یوه ځوان خپل ملګري ته واده کې اس ډالۍ کړی

په سعودي عربستان کې یوه ځوان د خپل ملګري واده کې هغه ته یو اس ډالۍ او د واده تالار ته تر پړي نیولی ورسره بېولی چې پر خواله رسنیو دې پېښې ته بېلابېل غبرګونونه ښودل شوي دي.

ددې پېښې وېډیو هم پر خواله رسنیو ډېره لاس په لاس شوې ده.

ځینو د دغه ځوان دا کار ستایلی او نورو بیا ملنډې پرې وهلې دي.

ددغه ځوان د اس ډالۍ زوم او ناوې هم هک پک کړي دي.

یاد ځوان وايي له ملګري سره یې ډېره مینه وه نو ځکه یې اس ورته ډالۍ او د واده تالار ته ورسره بوت.‌

دغه ځوان د واده تالار کې اس تر پړي نیولی او خپل ملګري ته د اس نسب او اصیل نسل بیانوي.

د ډالۍ ورکوونکی ځوان وايي، دا چې له ملګري سره یې ډېره وفاداري ښيي، نو ځکه یې تر اس بله قېمتي ډالۍ ورته ونه موندله.

د هند په نامه د خواله رسنیو یوې کارنې لیکلي، "د اس دا ډالۍ به دې زوم ته د واده او خوښۍ له تالار بهر ورکړی و یا دا چې د اس پر ځای به دې پیسې ورکړې وې".

الچاپو بیا لیکلي، له اس سره مې زښت ډېره مینه ده، ایا پوهېږئ چې د یوه اصیل عربي اس بیه تر ۷۰ زره کویتي دیناره اوړي؟