تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
ټکزاس کې هوايي ننداره؛ د دویمې نړیوالې جګړې د مهال الوتکې هوا کې ټکر شوې
د امریکا ټکزاس ایالت کې د دویمې نړیوالې جګړې د مهال دوه پخوانۍ الوتکې د یوې نندارې پر مهال هوا کې له جنګېدو وروسته را پرېوتې.
ویډیوګانو کې ښکاري چې دا الوتکې په ټیټه ارتفاع الوتنې کوي، تر جنګېدو وروسته یوه په منځ نیمېږي او د اور غونډوسکې په څېر ځمکې ته راپرېوځي.
دا ننداره دالاس ښار ته نږدې د پخوانیو سرتېرو په یاد جوړه شوې وه.
په جنګېدلو الوتکو کې یوه بوینګ 'بي-۱۷ فلاینګ فورترېس' او بله 'پي-۶۳ کېنګ کوبرا' الوتکه ده.
دمګړۍ مالومه نه ده چې په دوغو الوتکو کې څو کسان سپاره وو او ایا څوک ترې روغ هم وتلي که څنګه.
امریکا کې د هوايي چلن فدرال اداره وايي د دې پېښې په تړاو څېړنې کوي.
د پخوانیو سرتېرو ورځ په درناوي جمعه د دې پیل شوې درې ورځنۍ نندارې مسوولان وايي چې دا امریکا کې د دویمې نړیوالې جګړې په یاد لومړنۍ هوايي ننداره ده.
ویل کېږي له ۴ تر ۶ زره پورې کسان د دې نندارې لیدو ته ورغلي وو.
د دالاس ښاروال اېرک جانسن دا پېښه یوه 'وحشتناکه غمیزه' بللې.
هغه د ټویټ یوه پیغام کې لیکلي د پېښې "ویډیوګانې خواشینوونکې دي. لطفا د هغو کسان ارواګانو ته دعا وکړئ چې زموږ د کورنیو د اګاهۍ او ساعت تېرۍ لپاره یې نن الوتکې الوځولې."
ښاغلي اېرک ویلي تر اوسه د مرګژوبلې شمېر تایید نه دی، خو پر ځمکه چا ته د زیان اوښتلو راپور نشته.
د دې نندارې اړوندې ویب پاڼې لیکلي چې د شنبې پر ورځ د بېلابېلو پخوانیو الوتکو الوتنې پلان شوې وې.
بي-۱۷ بم غورځونکو دویمه نړیواله جګړه کې پر جرمني بریا کې ستر رول درلود.
'پي-۶۳ کېنګ کوبرا' هم د دویمې نړیوالې جګړې د مهال الوتکې دي. خو دا الوتکې یوازې د شوروي اتحاد هوايي ځواک لخوا کارول کېدې.