مسکو د ترکیې لخوا اوکرایین ته د پوځي بندیانو ورسپارل غندلي

ترکيې اوکرایین ته د هغو پوځیانو په ورستنولو د روسیې غوسه راپارولې چې روسي پوځیانو تېر کال د ماریوپول ښار د پولادو په ازوفستال کارخونه کې نیولي وو.

دغه اوکرايیني پوځیان ترکيې ساتل او د بندیانو د تبادلې په یوه معامله کې یې اوکرایین ته سپارلي دي.

خو کرېملېن ویلي ترکيې او اوکرایین په دغه کار سره د بندیانو د تبادلې د تړون شرایط تر پښو لاندې کړي دي.

د کرېملېن ویاند دیمتري پسکوف وايي ترکيې مسکو ته د بندیانو د تبادلې خبر نه دی ورکړی.

ټاکلې وه ترکيې دغه پوځیان د اوکرایین د جګړې تر پایه ساتلي وی.

د اوکرایین ولسمشر ولودیمير زېلېنسکي له دغو پوځیانو سره اوکرایین ته د دوی به لېږدونکې الوتکه کې ګډ تصویر اخیستی دی.‌

هغه دغه پوځیان اتلان بللي او ویلي يې دي چې اوس د دې وخت و چې دوی بېرته ورستانه شوي وی.

بلخوا د آزوف پوځي کنډک دغو پوځیانو ويلي دوی به بېرته خپلو دندو ته وګرځي.

خلکو هم د دوی تود هرکلی کړی.

د ازوف کنډک جنګیالي تېر کال د اوکرایین د ماریوپول ښار د پولادو کارخانې په تونلونو او سنګرونو کې تر اوږده مقاومت وروسته تسلیم شوي وو.

مسکو تېر اوړی یو شمېر دغه بندي اوکراییني پوځیان د انقرې په منځګړیتوب په دې شرط خوشي کړي وو چې د جګړې تر پایه به په ترکیه کې پاتې کېږي.

د راپورونو له مخې هغه مهال په ماریوپول کې زرګونه کلابند ملکیان هم د روسي پوځیانو لخوا د دغه ښار د درې میاشتنۍ کلابندۍ پر مهال وژل شوي وو.