د طالبانو حکومت فراه کې د بخش اباد بند د جوړولو چاري بیا پیل کړې

افغانستان کې د طالبانو حکومت وايي، د فراه ولایت د بخش اباد بند کارونه چې ولاړ وو، بیرته پیل کړي دي.

دغه خبر د طالبانو په حکومت کې د اطلاعاتو او کلتور وزارت مرستیال مهاجر فراهي په خپله ټویټر پاڼه خپور کړی چې په وینا یې د دغه بند کارونه به نن د ده په ټکو، د پرتمینو مراسمو په ترڅ کې پيل شي.

د بخش اباد بند د جوړولو کار له پخوا روان دی خو لومړی ځل دی چې طالبان یي په داسې وخت کې د کار د چټکولو خبره کوي چې له ایران سره یې د هېلمند سیند د اوبو پر سر ناندریو زور اخېستی.

په دې لړ کې تازه د افغانستان لپاره د ایران چارسمبالي سفیر حسن کاظمي قمي ویلي چې که ثابته شي چې طالبان ایران ته د اوبو خپل حق نه ورکوي، نو په وینا یې، باید ځواب یې ووایي.

د ایران رسمي خبري اژانس ایرنا د ښاغلي قمي له قوله وايي، چې ''ایران د بل هر هېواد پرتله افغانانو ته خدمت کړی، خو په وینا یې پروسږ کال تېر کال د طالبانو وینا برعکس نژدې دوه میلیارده مکعبه اوبه ګودرزرې ته بهیدلې دي.''

د ایرنا په رپوټ کې د ښاغلي قمي له قوله زیاته شوې: ''د طالبانو مسلکي کسان وايي، چې د وخت له تېرېدو سره په کمال خان بند کې شپیته سلنه اوبه کمې شوې دي، خو موږ وایو چې زموږ کارپوهان باید د بند له لیدو وروسته د دې خبرې واقعیت وګوري.''

د ښاغلي قمي په خبره هر وخت چې زموږ کارپوهان افغانستان ته لاړ شي، هغه وخت کولای شو، یوه تګلاره وړاندې کړو، او په غوڅ ډول تګلارې ولرو.

د یادونې ده، چې له دې مخکې د ایران بهرنیو چارو وزارت چارواکو هم ویلي، ایران ته د افغانستان هلمند سیند کې د حقابې موضوع کې د طالبانو حکومت دریځ تر هغه ورته "د منلو نه او غیر حقوقي دي" چې تر څو د دوی کارپوهانو پخپله دا "رښتیا" مالوم کړي‌ نه وي.

د افغانستان او ایران تر منځ د اوبو پر سر د راپورته شویو ناندریو په ترڅ کې ایراني چارواکي دا تازه څرګندونې د طالبانو حکومت تر یوې اعلامیې او له بي بي سي سره د اوبو او انرژۍ وزیر مرکې وروسته کوي، چې وايي، د وچکالۍ له کبله د کمال خان بند اوبه کمې دي او ایران ته د ورپرېښودو نه دي. همدا راز یې په خبرپاڼه کې وضاحت ورکړی چې د کجکي بند اوبه هم دومره کمې دي، که پرې یې هم ږدي نو تر ایران به ونه رسېږي.شو.

د افغانستان مخکیني حکومت په فراه ولایت کې پر فراه رود سیند نژدې ۱۳ کاله مخکې د بخش اباد بند چارو په تړاو لومړي له یوه پاکستاني او بیا وروسته ۲۰۱۶ کال کې له یوه ایټالیايي او یوه افغان شرکت سره تړون وکړ.

دغه بند د ۲۷ میګاواټه برېښنا تولید ته زمینه برابروي او له سلو زرو هکتارو ډېره ځکمه خړوبولی شي.