تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
فرانسې خپلو وګړو ته له پاکستانه د وتلو سپارښتنه وکړه
- Author, خدای نور ناصر
- دنده, بي بي سي، اسلام اباد
- د خپرېدو وخت
اسلام اباد کې د فرانسې سفارت وايي، خپلو وګړو ته یې د څه مودې لپاره له پاکستان د وتلو سپارښتنه کړې، چې کوم خطر ورته پېښ نه شي.
فرانسه دا ګام تر هغه وروسته اخلي، چې پاکستان کې له تېرو څو ورځو راهیسې د تحریک لبیک پلویانو احتجاجونه پیل کړي او په اخ و ډب کې يې لږ تر لږه دوه پولیس سرتېري وژل شوي دي.
په یوه برېښنالیک کې چې د فرانسې خبري اژانس اې ایف پي یې یوه کاپي لیدلې، فرانسې سفارت 'په پاکستان کې د فرانسې ګټو ته د جدي خطر ' یادونه کړې ده.
پاکستان کې څو میاشتې مخکې دا احتجاجونه له هغه وروسته پیل شول چې یوې فرانسوۍ مجلې د اسلام پیغمبر محمد (ص) کاریکاتورونه خپاره کړل.
د فرانسې حکومت د مجلې دفاع وکړه او له هغه وروسته په پاکستان کې لبیک یا رسول الله نومي ګوند پلویانو پراخې مظاهرې وکړې.
پاکستاني چارواکو د تېر کال نومبر کې د تحریک لبیک پاکستان له مشرانو سره چې د فرانسې پر ضد یې احتجاجونه کول، مذاکراتو کې د دوی دا غوښتنه منلې وه، چې له دغه هیواده به د فرانسې سفیر ایستل کېږي.
دغه تحریک هغه مهال فرانسه کې د اسلام پیغمبر ته د سپکاوي پر ضد احتجاجونه کول.
دوی د پاکستان له حکومته غوښتل، چې له فرانسې سره هر ډول اړیکي پرې او سفیر یې وشړي.
د تحریک لبیک پاکستان پلویانو له تېرې دوشنبې راهیسې بیا د دغه هېواد په ډېری لویو ښارونو کې تر هغه وروسته احتجاجونه پیل کړل، چې د لاهور پولیسو د دغه ګوند مشر سعد رضوي ونیو.
له دې سره د پاکستان مرکزي کابینې هغه لایحه تصویب کړې، چې کورنیو چارو وزارت تېره ورځ ورلېږلې او پر تحریک لبیک پاکستان ګوند د بندیز غوښتنه پکې شوې وه.
د پاکستان کورنیو چارو وزیر شیخ رشید احمد پرون اسلام اباد کې رسنیو ته ویلي وو چې دا لایحه یې د پنجاب د ایالتي حکومت په غوښتنه مرکزي کابینې ته لېږلې ده.
د پنجاب ایالتي حکومت غوښتي وو چې پر تحریک لبیک پاکستان ګوند دې د ترهګرۍ د قانون له مخې بندیز ولګول شي.
د پاکستان کورنیو چارو وزارت او ځينې نورې سرچینې وايي، د لومړي وزیر عمران خان په مشرۍ مرکزي کابینې نن پنجشنبه دغه لایحه تصویب کړې او ژر به يې چارواکي خبرتیا خپره کړي.
اعتراض کوونکي وايي پولیسو ښاغلی رضوي د دې لپاره نیولی، چې چارواکي غواړي د اسلام اباد پر لور د دغه تحریک پلان شوی لاریون ناکام کړي.
تحریک لبیک پاکستان وړاندې پاکستاني چارواکو ته د اپرېل تر شلمې وخت ورکړی و چې له دوی سره کړې ژمنې عملي کړي.
دغه ګوند ویلي و که پر شویو ژمنو عمل و نه شي، نو د اپرېل پر ۲۰مه به د پلازمېنې پر لور لاریون اعلان کړي.