طالبان: بدخشان کې نادرکه الوتکه موندل شوې؛ "د پيلوټ په ګډون څلور کسان ژوندي دي"

د افغانستان په شمال ختیځ بدخشان ولایت کې له تېرې شپې د نادرکه شوې بهرنۍ الوتکې په اړه نور جزیات خپاره شوي دي.

د طالبانو ویاند ذبیح الله مجاهد وايي د دوی څيړونکې ډلې نادرکه الوتکه د بدخشان د کوف آب ولسوالی د ارز کوه پدېو سیمه کې پيدا کړې ده.

هغه پر اېکس خواله رسنۍ یوه پیغام کې لیکلي "د معلوماتو په اساس د پيلوټ په شمول څلور کسان ژوندي دي."

وړاندې ویل شوي وو چې په دې الوتکه کې شپږ تنو سفر کاوه.

طالبانو ویلي د څيړونکي ټیم لخوا چې سیمې ته یې ځانونه رسولي د پاتې کسانو لټون او د مرستې عملیات روان دي.

تر دې دمه لا د دې الوتکې کره پېژندګلوي نه ده شوې.

ځايي طالب چارواکو پیل کې دا الوتکه هندۍ بللې وه، خو هند په دې تړاو د لومړنیو خبرونو له خپرېدو سملاسي وروسته دا خبر رد کړ.

د هند د هوايي چلند وزارت پر خپله اېکس پاڼه لیکلي "په افغانستان کې رالوېدلې الوتکه نه د هند لخوا په مهالوېش کې نېول شوې رسمي الوتکه ده او نه هم د هند کومه چارټر الوتکه."

وزارت زیاته کړې "دا د مراکش راجستر شوې کوچنۍ الوتکه ده."

په بدخشان کې د ځايي طالب چارواکو د معلوماتو له مخې دا الوتکه د دغه ولایت د کران و منجان او زیباک ولسوالیو اړوند په توپخانې غره کې غورځيدلې ده.

طالب چارواکو ویلي سیمې ته یې ټيمونه استولي او نور جزیات به وروسته شریک کړي.

په ورته مهال د روسیې د هوایي چلند سازمان د دې الوتکې په اړه معلومات خپاره کړې او په وینا یې "دا الوتکه له هنده مسکو ته روانه وه چې تېره شپه د افغانستان په فضا کې له راداره وتلې."

ځینو روسي رسنیو دا چارټر امبولانس ډوله کوچنۍ الوتکه بللې او وايې د هند له ګیا څخه د ازبکستان له لارې مسکو ته روانه وه چې د افغانستان په فضا کې نادرکه شوه.

د طالبانو حکومت ویاند ذبیح الله مجاهد مخکې د اېکس یوه بل پیغام کې دا RA-09011 ډوله روسۍالوتکه بللې.

هغه پر خپله اېکس پاڼه لیکلي "تیر ماښام د روسیې اړوند RA-09011 الوتکه، چې له هند څخه یې د ازبکستان په مقصد الوتنه کوله د افغانستان او تاجکستان پولې ته څېرمه له راداره وتلې ده"

نوموړی زیاتوي "د هوايي ځواک اړوند د ژغورنې ټیمونه سیمه کې په پلټنو بوخت دي."

رپوټونو کې راغلي چې د غورځېدو پر مهال په دې الوتکه کې د څلور عملې او دوو مساپرو په ګډون ټولټال شپږ کسان سپاره وو.

ځينو طالب چارواکو بي بي سي ته وویل د جزیاتو له موندلو او کره والي وروسته به د دوی د بهرنیو چارو وزارت د الوتکې او د لوېدو د څرنګوالي په اړه یې رسمي معلومات خپاره کړي.

د جمهوریت له سقوط وروسته د افغانستان له فضا ډېرې نړیوالې الوتکې نه تېریږي.

د طالبانو د ټرانسپورټ وزارت ویلي "د دې الوتکې مسير د افغانستان په فضا کې نه وو پلان شوی او په ډېر ګومان تخنيکي ستونزو له کبله له خپل مسيره اوښتې ده."