د حکومت د رسنیو مرکز مشر دوا خان مینه پال د وسلوالو طالبانو برید کې ترور شو

د افغانستان د حکومت د رسنیو مرکز مشر دوا خان مینه پال د جمعې په ورځ (د اګسټ ۶) په کابل ښار کې ترور شو. د کابل د پولیسو ویاند فردوس فرامرز د نوموړي ترور تاییدوي او وايي، نوموړی دارالامان ماڼۍ ته څېرمه وژل شوی دی.

د کورنیو چارو وزارت ویاند میرویس ستانکزی هم د نوموړي ترور تايیدوي او وايي، "دواخان مینه پال ترهګریز برید کې وژل شوی دی."

د نوموړي په ترور د ننګرهار والي او د ولسمشر سلاکار ضیاءالحق امرخېل هم خواشیني ښودلې ده.

وسلوال طالبان وايي، د دوی د وسلوالو ځانګړې ډلې دوا خان مینه پال وژلی دی.

دواخان مینه پال له څو میاشتو راهیسې د حکومت د رسنیو مرکز مشر او تر هغه مخکې د افغان ولسمشر مرستیال ویاند و.

د تېرې ولسي جرګې ټاکنو پرمهال دواخان مینه پال د ولسمشرۍ ماڼۍ له ویاندۍ تېر او دې ټاکنو ته د کوچیانو په استازۍ ودرېد، خو جرګې ته بریالی نه شو.

دوا خان مینه پال تر دې مخکې د افغانستان د عامه کتابتون مشر او په زابل کې د څو کلونو لپاره د اطلاعاتو کلتور ریس هم پاتې شوی وو.

هغه یو وخت د افغانستان په سوېلي ولایتونو په تېره کندهار کې د ازادۍ راډیو خبریال هم و.

نوموړی د کابل پوهنتون له حقوقو پوهنځي فارغ او شاعري او لیکوالي یې هم کوله ''

غبرګونونه

د افغانستان ملي روغې جوړې د عالي شورا مشر عبدالله عبدالله د ښاغلي مینه پال وژنه غندلي او په یوه پیغام کې وايي:

''دا بزدلانه، ناروا او ترهګریز برید په سختو ټکو غندم. باوري یم چې د دې جنایت عاملان به د خپلې بې رحمۍ، قساوت او افغان وژنې بیه پرې کړي. د افغانستان خلک به ترهګرۍ او وېرې اچوونې ته تسلیم نه شي. ''

د افغانستان کورنیو چارو وزارت په یوه پیغام کې د ښاغلي مینه پال وژل کېدلو پېښه سخته غندلې ده. په پیغام کې ویل شوي:

''په ژورې خواشینۍ سره ترهګرو نن د کابل ښار په اوومه حوزه کې د حکومت د اطلاعاتو او رسنیو مرکز مشر دواخان مینه پال شهید کړ. شهید دواخان مینه پال پر هېواد میین او مبارز ځوان و، چې د جمعې د لمانځه پر مهال عثمان غني جومات ته څېرمه د ترهګرو لخوا په ډزو شهید کړل شوی دی.

په کابل کې د امریکا سفارت شارژدافير راس ویلسن په یوه ټویټر پیغام کې وايي: '' موږ د دوا خان مینه پال پر وژل کېدو خواشیني شوي یو، یو داسې ملګری او همکار چې دنده یې د افغانستان په هکله ټولو افغانانو ته د رښتیني معلوماتو پر ورکولو متمرکزه وه. دا وژنه د افغانانو د بیان ازادي او بشري حقونو ته سپکاوی دی. ''

کاناډا هم د دوا خان مینه پال وژل کېدل په کلکو ټکو غندلي. په کابل کې د کاناډا سفارت په یوه ټویټ کې ویلي دوا خان مینه پال په افغانستان کې د وینا د ازادۍ، معلوماتو ته د لاسرسي او د بشري حقونو د خوندیتابه لپاره ټینګ ولاړ و.

سیاستوال او په پاکستان کې د بشري حقونو فعال افراسیاب خټک د ښاغلي مینه پال د وژل کېدو په هکله یوه ټویټر پیغاکې وايي، ''افغانستان یوه داسې جګړه کې له ځانه دفاع کوي چې د ډله ییزې وژنې، د ملي مفکرینو له منځه وړلو، کتابتونونو، ارشیفونو، ملي یادګارونو سوځولو او دولت او ملي هویت له منځه وړلو ټول توکي پکې شامل دي او مینه پال د دې هر څه مخنیوي لپاره ولاړ و. ''

د پاکستان پارلمان غړي او د پښتون ژغورنې غورځنګ یوه مشر محسن دوړ د ښاغلي مینه پال وژنې په تړاو ژوره اندېښنه څرګنده کړي او په وینا یې د دې وژنې مسوولیت د طالبانو او د دوی د د ملاتړو پر غاړه دی.