تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
یوناما: د طالبانو له بیا واکمنېدو راهیسې افغانستان کې ژورنالستانو سره د زورزیاتي له ۲۰۰ ډېرې پېښې ثبت شوې
افغانستان کې د ملګرو ملتونو د مرستندویه ماموریت دفتر (یوناما) وايي چې د ۲۰۲۱ کال له اګست (د طالبانو له بیا واکمنېدو راهیسې) افغانستان کې ورسره د ژورنالیستانو له حقونو د سرغړونو له ۲۰۰ ډېرې پېښې ثبت شوې دي.
یوناما دا خبره نن چارشنبه د نومبر ۲یمه د ژورنالیستانو پر وړاندې د جرمونو د معافیت پایته رسېدو نړیوالې ورځې په مناسبت کړې ده.
دغه دفتر پر خپل ټویټر لیکلي د دوی لخوا ژورنالیستانو سره د زور زیاتي په دغو ثبت شویو پېښو کې "خپلسرې نیونې، ناوړه چلند، ګواښل او ډارول شامل دي."
د ملګرو ملتونو سیاسي استازولي زیاتوي چې "په افغانستان کې رسنۍ په خطر کې دي" او دا چې د "زور زیاتی او د معافیت دغه کلتور باید پای ته ورسیږي."
یوناما خپله اعلامیه کې مشخصآ دا نه دي ویلي چې افغانستان کې له ژورنالیستانو سره د تاوتریخوالي دغو پېښو کې څوک ښکېل دي خو ظاهرآ یې اشاره واکمن حکومت او چارواکو ته ده.
د یادونې ده چې تر دغه خبر یوه ورځ وړاندې افغانستان کې د "کابل نیوز" په نوم د یوه ځايي تلویزون د نشراتو د بندېدو خبر ورکړ شوی و.
د افغانستان د ازادو خبریالانو د ټولنې اجراییوي مشر حجت الله مجددي بي بي سي ته د دغه تلویزون د مسوولانو په حواله ویلي چې کابل نیوز د مالي او اقتصادي ستونزو ترڅنګ له "ځینو نورو ستونزو" سره هم مخ و.
ښاغلي مجددي له واکمنو چارواکو وغوښتل چې رسنیو ته د کار خوندي فضا برابره او د نیوکو پر وړاندې سینه پراخه کړي.
هغه زیاته کړې چې رسنې نیوکې د اصلاحاتو لپاره کوي او نیوکې یې د زیان پر ځای ګټې لري.
د یادونې ده چې پر افغانستان د طالبانو له بیا واکمنېدو راهیسې دغه هېواد کې شاوخوا ۴۰ سلنه رسنۍ تړل شوي او د رسنیو ۸۰ سلنه کارکونکي بې روزګاره شوي دي.
د ملګرو ملتونو ملتونو سرمنشي انتونیو ګوتېرش هم خبریالانو سره د تاوتریخوالي د جرمونو د پای ته رسېدو د ورځ په تړاو د نړۍ پر هېوادونو غږ کړی چې د خبریالانو ترڅنګ ودرېږي او د قانون په تطبیق سره رسنیو او خبریالانو پر وړاندې د تاوتریخوالي د مخنیوي اراده ښکاره کړي.
هغه د ټویټر یوه پیغام کې لیکلي چې یوازې روان کال ۷۰ ژورنالیستان د خپل کار له کبله وژل شوي، خو د دغو ډېرو وژنو پېښې نه دي څېړل شوي.
ښاغلي ګوتېرش زیاته کړې چې "باید له مجازاتو د معافیت فرهنګ پای ته ورسوو او خبریالانو ته دا وړتیا وبښو چې خپل بنسټیز کارونه ترسره کړي."
ملګري ملتونه وايي له خبریالانو سره د زور زیاتي پېښو له مجازاتو معافیت د لا ډېرو جرمنو او سرغړونو لامل ګرځي.