تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د ایران بهرنیو چارو وزیر سید عباس عراقچي لږ مخکې په یوه اېکس پیغام کې وویل، که اسرائیل ''خپل غیر قانوني یرغل'' همدا اوس ودروي، ایران د ځوابي اقداماتو دوام هېڅ نیت نه لري. له دې مخکې د امریکا ولسمشر ډونلډ ټرمپ پر خواله رسنۍ د اسرائیل او ایران تر منځ د ''بشپړ او ټولټال'' اوربند اعلان وکړ.
د ایران قضایي رسنیز مرکز میزان مسوولین واي، ''د صهیونیستي رژیم ګټې او اطلاعاتي همکارۍ'' په جرم یو سړی اعدام شوی دی.
په ایران کې د اسرائیل لپاره د صیهونیستي رژیم اصطلاح کارول کېږي.
د میزان له لوري په یوه اعلامیه کې ویل شوي، اسماعیل فکري، چې د خدا نظر زوی و، د ۱۴۰۲ کال په لیندۍ میاشت کې د پېچلو استخباراتي عملیاتو په ترڅ کې داسې حال کې نیول شوی و، چې ''د صیهونیستی رژیم له اطلاعاتي سروس سره یې لا هم اړیکي درلودل.''
په اسرائیل کې د بېړنیو خدمتونو څانګې مشر ماګین ډېوېډ اډوم وايي، د ایران توغندیزو بریدونو له کبله یو بل ټپي شوی سړی وژل شوی دی.
له دې سره د تېرې شپې بریدونو کې د وژل شویو کسانو شمېر پینځو ته ورسېد.
له دې مخکې زموږ په رپوټ کې د یادې ادارې مسوولینو له قوله ویل شوي و، دوې ښځې اودوه سړي چې عمرونه یې د ۷۰کلنۍ په شاوخوا کې وو، دې بریدونو کې وژل شوي.
د بېړنیو مرستو اداره وايي، ۸۷ ټپيان یې روغتونونو ته لېږدولي، چې په وینا یې یوه ۳۰ کلنه ښځه سخته ټپي حالت کې روغتون ته لېږدول شوي، پنځه کسان په اوسط حالت کې ټپیان دي او ۸۱ برسېرن ټپيان شوي دي.
دا مهال په اسرائیل کې د سهار نژدې ۸:۰۰ بجې او په تهران کې د سهار نژدې ۸:۳۰ بجې دي.
که همدا اوس له موږ سره یو ځای شوي یاست دلته لولئ، چې په تېرو څو ساعتونو کې څه پېښ شوي.
د اسرائیل دولتي رسنۍ کان په رپوټ کې ویل شوي، د ایران له تازه بریدونو وروسته د اسرائیل په ساحلي ښار حیفا کې یو شمېر کسان ټپیان شوي دي.
په رپوټ کې دغه راز ویل شوي، چې په هغه ځای کې اور لګېدنه هم لیدل شوې، چې برید پرې شوی.
د ایران له تازه برید وروسته په حیفا کې چې له پلازمېنې تل ابیب ۹۰ کیلومتره لېرې دی، مرستندویه کارکوونکو ویلي، ''څو داسې ځایونو'' ته یې مرستندویان استولي، چې ''ګوزارونه پرې لګېدلي دي.''
په امریکا کې د بي بي سي همکارې رسنۍ سي بي اېس نیوز ته دریو سرچینو ویلي، ولسمشر ډونلډ ټرمپ د ایران مذهبي مشر ایت الله علي خامنه يي وژنې په تړاو د اسرائیل لومړي وزیر بنیامن نتنیاهو پلان رد کړی دی.
د سرچینې په وینا په هغو خبرو کې چې د رپوټونو له مخې د جمعې پر ورځ پر ایران د اسرائیل له برید وروسته د دواړو مشرانو تر منځ شوې، ټرمپ نتنیاهو ته ویلي، چې د خامنه يي وژنه ښه طرح نه ده. ټرمپ د دې رپوټ په هکله په عام محضر کې څه نه دي ویلي.
له فوکس نیوز سره خبرو کې بیا نتنیاهو مستقیماً هغه رپوټ نه رد کړ او نه یې هم تائید کړ، چې ټرمپ د ایت الله وژنې پلان وېټو کړی.
د اسرائیل لومړي وزیر په دې هکله وویل: "داسې ډېر جعلي رپوټونه د داسې خبرو په هکله شته، چې له سره شوې نه دي، خو زه نه غواړم دې (موضوع) ته ورشم. زه کولای شم درته ووایم، چې موږ هغه څه کوو، چې باید یې وکړو. موږ به هغه څه وکړو، چې اړتیا ورته لرو او زه فکر کوم امریکا متحده ایالتونه پوهېږي چې د امریکا متحدو ایالتونو لپاره څه ښه دي او زه نه غواړم دې (موضوع) ته لاړ شم.''
په دې هکله د بي بي سي بشپړ رپوټ دلته لوستلای شئ.
رویټرز خبري اژانس په یوه رپوټ کې ویلي، ایران قطر او عمان ته ویلي، تر څو چې د اسرائیلو تر بریدونو لاندې وي، د اوربند په خبرو کې به ګډون و نه کړي.
رویټرز د خپلې سرچینې له یادولو پرته د همدې سرچینې له قوله وايي: ''ایرانیانو قطري او عماني منځګړو ته ویلي، یوازې هغه مهال به جدي مذاکراتو ته ځي، چې ایران د اسرائیلي بریدونو ته خپل خپل ځواب ورکړی وي.''
په داسې حال کې چې اسرائیل او ایران پر یوه بل تازه بریدونه کړي، په تېرو څو ساعتونو کې یو شمېر مهمې پېښې شوې. دلته یې یو غورچاڼ وړاندې کېږي:
په اسرائیل کې
په ایران کې
په نوره نړۍ کې
ایراني چارواکو په رسمي توګه ومنله چې د سپاه د استخباراتو مشر محمد کاظمي او درې مرستیالان یې د اسرائیلو په برید کې وژل شوي دي.
د ایران د حکومت بیان کې راغلي، محمد کاظمي، حسن محقق او محسن باقري وژل شوي دي.
پر اسرائیلو د ایران له وروستیو بریدونو لږ مخکې، د ایران ولسمشر مسعود پزشکیان خبرداری ورکړ چې که چیرې د اسرائیلو بریدونه دوام ومومي، د "سخت او ډېر سخت" ځواب تمه دې ولري.
د عراق له لومړي وزیر سره په تلیفوني خبرو، هغه وویل چې که بریدونه دوام وکړي نو د سیمې نور هېوادونه هم له خطر سره مخ کیدلی شي، او له اسلامي هېوادونو یې د "ټینګ دریځ" غوښتنه وکړه.
هغه وویل چې ایران شخړه پیل نه کړه بلکې "سخت" ځواب یې ورکړ.
له امریکایۍ رسنۍ فاکس نیوز سره په مرکه کې، اسرائیلو له لومړي وزیر بنیامین نتنیاهو پوښتنه وشوه چې ایا په ایران کې د رژیم بدلون د اسرائیلو د هڅو یوه برخه ده؟
"هغه وویل دا یقیني پایله کیدلی شي، ځکه چې د ایران رژیم ډیر کمزوری دی،"
نتنیاهو ادعا کوي چې اوسنی ایراني رژیم "ولسي ملاتړ نه لري" او وايي چې ۸۰٪ خلک" غواړي چې دغه رژیم وپرځي."
هغه دا هم وايي، "د ایران خلک او یهودان لرغونې ملګرتیا لري" او زیاتوي، "دې وخت کې راپورته کیدل د ایرانيانو پریکړه ده.
د ایران ولسمشر مسعود پزشکیان ویلی که اسرائیل بریدونه روان وساتي له لا ډېر سخت ځواب سره به مخ شي.
د عراق لومړي وزیر محمد شیعه السوداني وايي چې هغه په بغداد کې د اروپايي ټولنې سفیر ته ویلي چې پر ایران د اسرائیلو بریدونه 'په عراق او سیمه کې د امنیت او ثبات لپاره مستقیم ګواښ' دی او موخه یې د ډیپلوماټیکو هڅو مخه نیول دي.
د فرانسې د بهرنیو چارو وزیر ژان نول بارو ویلي دي چې د ایران اټومي پروګرام د اسرائیلو او اروپا لپاره یو امنیتي او 'ګواښ' دی.
د جرمني چانسلر فریدریش میرز وايي چې تهران باید 'سمدلاسه په اسرائیلو کې د ملکي اهدافو په نښه کول ودروي'. هغه زیاته کړه چې جرمني د دې احتمال لپاره چمتووالی نیسي چې ایران ښايي په جرمني کې اسرائیلي یا یهودي ځایونه په نښه کړي.
د ترکیې د بهرنیو چارو وزیر هاکان فیدان خپل روسي سیال ته په ټلیفوني خبرو کې وویل چې یوازې ډیپلوماسي کولی شي 'دا اندېښمنونکې' شخړه حل کړي.
خپرو شویو انځورونو کې لیدل کېږي چې تهران کې د عدلیې وزارت له ودانۍ لوګي او لوخړې پورته کېږي.
رپوټونو کې ویل شوي چې پر دغه ودانۍ ښايي اسرائیلو هوايي برید کړی وي.
د ایران د عدليې وزارت د تهران په ولیعصر سیمه کې دی.
د بي بي سي یوه خبریاله وايي، زه له هغو ایرانیانو د هغوی د وضعیت په اړه اورم چې د اسرائیل دفاعي ځواکونو لخوا ورته امر شوی له تهرانه ووځي.
کله چې ما دوی ته د اسرائیلي ځواکونو هغه خبرداری واستاوه چې له ټولو ایرانیانو یې غوښتي پوځي ځایونو ته نږدې سیمې پرېږدي د یو کس غبرګون چې زه يې پېژنم داسې و"هو، له بده مرغه ما دا هر څه واردمخه لیدلي."
"موږ څنګه پوه شو چې پوځي ځای چېرې دی او چېرې نه؟" په هغو خلکو کې چې ما ورسره خبرې وکړې تر ټولو ډېر اندېښمن یې د تهران وګړي وو.
یو بل ایراني کس راته وویل "زه نشم کولی له تهرانه ووځم. نشم کولی خپل زاړه مور او پلار په داسې حال کې پرېږدم چې اوږد سفر نشي کولی. نشم کولی ښار پرېږدم. پر دې سربېره اړه یم دندې ته هم لاړ شم. اوس څه وکړم؟"
ایران په رسمي ډول سوداګرۍ نه دي تړلي، که څه هم چارواکو یې په پرله پسې ډول ویلي چې هېواد یې په جګړه کې دی.
د خواله رسنیو حکومت پلوه کاروونکو پر انلاین د اسرائیلو خبرداری یو "چل" بللی.
ځینو یې یوه داسې نا رسمي لیکنه خپره کړې چې د اسرائیلو دفاعي پوځ د خبرداري له بڼې سره ورته والی لري. دغه لیکنه په عبراني ژبه لیکل شوې او خلکو ته وايي چې د "خپل ژوند ژغورلو لپاره" "اشغال شوې سیمې" پرېږدي.
اسرائیلی پوځ وايي له ایران سره یې د جګړې پردرېیمه ورځ د شپې لخوا د دوی لسګونو جنګي جېټ الوتکو تهران کې لږترلږه ۸۰ ځایونه په نښه کړي دۍ.
په دې کې د ایران د دفاع وزارت مرکزي دفتر، د پوځ څېړنې او پراختیا څانګه او داسې نور ځایونه هم شامل وو چې د ایران رژیم په کې خپلې اټومي وسلې ساتلې وې.
د رویټرز خبري اژانس د یوه راپور له مخې په نښه شویو ځایونو کې د تېلو د مرکزونو په ګډون داسې ځایونه هم شته چې هم د پوځي او هم د اټومي عملیاتو لپاره کارول کېدل.
د اسراییلو دفاعي ځواک وايي د "راپورته شوي زمري" عملیاتو د یوې برخې په توګه یې په تېرو درو ورځو کې یې ۱۷۰ ځایونه ویشتلي او ۷۲۰ پوځي تاسیسات په نښه کړي دي.
ببرک احساس، اسلام کلا
زه د افغانستان په لویدیځ کې د ایران او افغانستان تر منځ په بندري ښار اسلام کلا کې یم او له همدې لارې له ایرانه د تیلو صادرات روان دي.
پر دغه پوله مې ولیدل چې د ایران له لوري په توکو او تیلو بار ګڼې لارۍ د هرات اسلام کلا ته واوښتې. پرون شنبه ځینو سیمه ییزو طالب چارواکو راته ویلي وو چې له ایرانه د نفتي مواد واردات ځنډېلي وو.
خو په عین حال کې، په هرات کې د سوداګرۍ خونې چارواکو بي بيسي ته ویلي، د اسرائیلو له برید وروسته په ایران کې پر نفتو مواد د لاریو تازه بارول ځنډېدلي دي.
د دغو چارواکو په وینا، افغانستان ته هغه لارۍ روانې دي چې له وړاندې په ایران کې بار شوې وې.
افغانستان د هغو هېوادونو په منځ کې څلورم ځای لري چې ایران ورته تر ټولو ډېر خوراکي او نور توکي صادروي. د ۲۰۲۴ کال په لومړیو لسو میاشتو کې، ایران افغانستان ته د نژدې ۲ میلیارده ډالرو په اندازه خوراکي توکي صادر کړي وو.
د دې ترڅنګ میلیونونه افغان کډوال هم له لسیزو راهیسې په ایران کې اوسېږي او په دغه هېواد کې هر ډول کړکېچ هلته پر افغان کډوالو تاثیر کولای شي.
د اسرئیلو یوه پوځي ویاند افیخای ادرعی پر خواله رسنیو ایرانیانو ته خبرداری ورکړی، له هغو سیمو دې ووځي چې اټومي تاسیسات په کې دي، او یا هم د وسلو جوړولو مرکزونه لري.
ادرعي په فارسي ژبه لیکلي: "ستاسو د خپل امنیت لپاره، له تاسو غواړم چې هر څه ژر، له دغو سیمو ووځئ او تر بلې خبرتیا ورستانه نشئ."
د اسرائیلو دا ډول خبرداري، د فلسطینیانو او لبنانیانو لپاره بېخي اشنا خبرې دي.
پر غزه د اسرائیلو د بریدونو او د لبنان سویل کې د اسرائيلو د عملیاتو لومړنۍ نښې له دا ډول خبرداریو د افیخای ادرعی له ایکس پاڼې چې ۸۰۰ زره فالورز لري راپورته شوې.
د پوځ دا ویاند په عربي ژبه روانې خبرې کوي او د غزې او لبنان جګړو د عربو په منځ کې خورا مشهور کړ.
پر ده ځینې، د چلند له امله یې سختې نیوکې هم کوي او ځینې پرې ملنډې هم وهي.
ځيني فلسطینیان ورته د" شیخ ادرعي" نوم هم اخلي.
که د ایران او اسرائیلو کړکېچ دوام وکړي، ښاييٍ ایرانیان د دې سړي له څېرې سره لا نور اشنا شي، هغسې چې په خپل لومړني ایکس پوسټ کې یې فارسي لیکلې، او هڅه کوي ځان د ایرانیانو په ژبه هغوی ته مخاطب وښيي او د خپل پوځ پیغام ورسوي.
زه د اسرائیلو په بات یام ښار کې یم، چیرې چې څو ساعته وړاندې د ایران د توغندیو له امله د یوې لس پوړیزې ودانۍ یوه څنډه ولګېد. لږترلږه شپږ کسان ووژل شول، او شاوخوا اوه نور لا هم ویجاړیو کې بند پاتې دي.
د دوی د ایستلو لپاره ژغورونکې ډلې په کار بوختې دي
د ودانۍ یوه برخه ټوله ویجاړه شوې، فلزي چوکاټونه او مات شوی کانکریټ یې لیدل کېږي.
ودانۍ ته نژدې ګڼ خبریالان له پولیسو سره په خبرو بوخت دي چې د پېښې په اړه ترې نور معلومات واخلي.
د سړک بل غاړه کې هم د ودانیو ښېښې ماتې شوي دي.
پر اسرائیلو د ایران بریدونو کې دا یې تر ټولو ویجاړونکی بلل کېږي.
ایران کې بیا چې اسرئیل پرې پرلپسې هوايي ګزارونه کوي د مرګ ژوبلې شمېر خورا لوړ ښودل کېږي.
د جرمني د بهرنیو چارو وزیر یوهان وادفول وايي، جرمني، فرانسه او بریتانیا تیار دي په منځني ختیځ کې د کړکېچ کمولو لپاره په بیړني ډول له ایران سره د اټومي پرواګرام په اړه خبرې وکړي.
هغه وویل " د دې خبرو اصلي شرط د کړکېچ کرارول دي، دا چې ایران باید د سیمې او اسرائیلو او همدا ډول د اروپا لپاره په ګواښ بدل نه شي."
د جرمني د بهرنیو چارو وزیر وايي، تهران د رغنده خبرو فرصت له لاسه ورکړی خو بیا هم جرمني د اسرائیلو او ایران ترمنځ کړکېچ کمولو کې ونډې ته چمتو ده.
هغه د شنبې پر شپه د جرمني ټلویزون ته وویل " هیله لرم چې دا فرصت به اوس هم وي. جرمني، فرانسه او بریتانیا تیار دي. موږ د ایران د اټومي پروګرام په تړاو د خبرو لپاره وړاندیز کړی دی. هیله لرو دا وړاندیز به ومنل شي."
د بي بي سي د ديپلوماتیکو چارو خبریال جېمز لنډېل هغو سناریوګانو ته نظر کړی چې دا جګړه ویروونکي لوري ته وړلی شي.
لومړۍ سناریو د امریکا د ښکېلېدو یادوي. دی باوري دی چې که څه هم امریکا منکره ده خو ایران پوهېږي چې امریکايي ځواکونه د اسرائیلو د بریدونو تکتيکي ملاتړ کوي.
دا ښايي د دې لامل شي چې ایران په منځني ختیځ او خلیج کې د امریکا پر پوځي اډو یا ديپلوماتیکو موخو برید وکړي.
که څه هم د ایران نیابتي ډلې لکه حماس او حزب الله ځپل شوي دي خو په عراق کې وسلهوالې ډلې سلامتې پاتې دي.
یا دا چې د خلیج هېوادونه راښکېل شي. که ایران د اسرائیلو پوځ او نورو موخو ته زیان ونه رسولی شي ایران ښايي په خلیج کې آسانه موخې په نښه کړي؛ هغه ځایونه چې په تېرو کلونو کې يې له امریکا سره مرسته کړې یا هلته د امریکا هوايي اډې چې مهمې بلل کېږي.
که دا کار وکړي، امریکايي جنګي الوتکې به اړ وي چې دفاع ته يې ور ووځي.
اسرائیل که د ایران د اتومي وړتیا له منځه وړلو کې پاتې راشي. دا هم شونې ده چې د اسرائیلو بریدونه د دې لامل شي چې ایران د نورو بریدونو د وېرولو لپاره له اوسنیو شپېته سلنه بډایه شوو یورانیمو چې فکر کېږي له منځه نه دي تللي په بیړه د بم جوړولو هڅه وکړي.
لنډېل په خپل تحلیل کې دا هم وايي چې د تېلو بیې په نړیواله کچه وار د مخه پورته شوې چې اوس د تېلو او نورو توکو د بیو له لوړوالي یوازې د روسیې ولسمشر پوتین ګټه وړي. یا دا چې د ایران رژیم سقوط کوي او تشه رامنځته کېږي.
که اسرائیل په اوږدمهال هدف کې بریالی کېږي او د ایران انقلابي رژیم پرځوي نو څه به کېږي؟ یوه داسې پوښتنه چې ځواب یې ډېرو ته روښانه نه دی.
اسرائیلو کې حکومتي سرچینو ویلي، تېره شپه د ایران په توغندیزو بریدونو کې لږ تر لږه لس کسان وژ شوي دي.
مرګ ژوبله تر ډېره په تل ابیب کې ده.
د بېړنیو خدمتونو اداره هغو اووه کسانو پسې لټون کوي چې ویجاړیو کې بند پاتې دي.