اسرائیل: د لبنان سویل کې هوايي بریدونو دوام مومي، بیروت کې پکې ۶ کسان وژل شوي

ژوندی پوښښ

1. ۹ تله ۱۴۰۳ - ۳۰ سپتمبر ۲۰۲۴امریکا وايي، اسرائيلو ورته ویلي چې په لبنان کې د محدود ځمکني بريد پلان لري

   یو امریکایی چارواکی وایی اسرائیلو امریکا ته په لبنان کې د محدودو ځمکنیو عملیاتو د پلان په اړه خبر ورکړی چې په وينا يې ښايي د دوشنبې په ورځ پیل شی.

   بل پلو د امریکا پلازمېنه واشنګټن ډي سي کې د يوې خبرې غونډې پر مهال د امريکا له ولسمشر جوبايډن پوښتنه وشوه چې ايا په لبنان کې د اسرائيلو د محدود ځمکني يرغل له پلانه خبر دی؟ ښاغلي بايډن په ځواب کې وويل، "زه ستاسو پرتله ډېر خبر یم او زه به يې په درولو راحت شم. موږ سملاسي اوربند ته اړتيا لرو."

   د امريکا د بهرنيو چارو وزارت وياند متيو مېلر ويلي چې امریکا د ترهګرۍ په وړاندې د اسرائیلو د دفاع له حق ملاتړ کوي خو وايي د منځني ختيځ کړکېچ "ډيپلوماتيک حل" غواړي.

   متيو مېلر هم په لبنان کې د اسرئيلو د محدودو ځمکنيو عملياتو په اړه وپوښتل شو، نوموړي وويل، په دې اړه له اسرائيلو سره "خبرې اترې" روانې دي. ده تائيد کړه چې اسرائيلو د لبنان پولې ته څېرمه د "محدودو عملياتو" په اړه امریکا ته خبر ورکړی و.

   په همدې حال د حزب الله د پوځي برخې مرستیال وايي، د اسرائیلو ځمکنیو عملیاتو ته چمتو دي. بل پلو په يمن کې حوثي ياغيان وايي د اسرائيلو د بريدونو پر وړاندې به پوځي عمليات ډېر کړي.

   په لبنان کې چارواکي وايي، په تېرو دوو اوونیو کې تر ۱۰۰۰ ډېر کسان وژل شوي او نژدې یو میلیون بې کوره شوي دي.

2. ۹ تله ۱۴۰۳ - ۳۰ سپتمبر ۲۰۲۴په لبنان کې څه تېرېږي؟

   د حزب الله مشرتابه ژمنه کړې ده چې د اسرایل پر وړاندې به خپلې جګړې ته دوام ورکوي. دا له هغې راهېسې چې مشر یې، حسن نصرالله د اسرایلو په هوايي برید کې ووژل شو، د دې ډلې لومړی ټلویزیوني پیغام دی. د حزب الله مرستیال مشر نعیم قاسم ویلي ډېر ژر به خپل نوی مشر وټاکي. دا پیغام داسې مهال خپرېږي چې اسرایلي پوځ دغې سیمې کې خپلو بریدونو ته زور ورکړی دی. د بي بي سي د نړیوالو چارو مشره خبریاله اورلا ګارېن د لبنان له بېکا درې دا رپوټ لري خو پام مو وي چې ځیني برخې یې ښايي خواشینونکي وي.

3. ۹ تله ۱۴۰۳ - ۳۰ سپتمبر ۲۰۲۴"لبنان کې د اسرائيلو بريدونو يو ميليون خلک بېځايه کړي"

   په لبنان کې د حزب الله د غړو د مخابراتي وسيلو او پېجرونو له چاودنو نژدې يوه اوونۍ وروسته د لبنان لومړی وزير نجيب ميقاتي وايي، د اسرائيلو د بريدونو له وېرې له سرحدي سیمو نژدې يو ميلیون لبنانيان بېځايه شوي او د پلازمېنې بېروت په ګډون د هېواد نورو سيمو ته کوچېدلي دي.

   ښاغلي ميقاتي د يکشنبې په ورځ (۲۹ سپټمبر) دا د خپل هېواد په تاریخ کې د وګړو "تر ټولو لویه بېځايه" کېدنه وبلله.

   په همدې مهال د لبنان د روغتيا وزارت د يکشبنې په ورځ د اسرائيلو په هوايي بريدونو کې د ۵۰ نورو کسانو وژل کېدل تائيد کړي دي.

   بشپړ رپوټ یې دلته لوستلی شئ

4. ۹ تله ۱۴۰۳ - ۳۰ سپتمبر ۲۰۲۴وروستی, ایرانیانو ته د نتنیاهو خطاب

   په یوه ویډیويي پیغام کې د اسرائیلو لومړي وزیر بنیامین نتنیاهو په مستقیم ډول د ایران خلکو ته خطاب کې ویلي: "پوهېږم چې تاسو د حماس او حزب‌الله د قاتلانو او جنسي تېريګرو ملاتړ نه کوئ، بلکې ستاسو مشران یې کوي."

   نتنیاهو دا هم ویلي چې د ایران مشران هره ورځ د لبنان او غزې د دفاع په اړه "سکروټې غوندې خبرې" کوي او همدغه مشران "تاسو ځپي".

   د اسرائیلو لومړي وزیر د ایران خلکو ته خطاب کې ویلي چې حکومت "ستاسو پروا نه لري، که نه نو په منځني ختیځ کې به په بې‌معنی جګړو کې د میلیاردونو ډالرو ضایع کېدو مخه نیول شوې وای او ستاسو د ژوند د ښه کولو لپاره به یې ګامونه پورته کړي وای."

   ښاغلي نتنیاهو د ایران حکومت تورن کړ چې سیمه د "جګړې او تیارو ژورو" ته ورټېل وهي او خبرداری یې ورکړ چې "په منځني‌ختیځ کې داسې ځای نشته چې اسرائیل ورته ونه رسېږي" او زیاته یې کړه چې هغه به د خپل هېواد او اسرائیلو وګړو د ساتنې لپاره هېڅ شی نه درېغ نه کړي.

   هغه د ایران له خلکو سره ژمنه وکړه: "کله چې ایران ازاد شي او د هغه پرتله به دا وخت ژر راشي‌ چې خلک یې په اړه فکر کوي ... ایران او اسرائیل به په سوله کې وي ... او ایران به تر بل هر وخت وده وکړي."

5. ۹ تله ۱۴۰۳ - ۳۰ سپتمبر ۲۰۲۴د لبنان عامې روغتیا وزارت چارواکي وايي، په عین سیمه کې د یکشنبې ورځې وژل شویو کسانو شمېر ۴۵ تنو ته لوړ شوی

   همدا اوس مو د لبنان عامې روغتیا وزارت له چارواکو تازه معلومات ترلاسه کړل، چې وايي، پر عین الدیلب سیمه کې پرون د اسرائیلي ځواکونو هوايي بمبارۍ له کبله د وژل شویو کسانو شمېر ۴۵ تنو ته لوړ شوی دی.

   د لبنان پر دې سویلي ښارګوټي له پرون ماسپښین بمبارۍ وروسته په لومړي سر کې ویل شوي وو، چې ۳۲ کسان پکې وژل شوي او لسګونه نور ټپیان دي.

   له دې مخکې د لبنان عامې روغتیا وزارت مسوولینو ویلي و، چې پر یکشنبه په ټول هېواد کې د بمباریو له کبله ۱۰۵ کسان وژل شوي وو.

6. ۹ تله ۱۴۰۳ - ۳۰ سپتمبر ۲۰۲۴یو څه چې اسرائیل غواړي حزب الله پرې فکر وکړي، دا دي چې ځمکنی برید کېدونکی دی, پاول اډمز- د بي بي سي دیپلوماتیکو چارو خبریال

   له څو ورځو راهیسې داسې نښې، نښانې تر سترګو کېږي.

   اسرائیلي ټانکونه د لبنان پولې ته څېرمه یو ځای کېږي. احتیاط پوځیان دندې ته غوښتل شوي دي (که څه هم شمېر یې لږ دی) او د اسرائیل تر ټولو لوړپوړي جنرال خپلو پوځیانو ته ویلي، چې د حزب الله په کلکو سنګرونو کې دننه فعالیت ته چمتو واوسي.

   د اسرائیلي پوځ د شمالي قوماندې مرکز مشر په هکله ویل کېږي، چې په لبنان کې د یوې حایلې سیمې یا بفرزون د رامنځته کولو پلویتوب کوي، چې حزب الله وسله وال او سنګرونه یې له پولې لېرې شي، چې نژدې یو کال مخکې له دې سیمې بې ځایه شوي خلک کورونو ته ستانه شي.

   همدا نن ګهیځ د اسرائیل دفاع وزیر یواف ګالانت په شمال کې خپلو پوځیانو ته وینا کې وویل، ''د هوا، ځمکې او سمندر له لارې به خپله ټوله وړتیا وکاروو، چې دا هدف ترلاسه کړو.''

   بل لور د وال سټریټ ژورنال په رپوټ کې ویل شوي، چې د ځانګړو اسرائیلي ځواکونو کوچنۍ ډلګۍ ښايي له څو میاشتو راهیسې د پولې بل لور ته عملیات کوي او یا چاپې وهي.

   له څه مودې راهیسې دغسې ګنګوسي شته. دغه راز د الجزیره په رپوټ کې ویل شوي، اسرائیلي ځواکونو په عباسیه، هاروف او بیداس سیمو کې هم چاپې وهلې، چې د اسرائیل او لبنان له پولې ښه لېرې په سویلي لبنان کې پرتې سیمې دي.

   خو تر اوسه پورې اسرائیلي ټانکونه یا زغره وال ګاډي د پولې بل لور ته نه دي اوښتي.

   هغه چاپې چې د الجزیره په رپوټ کې یې یادونه شوې، ښايي د چورلکو له لارې ترسره شوې وي. خو یو څه چې څرګند دي، هغه دا چې اسرائیل غواړي حزب الله فکر وکړي، چې ځمکنی برید راروان دی.

7. ۹ تله ۱۴۰۳ - ۳۰ سپتمبر ۲۰۲۴د اسرائیل دفاع وزیر وايي، ''موږ به د هوا، ځمکې او سمندر له لارې ټول ځواک وکاروو''

   د اسرائیل دفاع وزیر له لبنان پولې سره نژدې په یوه لیدنه کې خپلو ځواکونو ته ویلي، ''هر څه یې چې له وسه کېږي'' دوی به د اسرائیل له شمالي سیمو بې ځایه شوي خلک بېرته خپلو کورونو ته ستنوي.

   یواف ګالانت خپلو ځواکونو ته وویل، ''د (حزب الله مشر) نصرالله وژنه ډېر مهم ګام دی'' خو په خبره ''همدا هر څه نه دي.''

   په یوه لنډه ویډیو کې نوموړی اورېدل کېږي، چې وايي، ''موږ به ټوله وړتیا وکاروو، که د بل لوري څوک نه پوهېږي، چې ټوله وړتیا څه مانا- نو د دې مانا ټوله وړتیا ده.''

   هغه وویل، ''تاسې د دې هڅې برخه یاست. موږ پر تاسې باور لرو، چې هر څه به وکولای شئ.'' نوموړي زیاته کړه، ''هر هڅه چې باید وشي – کېږي به او دا چې موږ به د هوا، ځمکې او سمندر له لارې ټول ځواک وکاروو.''

8. ۹ تله ۱۴۰۳ - ۳۰ سپتمبر ۲۰۲۴د حزب الله مرستیال مشر وايي، د اسرائیل ځمکني برید ته چمتو دي

   د حزب الله مرستیال مشر شیخ نعیم قاسم وايي، دوی به ژر تر ژره خپل نوی مشر وټاکي. شیخ قاسم وايي، د اسرائیل له لوري ځمکني برید ته چمتو دي او اسرائیل ضد جګړې ته به دوام ورکړي.

   د رویټرز خبري اژانس په رپوټ کې د شیخ قاسم له قوله ویل شوي، چې د حزب الله فعالیتونه دوام لري او په وینا یې کېدای شي دا جګړه اوږده شي.

   هغه تر اوسه پورې د خپلې ډلې بریدونه ''لږ تر لږه'' وبلل او نوموړي د خپلو خبرو په پام کې د ''زغم'' غوښتنه وکړه.

9. ۹ تله ۱۴۰۳ - ۳۰ سپتمبر ۲۰۲۴حماس وايي د لبنان مشر یې په هوايي برید کې وژل شوی

   فلسطین کې حماس ډله ویلي، په لبنان کې د دې ډلې مشر فتح شریف ابو الامین د لبنان په جنوب کې د اسرائیلو په یوه هوايي برید کې د کورنۍ له یو شمېر غړو سره وژل شوی دی.

   حماس وايي، ابو الامین د لبنان په جنوب کې د الباس په کمپ کې د هغه پر کور په برید کې وژل شوی دی. د لبنان دولتي خبري اژانس سوېلي تایر ښار ته څېرمه پر کمپ د هوايي برید خبر ورکړی دی.

   حماس ډله په غزه کې مېشته ده، چېرې چې اسرائیل د تېر کال د اکتوبر له اوومې نېټې وروسته ورسره جګړه کوي، خو دوی په لبنان کې هم شتون لري.

   حماس او حزب الله دواړه هغه ډلې دي چې د ایران ملاتړ له ځان سره لري.

   بل پلو رپوټونه وايي چې په بېروت کې له ودانیو لوګي پورته کېږي.

   بي بي سي د بېروت په سوېلي ښارګوټو کې د اسرائیلو د بریدونو رپوټونه ترلاسه کړي دي.

   د رویټرز خبري اژانس د راپور له مخې عیني شاهدانو ویلي چې هلته له ودانیو لوګي پورته کېدل. د اسرائیلو پوځ تر اوسه د دغه برید په اړه څه نه دي ویلي.

   د بي بي سي خبریال جرمي بوینز وايي د حزب الله مشر حسن نصرالله تر وژل کېدو وروسته په اسرائیلو کې خوښۍ لمانځل کېږي او له دوی سره داسې احساس دی چې یوه ستره بریا یې ترلاسه کړې ده، دوی اوس فرصت لري چې شیان بدل کړي. خو اوس هم د اسرائیلو په شمال کې ۶۰ زره کسان د خپلو مېنو پرېښودو ته اړ شوي دي.

   حزب الله اوس هم توغندي توغوي، که څه هم دوی د اسرائیلو اهدافو ته لوی زیان نه رسوي، خو خلک نه شي کولای بېرته خپلو کورونو ته ستانه شي.

   اوس پوښتنه دا ده چې د اسرائیلو بل ګام به څه وي، یو احتمال د لبنان په سوېل کې ځمکنی برید دی او دا احتمال خورا زیات هم بلل کېږي.

10. ۹ تله ۱۴۰۳ - ۳۰ سپتمبر ۲۰۲۴وروستی, د اسرائيلو پوځ وايي تېره شپه يې د حزب الله پر موخو لسګونه بريدونه کړي دي

    د اسرائيلو پوځ وايي، تېره شپه يې د لبنان په ختيځ بيکا سيمه کې هوايي بريدونه کړي دي.

    د اسرائيلو دفاعي ځواکونه وايي، په بريدونو کې توغندي او هغه ودانۍ په نښه شوې چې حزب الله ډلې ترې د وسله ساتلو لپاره کار اخيست.

    دوی وايي د هېواد په جنوبي برخو کې يې هم پر هغو ودانيو بريدونه کړي چې حزب الله ډلې کارولې.

11. ۹ تله ۱۴۰۳ - ۳۰ سپتمبر ۲۰۲۴لبنان وايي د اسرائيلو بريدونه کې د يکشنبې په ورځ لږ تر لږه ۱۰۵ تنه وژل شوي

    لبناني چارواکي وايي، د یکشنبې په ورځ د اسرائیلو په بریدونو کې لږ تر لږه ۱۰۵ کسان وژل شوي او ۳۵۹ نور ټپیان شوي دي.

    د لبنان لومړي وزیر د یکشنبې په ورځ وویل، د روانې جګړې له امله ښايي شاوخوا يو ميليون کسان لا له وړاندې د خپلو کورونو پرېښودو ته اړ کړي وي.

    د تېرې شپې په اوږدو کې د پلازمېنې بيروت په زړه کې يوه ودانۍ په نښه شوې ده.

12. ۸ تله ۱۴۰۳ - ۲۹ سپتمبر ۲۰۲۴وروستی, سعودي له لبنان او د دغه هېواد له ځمکنۍ بشپړتیا ملاتړ کړی

    سعودي په یوه بیان کې چې د یکشنبې په ورځ ناوخته خپور شوی له لبنان د خپل بشپړ ملاتړ ترڅنګ د دغه هېواد د خپلواکۍ او ځمکنۍ بشپړتیا د ساتنې غوښتنه کړې ده.

    د سعودي د بهرنیو چارو وزارت ویلي، په لبنان کې په "ژورې اندېښنې سره" وروستۍ پر مختياوې تعقیبوي.

    د سعودي د بهرنیو چارو وزارت په بیان کې د حزب الله د مشر حسن نصرالله د وژل کېدو یادونه نه ده شوې.

    سعودی په دغه بيانيه کې له نړیوالې ټولنې غوښتي چې په سیمه کې د امنیت د ټینګښت او د دغو شخړو له کبله د بشري پايلو د کمولو لپاره په ګډه کار وکړی.

13. ۸ تله ۱۴۰۳ - ۲۹ سپتمبر ۲۰۲۴وروستی, د سوریې په ختیځ کې د ایران ملاتړې ملېشې وژل شوې

    د سوریې رسنیو خبر ورکړی، چې د سوریې په ختیځ دیرالزور ولایت کې د امریکا د جنګي الوتکو په بریدونو کې لږ تر لږه د ایران له ملاتړ برخمن ۱۵ اورپکي وژل شوي او شاوخوا ۲۰ نور ټپیان دي.

    د سوریې د بشري حقونو د څار ډلې هم ویلي، چې دغو بریدونو په الحری کلي کې د سپاه پاسداران یوه کمپلکس او په الحزم کلي کې د وسلو دوه ګودامونه په نښه کړي دي.

    د بشري حقونو د څار دغې ډلې دا هم ویلي، چې په دغو بریدونو کې د السویه په کلي کې د وسلو یو ګودام هم په نښه شوی دی.

14. ۸ تله ۱۴۰۳ - ۲۹ سپتمبر ۲۰۲۴وروستی, د یمن بندر کې لویه چاودنه

    پر خواله رسنیو ګڼ انځورونه او وېډیوګانې خپرې شوې چې ویل کېږي د یمن پر حدیده بندر د اسرائیلو برید پکې ښودل کېږي.

    بي‌بي‌سي د دې وېډیو په تاییدولو وتوانېده چې په بندر کې لویه چاودنه پکې رامنځ ته کېږي.

15. ۸ تله ۱۴۰۳ - ۲۹ سپتمبر ۲۰۲۴وروستی, پاکستان کې د حزب الله ملاتړي لاریونیان له پولیس سره لاس او ګرېوان شوي

    د پاکستان کراچۍ ښار کې هغه لاریونیان له پولیسو سره لاس او ګرېوان شوي، چې د لبنان حزب الله ملاتړ لپاره یې احتجاج کاوه.

    د یادونې ده، چې پر یکشنبه د پاکستان مجلس وحدت المسلمین ګوند (ایم ډبلیو ایم) او یو شمېر نورو ډلو د کراچۍ له نمائش څلور لارې د امریکا متحدو ایالتونو تر کونسلګرۍ پورې د احتجاجي لاریون کولو اعلان کړی و.

    په هغو ویډیويي کلیپونو کې چې د ایم ډبلیو ایم لخوا رسنیو ته استول شوی، د دې ګوند پلویان په داسې حال کې لیدل کېږي، چې د حزب الله بیرغونه او د اسرائیل په هوايي برید کې د حزب الله وژل شوي مشر حسن نصرالله تصویرونه یې له ځان سره لېږدوي.

    ځايي خبریالان وايي، کله چې لاریونیان د امریکا کونسلګرۍ ته نژدې ورسېدل، پولیسو یې د مخنیوي هڅه وکړه او اوښلن ګاز یې پرې وکاراوه.

    د سند ایالت کورنیو چارو ایالتي اداره وايي، لاریونیانو د ډبرو ګوزارونه کول، ځکه د کورنیو چارو ایالتي وزیر ضیاءالحسن لنجار د اضافي پولیس ځواک غوښتنه کړې. د کورنیو چارو وزارت اعلامیې له مخې د پولیسو افسرانو ته لارښوونه شوې، چې د قانون پلي کېدو، د خلکو سر او مال د خوندیتوب لپاره لازم اقدامات وشي او خبریالان باید وژغورل شي.

16. ۸ تله ۱۴۰۳ - ۲۹ سپتمبر ۲۰۲۴وروستی, اسرائیلو یمن کې د حوثیانو پر اهدافو بریدونه منلي

    اسرائیلي پوځ ویلي چې د یمن دوو سیمو رأس عیسی او حدیده کې یې د حوثیانو پر دوو "پوځي هدفونو" بریدونه کړي.

    د اسرائیلو پوځ وايي "پراخو بریدونو کې یې جنګي الوتکو او جاسوسي الوتکو ګډون درلود چې د حوثي ترهګر رژیم هدفونه په نښه شوي دي."

    اسرائیلي پوځ وايي یمن کې یې هغه زېربناوې او بندرونه په نښه کړي چې ګومان کېږي د ایراني وسلو د لېږد لپاره کارول کېږي.

    سرچینه دا هم وايي دا برید یې د حوثیانو د "وروستیو بریدونو" په غچ کې کړی دی.

    حوثیاننو ویلي یو توغندی یې پر اسرائیلو توغولی و چې تېره جمعه د اسرائیلو مرکز کې ولګېد.‌

    تر اوسه ددغه تازه برید د مرګ ژوبلې او ویجاړۍ په اړه معلومات نه دي ورکړل شوي.

    رویټرز خبري اژانس ویليو د سونتونکو زېرمې په نښه شوې دي. اسرائیلو مخکې هم پر حدیده بندر بریدونه کړي وو.‌

    په حدیده کې د اسرائیلو د برید په غبرګون کې حوثیانو په یوه بیان کې ویلي: "د یمن د ملاتړ جبهه به خپ فعالیت پرېنږدي او د صهیونیستي دوښمن پرضد به زموږ بریدونه ونه درېږي."

17. ۸ تله ۱۴۰۳ - ۲۹ سپتمبر ۲۰۲۴وروستی, حزب‌الله په الشیاح سیمه کې د اسرائیلو برید کې د خپل یوه وتلي قومندان نبیل قاووق وژل کېدل تایید کړل.

18. ۸ تله ۱۴۰۳ - ۲۹ سپتمبر ۲۰۲۴وروستی, اسرائیل وايي د حزب‌الله د مشر ترڅنګ یې ددغه غورځنګ ۲۰ جګپوړي مشران وژلي

    په داسې حال کې چې د لبنان حکومت وايي، په تېره یوه اونۍ کې د اسرائیلو له پرلپسې بریدونو ۸۰،۰۰۰ خلک سوریې ته تښتېدلي، اسرائیل وايي د جمعې په ورځ یې د بیروت سوېل ضاحیه کې د حزب‌الله د مشر حسن نصرالله سربېره د دغه غورځنګ شل جګپوړي مشران وژلي دي.

    د حزب‌الله غورځنګ په وژل شویو مشرانو کې د علي کرکي نوم ډېر یادېږي چې د سوېلي جنګي کرښې مخکښ قومندان و.

    د اسرائیلو پوځ د عربي برخې ویاند افیخای ادرعي پر اېکس لیکلي: "د نصرالله او کرکي ترڅنګ د بیروت سوېل ضاحیه کې تر ځمکې لاندې ودانۍ کې د بېلابېلو رتبو لرونکي څه باندې ۲۰ ترهګر له منځه وړل شوي چې له هغه ځایه یې د اسرائیلي دولت ضد جګړه اداره کوله."

    دی زیاتوي: د حزب‌الله مهمو وژل شویو قومندانانو کې دغه کسان شامل دي:

    • ابراهیم حسین جزیني – د نصرالله د خوندیتابه کنډک قومندان
    • سمیر توفیق دیب – د ترهګرۍ برخه کې څو کاله تجربه لرونکی د نصرالله سلاکار
    • عبدالامیر محمد صبلیني – په حزب‌الله کې د ځواک جوړولو مسؤل
    • علي نایف ایوب – په حزب‌الله کې د اوروژنې د مهارولو د ادارې مشر

    ادرعي وايي "ابراهیم حسین جزیني او سمیر توفیق دیب نصرالله ته ډېر نژدې کسان وو چې د همدې نژدې اړیکې په رڼا کې یې د حزب‌الله د تګلارې د تجربې یو مهم مرکز هم جوړ کړی و".

    دی وايي دوی ته معلومه شوه چې دوی د بیروت او د حزب‌الله مرکزي ادارې ودانۍ ځمکتل کې د ملګرو ملتونو اړوندو ښوونځیو ته نژدې راغونډ شوي وو.‌

19. ۸ تله ۱۴۰۳ - ۲۹ سپتمبر ۲۰۲۴اسرائیل وايي، پر حسن نصرالله د برید په ترڅ کې د حزب الله ۲۰ نور مهم کسان هم وژل شوي دي

    اسرائیل وايي، د حزب الله پر مشر حسن نصرالله د برید په ترڅ کې یې د دې ډلې ۲۰ نور مهم کسان هم وژلي دي. په وژل شویو کسانو کې د علي کرکي نوم هم شامل دی، چې زموږ په مخکیني رپوټ کې یې یادونه شوې.

    اسرائیلي ځواکونه وايي، په همدې برید کې یې د حسن نصرالله د امنیت ډلګۍ مشر ابراهیم حسین جازیني او دغه راز سمیر توفیق دیب هم وژلی، چې د اسرائیلي ځواکونو په خبره ''له اوږدې مودې راهیسې د حسن نصرالله باوري سلاکار و.''

    د اسرائیلي پوځ په وینا د حزب الله مرکز په یوه داسې ودانۍ کې و، چې شاوخوا کې یې د ملکي خلکو ګڼ شمېر ودانۍ وې.

20. ۸ تله ۱۴۰۳ - ۲۹ سپتمبر ۲۰۲۴وروستی, حزب الله د خپل یوه بل قوماندان وژل کېدل تائید کړل

    حزب الله همدا اوس د علي کرکي وژل کېدل تائید کړل، چې د سویلي جبهې لپاره د دې ډلې قوماندان و. د علي کرکي وژل کېدل له هغه وروسته تائید شوي، چې پرون اسرائیلي ځواکونو ویلي و، نوموړی په هغه برید کې وژل شوی، چې د حزب الله مشر حسن نصرالله پکې وژل شوی و.

    خو حزب الله نن یکشنبه د خواله رسنۍ ټیلیګرام له لارې د علي کرکي وژنه تائید کړه.