لندن کې د افغان ښځو له خوا جوړ شوی نندارتون
د جمعې پر ورځ د اکتوبر په ۲۷تمه لندن د افغانو ښځو له خوا جوړ شوي نندارتون کوربه و.
یاد نندارتون کې افغاني جامې، ګاڼې او نور هغه توکي نندارې ته ایښودل شوي و چې د افغانو ښځو په لاس جوړ شوي و.
دغه نندارتون کې د افغانو سوداګرو ښځو سربېره ګڼو نورو ښځو هم ګډون کړی و.
د نندارتون جوړوونکې ښځې وايي، له داسې نندارتونونو د جوړولو موخه یې افغاني کلتور سره د خلکو بلدول، افغاني تولیداتو ته بازار موندنه او افغانو ښځو ته د کاري فرصتونو برابرول دي.
افغانو سوداګرو ښځو بي بي سي ته ویلي، غواړي له دې لارې افغانستان کې او له هېواده بهر افغانې ښځې د افغاني تولیداتو کار و بار او سوداګرۍ ته وهڅوي.
وروسیتو کې بهر کې د افغاني توکو کار و بار ډېر شوی او ګڼ افغانان یې بهر کې په ځانګړې مناسبتونو کې اغوندي.
دغه نندارتون کې د نورو افغاني توکو تر څنګ چمبه (دایره) هم نندارې ته ایښودل شوې وه.
