د سرغړونو له تورونو سربېره د هند او پاکستان تر منځ اوربند ټینګ دی

ژوندی پوښښ

1. ۱۷ غویی ۱۴۰۴ - ۷ می ۲۰۲۵وروستی, مسعود اظهر: د هند برید کې زما د کورنۍ ۱۰ غړي او څلور نژدې ملګري ووژل شول

   

   د عکس سرچینه، Getty Images

   د ممنوع ګرځول شوې ډلې "جیش محمد" مشر مولانا مسعود اظهر ویلي، د هند لخوا د بهاولپور په سبحان الله جومات برید کې د هغه د کورنۍ لس غړي او څلور نژدې ملګري وژل شوي دي.

   د چهارشنبې په ورځ د دوی لخوا په یوه خپره شوې اعلامیه کې ادعا شوې چې په وژل شویو کې د مولانا مسعود اظهر مشره خور او د هغې مېړه، د مسعود اظهر وراره او د هغه مېرمن، یو بل وراره او د هغه د کورنۍ پنځه ماشومان شامل دي.

   په بیان کې دا هم ویل شوي چې د مسعود اظهر یو نژدې مرستیال او د هغه مور، له دوو نورو نژدې ملګرو سره یوځای د سې شنبې شپې په برید کې ووژل شول.

   په بیان کې د هند پر لومړي وزیر نریندرا مودي نیوکه شوې او ویل شوي، "دې ظلم ټول قوانین مات کړل، اوس باید هېڅوک د رحم تمه ونه کړي."

2. ۱۷ غویی ۱۴۰۴ - ۷ می ۲۰۲۵وروستی, پاکستان د هند د هوایي بریدونو له امله د دغه هېواد شارژدافیر احضار کړی

   د تاوتریخوالي د زیاتېدو په ترڅ کې، پاکستان ویلي چې د هند شارژدافیر یې احضار کړی چې د هغو "بې‌ځایه" هوایي بریدونو شکایت وکړي چې هند کړي دي.

   د پاکستان د بهرنیو چارو وزارت په یوه بیان کې ویلي: "دغه بریدونه د ګڼ شمېر ولسي وګړو، په ځانګړي ډول ښځو او ماشومانو، د وژل کېدو او ټپي کېدو لامل شوی."

   بیان زیاتوي چې د هند دا اقدام "د پاکستان له ملي حاکمیت څرګنده سرغړونه ده".

   اسلام‌اباد همداراز ویلي چې ډيلي ته یې خبرداری ورکړی، "دا ډول بې‌پروا چلن د سیمې د سولې او ثبات لپاره جدي ګواښ پېښوي".

3. ۱۷ غویی ۱۴۰۴ - ۷ می ۲۰۲۵وروستی, د پاکستان د ملي امنیت کمېټې غونډه پیل شوه

   د ملي امنیت کمېټې غونډه، چې د هند لخوا د پاکستان او د هغه تر ولکې لاندې کشمیر په بېلو ځایونو د توغندیو بریدونو وروسته رابلل شوې وه، د پاکستان د لومړي وزیر شهباز شریف په مشرۍ پیل شوه.

   په دې غونډه کې به د هند له بریدونو وروسته رامنځته شوي وضعیت وڅېړل شي.

   صدراعظم شهباز شریف به د ملي امنیت کمېټې له غونډې وروسته ملت ته وینا وکړي.

   د یادونې وړ ده چې د سې شنبې او چهارشنبې په شپه، هند د پاکستان او د هغه تر ولکې لاندې کشمیر په مختلفو ځایونو توغندیز بریدونه وکړل.

   د پاکستان د پوځ ویاند ډګر جنرال احمد شریف چوهدري په وینا، د هند په بریدونو کې ۲۶ ملکي وګړي وژل شوي او ۴۶ نور ټپیان شوي دي.

4. ۱۷ غویی ۱۴۰۴ - ۷ می ۲۰۲۵وروستی, پاکستان د وژل شويو شمېر ۲۶ تنه ښودلی دی

   

   د عکس سرچینه، Radio Pakistan

   د پاکستان پوځ وايي هند وړمه شپه په پاکستان او د هغه تر ادارې لاندې کشمیر کې په ګڼو ځایونو توغنديز بريدونه کړي چې ځاني او مالي زيان يې اړولی دی.

   د پاکستان د پوځ وياند جنرال احمد شريف چودري وايي، په دغو بريدونو کې ۲۶ ملکي وګړي وژل شوي او ۴۶ نور ټپيان دي. وړاندې پاکستاني چارواکو د وژل شويو شمېر اته تنه ښودلی و.

   بل پلو هند وايي د پاکستان له خوا ډزو کې د دوی تر ولکې لاندې کشمير کې لږ تر لږه دری تنه وژل شوي.

   د دواړو هېوادونو له خوا ادعاوې په خپلواکه توګه نشي تائيدېدلی.

5. ۱۷ غویی ۱۴۰۴ - ۷ می ۲۰۲۵چین د پاکستان پر ضد د هند عملیات د "خواشینۍ" وړ بللي

   چین د پاکستان پر وړاندې د هند پوځي اقدام "د خواشينۍ وړ" بللی دی.

   د چین د بهرنیو چارو وزارت ویاند ويلي چې د هند او پاکستان ترمنځ د روان کړکیچ په اړه "اندېښمن" دی.

   د چین د بهرنیو چارو وزارت په وینا، دوی دواړو هېوادونو ته مشوره ورکوي چې "له زغمه کار واخلي او له هغو کړنو ډډه وکړي چې وضعیت نور هم پېچلی کوي."

6. ۱۷ غویی ۱۴۰۴ - ۷ می ۲۰۲۵د ايران د بهرنيو چارو وزير هند ته ځي

   

   د عکس سرچینه، Getty Images

   د ایران د بهرنیو چارو وزیر سيد عباس عراقچي وايي د هند پلازمېنې ډيلي ته روانېږي.

   د ایران د بهرنیو چارو وزارت اعلان کړی چې ښاغلی عراقچي به د دې سفر پر مهال د هند له ولسمشرې دروپدي مرمو او د بهرنیو چارو وزیر سبرامنیم جېشنکر سره خبرې اترې وکړي.

   ښاغلي عراقچي څو ورځې وړاندې پاکستان ته سفر کړی و او د پاکستان د پوځ له لوی درستیز جنرال عاصم منیر او لومړي وزیر شهباز شریف سره یې ليدلي و.

   ایران مخکې هند او پاکستان ته وړاندیز کړی و چې د دواړو هېوادونو ترمنځ د نوې شخړې په حل کې منځګړیتوب ته چمتو دی.

7. ۱۷ غویی ۱۴۰۴ - ۷ می ۲۰۲۵د هند تر ادارې لاندې کشمیر کې د یوې ښځې په ګډون شپږ کسان وژل شوي

   

   د عکس سرچینه، Ishrat Butt

   د هند تر ادارې لاندې کشمیر کې د توغنديو په ډزو کې د یوې ښځې په ګډون شپږ کسان وژل شوي دي.

   د مړینو تائید ځايي روغتیايي مشر ډاکټر پرویز احمد خان د بي بي سي خبریال ریاض مسرور ته د ټلیفوني خبرو له لارې کړی دی.

   د هند تر کنټرول لاندې د کشمير په پهلګام کې له برید راهیسې، هند او پاکستان دواړه د کنټرول کرښې په اوږدو کې يو بل په سرغړونو او پر ملکي وګړو د بمبارۍ تورونه لګوي.

   د سې شنبې په شپه د "سیندور عملیاتو" وروسته د هند او پاکستان تر منځ په مختلفو ځایونو کې د درنو ډزو راپورونه ورکړل شوي دي.

   د هند پوځ ادعا کوي چې د پاکستان د "ډزو په پایله کې دری ملکي وګړي وژل شوي دي."

   رویټرز او اې ایف پي خبري اژانسونو هم د هند د پوځ له قوله ویلي چې د هند تر کنټرول لاندې کشمیر کې د پاکستان د ډزو په پایله کې دری هندي وګړي وژل شوي دي.

8. ۱۷ غویی ۱۴۰۴ - ۷ می ۲۰۲۵پر پاکستان او د هغه تر کنټرول لاندې کشمير د هند بريدونو په اړه تر دې مهاله معلومات

   • هند تر خپلې ولکې لاندې کشمير په پهلګام کې له بريد وروسته تېره شپه په پاکستان او د هغه تر واک لاندې کشمیر کې مختلف ځایونه په نښه کړي دي.
   • د پاکستان د پوځ ویاند ډګر جنرال احمد شریف چودري وايي، تر اوسه د ترلاسه شویو معلوماتو له مخې، هند په شپږو ځایونو ټولټال ۲۴ بریدونه کړي دي. د پاکستاني چارواکو په وینا، په دې بریدونو کې اته ملکي وګړي وژل شوي او ۳۵ نور ټپیان دي.
   • د هند حکومت وايي د پهلګام له برید وروسته یې د 'سندور' په نامه عملیاتو کې په پاکستان او د هغه تر واک لاندې کشمیر کې د ترهګرو پټنځایونه په نښه کړي. دوی ادعا کوي چې په دې بریدونو کې ملکي وګړي یا پوځي تاسیسات نه دي په نښه شوي.
   • د پاکستان د پوځ یوه ویاند ادعا وکړه چې د هند د توغنديزو بریدونو په غچ کې، پاکستان د هند د هوايي ځواک دوه جنګي الوتکې او یو ډرون ویشتلی دی، په داسې حال کې چې د پاکستان د دفاع وزیر خواجه محمد اصف ادعا وکړه چې د پاکستان هوايي ځواک پنځه هندي الوتکې ویشتلي او څو بې پیلوټه الوتکې یې ویجاړې کړې دي. خو د هند هوايي ځواک تر اوسه د دې ادعاوو په اړه غبرګون نه دی ښودلی.
   • پاکستان ګواښ کړی چې په خپل وخت کې به هند ته د دې بريد ځواب ورکړي.

9. ۱۷ غویی ۱۴۰۴ - ۷ می ۲۰۲۵د هند او پاکستان شخړه: يو شمېر هندي هوايي شرکتونو الوتنې لغوه کړې دي

   ګڼ شمېر هندي هوايي شرکتونو د هند تر ادارې لاندې کشمیر او د راجستان او پنجاب په څېر سرحدي ایالتونو ځینو ښارونو ته د الوتنو لغوه کولو اعلان کړی دی.

   سپایس جېټ ويلي، د شمالي هند په ځینو برخو کې د درمشالا، ليه، جمو، سرينګر او امرتسر هوایی ډګرونه، تړل شوي، چې له دې ځایونو الوتنې يې اغېزمنې کړې دي. انډېګو ایرلاینز پر اېکس پوست کې ليکلي چې دېښارونو ته او له هغه ځایه الوتنې د شرایطو د بدلېدو له امله اغېزمنې شوې دي.

   اېر انډیا ويلي، دوی د جمو، سرینګر، لیه، جودپور، امرتسر، بهوج، جام نګر، چندیګړ او راجکوټ ښارونو ته او له هغه ځایه خپلې ټولې الوتنې د ځایي وخت تر غرمې پورې ځنډولې دي.

   یاد هوایی شرکت دا هم ويلي چې دوی د پنجاب ایالت امرتسر ته په لاره دوې نړیوالې الوتنې پلازمېنې ډیلي ته اړولې دي.

   

   د عکس سرچینه، Getty Images

10. ۱۷ غویی ۱۴۰۴ - ۷ می ۲۰۲۵د پنجاب په مريدکې کې د هندي برید له امله اوښتي زیانونه

    د پاکستان د پوځ وياند وايي، هند د پاکستان د پنجاب ایالت په احمد پور شرقیه، مریدکې، سیالکوټ او شکرګړ تر څنګ د پاکستان تر واک لاندې کشمير په کوټلي او مظفر اباد کې بريدونه وکړل.

    د پوځ وياند وايي، د مريدکې په ام القرا جومات او د هغه شاوخوا سیمه څلور هندي توغندي لګېدلي چې له امله یې یو کس مړ او یو ټپي شوی او دوه تنه لادرکه دي.

    د بي بي سي خبریالان عمر دراز ننګیانه او فرقان الهي دا مهال په مريدکې کې دي او د برید له ځایهیې دا انځورونه را لېږلي دي.

    

    

    

11. ۱۷ غویی ۱۴۰۴ - ۷ می ۲۰۲۵وروستی, د امریکا د بهرنیو چارو وزیر وايي د پاکستان او هند ترمنځ وضعیت له نژدې څاري

    د امریکا د بهرنیو چارو وزیر مارکو روبیو ویلي، چې د پاکستان او هند ترمنځ راپورته شوی وضعیت له نژدې څاري.

    نوموړي ويلي، له ولسمشر ټرمپ سره همغږی دی چې دا وضعیت ډېر ژر پای ته ورسېږي او دواړه هېوادونه د متقابلو اړیکو له لارې د سوله ایز حل پر لور حرکت وکړي.

    

    د عکس سرچینه، @SecRubio

12. ۱۷ غویی ۱۴۰۴ - ۷ می ۲۰۲۵وروستی, د هند پوځ وايي د دوی تر ادارې لاندې کشمیر کې دری کسان وژل شوي

    رویټرز او اې اېف پي خبري اژانسونه وايي د هند پوځ ویلي چې د دوی تر ادارې لاندې کشمیر کې د پاکستاني ځواکونو په پوځي عملیاتو کې دری هندي ملکي وګړي وژل شوي دي.

13. ۱۷ غویی ۱۴۰۴ - ۷ می ۲۰۲۵د پاکستان تر ادارې لاندې کشمیر کې د هند له بریدونو وروسته حالت

    اسوشیټیډ پریس خبري اژانس داسې ويډيو ترلاسه کړی چې وايي په د کشمير په مظفر اباد کې له چاودنې وروسته وضعیت ښیې. بي بي سي په خپلواکه توګه دا نشي تائیدولی.

14. ۱۷ غویی ۱۴۰۴ - ۷ می ۲۰۲۵د ملګرو ملتونو مشر انتونيو ګوتېرېش د زغم غوښتنه کړې

    د ملګرو ملتونو د مشر انتونیو ګوترېش ویاند وايي چې هغه د کنټرول کرښې او له پاکستان سره د نړيوالې پولې په اوږدو کې د هند د پوځي عملياتو په اړه ژوره اندېښنه څرګنده کړې ده.

    د ده په وینا، انتونیو ګوتریش ویلي چې "د کنټرول کرښې او نړیوالې پولې په اوږدو کې د هند د پوځي عملیاتو په اړه ژوره اندیښنه لري."

    ده پر دواړو هېوادونو غږ کړی چې د "لوړې کچې له زغم کار واخلي."

    

    د عکس سرچینه، EPA

15. ۱۷ غویی ۱۴۰۴ - ۷ می ۲۰۲۵

    په دې ويډيو کې د پاکستان تر ولکې لاندې کشمير کې د چاودونو غږونه اورېدل کېږي.

16. ۱۶ غویی ۱۴۰۴ - ۶ می ۲۰۲۵تر اوسه څه پېښ شوي؟

    • د پاکستان د پوځ په وینا، هند له خپل هوايي حریم څخه د پاکستان او د دوی تر ولکې لاندې کشمير پر پنځو ځایونو توغندي توغولي دي.
    • پاکستان وايي په بريد کې بهاولپور او مریدکي سربېره د پاکستان تر ادارې لاندې کشمیر کې په کوټلي، مظفراباد او باغ کې پنځه توغندي توغول شوي دي.
    • بل پلو، د هند حکومت وايي د 'سندور' عملیاتو کې يې نهه ځایونه په نښه کړيي. پداسې حال کې چې 'د پاکستان د پوځ پر تاسیسات بريد نه دی شوي'.
    • د پاکستاني چارواکو په وینا، تر اوسه پورې په احمد پور شرقیه کې ۱۲ ملکي وګړي ټپیان شوي.په کوټلي کې دوه ملکي وګړي وژل شوي دي.
    • د پاکستان لومړي وزير شهباز شریف د ملي امنیت کمېټې غونډه رابللې ده. د پنجاب اعلی وزیرې مریم نواز په ايالت کې بېړنی حالت اعلان کړی دی.
    • پاکستان خپل هوايي حریم د راتلونکو ۴۸ ساعتونو لپاره تړلی دی.

17. ۱۶ غویی ۱۴۰۴ - ۶ می ۲۰۲۵وروستی, د پاکستان پوځ ادعا کوي چې دوه هندي الوتکې او یوه بې پیلوټه الوتکه یې ویشتلې ده

    د پاکستان د پوځ ویاند ډګر جنرال احمد شریف چودري له بي بي سي سره په خبرو کې ادعا وکړه چې پاکستان د هند د توغندیو بریدونو په غچ کې د هند د هوايي ځواک دوه جنګي الوتکې او یوه بې پیلوټه الوتکه ویشتلې ده.

    پاکستاني چارواکو تر اوسه په دې اړه نور معلومات نه دي ورکړي او نه هم هند تر اوسه د دې ادعا په اړه غبرګون ښودلی دی.

    د پوځ ویاند وايي په بريدونو کې جوماتونه هم په نښه شوي دي دي. دی وايي د هند په توغندیزو بریدونو کې ټولټال اووه ملکي وګړي وژل شوي دي.

18. ۱۶ غویی ۱۴۰۴ - ۶ می ۲۰۲۵پاکستان د هغې سيمې ويډيو خپره کړې چې هند بريد پرې کړی

19. ۱۶ غویی ۱۴۰۴ - ۶ می ۲۰۲۵وروستی, په پنجاب کې بېړنی حالت اعلان شوی

    د پاکسان د پنجاب اعلی وزیرې مریم نواز شریف په ټول پنجاب کې بېړنی حالت اعلان کړی دی.

    ټولې امنیتي ادارې، د پنجاب د پولیسو په ګډون، د چمتووالي په حالت کې دي. د پنجاب ټولو روغتونونو، ډاکټرانو او روغتيايي کارکوونکو رخصتۍ لغوه شوې دي.

20. ۱۶ غویی ۱۴۰۴ - ۶ می ۲۰۲۵وروستی,

    شهباز شریف نن سهار لس بجې د ملي امنیت کمېټې غونډه رابللې ده.

    د پاکستان لومړي وزير شهباز شریف د چهارشنبې سهار لس بجې د ملي امنیت کمېټې غونډه رابللې ده.