عمران خان: مرکزي حکومت دې قبایلي سیمو کې امن ټینګ کړي
د عکس سرچینه، Imran Khan
د پاکستان مخکیني لومړي وزیر عمران خان ویلي د دغه هېواد مرکزي حکومت باید قبایلي سیمو او ملاکنډ کې د خراب امنیتي وضعیت ښه کېدو لپاره لاس په کار شي.
هغه دا څرګندونې د شنبې پر ورځ د خیبرپښتونخوا چارسده کې د خپلو پلویانو یوې جلسې ته کړې.
دا جلسه چارسدې کې پارلمان لپاره د ضمني ټاکنو لړ کې جوړه شوې وه.
د تحریک انصاف ګوند مشر دې جلسه کې د پاکستان اوسني واکمن حکومت ته خطاب کې وویل "ستاسې ټولې هڅې په دې متمرکزي دي چې موږ تر فشار لاندې راولئ، پر رسنیو فشار راوړئ، خو د هېواد حالت نشئ سمبالولی."
هغه زیاته کړې چې حکومت باید د ده خلاف د دوسیو پرانیستلو پر ځای د قبایلي سیمو او ملاکنډ خراب امنیتي وضعیت ته پام وکړي، ځکه د ده په وینا "د پښتونخوا خلکو ډېرې قربانۍ ورکړې دي".
عمران خان وویل "ملاکنډ کې وضعیت خراب دی، د پښتونخوا پولیس هڅې کوي، خو اوس په کار ده چې مرکز حکومت رامخ ته شي او خپل مسوولیت پر ځای کړي."
د پاکستان مخکینی لومړی وزیر او د تحریک انصاف ګوند مشر دا څرګندونې داسې مهال کوي چې په دې وروستیو کې د خیبرپښتونخوا بېلابېلو سیمو کې امنیتي پېښې ډېرې شوې دي.
له دغو سیمو وخت ناوخت هلته د وسله والو د حضور او فعالیتونو د ډېرېدو خبرونه ورکول کېږي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د شهباز شریف په مشرۍ اتېلاف حکومت تر اوسه د عمران دغو څرګندونو ته غبرګون نه دی ښودلی خو د پاکستان ټاکنو کمېسیون ادعا کړې چې ګوندې تحریک انصاف ګوند د چارسدې جلسې لپاره دولتي چورلکه او نور وسایل کارولي دي.
د ټاکنو کمېسیون په دې تړاو له عمران خان او د خیبرپښتونخوا له وزیر اعلی محمود خان وضاحت هم غوښتی.
د پاکستان ټاکنو کمېسیون اعلامیه کې راغلي چې عمران خان او محمود خان وړاندې هم په وار وار له اصولو سر غړولی او داسې کړنې د ازادو او منصفانه ټاکنو ترسره کېدو له ستونزو سره مخامخوي.
