پریانکا ګاندي پورې ولې د هند د کانګرېس هیلې تړلې؟

هند کې د نهرو او ګاندي کورنیو مینوال له اولې ورځې پوهېږي چې پریانکا ګاندي څوک ده. ډېر شمېر زدکوونکي یې هم پېژني.

خو ټولې نړۍ په تېره هندي ولس اول ځل د خپلې نیا د مرګ په ورځ ولیده چې د مور سونیا ګاندي سره ولاړه وه او ورور یې راهل ګاندي له خپل پلار را جیو ګاندي سره و.

پر ۱۹۷۲ کال جنورۍ ۱۲ زېږېدلې پریانکا هغه وخت ۱۲ کلنه وه.

پر ۱۹۸۴ کال د اندرا ګاندي وژلو پسې خلک اندېښمن و پرینکا غمجنه خو په ارام وه او خلکو فکر وکړ چې که یو اندرا ځي بل اندرا راځي.

د اندرا ګاندي وروسته یې مشر زوی راجیو ګاندي لومړی وزیر شو او د خلکو اندېښنه ورکه شوه.

خو پر ۱۹۹۱ کال مۍ میاشت کې خور او ورور ګډ ولاړ او بیا غمجن وو.

د دوی پلار راجیو ګاندي ټاکنیزو هڅو کې د چاودنې له امله وژل شوی و.

دغه مهال پرینکا لویه وه خپلې غمجنې مور سونیا ته یې تسلي ور کوله.

سپینو جامو کې تر ډېره اندرا ګاندي ته ورته ښکارېده.

د راجیو ګاندي له وژلو وروسته کانګرېس واکمن شو، خو د نهرو او ګاندي له لاسونو دودیز واک ووت.

سونیا له سیاست ډډه وکړه او له سیاست یې د خپلو بچیو لرې ساتل غوښتل.

خو کله چې سیمه ییز ګوندونه پیاوړي شول، له بابري جومات او ممبي بریدونو وروسته د لومړي وزیر نرسمه راو حکومت کې کانګرېس کمزوری شو، د کانګرېس بېړۍ ژغورلو لپاره د سونیا ګاندي اړتیا شوه.

ځکه کانګرېس کې بل داسې څوک نه و چې د مختلفو سیمو ګوندي مشران پرې یوه خوله شي.

د راجیو ګاندي له مرګ نهه کاله وروسته سونیا د ډېر وخت لپاره د کانګرېس مشره شوه او د ۲۰۰۴ او ۲۰۰۹ کلونو ترمنځ یې حکومت جوړولو مسوولیت درلود.

دریم ځل پرینکا ګاندي په ۱۹۹۷ کال د خبرونو سرټکی شوه، چې له یوه سوداګر سره یې واده وکړ.

بیا چې کانګرېس د پایښت لپاره لاس پښې وهلې نو سیاست ته د پرینکا د راوستلو غوښتنه وشوه.

خو پر ۱۹۹۹ کال چې یوه مرکه کې وپوښتل شوه نو پرینکا وویل، چې یوه اوږده انتظار ته اړتیا ده.

هغې لس کاله وروسته پر ۲۰۰۹ کال بیا یوه مرکه کې وویل، زه سیاست ته تلل نه غواړم. خلک به دا غواړي خو زه له دوی پر خپل زړه او دماغ ښه پوهېږم.

خو دا یې هم ویلي و چې د خپلې نیا په څېر جوړېدل غواړي، هغه یواځې ځواکمنه سیاستواله نه بلکې ځواکمنه ښځه هم وه.

د سونیا ګاندي ژوند لیکونکی رشید قدوايي، وايي د پرینکا او اندرا ترمنځ ډېر ورته والی شته، خو د اندرا له مرګ درې نسله وروسته به ځوانانو ته د لمسۍ او نیا ترمنځ اړیکه جوړول مشکل وي.

خو د بي بي سي نامتو خبریال ریحان فضل وايي، چې مور او ورور یې د کانګرېس مشران او د پارلمان غړي دي او د دې لپاره ټاکنو کې ښه کار کولی شي.

"جامې یې، خبرې یې، رنګ، بڼه او وېښنا تر ډېره اندرا ګاندي ته ورته دي. خلک به دې ته دومره ډېره قرباني ور کړي چې راهل او سونیا ته یې هم نه ده ور کړې".

د دوو بچیانو مور پرینکا ته چې د ختیځ اتر پردېش مسوولیت ور کړل شوی او هلته د کانګرېس مشره ده، نو سیاست کې یې امتحان هم پیل شوی دی.

رشید قدوايي وايي، چې هغه ستایلو ته اړتیا نه لري، اغېزناکه یا کارېزماتیکه ده، خو ځان به پخپله ثابتوي.

پرینکا اراپوهنه کې لیسانس او بودیزم کې ماسټري کړې او په بودیزم باور لري.

۔