د هند هوايي ځواک وايي، د دوی عملیات لا هم روان دي. پر اېکس خواله رسنۍ یوه پیغام کې د هند هوايي ځواک له لوري ویل شوي، عملیات یې دوام لري او جزیات به یې وروسته خپاره کړي. په پیغام کې زیاته شوې، ''عملیات لا هم روان دي، نو نور معلومات به وروسته خپاره شي. هند هوايي ځواک له ټولو غواړي چې له اټکلونو او ناتائید شویو معلوماتو ډډه وکړي.''
د امریکا ولسمشر ډونلډ ټرمپ په سپینه ماڼۍ کې د یوې غونډې په ترڅ کې د هند او پاکستان ترمنځ د تاوتریخوالي په اړه د یوې پوښتنې په ځواب کې وویل، "دا د شرم خبره ده". موږ د دې په اړه همدا اوس واورېدل."
نوموړي وویل، "زه هیله لرم چې دا (تاوتریخوالی) ژر پای ته ورسېږي."
د عکس سرچینه، Getty Images
د پاکستان لومړي وزیر شهباز شریف یوه وینا پاڼه کې ویلي: "خاین دوښمن په پاکستان کې په پنځو ځایونو باندې بزدلانه بریدونه کړي دي. د تیري دا ناوړه عمل به یې بې سزا پاتې نشي.
هغه زیاته کړې"پاکستان د هند د دې بې دلیله برید پر وړاندې د پرېکنده ځواب ورکولو بشپړ حق لرو."
د عکس سرچینه، Red Crescent
د پاکستان دفاع وزیر خواجه اصف جیو نیوز ټلویزوني شبکې ته ویلي هند د پاکستان او کشمېر پر درې ولسي سیمو توغندیز بریدونه کړي. نوموړي هغه رپوټونه رد کړي چې هند ویلي د ترهګرو مرکزونه یې په نښه کړي دي.
هند ویلي، پاکستان او د پاکستان تر ولکې لاندې کشمیر کې یې نهه سیمې په نښه کړي دي.
د پاکستان پوځ ویلي، د هند په بریدونه کې دوه ولسي کسان د پاکستان تر کنټرول لاندې کشمیر او یو ماشوم د پاکستان په بهاولپور کې وژل شوي دي.
د پاکستان د پوځ ویاند وايي ۱۲ نور ولسي کسان په دغو بریدونو کې ټپیان شوي دي.
د پاکستان د پوځ ویاند له جیو نیوز سره خبرو کې ویلي، یو ماشوم د یوه نړیدلي کور ویجاړیو کې بند پاتې دی.
د عکس سرچینه، SOCIAL
د پاکستان پوځ وايي هندي الوتکو په دریو ښارونو بهاولپور، کوټلي او مظفر اباد توغنديز بریدونه کړي دي.
د پاکستان پوځ د عامه اړیکو ادارې (ای اېس پي ار) مشر جنرال احمد شریف چودري له یوه ځایي تلویزیون سره په خبرو کې د دې بریدونو پخلی کړی او وايي دا بریدونه "د هند له خپل هوايي حریم څخه" ترسره شوي دي.
