په ایران کې د امریکا د غورځول شوي اېف۱۵ جنګي جټ د عملې
د دویم غړي موندلو لپاره تېره شپه د ترسره شویو عملیاتو جزییات، چې ظاهرآ نښتې هم
پکې شوې، ورو ورو په راوتلو دي.
نیویارک ټایمز وايي په دغو عملیاتو کې "سلګونو
ځانګړو ځواکونو" برخه اخیستې، او د امریکا دوه ترانسپورتي الوتکې چې داسې
ښکاري په ایران کې کښته شوې وې، نسکورې شوې دي.
دې ورځپاڼې د امریکا د یوه پوځي چارواکي په حواله لیکلي
"یو وروستی خنډ پاتې وو چې د ژغورنې عملیات یې وځنډول."
د دغه چارواکي په وینا دوه ترانسپورتي الوتکې چې ټاکلې
وه کومانډو ځواکونه او ژغورل شوی پیلوټ یې خوندي ځای ته لېږدولي وای، د ایران په
یوه لېرې پراته هوايي ډګر کې ایسارې شوې.
نوموړي زیاته کړې چې وروسته درې نورې الوتکې واستول شوې
چې امریکايي ځواکونه راوباسي او له کاره لوېدلو الوتکو ته چاودنه ورکړي چې د ایرانیانو
لاس ته ور نه شي.
تر دې ورمخکې فراجا ویلي وو چې د اصفهان سویل کې یوه سي۱۳۰
امریکایۍ الوتکه راغورځول شوې ده.
سپاه پاسداران هم په اصفهان کې د یوې امریکایۍ الوتکې د
ویشتل کېدو خبر ورکړی و، خو د دې الوتکې د نوعیت په اړه یې څه نه وو ویلي.
خو د ایران د خاتم الانبیا مرکزي قرارګاه ویاند ویلي، چې
د غورځېدلي اېف۱۵ جټ د عملې د دویم غړي ژغورنې لپاره د امریکايي ځواکونو د عملیاتو
پر مهال د اصفهان په سویل کې د "دښمن" دوه بلکهاک چورلکې او یوه سي۱۳۰
ترانسپورتي الوتکه ویشتل شوې دي.
د امریکا ولسمشر ډونلډ ټرمپ اعلان کړی چې د غورځېدلي جټ
د عملې د دویم غړي د لټون او ژغورنې په ماموریت کې ان یوه امریکايي ته هم مرګژوبله
نه ده اوښتې.
