د طالبانو حکومت سوداګرۍ وزارت وايي افغانستان تېر یو کال د نږدې ۲ میلیارد ډالرو په ارزښت صادرات درلودل

د طالبانو په حکومت کې د صنعت او سوداګرۍ وزارت وايي د ګاونډ او سیمې له هېوادونو سره سوداګري په پراخېدو ده.

د دغه وزارت چارواکو ویلي تېر یوه کال کې د سوداګرۍ کچه لس میلیارد ډالرو ته رسېدلې چې د شاوخوا یو اعشاریه اته میلیارد ډالر په ارزښت په پکې صادرات او اته اعشاریه دوه میلیارد ډالرو په ارزښت واردات دي.

له دغو ارقامو ښکاري چې د افغانستان د صادراتو او وارداتو ترمنځ توپیر لا هم پام زیات او واردات د صادراتو پرتله څو برابره لوړ دي.

سوداګر او د اقتصادي چارو شنونکي وايي د هېواد صنعتي کېدل د وارداتو او صادراتو بیلانس برابرولی شي.

د صنعت او سوداګرۍ وزارت چارواکو د طالبانو حکومت د ادارو د یو کلنو لاسته راوړنو د تشریح په پروګرام کې چې دوی یې ملت ته د حساب ورکولو پروسه هم ګڼي، وویل، چې بهرنیو بازارونو ته افغان تولیداتو د لارموندلو لپاره یې په کور دننه او بهر ګڼ نندارتونونه جوړ کړي دي.

دوی زیاته کړه چې په تېر یوه کال کې د افغانستان د صادراتو کچه لوړه شوې او یو شمېر افغاني محصولات پر ګاونډیو هېوادونو سربېره د ترکیې او ځینو اروپايي هېوادونو بازارونو ته رسېدلي دي.

دا ناسته د حکومت د اطلاعاتو او رسنیو په مرکز کې جوړه شوې او د تېر یوه کال لاسته لاوړنو په تړاو د طالبانو حکومت د ادارو لخوا ملت ته د حساب ورکولو د لړۍ لومړۍ غونډه وه.

د صنعت او سوداګرۍ وزارت ویاند آخندزاده عبدالسلام جواد دلته وویل: "په تېر کال کې د افغانستان د سوداګرۍ کچه شاوخوا ۱۰ میلیارد ډالرو ته رسېدلې چې له دې ۱.۸ میلیارډه صادرات او څه باندې ۸ میلیارډه واردات دي. وړم کال افغانستان د ۵۰۰ میلیون ډالرو په ارزښت د ډبرو سکاره صادر کړي وو، خو تېر کال یې د صادراتو کچه ۱۷۴ میلیون ډالرو ته کښته شوې ده. له افغانستان څخه د مالوچو، پیازو، انځرو، کشمشو، زعفران او ګازي څښاکتوکو صادراتو د پام وړ وده کړې ده. "

ښاغلي جواد زیاته کړه، تېر کال روسیې ته د افغانستان د صادراتو کچه ۵۴ سلنه، ترکیې ته ۵۳، ایران ته ۱۹، چین ته ۱۶ او قزاقستان ته ۲ اعشاریه ۵ سلنه لوړه شوې ده.

هغه دا هم وویل چې په دې موده کې د افغانستان د ځان بسیاینې د اقلامو کچه له ۴۸ قلمه څخه ۱۳۳ ته لوړه شوې او د لومړنیو او خوراکي توکو په بیو کې ۲۸ سلنه کمښت راغلی دی.

د سوداګرۍ او صنعت وزارت مرستیال مولوي احمدالله زاهد هم وویل چې د خصوصي سکټور ملاتړ ته یې په خپلو لومړیتونو کې ځای ورکړی دی.

هغه زیاته کړه، په تېر یوه کال کې یې د سوداګریزو آساتنیاوو او ټرانزیټ په برخه کې د سیمې او له نورو هېوادونو سره ۱۰ بېلابېل هوکړه لیکونه نهايي کړي دي.

هغه وویل په دې موده کې ۱۰۰ فابریکې پرانیستل شوې او تر ۱۰۰۰ ډېرو تولیدي او صنعتي شرکتونو ته د کار جوازونه ورکړل شوي دي.

د طالبانو حکومت د صنعت او سوداګرۍ وزارت چارواکو په دغه غونډه کې همداراز د صنعتي پارکونو پراختیا، د نویو صنعتي پارکونو، ځانګړو اقتصادي زونونو او د صادراتو د پروسس زونونو رغول، د کورنیو تولیداتو او محصولاتو معیاري کول، پر وارداتي اقلامو د کیفي معیارونو وضع کول او له ګاونډیو، سیمې او نړۍ هېوادونو سره د سوداګریزو اړیکو پیاوړتیا، خپل راتلونکي پلانونه یاد کړي دي.