پاکستان ټولټاکنې؛ د راولپنډۍ کمشنر د رایو پایلو کې د لاسوهنې له ادعا وروسته استعفا وکړه

د پاکستان پلازمېنې اسلام اباد ته څېرمه راولپنډۍ ښار کمشنر لیاقت علي چټه د پاکستان ټولټاکنو کې د لاسوهنې له تورونو وروسته له خپلې دندې استعفا کړې.

نوموړي په راولپنډۍ کرېکټ لوبغالي کې له خبریالانو سره خبرو کې ادعا وکړه، چې د فبرورۍ اتمې په ټاکنو کې د سیمې ځینو کاندیدانو ته پر رایو ټاپې لګول شوې، چې په وینا یې د اویا-اویا زره رایو په توپیر یې ټاکنې بایللې وې.

نوموړي تور پورې کړ، چې د ملي اسامبلۍ لپاره د سیمې ۱۳ کاندیدانو په ترلاسه شویو رایو کې لاسوهنه شوې. کمشنر چټه وايي: او ما چې دومره ستر جرم کړی، زه ځان پولیسو ته سپارم، ما ته باید بشپړه سزا راکړل شي.

د پاکستان ټاکنو کمېسیون بیا په ټولټاکنو کې د لاسوهنې په تړاو د ښاغلي چټه هغه تورونه رد کړي، چې د پاکستان ټاکنو کمېسیون پر مشر یې پورې کړي دي. د ټاکنو کمېسیون په یوه اعلامیه کې ویل شوي، ژر به د دې تورونو په تړاو پلټنه پیل شي.

د پي ټي ای احتجاج

یوې پوښتنې ته په ځواب کې نوموړي وویل: ''ناسمې کړنې څوک کوي او د چا په ویلو یې کوي، دا (خبرې) له هېچا پټې نه دي.''

د پاکستان انګریزي ژبې ورځپاڼې ډان په رپوټ کې د ښاغلي چټه له قوله ویل شوي چې: ''زه له ټولې بیوروکراسۍ غواړم چې د دې سیاستوالو لپاره ناسمې کړنې مه کوئ.''

بل لور د پنجاب اطلاعاتو سرپرست وزیر عامر میر د ښاغلي چټه څرګندونې په سختۍ رد کړې او دا یې یو سیاسي مانور بللی.

له شخصي جیو ټلویزیون سره خبرو کې ښاغلي عامر ادعا کړې، چې ښاغلی چټا د راتلونکې مارچ میاشتې پر ۱۳مه تقاعد کېږي او په وینا یې دی فکر کوي چې ښاغلي چټه په راتلونکي کې د سیاسي فعالیتونو پیلولو لپاره دا ډول څرګندونې کړې دي.

د یادونې ده، چې د پاکستان په پارلماني ټاکنو کې د لاسوهنې او ټګي، برګي د تورونو لګولو او ردولو په لړ کې د راولپنډۍ سیمې د کمشنر تورونه او استعفا تازه پېښه ده. له دې مخکې یو شمېر سیاسي ګوندونو او شخصیتونو هم ورته تورونه پورې کړي او احتجاجونه یې کړي دي.

د مخکیني لومړي وزیر عمران خان تحریک انصاف پاکستان ګوند چې د فبرورۍ پر اتمه یې ټاکنو کې یې تر ټولو ډېرې ۹۲ پارلماني څوکۍ ترلاسه کړې، د درغلیو تورونه پورې کړي او نن (شنبه) یې د نورو سیاسي ګوندونو په ګډون د پاکستان بېلابېلو ښارونو کې د احتجاجي مظاهرو اعلان کړی.

هممهاله د پلازمېنې اسلام اباد پولیسو ویلي، په ښار کې یې د تیارسئ حالت اعلان کړی او د قانون ۱۴۴ مادې له مخې یې په دې ښار کې پر غونډو بندیز لګولی دی.

ځايي پولیس وايي، ښار ته د غځېدلو لویو لارو په اوږدو کې یې تالاشئ زیاتې کړې او د امنیت (سي ټي ډي) ځانګړي ځواکونه ګزمې کوي.

پولیسو له ځايي خلکو غوښتي چې د امنیت په ټینګښت کې ورسره مرسته وکړي، له اړتیا پرته سفر و نه کړي او د اړین سفر پر مهال د پېژندګلوۍ اسناد له ځان سره وساتي.