د لندن بریدګر امان څوک و؟
د عکس سرچینه، MET POLICE
سوېلي لندن کې هغه بریدګر وپېژندل شو چې پرون یې پر خلکو د چاکو برید وکړ او وروسته د پولیسو ډزو کې ووژل شو.
شل کلن سودېش امان د ترهګریزو جرمونو له امله د درې کاله او څلور میاشتو نیمه سزا پوره کړې وه او یوه اونۍ وړاندې خوشی شوی و.
د چاکو برید کې یې درې کسان ټپي کړل، خو د یوه حالت هم د اندېښنې وړ نه دی.
د برتانیا لومړي وزیر بوریس جانسن له پېښې وروسته وویل، د دوشنبې په ورځ(نن) حکومت له هغو کسانو د خلاصون لپاره- چې د ترهګرۍ جرم باندې سزا هم ور کړل شوې- په نظام کې د بنسټیز بدلون لپاره نور پلانونه اعلانوي.
له دې مخکې ښاغلي جانسن ټوېټري پیغام کې وویل، زړه یې دې پېښه کې له ټپي شویو سره دی.
نوموړي د بېړنیو چارو ادارې له کارمنانو هم مننه وکړه.
سودیش امان څوک دی؟
د عکس سرچینه، PA Media
د بي بي سي خبریال ډینیل ډي سمون وايي، د ۲۰۱۸ کال نومبر کې سودېش امان ته له ترهګرو سره د اړوند مالوماتو د سندونو د لرلو او د ترهګرۍ خپرولو په جرم درې کاله او څلور میاشتې بند واورول شو.
ډي سمون وايي، هغه مهال په محکمه کې و او د سزا اورولو په وخت یې د امان مسکا اوس هم یاد ده.
د ۲۰۱۸ کال په مۍ کې اول ځل پولیسو په شمالی لندن کې امان د ترهګریزو بریدونو د پلانولو په تور ونیو.
د هغه کال په اپرېل کې د ترهګرۍ ضد پولیس چې د ټیلي ګرام مسېج اېپ کې تبصرو ته متوجه شول نو امان ته یې پام واوښت.
یوه تبصره کې یو بیرغ باندې د دوو توپانجو انځورولو سره عربي کې لیکلي و، وسلوال د اپرېل په دریمه تیار دي.
عیني شاهدانو څه ولیدل؟
د عکس سرچینه، DAM SIMTH
عیني شاهدان وايي، درې ډزې یې واورېدې او له درملتون بهر یې پر ځمکه پروت یو کس ولید.
پولیسو نږدې خلکو ته دا هم ویلي و چې پټ شي.
۱۹ کلن زدکوونکی ګولود بلهان وايي، پر سړک روان و چې یو کس یې په منډه ولید او وروسته یې د ډزو غږونه واورېدل.
دی زیاتوي چې دې سره یې منډه کړل او کتابتون کې پټ شو، وروسته د پولیسو او امبولانسونو غږونه شول.
سیمه کې د بي بي سی خبریال سټېفن پاول وايي، هرې خوا ته پولیس و او له خلکو یې غوښتل چې کورونو کې پاتې شي.
هغه زیاتوي، چورلکو سیمه څارله او په کوڅو کې خورا ډېر پولیس ګرځېدل.
