د کورونا وبا له پیل وروسته، چین ته له کابله مخامخ لومړۍ الوتنه
د عکس سرچینه، ARIANA AFGHAN AIRLINES
په کابل کې د طالبانو د حکومت چارواکي وايي، د کورونا وبا له پیل را وروسته په لومړي ځل د چین اورمچي ښار ته له کابله د اریانا افغان هوايي شرکت الوتنې پیل شوې.
د کابل هوايي ډګر یو چارواکی چې نه یې غوښتل نوم یې واخیستل شي، بي بي سي پښتو ته وویل، په لومړي پرواز کې لس مسافر تللي دي.
خو د دغې سرچینې په وینا وروسته به هره اوونۍ له کابله یو پرواز کېږي چې د سپرلیو تر څنګ توکي هم لېږدوي.
کابل هوايي ډګر کې د همدې لومړي پرواز لپاره ځانګړي مراسم هم جوړ شوي و چې د طالبانو د ځینو چارواکو په ګډون سوداګر هم ورغلي وو.
د طالبانو ټرانسپورټ او هوايي چلند وزارت وايي، تمه لري د چین او کابل ترمنځ د الوتنو بیا پیل "د سوداګریزې راکړې ورکړې لپاره مرسته وکړي."
پر همدې مهال، پرون د طالبانو حکومت د بهرنیو چارو وزارت ویاند عبدالقهار بلخي ویلي و، چې امیرخان متقي او په کابل کې د چین د سفیر وانګ یو په یوه ناسته کې د دواړو هېوادونو د اړیکو پر پیاوړتیا خبرې کړې دي.
افغانستان کې د چین لیوالتیا
ښاغلي بلخي د دغې لیدنې په اړه پخپلو پرلپسې ټويټونه کې د ښاغلي "یو" له خولې زیاته کړې، چین لېوال دی چې له افغانستانه په ځانګړي ډول د انارو صادرات ډېر کړي.
د سرچینې د معلوماتو له مخې، ښاغلي یو همدا ډول د لوګر د میس عینک کان استخراج ابتدايي چارو، د جمهوریت روغتون د بیارغونې او په افغانستان کې د ارزان بیه کورونو د پروژې پرانیستلو خبره هم کړې ده.
په افغانستان کې د طالبانو حکومت د بهرنیو چارو وزیر امیر خان متقي په لیدنه کې له چینايي لوري افغانانو ته د ویزو د اسانولو غوښتنه کړې ده.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 1
چین د ګوته په شمېر هغو هېوادونو له ډلې دی چې دمګړۍ په کابل کې سفیر لري او د طالبانو له حکومت سره نږدې اړیکې لري.
تېره ورځ له امیر خان متقي تر لیدنې وړاندې ښاغلي "یو" د طالبانو حکومت د کورنیو چارو له وزیر سراج الدین حقاني سره هم لیدلي و.
د طالبانو د کورنیو چارو وزارت د ښاغلي "یو" له خولي ویلي چې هېواد یې په افغانستان کې د فشار، بندیزونو او لاسوهنې له سیاست سره مخالف دی.
چینايي لوري تر اوسه د دغو دواړو لیدنو په اړه څه نه دي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 2
دوی معمولا په افغانستان کې د طالبانو حکومت له چارواکو سره د لیدنو کتنو په اړه کم جزییات خپروي.
د افغانستان یو شمېر ګاونډي، لوېدیځ او ان یو شمېر اسلامي هېوادونه په افغانستان کې پر ټولګډوني حکومت او افغانانو ته د ازادۍ او بنسټیزو حقونو د ورکولو غوښته کوي، خو چین د نورو هېوادونو په چارو کې د نه لاسوهنې پر سیاست ټینګار کوي.
د چین او طالبانو حکومت اړیکې د بېجینګ له نظره تر ډېره پر امنیتي او د کابل له نظره تر ډېره پر سیاسي – اقتصادي محور را څرخي.
د شنونکو په باور، چین د سنکیانګ سیمې د سختدریځو اسلامپالو د کنټرولولو لپاره په افغانستان کې د طالبانو حکومت مرستې ته اړتیا لري او په افغانستان کې د طالبانو حکومت بیا د چین سیاسي ملاتړ او په بېلابېلو برخو کې پانګونې ته لېوال دی.
