکونه یې پر یوه برخه کنټرول لري.

هند له اوږدې مودې راهیسې پر پاکستان تور پورې کوي، چې د دې هېواد تر کنټرول لاندې کشمیر کې د بېلتون پالو ملاتړ کوي، خو اسلام اباد دا تورونه ردوي.

له ۱۹۸۰ لسیزې راهیسې په کشمیر کې د ډیلي پر ضد تاوتریخوالی ډېر شوی او د امنیتي ځواکونو رویې پر ضد پراخ احتجاجونه شوي دي.

د یادونې ده، چې ۲۰۱۹ کال کې د لومړي وزیر نرېندرا مودي حکومت د یوه ځانګړي قانون له مخې د هند تر کنټرول لاندې کشمیر ته ورکړل شوی ځانګړی حیثیت ختم کړ.