د الیکسي نوالنې کورنۍ ته ویل شوي، تر دوو اونیو پورې مړی نه ورته سپارل کېږي

رپوټونه وايي، د پوتین منتقد الیکسي نوالنې چې د روسیې زندان کې مړ شو جسد به تر دوو اونیو پورې کورنۍ ته نه سپارل کېږي.

د نوالنې یوه استازي ویلي، د الیکسي نوالنې ته ویل شوي، چې د ''کیمیاوي څېړنو'' لپاره د هغه مړي سپارلو چاره ځنډول شوې ده.

روسي چارواکو تر اوسه نه ده تائید کړې، چې د نوموړي مړی چېرې ساتل شوی دی. د الیکسي نوالنې کونډه بیا پر روسي چارواکو تور پورې کوي، چې د مېړه مړی یې چارواکو پټ ساتلی دی.

پر دوشنبه یوه ویډیويي پیغام کې یولیا نوالنایا ژمنه وکړه، چې د ''خپلواکې روسیې'' لپاره به مبارزه کوي او د خپل مېړه د وژنې تور یې مخامخ پر ولسمشر ولادیمیر پوتین ولګاوه.

هغې دغه راز وویل، د الیکسي مړی ځکه پټ ساتل کېږي، چې په وینا یې په همدې موده کې به د نويچوک نومي زهرو اغېز له منځه لاړ شي. نوالنې ته په ۲۰۲۰ کال همدا ډول زهر ورکړل شوي وو، چې ژوندی پاتې شوی و.

نوموړې په داسې حال کې چې د غم او غوسې له کبله یې غږ لړزیده په خپل ویډیويي پیغام کې لیدونکو وغوښتل چې ''د هغو پر ضد چې زموږ راتلونکی یې وژلی غوسه او کرکه'' ورسره شریک کړي.

په زندان کې د نوالنې مړینه د جمعې پر ورځ اعلان شوه. په سایبریا کې د زندان مسوولینو ویلي و، له پلي ګرځېدو وروسته نوموړی بې هوښه شو او بیا په هوښ رانغی.

د نوالنې مور او وکیل د هغه د مړینې له اعلان سملاسي وروسته سایبریا ته روان شوي وو. ځايي چارواکو بیا د هغه مړي موندلو هڅې پرلپسې بندې کړې. پر دوشنبه بیا د روسیې ولسمشرۍ ماڼۍ (کریمیلین) مسوولینو وویل، د الیکسي نوالنې د مړینې په تړاو تحقیقات روان دي او په وینا یې تر اوسه پورې یې ''هېڅ پایلې مخې ته نه دي راغلې.''

وروسته د الیکسي نوالنې ویاندې کیرا یارمېش وویل، پلټونکو د نوالنې مور لیودمیلا ته ویلي، چې ''کیمیاوي څېړنې'' دوې اونۍ وخت نیسي او تر هغو پورې به یې مړی دوی ته نه سپارل کېږي.