تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د روسیې برید کې مشهوره اوکرایینۍ لیکواله وژل شوې
د روسي پوځ د یوه توغندي په برید کې چې د اوکرایین ختیځ کراماتورسک ښار د پیزا خرڅولو پر یوه ځای لګېدلی، د اوکرایین یوه مشهوره لیکواله ویکتوریا املینا وژلې ده.
اغلې املینا د جنګي جنایتونو برخه کې څېړنې کولې. دا د سې شنبې ورځې برید کې دیارلسمه قرباني شوې ښځه ده.
۳۷ کلنه ویکتوریا املینا له یوې ډلې کولمبیايي خبریالانو سره ریا لانج رسټورانټ ته تللې وه.
نوموړې د روسي پوځ د توغندي برید کې له ټپي کېدو وروسته د دنیپرو ښار روغتون ته لېږدول شوې خو د ژورو ټپیونو له کبله یې سا ورکړه.
په دې برید کې شپږ کسان ټپیان شوي هم دي.
د بشر حقونو فعالان دا برید جنګي جنایت بولي.
اغلې املینا د اوکرایین په ختیځ کې د جنګي جنایتونو د مستندولو په درشل کې وه.
په پام کې وه چې په "د جګړې او عدالت ورځې او د ښځې او جګړې مشاهده" نامه خپل نوی کتاب ژر په انګلیسي ژبه خپور کړي.
د املینا پر ټوېټر یو پوست خپور او په سر کې ټومبل شوی و چې اوکرایین کې یې د یوې بمبار شوې ودانۍ عکس پکې اېښی و.
هغې له عکس سره لیکلي "دې انځور کې زه یم".
"زه اوکرایینۍ لیکواله یم. د لویو اوکراییني شاعرانو انځورونه مې بکس کې را سره دي. داسې ښکاري چې زه د کتابونو، هنر او زما د کوچني زوی انځورونه باید واخلم. خو د روسیې جنګي جرمونه مستندوم او د بمبارۍ غږ اورم نه د شعري قصیدو. ولې؟"