تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د طالبانو حکومت لومړي وزیر مرستیال د اسماعیل هنیه په جنازه کې ګډون کوي
د طالبانو حکومت د لومړي وزیر سیاسي مرستیال مولوي عبدالکبیر د اسماعیل هنیه د جنازې په مراسمو کې د ګډون لپاره د قطر پلازمېنې دوحې ته تللی دی.
ټاکل شوې د حماس د سیاسي مشر د جنازې مراسم سبا جمعه په قطر کې ترسره شي.
د ارګ ماڼۍ پر خپله اېکس (پخواني ټوېټر) پاڼې د مولوي عبدالکبیر عکسونه خپاره کړي او ویلي یې دي، نوموړی د ایران د نوي ولسمشر مسعود پزشکیان د لوړې په مراسمو کې له ګډون وروسته، د هنیه په جنازې کې د ګډون لپاره دوحې ته خوځېدلی دی.
وړاندې تر دې په افغانستان کې د طالبانو حکومت ویاند ذبیح الله مجاهد د اسماعیل هنیه پر وژنه خواشیني ښوولې وه. ښاغلي مجاهد پر خپله اېکس (پخواني ټوېټر) پاڼه د هغه وژنه یوه ستره ضایعه بللې او پر فلسطین یې د اسرائیلو بریدونه په کلکو ټکو غندلي دي.
د طالبانو حکومت د یوې اعلامیې په خپرولو سره اسماعیل هنیه "یو مسلمان، هوښیار او با تدبیره مشر" بللی او د هغه مړینه یې "د اسلامي امت او جهادي کاروان لپاره یوه ستره ضایعه" بللې ده.
بل خوا د ایران مذهبي مشر ایت الله خامنه ای نن پنجشنبې د تهران په پوهنتون کې د اسماعیل هنیه جنازه وکړه. د هغه تر څنګ د ایران نوی ولسمشر مسعود پزشکیان هم ولاړ و.
د جنازې تر لمانځه وروسته د اسماعیل هنیه او د هغه د ساتونکي تابوت د ازادۍ څلورلارې ته یوړل شول او له هغه ځایه به قطر ته، د خاورو سپارلو لپاره ولېږدول شي. ایران چې د دې برید پړه پر اسرائیلو اچوي، ګواښ کړی، د هغه د وژنې لپاره به په "سختو مجازاتو" غور وکړي. د اسرائیلو مشرانو مخامخ د پېښې په اړه تبصره نه ده کړې، خو د اسرائیلو لومړي وزیر بنیامین نتنیاهو وویل چې "ننګونکې ورځې" په مخ کې دي.
د فلسطیني سیاستوال او د حماس د سیاسي دفتر مشر اسماعیل هنیه وژنې ته په نړیواله کچه غبرګونونه ښودل شوي دي. نوموړی د چهارشنبې په ورځ په تهران کې د استوګنې په ځای کې وژل شوی دی.