د امریکا بهرنیو چارو وزیر بېجېنګ ته تللی؛ غواړي چین سره ترینګلي اړیکي ورغوي
د عکس سرچینه، Reuters
د امریکا بهرنیو چارو وزیر انتوني بلېنکن له چیني چارواکو سره لیدو کتو لپاره پر دوه ورځي سفر بېجېنګ ته رسېدلی دی.
دا په تېرو نږدې پنځو کلونو کې چین ته د یوه امریکا دېپلومات لومړنی سفر دی.
امریکايي چارواکو ویلي د دغه سفر او خبرو اصلي هدف دا دی چې د تېرو کلونو پر مهال د ترینګلو شویو اړیکو رغولو ته لارې چارې ولټول شي.
بېجېنګ ته د ښاغلي بلېنکن سفر نږدې پنځه میاشتې مخکې له دې کبله وځنډید چې د امریکا فضايي حریم ته د چین د څارګرو بالونونو د ننوتلو څرک ولګېد.
پر دغه سفر د همدې موضوع سیوری هم غوړېدلی دی.
امریکا و چین دواړو وار له مخه روښانه کړې چې د دغه سفر پر مهال د کوم مهم پرمختګ او سترې لاسته راوړنې هیله نشي کېدای.
واشنګټن وايي تر ټولو ستر هدف دا دی چې د څارګرو بالونونو له قضیې راوروسته ترینګلې شوې اړیکې ورغېږي او د لوړی کچې تماسونو چینل بېرته پرانیستل شي.
د عکس سرچینه، Getty Images
د امریکا لخوا تایوان سره د نږدې اړیکو پاللو هم له چین سره اړیکې اغېزمنې کړې.
بېجېنګ تایوان د خپلې خاورې یوه نه جلا کېدونکې برخه ګڼي او روان کال یې دغه ټاپو ته نږدې پراخ پوځي تمرینونه هم ترسره کړل.
ښاغلی بلېنکن به د دغه سفر پر مهال پر خپل چیني سیال 'چین ګانګ' سربېره د چین د بهرنۍ پالیسۍ له جګپوړي چارواکي 'وانګ يي' سره هم وګوري.
د اوکرایین جګړه، د پرمختللې کمپیوټري ټکنالوژۍ د خپلمنځي سوداګرۍ پر سر لانجې او چین کې بشري حقونه به د بحث نور موارد وي.
تر اوسه مالومه نه ده چې هغه به د چین ولسمشر شي جېنپېګ سره هم وګوري، که څنګه.
چیني چارواکو د ښاغلي بلېنکن دغه سفر ته سوړ غبرګون ښودلی او په دې تړاو یې پوښتنه راپورته کړې چې ایا امریکا واقعآ غواړي چې اړیکې ورغوي.
